Philemon 1 - New Testament-et Akuzipigestun

¹ Ukut latat Paul‑meng pinguut, anusimingllaghaq Christ Jesus apalluqluku, ugpeqaalgutemnnengllu Timothy‑meng. Piniqegkamtegnun qepghalgutemtegnun Philemon‑mun,

² ugpeqanunllu qerngughutkayugnun mangteghaghpeni, Apphia‑munllu nayamnnun Christ‑akun, Archippus‑munllu pilluwalgutemtegnun.

³ Kiyaghneghem Atamta, Atanemtallu Jesus Christ‑am nanglleklisillu, nekeggmellelguslisillu.

Philemon‑em Piniqillghallu Ugpeqillghallu

⁴ Philemon‑mi, quunpeng iqamsiqayugvikaqaqa Kiyaghneqa yughaatkennemken,

⁵ qayughllak nagaqughaqaqa piniqellghen tamaghhiitnun Kiyaghneghem yugitnun, ugpeqillghenllu Ataneghqun Jesus‑kun.

⁶ Yughaatkaqamken ungipaatesqelluki ilaten ugpeqillemnneng Christ‑akun. Tawaten pikuvek liigikataghaghlleqaten qamaglluki quyastellghet allgeghtekaput Christ‑akun.

⁷ Ugpeqaalgutemni, piniqilleghpek Kiyaghneghem yuganun quyasteghllagaangallu kayemaangallu! Piniqelleghpek quyastii Kiyaghneghem yugi.

Paul‑em Aapuskanga Onesimus

⁸ Tetugnaanghitunga qeleghnaluten Christ‑akun atuqesqelluku elqughutngalghii, iwernga tawaten pinaanghitunga.

⁹ Piniqutelleghpung apalluqluku aapfikamken atuqesqelluku elqughutngalghii. Whanga, Paul, nanevgaagunga, anusimingllaghaagungallu apalluqluku Christ Jesus.

¹⁰ Whanganguuq aaputilghii ighnemnun, Onesimus‑mun. Anusimingllaghvigmi ataliitkaqaanga Christ‑akun.

¹¹ Sivunghani sasiinghisaghtuq elpenun, iwernga whaa kayutngughtepigsimaaq whangkutegnun.

¹² Onesimus elpenun aglaghtesnaqaqa, leganqun iluka maligunnaquq ellngakun.

¹³ Whangamnitesuguyaghaqa kayusiitesqellunga anusimingllaghvigmi, katam elpek kayusiinnayaqevnga maansaquvek. Liisimakegkenqun anusimingllaghaalghiinga Pinilghiit Ungipat apalluqluki.

¹⁴ Iwernga whangamnitesnaanghitaqa wetkuqun sivukluten aaptaghlluten. Itagnaqumakuvgu whangamnitesqelluku taawa elpek piyukelqelleqan, qayughllak qelghunghitamken tawaten pisqelluten.

¹⁵ Entaqun Onesimus iqitaghtekaaguq elpenisaghqaaluni quunperugllak.

¹⁶ Ellnga paninang qepghaghtelaaghuuq. Iwernga qepghaghtelaaghumalleghmineng angliighataghaamaaq qayughllak piniqegkaaghsimaaq ugpeqaalguta. Piniqepigtaqa, iwernga elpek piniqataghaghlleqan qepghaghtelaaghuluku, ugpeqaalgutngulukullu Ataneghqun.

¹⁷ Enkaangam tugukliimakuvnga qepghalgutngulunga, tuguklighnaken Onesimus whangangusluku.

¹⁸ Sameng seghletun pimakangaten nalighmeng asengemakangaten, asengenga whanga llivikelleqaqa.

¹⁹ Whaa, whanga katam iiggemneng igaghtunga whaten: whanga, Paul, llivikelleqamken. Iwernga puygugpenaan unguvallghen asengeluku ayuqan whangamnun.

²⁰ Aa‑a, ugpeqaalgutemni, aapfikamken Ataneghqun tugukliisqelluku Onesimus. Tawaten pikuvek quyasleqaghpenga Christ‑akun!

²¹ Lataamken liisimakngwaaghluku qaatkesaghqaqan qelghutkaqa elpenun, repall qaayghulluku pillequten.

²² Atwhay, nekaghqangllaataghhnakevnga qayughllak sighimanguunga Kiyaghneghem kiimsighlleqii yughallesi, enkaam elpesinun pillequnga.

Paul‑em Taaqniitangi

²³ Epaphras‑emnguq piniqiisi; anusimingllaghalgutkaqa apalluqluku Christ Jesus.

²⁴ Qepghalgutmallu Mark‑enkut, Aristarchus‑enkut, Demas‑enkut, Luke‑enkut ellngitallunguq piniqiisi.

²⁵ Piniqellgha Atanghem Jesus Christ‑am tamaghhaghpesinilli.