Matthew 21 - New Testament-et Akuzipigestun

Jesus‑em Kaatellgha Jerusalem‑emun

¹ Jesus‑enkut maligsaaghtekullghiit tughaaghyalghiimeng Jerusalem‑emun, kaatkaat Bethphage‑mun Mount Olives‑melngughmun. Tawani kayagtekakek maalghuk maligsaaghtegni igleghtekestiisqellukek.

² Whaten pikakek, “Ingavek nenun aglaghlutek tawaninginaq esghaghlleqaghtek petugngalghii donkey nughalek. Itemllukek taginnakegtek whangamnun.

³ Kitum alngunak sameng pikangistek, whaten pinaketek, ‘Atanghem aklukaak.’ Tawaninginaq tagitesleqaak whangamnun.”

⁴ Whaten pikaaftuq apeghiighnaluku uuknaliqistem pillgha,

⁵ “Ungipaasaghtughqi, Zion‑eghmiit, ‘Esghaqaghtegguqun, umiilegpesi takwaaqiisi. Qusevegngaaq donkey‑kun igleghtaquq, donkey‑m nughaakun.’”

⁶ Enkaam maligsaaghtek igleghtekestaghlutek sivungitni, Jesus‑em pisqellghatun pikak.

⁷ Donkey nughaghtuumaan tagitkaak Jesus‑mun. Qaasliit aatkateng mataghlluki teghikusak qaayngitgun llikiit. Taagken Jesus aqumegkaq.

⁸ Yulghuteghllagem tumetgun aatkateng saagtekiit, enkaam ilangi uqfigem avayaaneng ikutaqluteng tumet llilaghtughvikegkiit.

⁹ Yulghuteghlaget Jesus‑em sivunganilnguutlu kingunganilnguutlu akilghuutkat, “Usuqnaghhalek Ighnegha David‑em! Kiyaghneghem quyasligu tagilghii aatghakun Atanghem! Usuqilleq qilagmelngughmun!”

¹⁰ Jesus iteghyan Jerusalem‑emun, qamaglluteng Jerusalem‑eghmiit kagaygunneqegsaatkat whaten pimaghmeng, “Kinangaawa una yuuk?”

¹¹ Jesus‑em maligtestengita yulghuteghllaget kiimsiqiit, “Jesus‑nguuq, uuknaliqista, Nazareth‑meng Galilee‑melngughmeng pinguuq.”

Jesus Temple‑mun Pilghii

¹² Jesus Temple‑mun iteghluni aanesquqii qamaglluki tukfightulghiitlu, akikulghiitlu. Taagken manimeng naveghqughtetlu tipelngit ulleghquqii, aqumutiitlu qawaagmeng akilpegaghtet.

¹³ Enkaam pikii, “Igaqngaaq Akuzitni Igaqegkani, ‘Mangteghama atilqesaghqaqaa, Yughaghvik.’ Iwernga elpesi iighaghvigughtaghsi teglegniightenun!”

¹⁴ Taagken ayaakatlu, ighullugmelnguutlu takukaat Jesus Temple‑mun, enkaam naallghuquqii.

¹⁵ Chief priest‑etlu apeghtughikayugetlu Liilightuusaneng esghapagluki allaaghlluwhaghtillghi Jesus‑em, nagallukillu taghnughhaat Temple‑mi akilghuulghiit whaten, “Usuqilleq Ighneghanun David‑em!” elngaatall ugumiyukat.

¹⁶ Enkaam Jesus aaptekaat, “Naganneghisikii taghnughhaat sameng pitangi?” Jesus‑em kiimsiqii, “Aa‑a, nagatanka. Atightiigastegguu Akuzitet Igaqegkat pillghit, ‘Qaanghitgun taghnughhaatlu allgenghhaghhaatlu yataaghqegkaqan usuqilleq elpenun katam?’”

¹⁷ Taagken Jesus‑em unilluki, Jerusalem‑emeng Bethany‑tkaq qavaghnaluni tamaani.

Jesus‑em Palightestekanga Uqfik

¹⁸ Jesus unaanguluku uteghniitkelluku Jerusalem‑emun iyataqaq.

¹⁹ Tumet saaghwitni esghaqaa figs‑em uqfiga. Takuluku piyaqminigu ququngaraaghinaaftuq figs‑ngunani. Enkaam uqfik tawavek pikaa, “Allamengllu piitestinaanghituten.” Tawaninginaq uqfik paliqaq.

²⁰ Maligsaaghtet tawaten pilghii esghapagluku, saghiighayugutkelluku aaptekaat, “Naten uqfik sukatepiglluni palighta?”

²¹ Jesus‑em kiimsiqii, “Ipa piimsi, malghuklillngunaan ugpeqillelgukufsi, whangamtun pillequsi, esghapalleghpesistun figs‑em uqfiga. Tawatenginaq pinaanghitusi talwa una naayghaq kayagtekufsigu, ‘Iikluten elpeneng meghmun miluuten’, legan pillequq.

²² Sameng alngunak aaptekufsi yughakun ugpeqillelgukufsi allgeghusaghqaagusi.”

Igleghutistet Aapqughaaqangat Jesus

²³ Jesus kaalluni Jerusalem‑emun Temple‑mun iitqaq. Apeghtughimaluku, chief priest‑etlu, siivanlleghetlu takuluku aaptekaat, “Ungipaatikut kitum qeleghtaten tawaten pisqelluten, nalighmeng kitum qelellghakun tawaten pinguzin?”

²⁴ Jesus‑em kiimsiqii, “Whangallu aapnaqamsi. Kiimsiqufsinga whangallu ungipaalleqamsi kitumun qelghumatka.

