Matthew 24 - New Testament-et Akuzipigestun

Jesus‑em Aapqanga Temple‑em Naavelleghqaa

¹ Jesus aanluni Temple‑meng aghulaqumaluku maligsaaghtengita takuluku kelgutkiit mangteghat Temple‑em pingi.

² Pikii, “Esghaghasi tamaakut mangteghat. Ipa piimsi, talwa ataasiq uyghak nemininnaanghituq. Qamaglluteng ulleghqughyaghqaagut.”

Seghleliillghetlu Amyuqetaatkellghetlu

³ Jesus aqumyan Mount Olives‑kun, maligsaaghtengita takuluku ellnginaghhaamaaghluteng aaptekaat, “Ungipaatikut, qakun tamaakut piyaghqaawat? Sangulleqa liisimakusighqaghput tagilleghqaghpenun, nunamllu iqugtelleghqaanun?”

⁴ Jesus‑em kiimsiqii, “Kelengalusi, kitumun alngunak puughtestegpenasi.

⁵ Qayughllak uglaapiglleghhii tagiyaghqaaguq atuqluku aatqa, whaten piiqluteng, ‘Whanga Christ‑anguunga’, puughqughtaayaghqaqaatlu yulghun.

⁶ Nagaquullequsi pilluwaneng, akusqaghtaatkellghitnengllu pilluwat; alingegpenasi qayughllak tamaana piyaghqaaguq. Iwernga salin iquggnaqngunghituq.

⁷ Nunat yugit pillugutullequt, ataneghpagullghetlu pillugutullequt, nani alngunak neqangisagllagllequq, nunat uvelegtaghllagllequt.

⁸ Qamaglluni tamaana aghnam ighniyukestallghatun ayuqellequq.

⁹ “Taagken tamaana pimaluku yuget tugulleqiisi, amyuqetaatkelleqiisi, tuqulleqiisillu. Nunataghhaan tamaghhaan ramkengan ugumiilleqiisi whanga apalluqlunga.

¹⁰ Enkaam uglaapiglleghhiim ugpeqnanighlleqaatnga, uveghpagutusagullequt, ugumiisagullequtlu.

¹¹ Taagken uuknaliqistesighwaalghutet tagiluteng puughqughlleqiit yulghutet.

¹² Seghleq nulam angtalanganeng apalluqluku allulluteng yuget piniqinanighllequt.

¹³ Iwernga kina alngunak nuqenneghtuqaq kenlemun yugulillengyaghqaaguq.

¹⁴ Ukutlu Pinilghiit Ungipat Kiyaghneghem Ataneghpagullghaneng ayuqelghiit ungipaqsaghqaagut nunataghhaani tamaghhaani ramkengitnun nagaqiisqelluki. Taagken nuna iqugllequq.”

Jesus‑em Aapqanga Seghleliilleghqaghllak

¹⁵ “Yeqay atightughtem liigikligu sameng pisiitanga uuknaliqistem Daniel‑em uuknaliqutkegkaa. Uuknaliqutkegkaa taana agleghniilnguuguq paaghqiitestilghii agleghnalghiimi nemi. Esghaqufsigu tesqamani nekevelghii,

¹⁶ Judea‑melnguut anagniighhaat naayghanun.

¹⁷ Yuuk mangtegham qaaynganilnguq ukigluni saghyaqufqaami pilghaaq.

¹⁸ Yuuk piitesiighaghvigmelnguq qaaslighqufqaami pilghaaq.

¹⁹ Tamaani aghneghni seghleghwaaghunaqnguut qumilget aghnat, mamaghtalgetlu!

²⁰ Yughaghtek anagniifqaafsi uksumi pisqellusi nalighmeng Sabbath‑mi,

²¹ qayughllak tamaani seghleliiq elngaatall seghleghllagughsaghqaaguq. Seghleghataghaayaghqaaguq seghleliighaqelleghneng ima piinlighyuggaallghaneng nunam whavemun kenlanga. Allamengllu tawatelnguq pinaanghitngwaaghtuq.

²² Tamaakut aghneghet Kiyaghneghem palallimangisaqaki, kina alngunak unguvanayanghituq. Iwernga apalluqluki nakmikegkani aghneghet palalliyaghqaqii.

²³ “Tamaani kitum alngunak pikangisi, ‘Ii‑i, Christ‑a whaa’, nalighmeng, ‘Tazingantuq!’ ugpeqegpenaan,

²⁴ qayughllak Christ‑asighwaaghetlu, uuknaliqistesighwaaghetlu tagillequt. Allaaghlluwhaghtighllagllequt, saghiighanaghqeghllagllequtlu puughhnaluki yuget, talwa Kiyaghneghem nakmikegkii puughsaqlegukumegteki.

²⁵ Taawa ungipaatamsi sivutghulluku pilleghqaq.

²⁶ “Enkaangam whaten pikangisi, ‘Ii‑i, Christ‑a paaghqillghanituq!’ takugpenaan; nalighmeng whaten pikata, ‘Ii‑i, mangtegham ilunganituq’, ugpeqegpenaki.

²⁷ Qayughllak Ighnegha Yugem tagikumi tawatesaghqaaguq nighugpaguutelleghtun kuukgullequq asivaghmeng pakfallamun.

