Matthew 9 - New Testament-et Akuzipigestun

Jesus‑em Naallghuskanga Uniiqaq

¹ Taagken Jesus angyamun uuglluni inglunganun naayvam aghviqaq. Enkaam Capernaum‑emun aglaqaq neminun.

² Ilangita yuget ellnganun tagitkaat uniiqaq yuuk allighaakun. Jesus‑em liigikluki ugpeqilleghtulngit, pikaa uniiqaq, “Ighnemni, quya! Seghleghqelleghten seghevutut.”

³ Taagken ilangi apeghtughikayuget Liilightuusaneng sumeghtaghaqat, “Una yuuk seghleghqeghllagtuq. Kiyaghneghuyugtuq seghevutilleghmikun seghleghqelleghneng!”

⁴ Jesus‑em liisimakluki sumeghtaghallghit, pikii, “Sangan seghleghmeng sumeghtaghaghetsi?

⁵ Naliq akuzilleq piyaqniita, ‘Seghleghqelleghten seghevutut’ nalighmeng ‘Makelluten piyugi’?

⁶ Liigikesnaqamsi Ighnegha Yugem seghevutilleghqalgutanga seghleghqelleghmeng nunami whani.” Enkaam uniiqaq yuuk pikaa, “Makelluten, allighan tuguluku, aglaa!”

⁷ Yuuk makelluni aglaqaq.

⁸ Yulghutet esghapagluku tallughyukat, usuqegkaat Kiyaghneq tawatelngughmeng aghtughyaghqaanghilleliskangi yuget.

Jesus‑em Tuqluqanga Matthew

⁹ Taam kingunganeng Jesus‑em igleghutkelluku esghaqaa tax‑em qerngughtistenga, aqumluni qepghaghvigmini; Matthew‑nguftuq. Pikaa, “Maligtinga.” Enkaam Matthew‑m nekevluni maligtekaa.

¹⁰ Mulugpenateng Jesus‑enkut maligsaaghtekullghiit neghyaghtuqat Matthew‑nkunun. Neghuusimaluki tax‑meng qerngughtistelghutetlu, seghleghqestelghutetlu aqumluteng Jesus‑enkut neghelgusiqiit.

¹¹ Ilangita Pharisees‑et esghaghluku neghelgusiighilghii, maligsaaghtengi aaptekiit, “Sangan apeghtughistegpesi neghelgusightaki tax‑meng qerngughtistetlu, seghleghqestetlu?”

¹² Jesus‑em nagalluki kiimsiqii, “Yugunqegtat aghallegtaghsughniitut, tamaakunginaat qinuyulghiit.

¹³ Liisaghtughteggu sameng pisiitanga una Akuzitnilnguq Igaqegkaq whaten pilghii, ‘Piyukenghitanka aghqutesi, itupill nangllegtaghtesugamsi.’ Tagingunghitunga tagsighnaluki elqughutngalghiit, iwernga taginguunga tagsighnaluki seghleghqestet.”

Aapqughaalleq Fast‑elleghmeng

¹⁴ Taagken John‑em Paaptaayestem maligsaaghtengita takuluku Jesus aaptekaat, “Sangan whangkutallu Pharisees‑etlu awen fast‑aaqesta, naqam maligsaaghteten fast‑egpenateng?”

¹⁵ Jesus‑em kiimsiqii, “Nulightughyaghqam tagsiqliqii qivghungayaghqaawaat tawanlluku nulightughnaqelghii? Yeghlegillu! Iwernga pilleghqaq kaasaghqaaguq nulightughnaqelghii ellngitneng iqitestekumegteggu, elngaatall tamaani aghneghni fast‑ellequt.”

Jesus‑em Apeghtuusii Ilasaghqaanghitut Jews‑et Apeghtuusiitnun

¹⁶ Taagken Jesus‑em pikii, “Kitum alngunak ilaaghnaanghitaak aatkalugek nutaghameng liiqneghmeng. Ilaalleq qellughtekumi piigullequq, enkaam piilleq sullevellequq.

¹⁷ Talwa kitum alngunak wine‑eghraghaghmeng imighnaanghitaa awataghpaluk qayughllak awataghpaluk imiqumi aafkaghluni imiighullequq. Enkaam awataghpaluk atuuyaghqaananighllequq. Iwernga awataghpagraghaq imiqumi wine‑eghraghaghmeng qerngaagmek naavnaanghituk.”

