Matthew 26 - New Testament-et Akuzipigestun

Tuqusukangat Jesus

¹ Jesus‑em taaqsamiki apeghtuusaqneghmeng tamaakut, maligsaaghteni pikii,

² “Liisimakaghsi maalghuk aghneghek atughlukek Neqenghaghqelleghqaa Passover‑em pinaqnguuq. Enkaam Ighnegha Yugem tuunelleqaat qaquuriisqelluku.”

³ Tawani aghneghmi, chief priest‑etlu, siivanlleghetlu qerngughutkat palace‑ngani High Priest‑em, Caiaphas‑em.

⁴ Agghitkegkaat Jesus aksaqluklu tuguluku, tuqunnaluku.

⁵ Iwernga pikat, “Neqenghaghqemmi pinaanghitaghput, luuraq yuget seghleliighqiighllagnayukata.”

Bethany‑mi Aghnam Jesus Tepengllaghqegkanga

⁶ Jesus Bethany‑metaqngami Simon‑enkunitkaq leprosy‑lguyalghiimi.

⁷ Aghnam takukaa Jesus, tugumiiqlukek alabaster‑ek aqimleghutak imalgek akitupiglleghhiimeng tepengllaasimeng. Neghumaluku naasqwakun kuuvegkakek tepengllaasik.

⁸ Iwernga maligsaaghtet esghaghluku tawaten pilghii, ugumiyagutkaat whaten pimaghmeng, “Sangan sakusiiqakek?

⁹ Akikegkaqsaqumikek tepengllaasik maningutkeghllaglukek aklumalghiinun tunqughnayaghaa!”

¹⁰ Jesus‑em liisimakluki sameng pitangi pikii, “Sangan seghlequughesteggu aghnaq? Piniipigtuq whangamnun tawaten pillgha.

¹¹ Aklumalghiit quunpeng tamaansaghqaagut, iwernga whanga quunpeng elpesininnaanghitunga.

¹² Tepengllaghqelleghmikun yugusiqa yataaghqengngwaa llivelleghqamnun.

¹³ Ipa ungipaatamsi, nunataghhaani tamaghhaani nani alngunak una Pinilghii Ungipaq ungipaqneghmegteggu, aghnam tawaten pillgha aapghaqelleqaat yugnun neqamikesqelluku.”

Judas‑em Uveghpagusukanga Jesus

¹⁴ Taagken Judas Iscariot ilangat qula maalghuk siipneqluku maligsaaghtet, chief priest‑enun piluni,

¹⁵ aaptekii, “Sameng tuunelleqestengnga Jesus elpesinun tuunegkumkun?” Enkaam kestulluku 30 silver manimeng llivikegkaat.

¹⁶ Taagken kenlekluku Judas pilleghqangnaqegkaq uveghpagunnaluku Jesus.

Yataaghqelleq Passover‑em Neqenghaghqellghanun

¹⁷ Sivulighmi aghneghani Neqenghaghqellghan Yeast‑alillghillnguum Neqekrangllam, maligsaaghtet Jesus takuluku aaptekaat, “Nani yataaghqutesugsin whangkunnun Passover‑em Neqenghaghqellghaneng neghesqelluten?”

¹⁸ Jesus‑em kiimsiqii, “Jerusalem‑emun pitek. Yuuk tamaantuq; ungipaannakesi, ‘Apeghtughista piiq, Pilleghqaqa kaannaquq. Maligsaaghtekullghiini neghnaqaghput Passover‑em Neqenghaghqellgha elpesini.’”

¹⁹ Maligsaaghtet Jesus‑em pisqellghatun pikat, Passover‑em Neqenghaghqellgha yataaghqegkaat.

²⁰ Ighivgaghyagu Jesus‑enkut qula maalghuk siipneqluku maligsaaghtekullghiit tipelngi aqumuutkat neghnaluteng.

²¹ Neghuusimaluki, Jesus‑em pikii, “Ipa piimsi, nalighpesi uveghpagunnaqngwaanga.”

