Matthew 25 - New Testament-et Akuzipigestun

Jesus‑em Ungipaghaatkegkangi Qulaghyaget Aghnaghaat

¹ “Tawani pilleghmi Ataneghpagullgha Qilagem uspusaghqaaguq qulaghyagnun aghnaghaghnun kelqelluki kenelghutateng paayghilghiit nulightughnaqelghiimeng.

² Tallimat nalluuqat tallimat peghqinelghiit.

³ Nalluuqat kelqegkiit kenelghutateng uqughqangunaki,

⁴ iwernga peghqinelghiit kelqegkiit kenelghutateng uqughqalighluki.

⁵ Nulightughnaqelghii muluuqaq, qenwat aghnaghaat qavaghnikat enkaam qavatghutkat.

⁶ “Unugem qukaani kina akilghuukaq whaten, ‘Uka tagiiquq nulightughyaghqaq! Aanlusi payeghteggu!’

⁷ Aghnaghaat taghtughaghtaalluteng kenelghutateng kenghit nallghusaqiit.

⁸ Taagken nalluuqat pikat peghqinelghiinun, ‘Uqughqalitaghtikut, kenelghutaput qaamnaqut.’

⁹ Peghqinellghita pikiit, ‘Seghleghhalek tamaghhamnnun uqughqapagitukut, akilpegaghtenun tukfighiyaghtughtek.’

¹⁰ Enkaam nalluuqat uqughqangyaghtuutkat. Aviisimaluki nulightughnaqelghii kaatkaq. Taakut yataaghqengngalghiit itelgusiqaat nengughutem neqenghaghqellghanun, enkaam amik uumkaat.

¹¹ “Kingunganeng nalluuqat aghnaghaat kaalluteng, akilghuukat, ‘Ataneq, Ataneq! Qelpeghutaghtikut!’

¹² Iwernga nulightughnaqelghiim kiimsiqii, ‘Ipa ungipaatamsi, nallukamsi kinkungutsi.’”

¹³ Jesus‑em ungipaghaatni taaqniqaa whaten, “Enkaangam kelengatek, qayughllak nallukaghsi natungutanga aghneq nalighmeng natungutanga aflu Ighneghan Yugem tagilleghqaa.

Jesus‑em Unipaghaatkegkangi Pingayut Qepghaghtet

¹⁴ “Ataneghpagullgha Qilagem uspusaghqaaguq whavek ungipaghaatmun: Taawanguq yuuk igleghanaqelghii navek uyavanun. Tuqluqii qepghaghteni aviilleghmini aflengakistenguluki saghyaminun.

¹⁵ Ataasimun 5,000 manit tuunegkii, ilanganun 2,000, kingulighmun 1,000. Tamaghhiita tunquqii pillegtulngistun. Taagken aghulaqegkaq.

¹⁶ Yuuk taana 5,000‑nengegkaq, tawaninginaq aghulaqluni akiksaghqameng tukfightuqaq. Enkaam alla 5,000 allgeghtekaa.

¹⁷ Taanallu 2,000‑nengegkaq, allgeghutkaq alla 2,000‑meng.

¹⁸ Iwernga taana 1,000‑nengegkaq aanluni laagulluki iiqii umiilegmi maningi.

¹⁹ “Muluughllagluni qepghaghtet umiilgat uteghnighyami ungipaghsuqii samatangi manini.

²⁰ 5,000‑nengegkam esnevaghluni pikaa, ‘Umiilemni, tagivaqaqaten 5,000 manit. Taawa alla 5,000 allgeghsimaaqaa.’

²¹ Umiilgan pikaa, ‘Seghleghhalek itagnapigtuten, pinightuten ataasiighmelnguq qepghaghta! Ataasiighmetkaategpeneng palaghhaghnun aflengakistengughtesnaqamken uglalghiinun. Iitghi quyalgusighyaghtughnga!’

²² Taagken 2,000‑nengegkam esnevaghluni pikaa, ‘Umiilemni, tagivaqaqaten 2,000 manit. Taawa alla 2,000 allgeghsimaaqa.’

²³ Umiilgan pikaa, ‘Seghleghhalek itagnapigtuten, pinightuten ataasiighmelnguq qepghaghta! Ataasiighmetkaategpeneng palaghhaghnun aflengakistengughtesnaqamken uglalghiinun. Iitghi quyalgusighyaghtughnga!’

²⁴ Taagken 1,000‑nengegkam esnevaghluni pikaa, ‘Umiilemni, liisimakamken elpek aaghsaghqaanghituten. Unataghaquten piitesighaqaqenghilkegpeneng. Qerngughtaqaten piitkat piitutngit ifkaghquqaqenghilketeng.

