Matthew 15 - New Testament-et Akuzipigestun

Sivuliighaat Apeghtuusiit

¹ Taagken ilangi Pharisees‑etlu, apeghtughikayugetlu Liilightuusaneng Jerusalem‑emeng tagiluteng aaptekaat Jesus,

² “Sangameng maligsaaghteten qaatkusigatat sivunemta apeghtuusiitnun? Neghnaqneghmeggni uughtiigatut elqughulluteng apeghtuusiitnun.”

³ Jesus‑em aaptekii, “Sangan elpesi qaatkigataqestiki Kiyaghneghem qelghusii maliggnaluki elpesi katam apeghtuusasi?

⁴ Kiyaghneghem qelghusaqaa, ‘Quulvaghlukek atanllu naanllu’. Whatenllu pikaaguq, ‘Kitum alngunak atani, nalighmeng naani seghlepestaatun akuzitkegkumigu, tuqusaghqaaguq’.

^5-6 Iwernga elpesi apeghtughiiqusi, ‘Yugem quulvanghisaghngaagu atani nalighmeng naani whaten pikagu,’ Kayusiisaghqalguunga elpenun, iwernga tuunaanghitaqa qayughllak akequsaqegkaqaqa tuunelleqniluku Kiyaghneghmun. Tawaten pilleghpesigun pakigaqasi Kiyaghneghem Liilightuusii apalluqluki elpesi katam apeghtuusasi.

⁷ Ukughsi piniiyugneghni! Elqughllusi whaten Isaiah‑m uuknaliqutkegkaqiisi!

⁸ Kiyaghneq piiq, ‘Ukut yuget akuzitmegteggun quulvaghaqaatnga, nakaan ilumeggneng.

⁹ Temngi manigughaqaatnga qayughllak apeghtuusaqaqiit liilightuusangllaqateng, katam whanga Liilightuusaqepiglleghhiistun.’”

Yugem Nukeggnaghqusii

¹⁰ Taagken Jesus‑em yulghutet tagsighluki pikii, “Nagallunga liigikitek!

¹¹ Yugem sangwaa qaneghminun kanaghtekaa nukeggnaghqingigatuq, iwernga yugem qaanghaneng aanegkaq nukeggnaghqikayuguuq.”

¹² Taagken maligsaaghtengita takuluku aaptekaat, “Liisimakenghisiguu Pharisees‑et anagteketen tawaten pilleghpegun?”

¹³ Jesus‑em kiimsiqii, “Nunivagseghaq qamaglluku Atama qilagmelnguum piitesighaamangilkanga nusugyaghqaaguq.

¹⁴ Avelghaqiinaghluki Pharisees‑et! Ayaakastun maghyaghqughiiqut. Yugem ayaakam ilanga ayaakaq tasluqumigu, laagwaaghmun kalefkagtaallequk.”

¹⁵ Peter‑em aaptekaa, “Ungipaataghtikut, sameng pisiigwa ungipaghaaten yuget nukeggnaghqiganniketen neghegkamegteggun?”

¹⁶ Jesus‑em pikii, “Elpesillu salin liigikigatsii?

¹⁷ Liisimakenghisteggu sangwaa alngunak yugem qaneghminun kanaghtekaa aqsaqghwanun piiquq, taagken aanaquq yugusiineng?

¹⁸ Iwernga sangwaa qamaken aanegkaq qaneghqun nukeggnaghqikayuguuq yugmeng.

¹⁹ Qayughllak yugem ilunganeng seghleq sumeghtaghalleq pikaayuguuq, yugtaq, gelgaghniiq, allaniiq, teglegniiq, iqlengiqutki, seghlequuq yugneng.

²⁰ Tamaakusta nukeggnaghqikayuget yugneng, iwernga uughtughpenani neghellghem nukeggnaghqennaanghitaa yuuk.”

Aghnam Ugpeqillgha

²¹ Taagken Jesus aghulaqegkaq tamaaken nunameng tungegkenun Tyre‑enkuk Sidon‑enkuk.