²² Maligsaaghtet qivghughllagumaghmeng tuungliqutaghluteng aaptaataqaat, “Ataneq, whangangwaa?”

²³ Jesus‑em kiimsiqii, “Uveghpagutiyaghqaq taananguuq neqni neptekanga sagneghmun whangamnun maligulluni.

²⁴ Ipapestaaq Ighnegha Yugem tuquyaghqaaguq Akuzitet Igaqegkat pinaqnillghistun. Iwernga seghleghwaaghunaqnguuq taana yuuk uveghpagutilghii Ighneghaneng Yugem! Itagnaghnayaghtuq allgeghumangisaqumi!”

²⁵ Uveghpagutistem Judas‑em aaptekaa, “Apeghtughista, whangangwaa?” Jesus‑em pikaa, “Taawa elpeneng apeghtuten.”

Atanghem Neghestillgha

²⁶ Neghuutnguluteng Jesus‑em tuguluku neqekrangllaq iqamsiqayugvikluku Kiyaghneq, aavgughluku tunquqii maligsaaghteni. Pikii, “Tuguluku neghiteggu, una yugusiqaqa.”

²⁷ Taagken tuguluku qayuusiq wine‑meng imalek iqamsiqayugvikluku Kiyaghneq tuunegkaa ellngitnun. Pikii, “Meghvikaataghteggu qamagllusi.

²⁸ Taana aakwaqa, taaggun Kiyaghneghem akequsaa apeghiighyaghqaaguq. Tuqukuma aakwa kuuvellequq uglapiglleghhiinun yugnun seghevutusiiluni seghleghqellghitnun.

²⁹ Ungipaatamsi, wine‑meng alla meghnaanghitunga kenlanga aghneghmi tawani, wine‑eghraghaghmeng meghelgusighlleqamsi Atama Ataneghpagullghani.”

³⁰ Taagken ilagaghluteng aanluteng Mount Olives‑mun pikat.

Jesus‑em Aapqanga Peter‑mun Nallunqelleqniluni

³¹ Taagken Jesus‑em pikii, “Unugmi whani, whanga apalluqlunga uniqaghaalleqaghpesinga, qayughllak Akuzitni Igaqegkani Kiyaghneq pikaaguq, ‘Tuqulleqaqa penniighniighta enkaam penniighet mingiqellequt.’

³² Iwernga unguvaghtestekanganga tuqulleghmeng sivugpesini aglaghllequnga Galilee‑mun.”

³³ Peter‑em pikaa Jesus, “Apalluqluten elpek qaywa ilama uniqaghaateghngaaten, whanga uninnaanghitngwaaghamken!”

³⁴ Jesus‑em pikaa, “Ipa ungipaatamken, unukun rooster‑a qalghightestegpenaan, pingayuneng ketwell nallunqelleqaghpenga.”

³⁵ Peter‑em pikaa, “Qaywa tuqumalgusighyaghngaamken, nallunqennaanghitamken.” Maligsaaghtetlu qamaglluteng ungipaatkaat tawaten.

Jesus Yughalghii Gethsemane‑mi

³⁶ Taagken Jesus‑enkut maligsaaghtekullghiit kaatkat tawavek atilqelghiimeng Gethsemane‑meng. Pikii, “Aqumuutek taaggun, ingavek yughaghyaghtuumalunga.”

³⁷ Tazingavek kelqegkii, Peter, Zebedee‑mllu ighneghqek. Taagken qivghughllagemllu seghleliighemllu kaatekestaqaa,

³⁸ enkaam pikii, “Qaamnaka qivghughllaguuq, repall tuquyaghqaaghllunga. Tawanllusi kelengalgusightengnga.”

³⁹ Tazingapighqaaghluni nunamun sikmuulluni yughaqaq, “Atamni, piyaghqaakan, meghenghillanga whaken qayuusimeng; iwernga nakaan piyukellemtun, elpek piyukelleghpetun pigu.”

