Matthew 3 - New Testament-et Akuzipigestun

John‑em Paaptaayestem Ungipaqillgha

¹ Taakwaningani John Paaptaayesta aglaghluni kilgaanganun Judea‑m, piinliqaq ungipaqimeng.

² Whaten pikaq, “Avuteghqellusi taaqitek seghleghqenneghmeng, qayughllak Ataneghpagullgha Qilagem kaasaghtuumaaq.”

³ John‑nguuq uuknaliqistem Isaiah‑am akuzitkegkaa whaten piiqngami, “Kilgaani kina akilghuugaquq whaten: ‘Yataaghqiteggu Atanghem tuumkaghqaa, taklaghrukegsaghteggu igleghavigkaa!’”

⁴ John‑em aatkii camel‑em melqwaaneng ulimaaghet, meqameng tafsiluni, neqekluni locust‑mengllu honey‑mengllu.

⁵ Yuget aglaghtuutkat ellnganun Jerusalem‑emengllu Judea‑mengllu uvitanganengllu Kiiwem Jordan‑em.

⁶ Seghleghqelleteng qayvighqenghatki, John‑em paaptaayaaqegkangi Jordan‑egni.

⁷ John‑em esghaghluki Pharisees‑elghutetlu Sadducees‑elghutetlu tagilghiit ellminun paaptaayesqelluteng pikii, “Elpesi nemeghyani! Kitum anagesqisi Kiyaghneghem nanqigtelleghqaaneng kaannaqelghiimeng?

⁸ Sivuklusi pinitun pilleghpesigun ipapighqiteggu seghleghqelleghpesineng avuteghqelleghsi.

⁹ Whatenꞌngam sumeghtaghaghpenasi, ‘Kiyaghneghem nanqiggnaanghitiinkut qayughllak kingunqiinkut Abraham‑em.’ Ungipaatamsi Kiyaghneghem Abraham kingunengllaannayaghaa maaken uyghagneng!

¹⁰ Whaa maaten qalqalimayaqleggiinaghlluteng ayuqut uqfiget akwiitgun. Qamaglluteng uqfiget pinilghiimeng piitestinghilnguut kepluki, kenghegnun miluusaghqaagut.

¹¹ Meghqun paaptaayeghiiqunga avuteghkegkanun seghleghqelleghmeggneng. Iwernga tagiyaghqam kingumneng paaptaayelleqiisi Agleghnalghiignengllu Taghneghagneng, keneghmengllu. Aghtughyaghqaanghiteghllagtuq whangamneng, repall talwa kamegkek tugumiiqepagningitagka.

¹² Taana tagiyaghqaq nanqigtiyaqleggiinaaguq. Aafsaghqaqii pinilghiit yuget seghleghneng, katam piitesiighaghtem pekutamineng malliillghatun grain‑et. Kagpagluki grain‑et mallaq tamaana miluusaghqaqaa qaamyaghqaanghilnguugnun kenghegnun.”

Paaptaayellgha Jesus‑em

¹³ Taagken Jesus Galilee‑meng tagikaq Jordan‑egnun, John‑mun paaptaayesqelluni.

¹⁴ Iwernga John‑em akuzinnaqutkegkaqsaqanga whaten, “Whanga elpek paaptaayeyaghqaqsaghaghpenga. Sangavek whangamnun tagizin?”

¹⁵ Iwernga Jesus‑em pikaa, “Legan saaqsin paaptaayenga qayughllak tawaten pikumtung apeghiighlleqaghpung Kiyaghneghem piyukellgha.” Enkaam John‑em paaptaayekaa.

¹⁶ Jesus paaptaayeyatni meghmeng aanegkaq. Taagken qilak qelpeghluni esghaqakek Kiyaghneghem Taghneghakek ukilghiik dove‑etun ayuqlutek, enkaam ellngakun nalukak.

¹⁷ Taagken ma qilagmeng pikaq, “Unanguuq piniqegkaghllaka Ighneqa, efquqepigtaqa.”