Matthew 18 - New Testament-et Akuzipigestun

Kina Angelleghpigaawa?

¹ Taam kingunginaaneng maligsaaghtet Jesus‑mun tagiluteng aaptekaat, “Ataneghpagullghani Qilagem kina angelleghpigaawa?”

² Jesus‑em tagsighluku taghnughhaq nekevestekaa qukiitgun.

³ Pikii, “Ipa ungipaatamsi, iteghnaanghitngwaaghtusi Ataneghpagullghanun Qilagem wetqukun taghnughhaghestun lliiqufsi.

⁴ Kina alngunak ukaliighlleghhii uutun taghnughhaghtun, angelleghpigaaguq Ataneghpagullghani Qilagem.

⁵ Kitum alngunak atemkun tuguklineghminigu whatelnguq taghnughhaq, whanga tuguklighaqaanga.

⁶ Iwernga kitum alngunak seghleghqestekagu naliit mekestaaghhaat ugpeqingalghiit whangamneng, itagnaghnayaghtuq yuget qaamqaghfikluku uyaqwaghkun uyghagllagmeng kalefsaqumegteggu uusqallghanun kelliim.

Yakughnallgha Seghleghqellghem

⁷ “Seghleghwaaghunaqnguut yuget qayughllak nunami whani nanghiiqulleghtupigtut seghleghqelleghmun. Nanghiiqullghet seghleghqistimun piyaghqaagut, iwernga seghleghwaaghunaqnguuq kina seghleghqestilghii yugneng!

⁸ “Iiggegpek nalighmeng itegaghpek seghleghqestekangaten, kepluki eggnaketen! Itagnaghataghaghnayaghtuten kenlengilngughmun unguvalleghmun iitquvek, iiggiteghngaaghpek nalighmeng itegiiteghngaaghpek miluutelleghqaghpeneng kenlengilnguugnun kenghegnun, inglugtun iiggelighluten nalighmeng itegalighluten.

⁹ Iyegpeklu seghleghqestekangaten ipugluku eggnaken! Itagnaghataghaghnayaghtuten kenlengilngughmun unguvalleghmun iitquvek inglupigaq iiskelluku, miluutelleghqaghpeneng kenghanun hell‑em inglugtun iyelguluten.

¹⁰ “Wataghllak, ukaliqegpenaki nalighhiiniit ukut mekestaghhaat. Ungipaatamsi, qilagmi yaqulgita quunpeng Atama qilagmelnguum gginaa esghaghaqaat.

¹¹ Ighnegha Yugem tagikaaguq yugulinaluki iflakat.

Ungipaghaatkegkaq Iflakaq Penniiq

¹² “Sumeghpesini sanayaghta yuuk 100 penniilek, ataasiq aghulaqsaqan? Ivaghyaghtughnayaghtaguu aghulaqegkaq unilluki 99 penniini qeminilluki?

¹³ Ipa piimsi, naalkegkumigu quyakeghllagyaghqaqaa pakiggulluku 99‑eneng aghulaqumangilngughneng.

¹⁴ Tawateghpigaq Atagpesi qilagmelnguum piyukelqenghitaa nalighhiiniit maakut mekestaghhaat iflasqelluki.

Ugpeqaalgutem Anaggutellgha

¹⁵ “Ugpeqaalgutegpek seghletun pikangaten, ellnginaaghulluku ungipaannaken anaggutellghaneng. Nagaskumiten taawa ilaliighunneqigllequtek.

¹⁶ Iwernga nagasunghilkangaten, takunqiggnaken kelqelluku ataasiq nalighmeng maalghuk ugpeqaalgutek liisimakestengulukek sameng pilleghpetegneng. Tawaten pilghaaten qayughllak Akuzitet Igaqegkat apeghtuusaqaat maalghuk nalighmeng pingayut liisimakistet ipapighqesaghqaqaat anaggutelleq.

¹⁷ Iwernga nagasunghilkaki apeghnakesi yughaghvigem yugitnun. Nagasunghilkaki talwa yughaghvigem yugi, kiyaghunnakesi Gentile‑ngulghiistun, tax‑mengllu qerngughtistengulghiistun.

¹⁸ “Ipa ungipaatamsi, sangwaa alngunak asightekufsigu nunami whani, asighsaghqaaguq qilagmillu. Sangwaa alngunak itemuskufsigu nunami whani, itemusaghqaaguq qilagmillu.

¹⁹ “Ilanganengllu ungipaannaqamsi, nunami whani maalghugulutek itagnaqutngukuftek aapnalutek sameng alngunak, Atama qilagmelnguum apeghiighlleqaa elpetegnun.

²⁰ Qayughllak maalghuggaat nalighmeng pingayuggaat qerngughuskata whanga atemkun, akulngitnisaghqaagunga.”

Ungipaghaatkegkaq Seghevutinghilnguq Qepghaghta

²¹ Taagken Peter‑em takuluku Jesus aaptekaa, “Ataneq, ugpeqaalgutma seghletun pimanginaqanganga naten uglaghqakaan seghevusaghqaqsikun? Ketwell maaghraghvinlaak?”

²² Jesus‑em kiimsiqaa, “Maaghraghvinleggiinaq seghevusaghqaqenghitan, iwernga 70 x 7.

²³ Tawaten piimken qayughllak Kiyaghneghem igleghutillgha Ataneghpagullghani Qilagem whatetuq: Umiilgem qepghaghtemi igiit yuvghiighyaghtuqii esghaghnaluki asengetulangit.

²⁴ Iiwenllu igiit yuvghiighaqii, umiilegmun itghutkaat qepghaghta asengelek 10,000 manimeng.

²⁵ Tawaten angkaan maningilnguq llivikuusaghqameng asengeminun. Enkaam umiilgem akikesqegkii ellnga, nulighha, avaqutii, saghyangillu llivikuusaaluki asengenganun.

²⁶ Iwernga qepghaghta sikmuulluni umiilegmi manungakun maniguutepiglluni pikaa, ‘Utaqiigaghten! Lliviknaaghaqa qamagtengngwaaghluku!’

²⁷ Umiilgem nangllegyagulluku puygusqegkaa asengenga enkaam aanestekaa.

²⁸ “Taagken taana qepghaghta aanluni nallaqaa qepghaghtelgutni 100 manimeng asengekaq. Akuqaghluku uyaqwhakun pikaa, ‘Llivikinga asengegpeneng!’

²⁹ Qepghalgutangan sikmuulluni nangllegsipiglluni pikaa, ‘Utaqiigaghten, llivikelleqamken’.

³⁰ Iwernga yugem nagasimangilkanga, yeghlegi anusimingllaghtestekaa kenlanga asengenga llivikellghanun.

³¹ Ilangita qepghaghtet esghapagluku tawaten pillgha, seghleghyaguteghllagluku umiilegmeggnun apeghyaghtuqaat.

³² Enkaam umiilgem qepghaghta taana tagsiqlighluku pikaa, ‘Uyuq seghlepestaaq qepghaghta! Leganꞌngam seghevutamken asengeghllagpeneng, qayughllak nangllegsilghiiten.

³³ Qepghalguten nangllegyagusaqlegestun katam whanga nangllegyagutellemtun elpek!’

³⁴ Umiilgem sakritepiglluni taana qepghaghta aglaatestekaa amyuutkistenun anusimingllaghvigmelngughnun kenlanga qamagtengngwaaghluku asengenga llivikellghanun.

³⁵ “Esgha tawateghpigaq Atama qilagmelnguum qamagllusi piyaghqiisi, qamaken ilugpesineng seghevunneghilkufsiki yulgutesi.”