Matthew 2 - New Testament-et Akuzipigestun

Ighaleqetaaghneng Liitkaghllaget Esghaghyaghtuqangat Jesus

¹ Jesus allgeghaqngan Bethlehem‑emi Judea‑melngughmi, Herod umiilgulghii. Allgellghan kingunganeng ighaleqetaaghneng liitkaghllaget asivaghmeng kaatkat Jerusalem‑emun.

² Aapqughwaaqat, “Naagu taghnughhaq allgelghii umiilgat Jews‑et? Ighaleqetaagha esghaamaaghput asivaghmelluku enkaam manigughyaghtughaqaghput.”

³ Umiilgem Herod‑em nagaqughluku teggellghiighllakaq, qamagtengngwaaghlutengllu Jerusalem‑eghmiit maligulluteng.

⁴ Tagsiqlighteghluki qamaglluki chief priest‑etlu, apeghtughikayugetlu Liilightuusaneng aaptekii, “Nani Christ‑a allgeghyaghqaawa?”

⁵ Kiimsiqaat, “Bethlehem‑emi Judea‑melngughmi. Uuknaliqistem whaten igaqegkaqaa:

⁶ ‘Elpek Bethlehem, Judah‑melnguq, igleghutisteyaggiitneng Judah‑m ukavantelleghpigaanghituten, qayughllak elpeneng taginaqnguuq igleghutista, igleghutiyaghqaq yumneng Israel‑eghmiineng.’”

⁷ Taagken Herod‑em aksaqluku tagsiqliqii ighaleqetaaghneng liitkaghllaget, liigiknaluku qavngaq aliighyuwhaaqaatanga ighaleqetaaq.

⁸ Taagken pikii, “Bethlehem‑emun aghulaqlusi elngaatall ivaghteggu taghnughhaq. Naalkegkufsigu ungipaasaghtughnakefsinga, whangallu manigughyaghtughlleqaqa.”

^9-10 Tawaten umiilgem piyisteng igleghtekat. Esghaghlaataqaat ataasiq taana ighaleqetaaq asivaghmelluku, enkaam elngaatall quyateghllakat. Maligtekaat kenlanga aghuliillghanun taghnughhaam nengan quulngani.

¹¹ Iteghluteng mangteghamun esghaqaat taghnughhaq, naangallu Mary. Segesqughquulluteng maniguqaat. Taagken aqeftaghaateng qelpeghlluki tunquqaat tunusameng: gold‑meng, frankincense‑meng, myrrh‑meng.

¹² Taagken Kiyaghneghem qavangukun yitkii Herod‑mun uteghnifqiita pisqelluki enkaam aglaqat nunameggnun allatgun tumetgun.

Joseph‑enkut Qimallghat Egypt‑mun

¹³ Ighaleqetaaghneng liitkaghllaget aghulaqsata, qavangukun Atanghem yaqulgan aliighvikluku Joseph pikaa, “Makelluten taghnughhaqlu naangallu anagutikek Egypt‑mun. Tamaanlleghhaten uteghniisqellemnun kenlanga qayughllak Herod‑em ivaghtesnaqaa taghnughhaq tuqutesnaluku.”

¹⁴ Enkaam unugmi tawani Joseph‑em makelluni aghulaqutkakek taghnughhaqlu naangallu Egypt‑mun.

¹⁵ Tamaantekat kenlanga Herod‑em tuqullghanun. Enkaam apeghiiqaaguq Atanghem akuzitkegkaa uuknaliqistekun whaten, “Tuqluqaqaqa ighneqa tagisqelluku Egypt‑meng.”

Taghnughhaghneng Tuququllghat

¹⁶ Herod‑em liigiksamigu ighaleqetaaghneng liitkaghllagnun puughsimaniluni sakriteghllakaq. Taagken pilluwaghtet kayagtekii Bethlehem‑emun, uvitanganunllu tuquqiisqelluki qamaglluki mekelghiighhaat allgenghhaghhaghneng, maalghugegnun ayumiqulleghtutkalghiinun kenlanga. Tamaakut taghnughhaat nakmikegkaqii qayughllak ighaleqetaaghem allgellghaneng maalghugughlleghhiik ayumiqullghek, ighaleqetaaghneng liitkaghllaget apellghitni.

¹⁷ Tawaten pilleghqun uuknaliqistem Jeremiah‑am uuknaliqellgha apeghiiqaq:

¹⁸ “Ramah‑mi nagaquqaat leghaghllagaataq. Rachel‑nguftuq qiyalghii avaqutaminun, repall ilutughsaghyaghqaaghhaagpenani, qayughllak qamaglluteng tuqulaghaatkat.”

Joseph‑enkut Uteghnilghiit Israel‑mun

¹⁹ Joseph‑enkut Egypt‑melluki Herod tuqukaq, qavangukun Atanghem yaqulgan aliighvikegkaa Joseph

²⁰ pikaa, “Makelluten taghnughhaqlu naangallu uteghniitikek Israel‑mun, qayughllak tuqutinaqsalghiit taghnughhaghmeng tuqulaghaasimaat.”

²¹ Enkaam Joseph‑em makelluni taghnughhaqlu naangallu aglaatkakek Israel‑mun.

^22-23 Iwernga Joseph‑em nagaqughluku nutaghaq umiilga Judea‑m, Archelaus‑nguniluku Herod‑em ighnegha, alingegkaq tawavek aglaneghmeng. Qavangukun Kiyaghneghem ungipaatkaa Joseph Judea‑tefqaan pisqelluku, enkaam Nazareth‑mun aglaqat Galilee‑melngughmun. Tamaantekat uuknaliqistet whaten pillghat, apeghiighesqelluku, “Messiah Nazareth‑eghmiinguyaghqaaguq.”