Matthew 28 - New Testament-et Akuzipigestun

Jesus‑em Unguvaghtellgha

¹ Sabbath‑em kingunganeng, aghtaghaghaqaallu sivulighmi aghneghani santillghem, Mary Magdala‑ghmii, ilangallu Mary‑m, lliveq esghaghyaghtuqaak.

² Tawani pilleghmi nuna qapragllakaq qayughllak Atanghem yaqulga qilagmeng ukikaq. Lliivghem paayngan uyghaga ullghitaghtaghluku aqumegkaa.

³ Esghaqaaluni nighugpaguullghiistun nighugtutkaghmi, aatkiillu qatelghiit anigustun.

⁴ Kelengakistet yaqulegmeng alingruuqat repall ungeleglluteng, tuqukastunllu lliiqat.

⁵ Iwernga aghnak yaqulgem pikakek, “Alingegpenatek. Liisimakamtek Jesus ivaghaqaghtek, qaquuraqaayalghii.

⁶ Whaanneghituq; unguvaamaaq pinaqnilleghmitun. Tagitek, esghaghyaghtughtegnegu lliviksaqanga.

⁷ Enkaam ungipaatqaghsaghtughtegneki maligsaaghtengi unguvaamaniluku tuqulleghmeng, agallu sivullgaaghumaaq Galilee‑mun. Taagani esghaghlleqaghsi! Taawa ungipaatamtek.”

⁸ Enkaangam tawaninginaq lliveghmeng aghulaqegkak, alingumaagmeklu quyaghllagumaagmeklu, ketanqusnaq ungipaasaghtuqiik maligsaaghtengi.

⁹ Jesus‑em aliighaghfiklukek pikakek, “Nekeggmelleq elpetegnilli.” Enkaam taakuk aghnak takuluku, itegii nuqneqluki maniguqaak.

¹⁰ Taagken Jesus‑em pikakek, “Alingegpenatek. Ungipaasaghtughtegneki malighsaaghtenka anglegusiitkanka, Galilee‑munꞌnguq aglaghlit taaganinguq esghaghlleqaatnga.”

¹¹ Aghnak igleghsimalukek, lliveghmelnguut ilangi kelengakistet Jerusalem‑emun iteghluteng, chief priest‑enun aapqaat qamaglluku tamaana apeghiiqaq.

¹² Enkaam chief priest‑etlu, siivanlleghetlu qerngughlluteng agghitkat. Taagken maniliteghllagluki pilluwaghtet,

¹³ pikiit, “Ungipaannakesi yuget, ‘Unugmi qavaasimaluta maligsaaghtengita tagiluteng teglegumaat yugusii.’

¹⁴ Governor‑em nagaquumakagu whangkuta aleghqughlleqaghput enkaam seghleliillengnaanghitusi.”

¹⁵ Kelengakistet mani tuguluku pisqelleghmegestun pikat. Enkaam whavemun kenlanga Jews‑et paninang aapghaqaat Jesus‑em yugusii teglekaqniluku maligsaaghtenganun.

Jesus‑em Aliighvikegkangi Maligsaaghteni

¹⁶ Tawaten pimaluki, taakut qula ataasiq siipneqluku maligsaaghtet aglaqat Galilee‑mun, naayghamun Jesus‑em pisqellghatun tawaten.

¹⁷ Esghaghyamegteggu Jesus maniguqaat, iwernga ilangita aygughikegkaat ellngangutanga.

¹⁸ Jesus‑em takuluki pikii, “Qamaglluni aghtughyaghqaanghilleq qilagmillu, nunamillu whangamnun tagivaqaaguq.

¹⁹ Tamaaken apalluqluku aghulaqlusi qamaglluki yuget maligsaaghtengllaghteki whangamnun, paaptaayelaghteki Aatghakun Atam, Ighneghem, Agleghnalghiimllu Taghnegham.

²⁰ Apeghtuusaqiteki qaatkesqelluki qamaglluki qelghutkanka elpesinun. Elpesinitepestaaghllequnga quunpeng kenlanga kenletghuutellghanun nunam.”