Matthew 8 - New Testament-et Akuzipigestun

Jesus‑em Naallghuskanga Leprosy‑lek

¹ Jesus qemimeng ukigyan, yulghuteghllagem maligtekaa.

² Taagken yuuk, leprosy‑lek, tagiluni ellnganun, segesqughfikluku, pikaa, “Ataneq, piyukelqegkuvgu, ukmangiqaghnga.”

³ Enkaam Jesus‑em tawavek saafluku pikaa, “Piyukelqaqa, ukmangiighten!” Tawaninginaq leprosy‑ngiitkaq.

⁴ Taagken Jesus‑em pikaa, “Wataghllak kina alngunak ungipaategpenaan naallghutelleghpeneng, yeghlegi aglaa priest‑mun esghaghligu naallghutellghen. Taagken aghqerraaghhaaten Moses‑em Liilightuusaan pisqellghatun ipapighqesqelluku naallghutellghen.”

Jesus‑em Naallghuskanga Rome‑em Umiilwaaghan Qepghaghtenga

⁵ Taagken Jesus Capernaum‑emun pikaq. Kaataquqlu, Rome‑em umiilwaaghan takuluku kayusiitaghtesqelluni pikaa,

⁶ “Ataneq, whangkunni qepghaghteka, uniighumaaq, ikfiqeghllaguuq.”

⁷ Jesus‑em pikaa, “Naallghusaghtughnaqaqa.”

⁸ Iwernga umiilwaaghem pikaa, “Ataneq, itagnanghitunga elpenun iteghviksaghqaalunga mangteghamnun. Legan tawanlluten naallghutesqigu qepghaghteka enkaam naallghulli.

⁹ Qelghikayugmeng umiilelguunga enkaam whangallu qelghaqanka pilluwaghtenka. Ataasiq qelqumkun, ‘Aghulaqi’ aga aghulaqellequq. Ilanga whaten pikumkun, ‘Tagi’ tagillequq. Qepghaghteka qelqumkun, ‘Una piightigu’, aga pilleqaa.”

¹⁰ Jesus‑em nagalluku saghiighayukaq, enkaam yuget maligullghiit ellminun pikii, “Ipa ungipaatamsi, nallaasigatunga kitumeng alngunak Israel‑eghmiimeng, uutun yugtun ugpeqineghtutkalghiimeng.

¹¹ Ungipaatamsi, asivaghmengllu pakfallamengllu yulghutet tagilaghaasaghqaagut Ataneghpagullghanun Qilagem. Tawani aqumuulluteng neghelgusighlleqiit sivuneput Abraham‑enkut, Isaac‑enkut, Jacob‑enkut.

¹² Iwernga tamaakut Ataneghpagulleghmesaghqaayalghiit aanesaghqaagut mamlegllagmun, tawani elngaatall qiyaaghwaghllagllequt gguteteng terqitaagtaamiita avuteghqem angtalanganeng.”

¹³ Taagken Jesus‑em pikaa umiilwaaq, “Aglaghhaaten, ugpeqilleghpetun apeghiighllequq.” Enkaam tawaninginaq umiilwaaghem qepghaghtenga naallghutkaq.

Jesus‑em Naallghuskangi Yulghutet

¹⁴ Jesus Peter‑enkunun piluni, esghaqaa aghnaq Peter‑em sakinga qavaghvigmeteftuq puqleghaluni.

¹⁵ Saafsaqminigu iiggakun puqleghangiitkaq, aga makelluni kepsiiqukaa.

¹⁶ Ighivgaghyagu Jesus‑mun tagiquutkiit tughneghalget ilumegteggun enkaam aanesquqii tughneghiit akuzilleghmikun, qamagllukillu qinuyuget naallghutkii.

¹⁷ Tawaten pikaq apeghiighnaluku uuknaliqistem Isaiah‑m whaten pillgha, “Tugukaqii qinuyulleput, iqitkaqii aqnighneput.”

Jesus‑mun Maligsaaghtengughsulghiik

¹⁸ Jesus‑em esghaghluki uvitminilnguut yulghuteghllaget, yataaghqesqegkii naayvam inglunganun aghvighnaluteng.

¹⁹ Taagken apeghtughikayugem Liilightuusameng takuluku pikaa, “Apeghtughista, maliglleqamken natmun alngunak pikuvek.”

²⁰ Jesus‑em pikaa, “Kaviighet riigtelguut, qawaaget unglutelguut, iwernga Ighnegha Yugem ingaghfigitaquq.”

²¹ Ilangan maligsaaghtengan pikaa, “Ataneq, maliglleqamken iwernga sivukluku ataka lliveghyaghtuqaghlakun.”

²² Iwernga Jesus‑em pikaa, “Maligtinga. Tamaakut maligusunghilnguut whangamnun tuqukaagut taghneghamegteggun; lliveghlitki tuqumasliiteng.”

Jesus‑em Amsanaghtestekanga Naaftelleghllak

²³ Taagken Jesus angyamun uugsan maligsaaghtengillu uuglleghaatkat.

²⁴ Puglellghita kiingungiighhaaneng esla nuuskagllagan naafteghllakaq, naayvaqlu imaghllugughteghllagumaghmi, repall angyaq imighaataqegkaa. Iwernga Jesus qavaalghii.

²⁵ Maligsaaghtet takuluku taghtughtekaat whaten pimaan, “Ataneq, yugulikut! Tuqulaghaannaqukut!”

²⁶ Jesus‑em pikii, “Sangafsi alingetsi? Ugpeqilleghqestaapiguusi!” Taagken nekevluni ineghtekakek anuqallu imaghllugetlu enkaam amsanaghllugughtekaq.

²⁷ Qamaglluteng saghiighayukat. Whaten pikat, “Natelnguuwa yuuk una? Talwa anuqemllu imaghllugetlu qaatkegkangat!”

Jesus‑em Naallghuskek Tughneghalgek

²⁸ Jesus‑enkut kaasameng inglunganun naayvam, aglaqat Gadara‑ghmiit nunangitnun. Taagken maalghuk yugek tughneghalgek ilumegnegun tagilutek lliveghneng nallaqaak Jesus. Suugllugllagek repall kina alngunak taakwagun tuumkun igleghsigalnguq.

²⁹ Legan esghaghluku Jesus akilghuukak, “Sanaqsikut, Ighneghani Kiyaghneghem? Ikfiqesnaqsikut pilleghqaq kaatestegpenaan?”

³⁰ Taawanguq qantaghani kurugalghutet, neghaqeftut.

³¹ Tughneghaat maniguutepiglluteng Jesus pikaat, “Aanestekufkut, kurugaghnun iteghaatesnakefkut.”

³² Enkaam Jesus‑em pikii, “Aanleghaatek!” Aanleghaalluteng kurugaghnun iteghaatkat. Aga kurugaat pangalgutkat asitmun naayvamun nagneghluteng meghmi tuqulaghaatkat.

³³ Kurugaghneng aflengakilghiit qimaaguutkat nemun. Tawani aapqagket samatkek tughneghalguyalghiik ilumegnegun, samatangillu kurugalghutet.

³⁴ Enkaam qamagtengngwaaghluteng tamaakumiit esghaghyaghtuutkaat Jesus. Esghaghyamegteggu maniguutepiglluteng aghulaqesqegkaat nunameggneng.