²⁵ Kitum qeleghtagu John paaptaayeghisqelluku? Kiyaghneghtaawaa nalighmeng yugmeng pingwaa?” Taagken ellmeggneng akuzimghhutkat, “Sameng pinaqesteggu? Kiimsiqumteggu Kiyaghneghmeng pinguniluku, whaten pilleqiinkut, ‘Sanganꞌngam ugpeqenghisteggu John?’

²⁶ Iwernga, ‘Yugmeng pingunikumteggu’, qemall yulghutet salleqiinkut, qayughllak qamaglluteng ugpeqegkaat John uuknaliqistenguniluku.”

²⁷ Enkaam kiimsiqaat Jesus, “Nallukaghput.” Jesus‑em pikii, “Whangallu ungipaannaanghitamsi kitumun qelellengegkaatka tawaten pillemnun.”

Jesus‑em Ungipaghaatkegkek Yugem Ighneghqek

²⁸ Taagken Jesus‑em aaptekii, “Naten una sumeghtaghaatkelleqesteggu? Yugnguq taawa maalghugegneng ighnelek. Sivulighmun piluni pikaa, ‘Ighnemni, aghneghmi whani grapes‑meng piitesighaghvimnun qepghaghyaghhaaten!’

²⁹ Ighneghan pikaa, ‘Wiin piyunghitunga.’ Iwernga aghneghmi taakwani avuteghqelluni qepghaghyaqaq.

³⁰ Taagken tuunglighhaanun ighneghmi piluni, tawateghpigaq pikaa. Ighneghan pikaa, ‘Aa‑a, pillequnga’, iwernga pimangilnguq.”

³¹ Jesus‑em aaptekii, “Naliim ighneghan qaatkegkaqagu atani?” Kiimsiqaat, “Sivuliim.” Enkaam Jesus‑em pikii, “Ungipaatamsi tax‑meng qerngughtestetlu, aghnatlu akikikayuget yugusimeggneng sivugpesini iteghaatnguut Ataneghpagullghanun Kiyaghneghem.

³² John‑em Paaptaayestem ungipaasaghtuqaqiisi naten kiyaghtelleghqameng Kiyaghneghem piyukellghatun, iwernga ugpequmangitaghsi. Naqam tax‑meng qerngughtistetlu, aghnatlu akikikayuget yugusimeggneng ugpeqegkaqaat. Talwa kingunganeng esghapakaqeghngaaghpesiki ugpeqegkangat John, paninang elpesi avuteghqellusillu seghleghqennanillghitusi, ugpequmangitaghsillu.”

Jesus‑em Ungipaghaatkegkangi Seghleghet Piitesighaghtet

³³ Jesus‑em pikii, “Ilanga ungipaghaan nagateggu. Taawanguq yuuk piitesighaqaq grapes‑meng nunamikun. Minglluluku, laagutkakek grapes‑mun qageghquusik, nekeftekaallu uusqalghii kelengakivigkaq. Taagken navghitkaa grapes‑meng piitesighaghvini piitesighaghtenun aflengakesqelluku. Taagken ellnga ilanganun nunam aglaqaq.

³⁴ Saghnayaghqaaghsata grapes‑et, piitesighaghvilgem qepghaghteni kayagtekii nengini aqfasqelluki.

³⁵ Iwernga piitesighaghtet akuqaghluki qepghaghtet, ataasiq anaguleghtaakaat, ilanga tuqutkaat, pingayaat milughpagaataghhiinaq tuqutkaat.

³⁶ Qepghaghtemi ilangi kayagllaataqii, sivulighneng uglaghataghaghluki, ellngitlu tawatengwaaq pilaataqiit.

³⁷ Qenwat ighneni kayagtekaa ellngitnun, whaten pimaghmi, ‘Ipapestaaq siivakelleqaat ighneqa.’

³⁸ Iwernga piitesighaghtet esghaghluku piitesighaghvilgem ighnegha whaten pikat, ‘Uum ighneghan piliilleqaa una nuna atani tuqukan. Tuquskumteggu whangkuta piliilleqaghput una grapes‑meng piitesighaghvik.’

³⁹ Enkaangam akuqaghluku, piitesighaghvigmeng miluulluku tuqutkaat.”

⁴⁰ Jesus‑em aaptekii, “Piitesighaghvilgem tagikumi salleqaki piitesighaghtet?”

⁴¹ Chief priest‑etlu siivanlleghetlu kiimsiqaat, “Seghlepestaatun tuqulleqii taakut seghleghet yuget. Taagken navghilleqaa piitesighaghvini allanun piitesighaghtenun. Saghnalleghqaq kaaskan nengiilleqaat.”

⁴² Jesus‑em pikii, “Atightiigastekii Akuzitet Igaqegkat whaten pillghit? ‘Uyghak taana mangteghangllaghtet ighsakegkaat megnunalleghpigaaghtekaaguq uyghak. Taana Atanghem pilqaa, urang pinilleghpigaaguq whangkunnun!’

⁴³ “Enkaangam ungipaatamsi, Ataneghpagullgha Kiyaghneghem elpesineng awisaghqaaguq, enkaam tuunyaghqaaguq yugnun piitestiyaghqanun fruit‑nganeng Ataneghpagullghem.”

⁴⁴ “Kina alngunak taaggun uyghagkun iqukumi, pelimyaghqaaguq. Kina alngunak taam uyghagem ifkaghvikegkumigu siftaaghqelleqaa.”

⁴⁵ Chief priest‑etlu Pharisees‑etlu nagalluki Jesus‑em ungipaghaatangi liigikegkat Jesus‑emnguq ellngit akuzitkaqeftii.

⁴⁶ Enkaam tuguyukaqsaqangat, iwernga alingegkat yulghuteghllagneng qayughllak ugpeqegkangat Jesus uuknaliqistenguniluku.