Philippians 2 - New Testament-et Akuzipigestun

Christ‑am Qusevegngallghallu Aangellghallu

¹ Kiyaghtaalleghpesi Christ‑akun iknaqughtisii? Piniqellghan ilutughtisii? Quyaaqetsii ataasistun lliilghiisi ugpeqaalgutkullghiini Agleghnalghiignekun Taghneghagnekun? Pinitun piiqestekii, nangllekaqestekii ilasi?

² Tawatetngukufsi, quyamasteghllagtengnga piniqutelleghpesigun, ataasistun sumeghtaghalleghpesigun, ataasistun pilleghpesigun.

³ Ellnginaayugneghugpenasi, aangaayugneghugpenasi. Yeghlegi qusevgutullusi, ilagpesineng pinighataghaghnilusi sumeghtaghaghpenasi.

⁴ Suumqegpenaki piyukellghiinasi, yeghlegi piyukellesi pakikaghluki kayusiitaqluki ilasi.

⁵ Sumeghnesi Christ Jesus‑em sumeghneghatun ayuqlit.

⁶ Jesus Kiyaghneghtun ayuqsaghngaaghmi sumeghtaghaamangituq Kiyaghneq ingluksaghqaaluku.

⁷ Yeghlegi Kiyaghneghulleni pakigluku, qepghaghtestun lliiqaaguq. Yugestun lliiqaaguq, allgeqaaguqlu yugestun.

⁸ Yugughsami qusevegtekaaguq enkaam qaatkutkaaguq tuqulleghmun, talwa tuqukaaguq qaquurakun.

⁹ Tamaaken apalluqluku Kiyaghneghem nekegtekaqaa Jesus aangelleghpigaaluku, atiqaqaallu Ataneghmeng aangelleghpigaghmeng ateghyaggaghneng.

^10-11 Enkaangam qamagtengngwaaghluni qilagmelnguum, nunamelnguum, nunam asinganilnguum quulvaghlleqaat Jesus qungughquutelleghmegteggunllu apelleghmegteggunllu, “Jesus Christ‑a Atanghuuq.” Tawaten pilleghmegteggun quulvaghlleqaat Kiyaghneq Ata.

Kuukgutelleq Nighugestun Nunami

¹² Enkaangam piniqegkamni, elpesinillunga qaatkumanginaqaqaghpesinga, maaten aviillemni qaatkataghaghtengnga. Iighwightesqelluku yugulilleghsi qepghaamanginaghtek alingellelighlusillu ungelegtellelighlusillu;

¹³ qayughllak Kiyaghneq quunpeng qepghaaguq elpesini atuqsagutesqelluku piyukelleni, qaatkusagutesqellusillu piyukelleghminun.

¹⁴ Sangwaa tamaghhaan piiqiteggu akuzilgafqaafsi, nalighmeng aaghtiiraaghutefqaafsi.

¹⁵ Enkaam avutngillequsillu pelungillequsillu. Kiyaghneghem avaqutii avutngisaghqaagut kiyaghtengnguluteng akulngitni puughtinghetlu seghleghqestetlu. Kuukgutepestaaghyaghqaagusi ighaleqetaaghestun nunami,

¹⁶ ungipaqingulusi ellngitnun Christ‑ameng unguvallengestikayugmeng. Enkaam taginqigtekan quyasleqaghpesinga elngaatall, qayughllak kiyaghtaalleghpesi kelgusaghqaqaa qepghalqa temngingunghilnguq.

¹⁷ Ugpeqilleghsillu qepghalleghsillu Kiyaghneghmun aghqutestun ayuqut. Tuquskangatnga whani anusimingllaghvigmi quyallequnga, qayughllak tuqulqa aghqutestun ayuqsaghqaaguq tuunelghii elpesi aghqutegpesinun iighwiisiiluni. Taam qamaglluta quyasleqiinkut.

¹⁸ Tawateghpigaq elpesillu quyayaghqaagusi, quyalgusighllagyaghqaqaghpesinga.

Timothy‑nkuk Epaphroditus‑enkuk

¹⁹ Atanghem piyukelqegkagu, Timothy kayagsaghtungestaghaqa elpesinun. Enkaam quyallequnga ungipangegkuma elpesineng.

²⁰ Timothy‑nginaghhaam sumeghtaghaatkaqiisi sumeghtaghaatkellemtun.

²¹ Tamaakut ilangi kiyang ellmeggneng katam sumeghtaghaatkaqut Jesus Christ‑am qepghaqaa avelghaghluku.

²² Iwernga Timothy liisimakngwaaghaghsi natetulanga. Ighneghestun kayuusiitkaqaanga ungipaqingulunga Pinilghiineng Ungipaneng.

²³ Liigikaghesnaqumkun aanesaghqaatka anusimingllaghvigmeng kayaglleqaqa elpesinun.

²⁴ Neghyukaqa Ataneq whangallu elpesinun piyaghtungestaghtunga.

²⁵ Sumeghtaghaatkaqaqa ugpeqaalgutfut Epaphroditus elpesinun uteghnightesnaluku. Kayutkaghqaghyugumalunga tagistekaqegkesi kayusiitesqellunga. Qerngaamtung qepghaqaagukungllu ungipaqikaagukungllu Pinilghiineng Ungipaneng. Nekevghatkaqapungllu Pinilghiit Ungipat kipullginaalghiineng.

²⁶ Aglaghtesnaqaqa elpesinun qayughllak aghyuqnguuq. Pengꞌgaqiisi qayughllak nagaquqaqegkesi qinuyullghaneng.

²⁷ Ipanguuq qinuyugllakaaguq repall tuquvziqaaguq. Iwernga Kiyaghneghem nangllegyagutkaqaa, whangallu nangllegyagutkaqaanga. Tuqumayaqan wataqaaghaq qivghullengataghaghnayaghtunga.

²⁸ Tamaaken apalluqluku wataqaaghaq aglaghtesugaqa elpesinun. Kaaskan esghaqufsigu quyallequsi, enkaangam itagnaghillequnga whangallu.

^29-30 Epaphroditus tuquyaghngaaghmi qepghaqaaguq Christ‑amun, aaqun tuquvziqaaguq. Kayusiitkaqaanga qayughllak elpesi kayusiitepagningitkaqaghpesinga, aviilnguusi. Quyakusiqluku upughannakesi qayughllak anglegutkaghsi Ataneghqun. Enkaam quulvaghluki qamaglluki yuget Epaphroditus‑etun ayuqelghiit.