²⁸ “Qawaagpaget qerngughtaqut nani alngunak kemegqwaalgunghani.

Tagilleghqaa Ighneghan Yugem

²⁹ “‘Kingungiighhiitneng tamaakut seghleliilleghllaget Kiyaghneghem siqineq mamlegtesleqaa, tanqiq nighugunnanightesleqaa, ighaleqetaaghet ifkaquutesleqii qilagameng, aghtughyaghqaanghillghet qilagamelnguut igleghallghit allangughquutesleqii.’

³⁰ “Taagken qilagakun sangwaa allgeghllequq liisimakusighqaq Ighneghaneng Yugem. Taagken qamagtengngwaaghluteng nunam ramkengi qivghum qiyaaghuuteghllagllequt. Esghaghlleqaat Ighnegha Yugem tagilghii qilagwaaghteggun, aghtughyaghqaanghilleghtuumaghmillu nighughqellelighllaglunillu.

³¹ Enkaam Ighneghan Yugem qalghightaan qalghightesteghllakumigu kayaglleqii yaquleni navek alngunak qerngughtesqelluki nakmikegkani nunataghhaaneng tamaghhaaneng.

Figs‑em Uqfiga Liitfiksaghqaq

³² “Liitfikiteggu uqfiga figs‑em. Esghaqufsiki avayii uniilliighalghiit, ququngii piitekestalghiit, liisimakaghsi kiigyaghtungestaghaa.

³³ Tawateghpigaq qamagtengngwaaghluki aapqanka tamaakut esghaqufsiki, liisimakelleqaghsi ellnga kaasaghtungestaamaaq, aaqun amigmun lliighumaaq.

³⁴ Ipa ungipaatamsi, maaten unguvalghiit tuqulaghaatestegpenaki qamaglluteng tamaakut piyaghqaagut.

³⁵ Qilagallu, nunallu aviighusaghqaaguk, iwernga whanga akuzitenka aviighunnaanghitut.

Kelengakluku Tagilleghqaa

³⁶ “Kitum alngunak nallukaa taam aghneghem aflunga qakun kaasaghqaatanga. Talwa qilagmelnguut yaqulget nallukaat, Ighneghemllu nallukaa, Atanginaghhaam liisimakaa.

³⁷ Katam tamaani Noah‑m kiyaghtellghani, yuget tawatesaghqaagut Ighneghan Yugem tagilleghqaani.

³⁸ Tamaani aghneghni, sivungani ulevem yuget neghaqluteng, meghaqluteng, nengughutaqluteng ayuqegkat kenlanga tawavek aghneghmun Noah‑nkut itellghitnun ark‑mun.

³⁹ Nallukegkaat natesaghqaatanga kenlanga ulevelleghmun, enkaam qamagtengngwaaghluteng tuqulaghaatkat. Tawateghpigaq Ighnegha Yugem tagikan, nallukelleqaat natesaghqaatanga.

⁴⁰ Tawani pilleghmi maalghuk yugek piitesiighaghvigmegni qepghaatek, aallgha tugulleqaa, ilanga uneglleqaa.

⁴¹ Aghnak kagimtilghiik grain‑meng, aallgha tugulleqaa, ilanga uneglleqaa.

⁴² “Enkaangam kelengalusi, qayughllak nallukngwaaghaghsi nani aghneghmi Ataneghpesi tagilleghqaa.

⁴³ Nalluneqniituq, mangtegham yugan liisimaksaqumigu teglegniightem tagilleghqaa, qavaghpenani kelenganayaghtuq naafqulluni iteghnayukan mangteghaminun.

⁴⁴ Enkaam tamaaken apalluqluku elpesillu apeghiighsaghlusi quunpeng, qayughllak Ighnegha Yugem tagiyaghqaaguq waakenghillghaghllusi.

Qepghaghta Ataasiighmelnguq Nalighmeng Ataasiighmenneghilnguq

⁴⁵ “Kinangaawa ataasiighmelnguq peghqinelghii qepghaghta? Taananguuq umiilgan igleghutistengllaqaa qepghaghtelgutanganun, neqelitaatiisqellukillu aghhutanga tamaghhaan.

⁴⁶ Taana qepghaghta quyastellengyaghqaaguq umiilgan kaalluni esghaqumigu qelelleghmitun pilghii.

⁴⁷ Ipa ungipaatamsi, taana qepghaghta umiilgan aflengakistengllaghyaghqaqaa saminun tamaghhaanun.

⁴⁸ Iwernga taana qepghaghta seghleghukumi sumeghtaghaghllequq whaten, ‘Umiilka tagilghaghtughnaanghituq’,

⁴⁹ enkaam amyuutkesagulleqii qepghaghtelgutni. Ilallequqlu suumelghiinun, neghelgusighaqluki, meghelgusighaqluki lliighllequq.

⁵⁰ Taagken ataasimi aghneghmi umiilga kaallequq qepghaghta yataaghqellghillukullu, sighimakellghillukullu.

⁵¹ Enkaam umiilgan qevuulluku aghyuughlleqaa, aglaghtesleqaa piniiyugneghnun aghyuughyaghqaaluku maligulluku. Tawani qiyiqellequt, gguteteng terqitaagtaamiita.