Matthew 19 - New Testament-et Akuzipigestun

Aapqughaallghet Pellghututelleghmeng

¹ Jesus‑em tamaakut apeghtuusaqneghmeng taaqsamiki aghulaqegkaq Galilee‑meng, nunanganun Judea‑m, inglunganilngughmun Kiiwem Jordan‑em.

² Yulghuteghllaget maliglleghaatkaat enkaam tawani naallghuquqii qinuyuget.

³ Ilangita Pharisees‑et takuluku anagniilqavigighnaluku aaptekaat, “Liilightuusamnni itagnaghtaa yugem pegtekumigu nuliini sangwaa alngunak apalluqluku?”

⁴ Jesus‑em kiimsiqii, “Atightiigastekii Akuzitet Igaqegkat whaten pillghit, ‘Piinlighyuwhaalleghmi Kiyaghneq yungllaghaqngami ulimakaqegkek yugenkuk aghnaankuk’?”

⁵ Enkaam pikii, “Taana apalluqluku yugem atanillu naanillu unillukek, nulighqullghiik qerngughullequk, enkaam ataasiighllequk yugusiik.

⁶ Enkaangam maalghugunanightuk, ataasiightuk yugusiik. Tamaaken apalluqluku Kiyaghneghem qerngughutestekakek yeqay yugem pellghututesneghillikek.”

⁷ Pharisees‑et aaptekaat, “Sanganmi Moses‑em Liilightuusalitinkut yugmun igalitesqelluku nulighha pegtugsighqameng, aanesimaanllu?”

⁸ Jesus‑em kiimsiqii, “Moses‑em pegtesaghqaaghtestekaqii nuliisi qayughllak pineghllugulghiisi. Iwernga piinlighyuggaalleghmeng Kiyaghneghem tawatetesaghqaanghinniluku pikaqsaghaa.

⁹ Enkaam whanga piimsi, yugem pegsaghqaqenghitaa nuliini wetkuqun gelghaghniiqan. Pegtekumigu sameng allaneng apallulighluni, nulightunqigtekumi gelgaghniighullequq nulighqenghhamikun.”

¹⁰ Maligsaaghtengita pikaat, “Taananginaghhaakan apalluq yugem pegtusighqaa nuliighminun, yuuk nulightunghiteghngaaghmi itagnaghnayaghtuq.”

¹¹ Iwernga Jesus‑em pikii, “Taana apalluq tamaghhaghmi tuguklighnaanghitaat, iwernga Kiyaghneghem ilangitnun tuguklighyaghqaaghtestekaqaa.

¹² Ilangi yuget nulightiigatut allgeqaatmeggneng eunuch‑ngnguluteng. Ilangi nulightiigatut qayughllak yuget eunuch‑engllaqaqiit. Paninang ilangi eunuch‑ngwaaqut pinighataghatun qepghaannaluku Kiyaghneq Ataneghpagullghani Qilagem. Kitum alngunak taana tuguklighyaghqaqegkumigu, tuguklighligu.”

Jesus‑llu Taghnughhaatlu

¹³ Taagken taghnughhaat tagitkiit Jesus‑mun saafluki yughaatkesqelluki. Taawanginaq maligsaaghtet ineghtekiit tagitistengit taghnughhaat.

¹⁴ Iwernga Jesus‑em pikii, “Yeqay taghnughhaat tagilit whangamnun. Ineghtegpenaki, qayughllak Ataneghpagullgha Qilagem taghnughhaghestun ayuqelghiit pikaat.”

¹⁵ Enkaam saaftaqluki quyastekii, taagken aghulaqegkaq.

Aklungilnguq Nukalpigaq

¹⁶ Taagken yugem takuluku Jesus aaptekaa, “Apeghtughista, sangwaa pinilghii piyaghqaqsikun allgeghutusighqaaluku kenlengilngughmeng unguvalleghmeng?”

¹⁷ Jesus‑em pikaa, “Sangan aapsinga sangwaa piniitanga? Ataasighhaaguq pinilghii. Kenlengilngughmeng unguvallengyukuvek qaatkiki Kiyaghneghem qelghusii.”

¹⁸ Nukalpigam aaptekaa, “Nakut?” Jesus‑em kiimsiqaa, “Yugtaghpenang, Gelgaghniighpenang, Teglegpenang, Iqlengiqutkigpenang,

¹⁹ Quulvaghlukek atanllu naanllu, Piniqluki yulguteten piniqelleghpetun elpeneng.”

²⁰ Nukalpigam pikaa, “Qamaglluki taakut qaatkaqanka. Sangwaallu piyaghqaqsikun?”

²¹ Jesus‑em kiimsiqaa, “Naamigtengngwaaghyukuvgu Kiyaghneghem pisqellgha elpenun, aglaghluten qamaglluku saghyan akikluku, akinga tamaana aklumalghiinun tunqughnaken. Enkaam qilagmi aklungilgullequten, taagken tagiluten maliggnakevnga.”

²² Nukalpigam nagalluku, aghulaqegkaq iilqepiglluni qayughllak aklungitepiglleghhii.

²³ Taagken Jesus‑em maligsaaghteni pikii, “Ipa piimsi, piyaqnaghyaghqaaguq aklungilngughmun yugmun itelleghqaa Ataneghpagullghanun Qilagem.

²⁴ Ungipaannaqlaataghamsi ilanganeng, piyaqniisaghqaaguq camel‑em suflughutelleghqaa sikuum iiyngakun, aklungilnguum yugem itelleghqaaneng Ataneghpagullghanun Kiyaghneghem.”

²⁵ Maligsaaghtet nagasamegteggu tawaten pilleq saghiighayugllagumaghmeng pikat, “Kinangam yugulillengelleqa?”

²⁶ Iwernga Jesus‑em tawaveghlluwaaq esghaghluki pikii, “Yuget piyaghqaqenghilkangit, Kiyaghneghem piyaghqaqii.”

²⁷ Taagken Peter‑em pikaa, “Esghaqaghqutqun, sangwaa qamaglluku unilluku maligtekaqamken. Sangwaangam allgeghlleqesteggu?”

²⁸ Jesus‑em pikii, “Ipa piimsi, nutaghami nunami Ighnegha Yugem aqumellequq umiilgusignekun aqumutagmikun nighughqelleghmini. Taagken elpesillu maligutkani whangamnun aqumlusi qula maalghuk siipneqluku umiilgem aqumutiitgun, igleghutillequsi qula maalghuk siipneqluku ramkenganeng Israel‑em.

²⁹ Enkaam whanga apalluqlunga kinkut alngunak uniskumegteki mangteghateng, angleguteteng, nayateng, atateng, naateng, avaqutateng, nalighmeng piitesighaghviteng, nulallequt 100‑alpagluku. Kenlengilngughmengllu unguvalleghmeng allgeghullequt.

³⁰ Iwernga aangelghiilghutet ukaliighllequt enkaam ukavanlenguut angellghughllequt.”