Philippians 1 - New Testament-et Akuzipigestun

¹ Ukut latat Paul‑mengllu Timothy‑mengllu pinguut, qepghaghtekiinkung Christ Jesus‑em. Lataaqamsi qamagllusi Kiyaghneghem yugitni, yughaghvigem igleghutistengitni, deacon‑enillu Philippi‑melngughni, ugpeqilghiit Christ Jesus‑kun.

² Kiyaghneghem Atamta, Atanemtallu Jesus Christ‑am nanglleklisillu nekeggmellelguslisillu.

Paul‑em Yughaatkegkangi Ugpeqat Philippi‑melnguut

³ Iqamsiqayugvikaqaqa Kiyaghneqa elpesineng sumeghtaghaatkennemsi.

⁴ Yughaatkennemsi quyapigtaqunga,

⁵ qayughllak neqamikaqa ungipaqilgusiqaqaghpesinga Pinilghiineng Ungipaneng. Kayusiqaqaghpesinga ugpeqiyuggaalleghpesineng Pinilghiineng Ungipaneng whavemun kenlanga.

⁶ Liisimakngwaaghaqa Kiyaghneq piinlighikaq pinilghiimeng qepghaqameng ilugpesini, ellngan apeghiighlleqaa Christ Jesus uteghniqan.

⁷ Itagnapigtuq whangamni sumeghtaghaatkennemsi tawaten qayughllak ilumnitaqusi. Ungipaqingulungallu ipapighqingulungallu Pinilghiit Ungipat ipanguniluki, maatenllu anusimingllaghvigmellunga, qamagllusi allgeghtengngwaaghsi Kiyaghneghem nangllegtallgha whangamnun maligullusi.

⁸ Kiyaghneq liisimakistekaqa esghaghyupigtaqamsi, qayughllak qamagllusi piniqamsi Christ Jesus‑em piniqellghatun elpesi.

⁹ Yughaatkaqamsi piniqighllagesqellusi, liisimallengataghiisqellusi, liigikellengataghiisqellusillu.

¹⁰ Tawaten lliiqufsi kiyaghtelleghpesini sangwaa pinilleghpigaq nakmikumanginaghyagulleqaghsi. Taagken Christ‑a taginqigtekan pelungillequsillu anaggutellghillequsillu.

¹¹ Enkaam unguvallesi imighllequt ipapestaaq piniipiglleghhiimeng Jesus Christ‑anginaghhaam piitestekaaneng. Taagken yuget quulvaghlleqaatlu, usuqelleqaatlu Kiyaghneq.

Paul‑em Anusimingllallghan Ungipaqestii Pinilghiit Ungipat

¹² Ugpeqaalgutemni, elpesinun liisimakesugaqa anusimingllaghvigmetelleghma ipapestaaq uglalghii yuuk nagatestaa Pinilghiineng Ungipaneng.

¹³ Tamaaken apalluqluku qamaglluteng umiilgem mangteghaan kelengakistengita liitaat anusimingllaghaagunga qayughllak qepghaghtekegkanganga Christ‑am.

¹⁴ Anusimingllaghvigmetelleghma allulluteng ugpeqalghutet ugpeqiighataghaghtestii Ataneghqun. Enkaam wata tetugnanighataghaghtut ungipaqneghmegteggu Christ‑a.

¹⁵ Ipanguuq ilangi ungipaqinguut Christ‑ameng qayughllak aqinakngukangatngallu aaghtiiraaghukangatngallu. Iwernga ilangi ungipaqinguut Christ‑ameng elqughulluteng.

¹⁶ Ungipaqinguut qayughllak piniqegkangatnga. Liisimakegkangat Kiyaghneghem tagistekaqaanga whavek nekevghatesqelluki Pinilghiit Ungipat anguyamnneng.

¹⁷ Iwernga ilangit ungipaqinguut Christ‑ameng ellnginaayugtem, ipapighqegpenateng. Sumeghmeggni tawaten pilleghmegteggun seghleliighqataghaghnilunga piitnga anusimingllaghvigmesimalunga.

¹⁸ Itagnaghtuq, ungipaqillghat elqughutngayaghngaan nalighmeng sameng allaneng apallulguyaghngaan, ungipaqillghita quyastaqaanga, qayughllak ungipaqinguut Christ‑ameng uglapiglleghiinun.

¹⁹ Aa‑a quyangallequnga, qayughllak liisimakaqa aanyaghqaagunga anusimingllaghvigmeng yughaatkelleghpesigun, kayusillghakunllu Jesus Christ‑am Taghneghaan.

²⁰ Piyukelleghllakallu, sighimakelleghllakallu esgha taana, kayngusaghaatefqaama pinalunga Christ‑amun. Itupill kiyaghsugaqunga ilutulunga wataqaaghaq maaten anusimingllaghvigmetellemni. Enkaam Christ‑a quulvallengellequq unguvaghngaaghma, nalighmeng tuquyaghngaaghma.

²¹ Whangamni unguvalleq Christ‑anguuq, enkaam tuqulleq allgeghutaghallghuuq.

²² Iwernga unguvanaqngukuma qepghaghataghaghllequnga Christ‑amun. Nalikek nakmikelleghqaqa nallukaqa, unguvalleq nalighmeng tuqulleq.

²³ Kukriqnguunga naligkeneng nakmiilleghqamneng. Aghulaqsupigtaqsaghtunga Christ‑amennalunga, qayughllak pinighataghaghyaghqaaguq taana.

²⁴ Iwernga megnunaghataghaghtuq elpesi apalluqlusi unguvanguunga.

²⁵ Ipapighqutkumaaqa taana, liisimakaqa wiin unguvanaqnguunga. Elpesininnaqnguunga kayusiinnalusi nagusqellusi, quyamallengesqellusi ugpelleghpesigun.

²⁶ Elpesinun pikuma, usuqataghaghlleqaghsi Christ Jesus whanga apalluqlunga.

²⁷ Sayaghngaatnga nagneghuteki kiyaghtaallesi Christ‑am apeghtullghatun Pinilghiitgun Ungipatgun. Enkaam esghaghyaghtuqumsi, nalighmeng aviiteghngaaghma nagaququmsi, liigikelleqaqa ataasistun pilleghsi. Liigikelleqaqallu qerngaghpesi nekevghannaqutkellesi Pinilghiit Ungipat anguyagpesineng.

²⁸ Alikegpenaki anguyasi, quunpeng ilutullusi. Enkaam tawaten pilleghpesi ipapighqelleqaat ellngit kayaalqiinaanghitut. Elpesi kayaalqiillequsi qayughllak Kiyaghneghuuq kayaalqiistilghii elpesineng.

²⁹ Elpesinun qepghaasaqlegughtestekaqaa Christ‑a, ugpeqnginaghpenaan, ikfiqelgusiqesillu.

³⁰ Pilluwalgusightengnga. Sivunghani esghapakaqaghpesinga piyaqliilghiinga, nagaquqaqasillu piyaqliillghenka maaten. Elpesillu tamaakut ataasit piyaqliighutkennaqngwaasi.