Jesus‑em Naallghutillghallu Unguvaghtillghallu

¹⁸ Paninang Jesus akuzimaluku Jews‑et igleghutistengat iteghluni segesqughlluni manungakun pikaa, “Panika whaa tuqunꞌghhaaguq, iwernga takuluku saaftekuvgu unguvaghllequq.”

¹⁹ Enkaam Jesus‑em nekevluni maligtekaa, maligsaaghtengillu maligutkat.

^20-21 Aglaamaluki, qinuyulghiim aghnam takukaa Jesus tunutanganeng. Qula maalghuk siipneqluku ayumiqulleq kiitelqungigalnguq. Whaten sumeghtaghaqaq, “Saafteqeghsaqumkun aatkaakun, naallghunnayaghtunga.” Enkaam saaftekaa atkuyaaghan keniikun.

²² Jesus‑em qiivutkelluku esghaghluku aghnaq pikaa, “Panimni alingegpenang! Ugpeqilleghpegun naallghututen.” Aga aghnaq naallghutkaq.

²³ Taagken Jesus‑em kaalluni igleghutistenkunun, esghaqii tuqiilghiini qalghightaghtetlu, yulghutetlu qiyaaghuuteghllalghiit.

²⁴ Tawavek pikii, “Aanleghaatek! Aghnaghaghhaq tuqullghituq qavaaguq!” Iwernga nenglaqegkaat.

²⁵ Aanleghaatesatki, iteghluni Jesus‑em tugukaa iiggakun, enkaam aghnaghaghhaq unguvaqaq.

²⁶ Enkaam taana allaaghlluwhaghtilleq ungipaqegkaat tamangani.

Jesus‑em Naallghuskek Ayaakak Yugek

²⁷ Taagken Jesus aghulaqegkaq nemeng. Ayaakak yugek maligsaaqaak, akilghuumaagmek whaten, “Ighneghani David‑em, nangllegyagutikung!”

²⁸ Aga mangteghamun iteghyan maligtekaak, enkaam Jesus‑em aaptekakek, “Ugpeqestegneguu naallghutilleghqaqa?” Kiimsiqaak, “Aa‑a Ataneq!”

²⁹ Taagken Jesus‑em iyegkenkun saaflukek pikakek, “Ugpeqilleghpetegetun apeghiighli.”

³⁰ Enkaam esghaghyagutkak. Jesus‑em ineghtengngwaaqakek, “Ungipaghpenatek kitumun alngunak.”

³¹ Iwernga navek pineghmegni aapghaqegkangak Jesus‑em apeghiiqaa ellmegnun.

Jesus‑em Naallghuskanga Akuzingigalnguq Yuuk

³² Taakuk yugek aghulaqumalukek, Jesus‑mun tagitkaat yuuk akuzingigalnguq qayughllak ilumikun tughneghalek.

³³ Legan Jesus‑em tughneghaq aanestaa, yuuk aga akuzikaq. Enkaam yulghutet saghiighayugulluteng whaten pikat, “Whatelngughmeng allaaghlluwaghtilleghmeng esghaasigatukut Israel‑mi!”

³⁴ Iwernga Pharisees‑et pikat, “Umiilgita tughneghaat aghtughyaghqaanghillelisimaat aanesqiisqelluku tughneghaghneng.”

Jesus‑em Nangllegyaguskangi Yuget

³⁵ Taagken Jesus igleghtekaq tamaghhaani Galilee‑mi, apeghtughimaghmi synagogue‑ngitni, ungipaqimaghmillu Pinilghiineng Ungipaaneng Ataneghpagullghem. Naallghuquqii qamaglluki aqnighnelgetlu qinuyulghiitlu.

³⁶ Esghaghluki yulghuteghllaget nangllegyagutkii, qayughllak seghleliighngaghllaget, kayutngunateng; penniighestun penniighnightengilngughestun.

³⁷ Taagken maligsaaghteni pikii, “Uglalghiim yugem ugpeqsugaqiit Pinilghiit Ungipat. Tamaakunguut usputngalghiit nunivagseghanun unataghyaqleggiinaaghtekat. Taawanginaq palapiguut qepghaghtet.

³⁸ Enkaangam yughaghtek Atanghanun unataghyaghqat, kayagtisqelluku qepghaghtekaghqameng unataghyaghqaanun.”