⁴⁰ Taagken Jesus‑em takuyaqminiki pingayut maligsaaghteni qavaaftut. Enkaam Peter pikaa, “Kelengalgusighpagningitestengngaa ataasiq aflu?

⁴¹ Kelengatek, yughaghtek nanghiiqullengenghitesqellusi. Ipaapestaaq taghneghak piyaghqaaghngaaghmek, iwerngaqun yugusiq kayaatuq.”

⁴² Allameng Jesus tazingavek aglaghluni yughaqaq, “Atamni, meghyaghqaqngukumkun una qayuusiq elpek piyukelleghpetun apeghiighli.”

⁴³ Takunqigsaqminiki maligsaaghteni, taawa qavaatnguftut, qayughllak qavam sakniqestekangi.

⁴⁴ Jesus‑em unillaataghluki, tazingani pingayiqii yughalleni taakut ataasit yughat atuqluki.

⁴⁵ Taagken maligsaaghteni takuluki pikii, “Taawa qavaawaqetsii, meghnaaliiqetsii? Taawa aflu kaatuq, Ighnegha Yugem uveghpagusaghqaaghtuq seghleghqestenun.

⁴⁶ Nekevitek, igleghtelta. Ii‑i, uka uveghpagutisteka.”

Tugukangat Jesus

⁴⁷ Jesus paninang akuzimaluku, Judas kaatkaq, qula maalghuk siipneqluku maligsaaghtet ilangat. Yulghutet maligtekaat, ilangi savigpalighluteng, ilangi anagutalighluteng. Chief priest‑etlu, siivanlleghetlu kayagtekiit maligtesqelluku Judas.

⁴⁸ Uveghpagutistem Judas‑em kaatfagilgameng ilani salleghqamineng ungipaatkaqegkangi, “Yuuk naaghyaghqaqa ellnganguuq piyukegkaghsi. Tugunakesi.”

⁴⁹ Judas‑em takwaaghaghlluku Jesus pikaa, “Seghleghhalek, Apeghtughista!” Taagken naaqaa.

⁵⁰ Jesus‑em pikaa, “Ilakumtaamni, aga saaqsin pilleghqan pigu!” Taagken takuluku Jesus akuqaghluku nuqneghteqaat.

⁵¹ Tawani naliita yuget Jesus‑melnguut savigpani nusugluku kepqaghtekaa sigutnga High Priest‑em qepghaghtelaaghan.

⁵² Taagken Jesus‑em pikaa, “Savigpagen kanaghtigu qantaanun, qayughllak qamaglluteng savigpagmeng atuqilghiit savigpagkun tuqusaghqaagut.

⁵³ Sumeghpenii‑i Ataka kayutengllaghnaanghinniluku piziguu? Aaptekumkun tawaninginaq 72,000‑eneng uglalghiit yaqulelghuteghllaget pilluwaghtet kayaggnayaghii.

⁵⁴ Iwernga tawaten pinaanghitunga qayughllak Akuzitet Igaqegkat apeghiighyaghqaalghiit igaqelleghmegestun.”

⁵⁵ Taagken Jesus‑em yulghutet pikii, “Tuguyaghtughestengngaa savigpagtuumaghpesi, anagutaghtuumaghpesi, nikimqun wayaghniightestun ayuqlunga? Aghhutanga tamaghhaan aqumlunga apeghtughiiqunga Temple‑mi tugungigataghpesinga.

⁵⁶ Iwernga qamaglluteng tamaakut tawaten pinguut, apeghiighnaluki uuknaliqistet igaqegkiit Akuzitni Igaqegkani.” Taagken qamaglluteng maligsaaghtet unilluku qimaguutkat.

Jesus Agghistenun Aglaaskangat

⁵⁷ Taagken Jesus‑em tugustengita aglaatkaat High Priest‑em, Caiaphas‑em, mangteghaanun. Tawani apeghtughikayuget Liilightuusaneng, siivanlleghetlu qerngughutkat.