²⁵ Enkaam alinglunga laagulluki maniten iiqaqanka. Ang, taawa elpek pin.’

²⁶ Iwernga umiilgan pikaa, ‘Uyuq seghleq, ighsanitalghii qepghaghta! Elpek piighpenga unataghaqnilunga piitesighaqaqenghilkemneng, qerngughtiiqnilungallu piitkaneng piitutngit ifkaghquqaqenghilkemneng.

²⁷ Sanganꞌngam manika kanaghhnanighsigu bank‑amun? Tawaten pikaqsaquvgu, uteghnillemni veghhnayaghaqa allgeghnelighluku.’

²⁸ Taagken umiilgem qepghaghteni pikii, ‘Tuguluku 1,000 maninga, tuuniteggu taamun 10,000‑nelegmun.

²⁹ Tamaakut pilget tuunataghaghyaghqaagut enkaam siiptiillequt. Iwernga taana avangilnguq pillgaayaghngaan iqisaghqaqiit ellnganeng.’

³⁰ Taagken umiilgem pikii, ‘Aanesteggu taana satngunghilnguq qepghaghta qagavek mamlegllagmun. Tawaani yuget qiyaaghwaghllagllequt, ggutetengllu terqitaagtaamiita.’

Kinguliq Nanqigtelleq

³¹ “Ighnegha Yugem tagikumi nighughqelleghmikun, yaqulegtuumaghllagmi, taagken aqumellequq nighughqengngalghiignekun aqumutagmikun.

³² Sivungakun qerngughutesleqiit qamagtengngwaaghluki nunam yugi. Taagken avughlleqii, katam penniighniightem avullghatun penniighet goat‑neng.

³³ Penniighet aghenqigneghminitesleqii, goat‑et saghumigneghmini.

³⁴ Taagken Umiilgem aghenqigneghminilnguut pilleqii, ‘Tagitek, Atama quyastekiitni, piliiteggu Ataneghpagulleq yataaghqegkaq elpesinun ima nuna ulimaaqngan.

³⁵ Iyatiqngulunga neghqegkaqaghpesinga; meqsugulunga meghsikaqaghpesinga; allaneghtaalunga upughatkaqaghpesinga.

³⁶ Amsikaghmellunga aasightuqaqaghpesinga, qinuyugulunga laalighfikegkaqaghpesinga, anusimingllaghaalunga esghaghyaghtuqaqaghpesinga.’

³⁷ Taagken elqughutngalghiit pilleqaat, ‘Ataneq, qavngaq iyatiqnguluten neghesiken, nalighmeng meqsuguluten meghsiziken?

³⁸ Qavngaq allaneghtaaluten upughasiken, nalighmeng amsikaghmelluten aasightughsiken?

³⁹ Qavngaq qinuyuguluten, nalighmeng anusimingllaghvigmelluten laalighfiksiken?’

⁴⁰ Umiilgem kiimsighlleqii, ‘Ipapestaaq ungipaatamsi, sangwaa alngunak pikaghsi ukalighpigaghnun anglegutemnun, whangamnun piiqasi!’

⁴¹ “Taagken Umiilgem saghumigneghminilnguut pilleqii, ‘Elpesinguut Kiyaghneghem aghyuughyaghqii. Awiitek whangamneng, aglaghtek kenlengilnguugnun kenghegnun Kiyaghneghem yataaghqegkaanun Tughneghaghmunllu, yaqulganunllu!

⁴² Iyatiqngulunga neghestellghitaghpesinga, meqsugulunga meghsillghitaghpesinga,

⁴³ allaneghtaalunga upughatellghitaghpesinga, amsikaghmellunga aasightuumangitaghpesinga. Qinuyugulungallu, anusimingllaghvigmellungallu laalighfikumangitaghpesinga.’

⁴⁴ Taagken pilleqaat, ‘Ataneq, qavngaq iyatiqnguluten, meqsuguluten, allaneghtaaluten, amsikaghmelluten, qinuyuguluten, nalighmeng anusimingllaghvigmelluten, kayusiisimangisiken?’

⁴⁵ Taagken Umiilgem kiimsighlleqii, ‘Ipapestaaq ungipaatamsi, tawaten pinghitelleghpesistun nalighhiiniitnun ukut ukalighpigaat, whanga pinghitaqaghpesinga.’

⁴⁶ Enkaam taakut aglaghllequt kenlengilngughmun aghyuulleghmun, iwernga elqughutngalghiit aglaghllequt kenlengilngughmun unguvalleghmun.”