Matthew 7 - New Testament-et Akuzipigestun

Nanqigtisnanilleq

¹ Jesus‑em apeghtuusani nagneghutkii, “Nanqigtigpenasi ilagpesineng enkaam Kiyaghneghem nanqiggneghillisi,

² qayughllak Kiyaghneghem nanqiglleqiisi tawatengngwaaq nanqigtilleghpesistun ilagpesineng. Atuqelleqiillu elpesinun ataasit tamaakut pikasi ilagpesinun.

³ Sangan esghaghsigu yulgutegpek iisqughutnga, elpek katam iisqughuten unaghsighllak avelghaghluku?

⁴ Salghiimeng yulguten pizigu, ‘Entaa‑a iisqughutngiqaghlaken’, elpek paninang iisqughutelguluten unaghsighllagmeng?

⁵ Uyuq piniiyugneq! Sivukluku unaghsighllak iyegpeneng nusugluku elngaatall whateghlluwaaq esghaghluku yulguten iisqughutngighnaken.”

Legasiighwaghtenun Apeghtuusaqegpenaki Kiyaghneghem Akuzitangi

⁶ Taagken Jesus‑em pikii, “Legasiighwaghtenun apeghtuusaqegpenaki Kiyaghneghem Akuzitangi, qayughllak qikmistunllu kurugaghestunllu ayuqut. Sangwaat agleghnalghiit tuunegpenaki qikminun luuraq sughugnayukangisi. Akituqat sungaat miluutegpenaki kurugaghnun, luuraq tutmaasghaqnayukatki.

Aaptelleq, Ivaghilleq, Tenglugtulleq

⁷ “Aaptek, allgeghullequsi; ivaghitek, naalkullequsi; tenglugtughtek amigkun, qelpeghulleqiisi.

⁸ Qayughllak kina alngunak aapleghhii, allgeghusaghqaaguq; kina alngunak ivaghilghii, naalkusaghqaaguq, kina alngunak tenglugtulghii amigkun, qelpeghulleqaa.

⁹ Kitum yugem ighneni tungsiqan neqekrangllameng, tuunelleqaguu uyghagmeng?

¹⁰ Nalighmeng tungsiqan iqallugmeng, tuunelleqaguu nemeghyameng?

¹¹ Seghleghughngaaghpesi, avaqutasi tuunyaghqaqasi pinilghiimeng tunusameng. Atazi qilagmelnguq tuuniyugataghaghluni ayuquq pinilghiimeng tunusameng tamaakunun aapleghhinun ellminun.

¹² “Enkaam yulgutegpesinun pinitun pistesukufsi, elpesillu pinitun piiqiteki. Tawaten apeghtughinguut Moses‑em Liilightuusiillu, uuknaliqistetlu igaqegkiit.”

Kagpestaaghhaq Amik

¹³ Taagken Jesus‑em pikii, “Iteghtek kagpestaaghhaghqun amigkun. Amik hell‑mun ayuqelghii nuqutuuq, tuumkegtuqlu enkaam uglaq taakwagun igleghtaquq.

¹⁴ Iwernga amik unguvalleghmun ayuqelghii kagpestaaghhaaguq, tuumllugmetuqlu enkaam qafsinkuuraghhaam naalkaqii tumet unguvalleghmun ayuqelghiit.

Naten Liigikelleghqii Uuknaliqistesighwaaghet

¹⁵ “Kelengalusi uuknaliqistesighwaaghneng. Takulleqiisi penniighsugnighqelluteng, taawanginaq ugighsalghiistun amaastun ayuqut.

¹⁶ Liigikelleqasi nangaghneghitgun liigikelleghpesistun uqfiget sameng piitestillghitgun. Sikughlluget piitestingigatut grapes‑meng nalighmeng figs‑meng, tawateghpigaq seghleghet yuget pinitun pingigatut.

¹⁷ Uqfik pinilghii piitestiyaghqaaguq pinilghiimeng, taawanginaq uqfik seghleq piitestiyaghqaaguq seghleghmeng.

¹⁸ Uqfik pinilghii piitestinaanghituq seghleghmeng, uqfik seghleq piitestinaanghituq pinilghiimeng.

¹⁹ Enkaam alngunak uqfik piitestinghilnguq pinilghiimeng kepluni kumaghsaghqaaguq.

²⁰ Enkaangam tawatetellghitgun liigikelleqasi uuknaliqistesighwaaghutangi.”

Iteghyaghqat Ataneghpagullghanun Qilagem

²¹ Jesus‑em apeghtuusani nagneghutkii, “Ilangi yugem whangamnun maligsaaghtekniiqut enkaam piiqaatnga, ‘Atanqamken’ iwernga iteghnaanghitut Ataneghpagullghanun Qilagem. Tamaakunginaat atuqilghiit piyukellghaneng Atama qilagmelnguum iteghyaghqaagut Ataneghpagullghanun Qilagem.

²² Nanqigtillghem Aghneghani, uglam piyaghqaqaanga whaten, ‘Ataneq, Ataneq! Ateghpegun Kiyaghneghem ungipaa aapqaqaghput. Ateghpegun aanesquqaqaput tughneghaat uglalghiineng yugneng. Ateghpegun allaaghlluwhaghtiighaataqaagukut uglaghngaan!’

²³ Iwernga whaten pilleqanka, ‘Nallukngwaaghamsi, iqitek whangamneng, seghletun pisteni’.

Ayugilnguq Tunemaq

²⁴ “Kina alngunak nagallghii apeghtughillemnun, qaatkegkumiki peghqinelghiitun yugtun ayuquq mangteghangllaqaq uyghagem qaayngakun.

²⁵ Eslallugughteghllagyalghiimi, kiiwet ulevumaghmeng, anuqlighllagyalghiimillu, tawallima mangteghaq uullghumangilnguq qayughllak uyghagkun nekeftekaalghii.

²⁶ “Iwernga kina alngunak nagateghngaaghmi apeghtughillemnun, qaatkenghilkumiki, nalluqatun yugtun ayuquq mangteghangllaqaq qenaaghllugkun.

²⁷ Eslallugughteghllagyalghiimi, kiiwet ulevumaghmeng, anuqlighllagyalghiimillu, aga mangteghaq uulqaq naavngwaaghluni.”

Jesus Apeghtughilghii Aghtughyaghqaanghillelighluni

²⁸ Jesus tamaaken apeghtughineghmeng taaqsan, yulghuteghllaget saghiighayukat,

²⁹ qayughllak apeghtughikaq aghtughyaghqaanghillelighluni, apeghtughikayugestun Liilightuusameng pigpenani.