⁵⁸ Uyavaqaanlluni Peter‑em maligtekaa courtyard‑nganun High Priest‑em mangteghaan. Iteghluni aqumelgusiqii kelengakistet esghapagnaluku Jesus sayaghqaatangat.

⁵⁹ Chief priest‑etlu, qamagllutengllu agghistet iqlengiqutkestengnaqutkegkat Jesus tuqutestepigesnaghnaluku.

⁶⁰ Iwernga naalkunneghmeng aghtuqat. Qaywa uglalghiim esnevaghaqluteng aapghaataghyaghngaaghmegteggu aapqiit allakutkat. Qenwatlu yugek esnevaghlutek

⁶¹ pikak, “Una yuuk whaten pikaaguq, ‘Temple‑a naafqesaqlegwaaqa enkaam nekefleqaqa pingayani aghneghem.’”

⁶² Taagken High Priest‑em nekevluni aaptekaa Jesus, “Sameng piyaghqiisiin yugek apellghegkenun?”

⁶³ Iwernga Jesus qaalkaamangilnguq. Enkaam High Priest‑em aaplaataqaa, “Aatghakun Unguvalghiim Kiyaghneghem qelghamken ungipaatikut Christ‑anguziin? Ighneqaten Kiyaghneghem?”

⁶⁴ Jesus‑em kiimsiqaa, “Elpek pilleghpetun ayuquq. Iwernga ungipaatamsi, uum kingunganeng esghaghlleqaghsi Ighnegha Yugem aqumluni aghenqigneghakun Aghtughyaghqaanghilnguum, esghaghlleqaghsillu tagilghii qilawaaghitgun qilagam.”

⁶⁵ Taagken tawaten piyatni High Priest‑em aatkani piiguumiita pikaq, “Una yuuk Kiyaghneghuniluni pilghii! Alla liisimakistengisaghngaamta pilta. Legan whaa nagataghsi Kiyaghneghunilghii!

⁶⁶ Naten elpesi nanqigtesteggu?” Kiimsiqaat, “Tuqusaghqaaghsimaaq.”

⁶⁷ Taagken gginaakun qesiqukaat, tenglugpagaataqaatlu, enkaam qasaghtestengita

⁶⁸ pikaat, “Elpek Christ‑a uuknaliqutikut! Kitum tenglugtaten?”

Peter‑em Nallunqegkanga Jesus

⁶⁹ Tawaten taakut pimaluki courtyard‑mi Peter aqumgakaq. Qepghaghtem aghnaghaam takuluku pikaa, “Elpeklu Jesus‑metkaaguten, Galilee‑ghmiimi.”

⁷⁰ Iwernga Peter mesighaqaq sivungitni tamaakut pikaa, “Nallukaqa sameng piiquten.”

⁷¹ Aanyan courtyard‑em iteghviganun ilangan qepghaghtem aghnaghaam esghaghluku Peter, tawanlenguut pikii, “Una yuuk Jesus‑metkaaguq Nazareth‑eghmiimi.”

⁷² Peter mesighaghlaataqaq, “Ipapestaaq piimsi, Kiyaghneghem aatghakun nallukngwaaghaqa yuuk.”

⁷³ Mulunghituq, yuget nekevghataaghullghiit tagiluteng, Peter pikaat, “Ipa ilakaaten Jesus‑em malighsaghtengita qayughllak akuzillghen Galilee‑ghmiistun ayuquq!”

⁷⁴ Taagken Peter‑em pikii, “Ipapestaaq Kiyaghneghem aatghakun ungipaatamsi nallukngwaaghaqa yuuk! Iqlengiqngukuma Kiyaghneghem aghyuughlinga!” Tawaninginaq rooster‑a qalghiqaq.

⁷⁵ Taagken Peter‑em neqaatkaa Jesus‑em pillgha, “Rooster‑a qalghightestegpenaan pingayuneng nallunqelleqaghpenga.” Enkaam aanluni qiyaaghwaghllakaq.