Matthew 22 - New Testament-et Akuzipigestun

Jesus‑em Ungipaghaatkegkanga Nengughhnaqelghiim Neqenghaghqellgha

¹ Taagken Jesus‑em apeghtughlaataqii taakut yuget ungipaghaatetgun. Pikaq,

² “Ataneghpagullgha Qilagem whatetuq, umiilgem ighneni nengughhnaqelghii yataaghqutkaa neqenghaghqunnaluku.

³ Qepghaghteni kayagtekii ungipaasaghtiisqelluki tagsiqliqat nengughutem neqenghaghqellghanun tagilaghaatesqelluki, iwernga tagiyunghitkat.

⁴ Taagken umiilgem pikii ilangi qepghaghteni, ‘Ungipaasaghtughteki tagsiqliqanka neqenghaghqellemnun, neghyaghqanꞌnguq apeghiightut. Tuqutiightesimaanka yugtaaneghneng teghikusaneng, quwintalghiinengllu nughaghneng. Enkaam sangwaa qamaglluni apeghiightuq. Tagilinꞌnguq nengughutem neqenghaghqellghanun!’

⁵ Iwernga aqelqaghqat tagsiqliqiit waakumangilnguut. Yeghlegi navek sayaghtuutkat, ataasiq piitesighaghvigminun pikaq, ilanga estugaghminun,

⁶ umiilgem qepghaghtengi ilangita akuqaghluki sakusiiqluki tuququqiit.

⁷ Umiilek sakriteghllakaq enkaam pilluwaghteni kayagtekii. Tuququqiit yugtaqat, kumaghtekaatlu nengat.

⁸ Taagken qepghaghteni pikii, ‘Nengughhnaqem neqenghaghqusighqii apeghiightut. Aqelqangllaqaqsaqenka seghletun pikaatmeggneng tagipagningitut.

⁹ Enkaangam aanlusi tumenun nallaqasi qamaglluki yuget neqenghaghqesaghtiisqiteki.’

¹⁰ Qepghaghtet aanluteng tumeni qamaglluki nallaqateng seghleghuyaghngaata, pinighyaghngaata neghyaghtiisqegkiit, enkaam nengughutfik esleqaghaghtekaq.

¹¹ “Umiilgem esghaghyaghtughyaqminiki aqelqat, esghaqaa yuuk aasimangilnguq nengughhnaqelghiim aatkaaneng.

¹² Enkaam aaptekaa, ‘Ilakumtaamni, naten iteghsin nengughhnaqelghiim aatkaaneng aategpenang?’ Yugem kiimsighpagningitkaa.

¹³ Taagken umiilgem qepghaghtet pikii, ‘Iiggillu, itegiillu asighlluki qagavek mamlegmun miluuteggu, tawani yuget qiyallequt ggutetengllu terqitaagtaghlleqiit.’”

¹⁴ Jesus‑em taaqniqii akuzilleni whaten, “Uglapestaaq tagsiqliqaaghngaan, iwernga palaghhaagut nakmikegkat.”

Aapqughwaalleq Tax‑meng

¹⁵ Taagken Pharisees‑et unilluku Jesus agghitkat naten anagniilqavigighnaluku Jesus akuzillghakun.

¹⁶ Enkaam kayagtekiit ilangi maligsaaghteteng, ilangillu Herodian‑et Jesus‑mun. Whaten pikaat, “Apeghtughista, liisimakamken akuziiquten ipanguluku. Apeghtuusanllu naten Kiyaghneghem kiyaghtesqesullgha ipanguuq. Aangwaaghuyaghngaata, ukavansaghngaata paninang apeghtughaqaten tawateghpigaq.

¹⁷ Enkaam ungipaataghtikut naten sumeghtaghalleghpeneng. Kiyaghneghem Liilightuusaani elqughutngaa llivikilleghqaghput tax‑emeng Caesar‑mun? Llivikiltaa‑a nalighmeng pinghitelta?”

¹⁸ Jesus‑em liisimakegkii seghletun piyugukangat, enkaam pikii, “Piniiyugneghni elpesi! Sangama anagniilqavigighnaqutkestengnga?

¹⁹ Kelguvikitengnga manimeng tax‑mun llivikisighqameng.” Enkaam tagitkaat manimeng.

²⁰ Taagken aaptekii, “Kitum gginaqagu una? Kitum aatqagu una?”

²¹ Kiimsiqaat, “Caesar‑em.” Enkaangam Jesus‑em pikii, “Tuuniteki Caesar‑mun tamaakut Caesar‑em pingi, tuuniteki Kiyaghneghmun tamaakut Kiyaghneghem pingi.”