²² Taawanguq Canaan‑eghmii aghnaq. Jesus takukaa akilghuumaghmi, “Kaay Ataneq, Ighnegha David‑em, nangllegyaguteqeghtinga! Panika tughneghaam iitghumaa, seghleghwaaghuuq.”

²³ Iwernga Jesus‑em avelghaqiinaqaa. Maligsaaghtengita takuluku kayagtaghwaaqaat, “Iqitesqigu! Maligsaaghumaamta akilghuuguq!”

²⁴ Taagken Jesus‑em pikii, “Kiyaghneghem kayagtekaqaanga Israel‑eghmiinginaghhaghnun, penniighestun iflakastun ayuqelghiinun.”

²⁵ Iwernga aghnaq tagiluni Jesus‑em sivungakun qungughtutkelluku pikaq, “Ataneq, kayusiitaghtinga!”

²⁶ Jesus‑em pikaa, “Anaggutngaaq taghnughhaat neqngit tuguluki qikminun miluuskumeng.”

²⁷ Aghnam pikaa, “Aa‑a, Ataneq, talwa yugem qikmii ifkaghqellghaneng neghaqut.”

²⁸ Taagken Jesus‑em pikaa, “Aghnaq elpek, ugpeqilleghtupigtuten! Apeghiighli piyukelleghpetun.” Tawaninginaq paniga naallghutkaq.

Jesus‑em Naallghuskanga Yuuk Uglalghii

²⁹ Taagken Jesus aghulaqegkaq tamaaken nunameng, esnengakun Naayvam Galilee‑m. Qemimun mayughluni aqumegkaq.

³⁰ Yulghuteghllaget takulaghaatkaat, tagisimiita Jesus‑em sivunganun piyugpagningilnguut, aqnightekat, ayaakat, akuzingigalnguut, ilangillu qinuyulghiit. Enkaam naallghuquqii.

³¹ Yulghuteghllaget saghiighayukat esghapagluki akuzingigalnguut akuziyagullghiit, aqnightekat naallghullghiit, piyugpagningilnguut piyugyagullghiit, ayaakatlu esghaasagullghiit. Enkaam usuqegkaat Kiyaghnegha Israel‑em.

Jesus‑em Neghestellgha 4,000 Siipngalghiineng Yugneng

³² Taagken Jesus‑em maligsaaghteni tagsighluki pikii, “Maakut nangllegyagutepigtanka qayughllak whangamnitut pingayut aghneghet, talwa neghyaghqiitut. Neghestegpenaki aghulaqesunghitanka, luuraq tumangani kayaalinayukata.”

³³ Maligsaaghtengita aaptekaat, “Maani kilgaani naken neqengnaqesta naamayaghqameng yulghuteghllagnun?”

³⁴ Jesus‑em aaptekii, “Naten uglaghqakaan neqekrangllalgutsi?” Kiimsiqaat, “Maaghraghvinleguut, qafsinatlu iqalluggaat.”

³⁵ Enkaam Jesus‑em yulghuteghllaget qelqii aqumuutesqelluki nunakun.

³⁶ Taagken tuguluki maaghraghvinlek neqekrangllat iqallugetlu, Kiyaghneq iqamsiqayugvikegkaa. Aavgughluki tuunegkii maligsaaghteminun enkaam uyegtekiit yulghuteghllagnun.

³⁷ Qamaglluteng neghuutkat kepsuulluteng. Taagken maligsaaghtet siipneq qerngughlluku maaghraghvinlek pasketet imiiqiit esleqaghaghluki.

³⁸ Uglaghtalangit neghuutkat yuget 4,000‑nguftut, kesutkegpenaki aghnatlu taghnughhaatlu.

³⁹ Taagken Jesus‑em yulghuteghllaget aglaghtuutesluki ellngitnun ellnga angyamun uuglluni uvitanganun Magadan‑em aglaqaq.