Matthew 17 - New Testament-et Akuzipigestun

Jesus‑em Allangughllegha

¹ Aghvinlek aghneq atughluku, Jesus‑em kelqegkii Peter, James‑enkuklu, John‑enkuk, anglegutkullghiik, mayuutkii uusqalghiimun naayghamun ellnginiita.

² Iiyngitneng taagken Jesus allangughtekaq: gginaa kuukgutkaq siqineghtun, aatkiillu qateghrakguughtekat nighugestun.

³ Taagken maligsaaghtet esghaqagket Moses‑enkuk Elijah‑nkuk aliighlutek aleghquqangak Jesus.

⁴ Enkaam Peter‑em pikaa Jesus, “Ataneq, itagnapigtuq whaantelleghput! Piyukelqegkuvgu nekeflangi pingayut azigutat, elpenunllu, Moses‑munllu, Elijah‑munllu.”

⁵ Salin akuzimaluku, qilagwaaghem nighugrakegtam saapegkii, enkaam qilawaaghmeng mem pikii, “Una Ighneqaqa, piniqepigtaqa, efquqepigtaqa, nagataqiteggu!”

⁶ Maligsaaghtet nagalluku ma, alingruughem angtalanganeng niinghutkat nunamun.

⁷ Taagken Jesus‑em takuluki saafluki, pikii, “Nekevitek, alingegpenasi!”

⁸ Sivugsalghiimeng Jesus‑nginaghhaq esghaqaat.

⁹ Ukigutkelluku naayghameng Jesus‑em ineghtengngwaaqii, “Kitumun alngunak apeghyaqunaan esghaghwaalleq pinakesi kenlanga Ighnegha Yugem unguvaghtekan tuqulleghmeng.”

¹⁰ Taagken maligsaaghtet aaptekaat Jesus, “Sangan apeghtughistengita Liilightuusat piiqatgu Elijah sivukluni tagipestaaghyaghqaaniluku?”

¹¹ Jesus‑em kiimsiqii, “Ipa Elijah tagipestaaghyaghqaaguq, enkaam sangwaa qamagtengngwaaghluku nallghusanqiglleqaa.

¹² Iwernga ungipaatamsi Elijah tagingwaaqaaguq, iwernga yuget kinangutanga nallukegkaqaat, piyukelleghmegestunllu pikaqaat. Tawateghpigaq Ighnegha Yugem ikfiqesleqaat.”

¹³ Taagken maligsaaghtet liigikegkaat John Paaptaayesta akuzitkaqeftaa.

Jesus‑em Naallghuskanga Mekelghiiq Tughneghaam Iitqaa

¹⁴ Yulghuteghllagnun uteghnighyata, yugem takuluku Jesus, aga segesqughtengnginaamaghmi manungakun pikaq.

¹⁵ Pikaa, “Ataneq, ighneqa nangllegyagutaghtigu! Sayugpagtalguuq, elngaatall ikfiqnguuq. Awen kenghegnun uullghaghtaquq nalighmeng meghquutaquq.

¹⁶ Maligsaagtegpenun tagisaghaqa, iwernga naallghutepagningitkaat.”

¹⁷ Jesus‑em pikii, “Elpesi yugni, ugpeqillghitusillu, seghleghwaaghuusillu! Naten tagkaan elpesininnaqsinga ugpeqesqellunga? Mekelghiiq whavek tagiteggu!”

¹⁸ Jesus‑em aghyuuqaa tughneghaq, taagken aanegkaq mekelghiighmeng enkaam tawaninginaq naallghutkaq mekelghiiq.

¹⁹ Taagken Jesus ellnginaaghsan maligsaagtengita takuluku aaptekaat, “Sangan whangkuta aanesneghmeng aghtughesteggu tughneghaq?”

²⁰ Jesus‑em kiimsiqii, “Qayughllak ugpeqilleghqestaaghhaalghiisi. Ipa ungipaatamsi, ugpeqillelguyaqufsi mustard‑em piitutesqughhan angtalngatun, una naayghaq pikufsigu, ‘Ingavek nuugten!’ nuuggnayaghtuq. Enkaam sangwaa alngunak aghtughnayanghitaghsi!”

²¹ Iwernga tawatelnguq tughneghaq yughaghhiinaghqunllu, fast‑elleghqunllu aanesaghqaqaghsi.

Jesus‑em Akuzitkenqigtekanga Tuqulleghqani

²² Maligsaaghtet qerngughusata Galilee‑mi Jesus‑em pikii, “Ighnegha Yugem tuguluku tuunelleqaat yugnun,

²³ enkaam tuqulleqaat. Iwernga pingayiitangani aghneghem unguvaghtesaghqaaguq.” Taagken maligsaaghtet qivghughllakat.

Jesus‑enkuk Peter‑enkuk Llivikegkangak Temple‑em Tax‑nga

²⁴ Taagken Jesus‑enkut maligsaaghtekullghiit Capernaum‑emun tagiyata, Temple‑em tax‑meng qerngughtistengita takuluku Peter aaptekaat, “Apeghtughistezi Temple‑em tax‑nganeng llivikiiqaa?”

²⁵ Peter‑em kiimsiqii, “Aa‑a, piiquq.” Peter iteghyan mangteghamun Jesus‑em aleghqughyuwhaaqaa, “Simon, nateta elpek sumeghpeni? Kinkungwaaqat nunat umiilgita llivikistaqegkangit allaaghhiinaghmeng tax‑emeng? Nunalgutmeggneng piiqaat nalighmeng nakumiineng?”

²⁶ Peter‑em kiimsiqaa, “Nakumiineng.” Jesus‑em pikaa, “Enkaam umiilget yugit llivikinaanghitut.

²⁷ Iwernga seghleghyugsunghitapung tax‑meng qerngughtistet. Enkaam nulughyaa naayvamun iqallugtaqsuggaaghpek qaanghani naalkelleqan mani. Tuguluku llivikusaghtughnakefkung.”