Matthew 6 - New Testament-et Akuzipigestun

Apeghtuusaq Tuunilleghmeng Aklumalghiinun

¹ Jesus‑em apeghtuusani nagneghutkii, “Wataghllak pinitun pillesi esghaghsaqegpenaki. Esghaghsaqegkufsiki Atagpesi qilagmelnguum akileghtughnaanghitiisi.

² “Enkaam tuunikuvek aklumalghiinun, piniiyugneghestun pigpenang. Qalghightaghtestikayuguut tuunivagilgameng esghiisqelluteng. Tawaten piiqut, synagogue‑nillu tumenillu usuqesqelluteng. Ipa ungipaatamsi akileghtuusangwaaghluteng ayuqut.

³ Iwernga tuunikuvek aklumalghiinun, kina alngunak ungipaategpenaan,

⁴ kitumun alngunak nallukesqelluku tuuniillghen. Atagpek esghapagaqaaten enkaam akileghtughlleqaaten.”

Apeghtuusaq Yughalleghmeng

⁵ “Yughaneghpesini piniiyugneghestun pigpenasi. Yughaghyuneghtuut nekevghaghmeng synagogue‑nillu tumenillu esghiisqelluteng yugnun. Ipa ungipaatamsi akileghtuusangwaaghluteng ayuqut.

⁶ Iwernga yughaghnaqneghpeni, iteghluten negpenun uumgulluten yughaghaqi Atagpenun aliinneghilgughmun. Atagpek liisimakaa aksaqluku sallghen enkaam akileghtughlleqaaten.

⁷ “Yughaneghpesini Kiyaghnepigmun maniguusigalngughestun pigpenasi. Yughaneghmeggni uteghpagtaghaqiit akuzitet sameng pisiinghilnguut. Sumeghmeggni akuzilleghllagmegteggun kiimsighlleqniluki yughalleteng piiqiit.

⁸ Ellngistun ayuqegpenasi qayughllak Atagpesi liisimakaa aklukegkaghsi, talwa aaptestegpenasi.

⁹ “Enkaam whaten yughaghaqitek, ‘Whangkuta Atavut qilagmelnguq pamani, agleghnalghii aatghen quulvallengli.

¹⁰ Yughaghtukut Ataneghpagullghen tagisqelluku, piyukellghenllu apeghiighesqelluku nunami whani, katam qilagmelngughestun.

¹¹ Neghyaghqaliteqeghtikut aghneghmi whani.

¹² Seghevutaghtiki seghleghqelleput seghevusimaluki seghletun pisteput.

¹³ Nanghiiqullengestegpenaamta, iwernga yugulikut taagken Seghleghmeng. Ataneghpagulleq, aghtughyaghqaanghilleq, nighughqelleq, elpek pikaten quunperugllak. Amen.’

¹⁴ “Seghevuskufsiki seghletun pistesi, Atagpesi qilagmelnguum seghevulleqiisi.

¹⁵ Iwernga seghevunneghilkufsiki seghletun pistesi, Atagpesi seghevunnaanghitii seghleghqellesi.

Apeghtuusaq Fast‑elleghmeng

¹⁶ “Fast‑eneghpesini iilqesugnighqegpenasi piniiyugneghestun. Aghmigigatut, mesuunangigatut liigikesqelluteng fast‑enguniluteng. Ipa ungipaatamsi, akileghtuusangwaaghluteng ayuqut.

¹⁷ Fast‑eneghpeni aghmigaqillu mesuunaaqillu,

¹⁸ ilagpenun nallukesqelluku fast‑ellghen. Iwernga Atagpek aliinneghilnguum liisimakaa saaquten enkaam akileghtughlleqaaten.

Qilagmelnguut Aklungit

¹⁹ “Nunami whani kagpagpenasi aklungimeng qayughllak kingugemllu anaghtaallghemllu naafqelleqii, teglegniightetlu naafqiiluteng teglegllequt.

²⁰ Iwernga elpesineng katam qilagmi kagpagitek aklungimeng qayughllak moth‑ngituq, anaghtaangituq naafqiiyaghqameng, tegleghniightengituqlu naafqiiluteng teglegughyaghqameng.

²¹ Sumeghtaghaatkumanginaghlleqaghsi aklungigpesinun kagpagvigsi.

Yugusim Nighuga

²² “Iyek kenelghutastun ayuquk yugusimun. Iiskegtekuvek iingunaghmi yugusin nighugllagullequq,

²³ iwernga iyellugmeskuvek iingunaghmi yugusin mamlegllagullequq. Enkaam nighuk ilugpenilnguq mamlegukumi, elngaatall mamlepigtuq!

Kiyaghneghenkuk Maninkuk

²⁴ “Kitum alngunak qepghaannaanghitaak maalghuk umiilgek. Maalghugegneng umiilelgukumi ugumikelleqaa ataasiq, piniqelleqaa ilanga. Qaatkutngallequq ataasimun, pitkennaanghitaa ilanga. Enkaam piniqnaanghitaghsi Kiyaghneq piniqumaluku mani.

²⁵ “Tamaaken apalluqluku ungipaatamsi, nulqaviighutkegpenaan ungvalleghsi, sameng neghelleghqaghsi, meghelleghqaghsi, nalighmeng sameng aatelleghqaghsi. Sumeghtaghaqaghtekqun, unguvalleq megnunaghataghaghtuq neqmeng, yugusiqlu megnunaghataghaghtuq aatkaneng.

²⁶ Esghaqaghtekiqun qawaaget, piitesighiigatut, unatiigatut, kagpagingigatut. Naqamllu Atagpesi qilagmelnguum neghqaqii! Elpesi megnunaghataghanghitsii qawaagneng?

²⁷ Nalighpesi nulqaviighutkelluku unguvalleni taakughlleqaguu?

²⁸ “Sangan nulqaviightaqetsi aasaghqameng? Esghaqaghtekiqun piitesighaat piitellghit, qepghiigatut talwa aatkanglliigatut ellmeggneng.

²⁹ Ungipaatamsi talwa Solomon aklungighllagmini aasigatuq piitesighaghestun pinightutkalghiimeng.

³⁰ Kiyaghneghem aasightughaqii vegaaghet, iwernga aga unaami quukaqiit. Kiyaghneghem aasightuqayugukaki veghaaget, aasightughataghaghnaanghitisii elpesi? Ugpeqilleghqestaapigutsi!

³¹ Tamaaken apalluqluku nulqaviightegpenasi whaten, ‘Sameng neghnaqesta?’ nalighmeng ‘Sameng meghnaqesta?’ nalighmeng ‘Sameng aannaqesta?’

³² Gentile‑et tamaana nulqaviighutkaqaat. Atagpesi qilagmelnguum liisimakii qamaglluki aklukegkasi.

³³ Tamaaken apalluqluku kiyaghtelleghpesini megnunalleghpigaaghtestekek Kiyaghneghem Ataneghpagullghallu, piyukellghallu. Tawaten pikufsi Kiyaghneghem tuunelleqii qamaglluki aklukegkasi.

³⁴ Nulqaviighutkegpenaan unaamilleghqaq, qayughllak unaamim seghleliighi itagnaghyaghqaagut tawavek aghneghmun. Seghleliiq pikayuguuq aghhutanga tamaghhaan, ilaaghataghaghpenaan unaamim seghleliilleghqaaneng.”