Philippians 3 - New Testament-et Akuzipigestun

Yugulisighpigaq

¹ Ugpeqaalgutemni, naangniitkun ungipaasuwamsi, “Quyamaaqitek Ataneghqun!” Qinuyagusigatunga ungipaanneqiggnemsi latatgun igaqegkamneng sivunghani, enkaam ilallequq paqniitelleghpesinun.

² Kelengalusi seghletun pikayugneng, tamaakuneng qikmineng, yuguut sagiqutilghiit kepfikesqelluki yugusit.

³ Whangkutanguukut ugpeqani circumcise‑epiiwaaqani qayughllak manigughaqaghput Kiyaghneq Taghneghagkenkun, usuqaqaghputlu Christ Jesus. Neghyungigatukutlu Kiyaghneghmun piliitesqelluta whangkuta katam sallemteggun.

⁴ Kina alngunak Kiyaghneghem piliisaghqaqsaqagu ellngan katam sallghakun, whanga piyaghqaayaghtunga. Yuget tawaten piyaghqaayaqata whanga wataqaaghaq pinayaghtunga ukut apalluqluki:

⁵ Circumcise‑ekaqaatnga pingayuneng inglulek aghneq atughyamkun kingunganeng allgelleghma. Israel‑eghmiineng pinguunga, ramkenganeng Benjamin‑em. Hebrew‑piiguunga, angayuqagkallu Hebrew‑nguuk. Malighqutaqngaghllagtunga Jewish‑et Liilightuusiitnun, tamaaken apalluqluku Pharisee‑ngughtunga.

⁶ Sagiqepigllunga amyuqetaatkegkaqanka ugpeqat. Qaatkengngwaaqaqanka Jews‑et Liilightuusiit repall anaggutelleghmun avutngitkaagunga.

⁷ Iwernga tamaakut allgeghtekaqnikaqsaqenka iflamaanka apalluqluku Christ‑a.

⁸ Ipa sangwaat qamaglluki iflamaanka apalluqluku megnunaghtulnga liitngwaallemneng Christ Jesus, Atanqa. Ellnga apalluqluku sangwaat qamaglluki egsimaanka. Esghaghanka mallastun ayuqluki allgeghteqeghnaluku Christ‑a,

⁹ ilatngwaaghtungallu ellnganun. Ugpeqnaniimaaqa whangamneng pinighnaqelleq qaatkutellemkun Kiyaghneghem Liilightuusaanun. Yeghlegi liisimakaqa Kiyaghneghem pinightestaqaanga qayughllak ugpeqegkegka Christ‑a. Una pinilleq Kiyaghneghmeng ayuquq, yuget allgeghtaqaat ugpeqilleghmegteggun Christ‑ameng.

¹⁰ Piyukelleghllakaqa, liinnaluku Christ‑a, nanghiighnalukullu aghtughyaghqaanghillgha unguvaghtellghan; ilannalungallu ikfiqellghanun, ellngatunllu lliighyaghqaalunga tuqullghani.

¹¹ Tawaten pikuma, Kiyaghneq sighimakaqa whangallu unguvaghtesqellunga tuqulleghmeng.

Ketanqustestun Ayuqunga Kenlemun Kaasuwhaaghyugllak

¹² Whaten pingunghitunga, “Christ‑atun lliighumaanga nalighmeng Christ‑atun kiyaghtaqunga quunpeng.” Iwernga pinaqellghaqa qamaglluku atuqngwaaqa Christ‑am piyukellghatun lliighnalunga atuqnalukullu pisqesullgha whangamnun.

¹³ Ugpeqaalgutemni, sumeghtaghiigatunga kayaalqelghagtuumaniluku. Iwernga ataasiq piiqaqa, puyguluku sangwaa tunutemnilnguq sivutmiighnaqutkaqunga kaannaluku sangwaa sivumnilnguq.

¹⁴ Enkaam taklaghruketun kilgaaqunguunga kayaalqiisiqnaluku akileghtuusaq, Kiyaghneghem tuqluutkaanun pamavek Christ Jesus‑kun.

¹⁵ Tawaten sumeghtaghanghilkufsi, Kiyaghneghem liigikesnaaghii sumeghtaghallesi anaggutngalghiit.

¹⁶ Una megnunapigtuq, nagneghutelteki kiyaghtaalleput maliglluku ipapighqelleq liitkaghput.

¹⁷ Ugpeqaalgutemni, usputaqlunga maligtengnga. Esghapagluki ilangillu kiyaghlleghhiit whangamtun.

¹⁸ Sivunghani uglaghngaan ungipaataataqaqamsi, maaten ungipaannaqlaataghamsi qunituumaghma. Uglaapigtut kiyaghlleghhiit anguyaguluteng Christ‑am tuqullghaneng qaquurakun.

¹⁹ Suumqaqiit yugusimeng piyukellghit kiyang, Kiyaghneq avelghaghluku. Kaynguyugusighqaqsaqeteng aangaayugusiqaqiit. Sumeghtaghaatkaqaat nunamelngughhiinaq kiyaghtaalleghteng enkaam naafqellengyaghqaagut hell‑mi.

²⁰ Iwernga ugpeqani whangkuta qilagmiinguukut. Enkaam utaqangwaaghput yugulighista, Ataneq Jesus Christ‑a, ukigyaghqaq whangkunnun qilagmeng pamaken.

²¹ Tagikumi allangughsaghqaqii kayaalnguut, tuqumun ayuqelghiit yugusiput. Unguvaghtekatun yugusimitun lliighsaghqaqii aghtughyaghqaanghilleghmikun. Taaggun ataasikun aghtughyaghqaanghilleghqun igleghusaghqaaghlleqaa sangwaa qamagtengngwaaghluku.