²² Nagasamegteggu saghiighayukat taagken unilluku aghulaqegkat.

Sadducees‑et Anagniilqavigighnaqutkegkangat Jesus

²³ Tawani aghneghmi Sadducees‑et aapsaghtuqaat Jesus. Tamaakunguut ugpeqingigalnguut tuqukat unguvaghtekayugutangi.

²⁴ Pikaat, “Apeghtughista, Moses‑em Liilightuusii pikaagut, ‘Yuuk nulightughluni tuqukan avaqutigpenani, anglegutangan tuguyaghqaqaa ugingighaq avaqutinnaluku anglegutni tuqukaq.’

²⁵ Maansaghtut maaghraghvinlek yuget anglegutkullghiit. Nuyekliq nulightughluni avaqutigpenani tuqukaaguq. Enkaam nulighha anglegutangan tugukaa.

²⁶ Tuunglighhaallu anglegutanga tuquuq avaqutigpenani. Enkaam pingayaan anglegutangan tugaa taana aghnaq. Qamaglluteng tugaaqluku tuqulaghaatut avaqutigpenateng.

²⁷ Kinguliiluni aghnaq tuqukaaguq.

²⁸ Ungipaataghtikut, unguvaghtuutellghem aghneghani kitum aghnaq nulighqelleqagu, qamagllutengqun tugukaqegkangat?”

²⁹ Jesus‑em kiimsiqii, “Anaggutngaasi qayughllak liigikigatasi Akuzitet Igaqegkat, talwa aghtughyaghqaanghillgha Kiyaghneghem.

³⁰ Tuqukat unguvaghtuuskumeng nengughusaghqaanghitut, yaqulgestun qilagmelngughestun.

³¹ Atightiigastegguu Kiyaghneghem apellgha elpesinun tuqukat unguvaghtuutelleghqiitneng? Whaten pikaaguq,

³² ‘Kiyaghneqaanga Abraham‑em, Kiyaghneqaanga Isaac‑em, Kiyaghneqaangallu Jacob‑em.’ Kiyaghneq Kiyaghneqaat unguvalghiit, nakaan tuqukat.”

³³ Jesus‑em apeghtughillgha yulghuteghllaget nagalluku, saghiighayaguteghllakaat.

Angelleghpigaq Liilightuusaq

³⁴ Pharisees‑et nagaqughyamegteki Sadducees‑et Jesus‑mun nepiighqwaaniluki qerngughutkat.

³⁵ Ataasim Pharisees‑em apeghtughistengan Liilightuusat aapqughaaqaa Jesus anagniilqavigighnaluku.

³⁶ Whaten aaptekaa, “Apeghtughista, natungaawa angelleghpigaq Liilightuusani?”

³⁷ Jesus‑em kiimsiqaa, “‘Ataneq Kiyaghneghen piniqsaghqaqan qamaglluku ilugpegun, qamaglluku unguvasighpegun, qamaglluku umyugaghpegun.’

³⁸ Taana angelleghpigaaguqlu, megnunalleghpigaaguqlu Liilightuusaq.

³⁹ Tuunglighhaa angelleghpigaq Liilightuusaq sivulightun ayuquq: ‘Piniqsaghqaqaten yulguteten piniqelleghpetun elpeneng katam.’

⁴⁰ Taakuk Liilightuusak tunemaaguk tamaghhitnun Liilightuusanunllu, apeghtuusiitnunllu uuknaliqistet.”

Aapqughwaalleq Christ‑ameng

⁴¹ Taagken Jesus‑em aaptekii Pharisees‑et qerngughutngamaluki,

⁴² “Naten sumeghtaghaatkaqesteggu Christ‑a? Kitum ighneqagu?” Kiimsiqaat, “Ighneqaa David‑em.”

⁴³ Jesus‑em aaptekii, “Sanganꞌngam David‑em akuziiqngami Agleghnalghiignekun Taghneghagnekun atightagu, ‘Ataneghmeng’? Whaten pikaalghii,

⁴⁴ ‘Atanghem pii Atanqa, Aqumi aghenqignemkun, kenlanga anguyagten itegaghpek asinganun lliightellemnun.’

⁴⁵ David‑em atiimakagu, ‘Ataneghmeng’ naten ighneqagu?”

⁴⁶ Nalighhiiniita Pharisees‑et kiimsighpagningitkaat Jesus. Taagken kenlekluku kitum alngunak tetugyagutkaat aapneghmeng.