Matthew 12 - New Testament-et Akuzipigestun

Aapqughaalleq Sabbath‑meng

¹ Taagken Sabbath‑em aghneghani Jesus igleghtekaq wheat‑em piitfigakun. Maligsaaghtengi iyataqat enkaam wheat‑meng qesugutaqluteng neghegkat.

² Pharisees‑et esghaghluki maligsaaghtet wheat‑meng qesugutaatalghiit, Jesus pikaat, “Ii‑i, Sabbath‑mi maligsaaghteten qepghaghtut, Liilightuusaq naafqaat!”

³ Jesus‑em pikii, “Atightuumangistegguu David‑enkut yukullghiit sakaatangi iyataghaqngameng?

⁴ Iitqaaguq tabernacle‑mun enkaam yukullghiit neghegkaqaat neqekrangllaq Kiyaghneghmun tuunegkaq. Tawaten pilleghmegteggun Liilightuusaq naafqegkaqaat qayughllak priest‑nginaat neghyaghqaqsaqangat.

⁵ Atightiigasteggullu Liilightuusanilnguq priest‑et Temple‑mi qepghaneghmeggni Sabbath‑mi naafqaqegkangat Sabbath‑em Liilightuusaa? Naqamllu priest‑et anaggusigatut.

⁶ Ungipaatamsi, whaantuq Temple‑mi kina aangataghalghii.

⁷ Akuzitni Igaqegkani Kiyaghneq pikaaguq, ‘Nangllegtiisqesugamsi yulgutegpesinun pakiggulluku aghqutegpesineng.’ Taakut akuzitet liigikngwaaghyaqufsiki sameng pitangi, nanqiggnayanghitasi aghyuughyaghqaaluki anaggutellghilnguut,

⁸ qayughllak Ighnegha Yugem, Atanqaa Sabbath‑em.”

Yuuk Iiggelek Uniiqameng

⁹ Taaken Jesus aglaghluni synagogue‑ngitnun iitqaq.

¹⁰ Taawanguq yuuk iiggan inglungi uniiqat. Ilangita yuget tawanlenguut aaptekaat Jesus naalkefiknaluku anaggutelleghmeng, “Liilightuusamnni itagnaghtaa‑a naallghutilleghqaq Sabbath‑mi?”

¹¹ Jesus‑em kiimsiqii, “Nalighpesi penniigha kalefkagsaqan laawaaghmun Sabbath‑mi, nusugnayaghestegguu?

¹² Yuuk megnunaghataghaghtuq penniighmeng! Enkaam Liilightuusani itagnalghiinguuq pinitun pilleghqaq Sabbath‑mi.”

¹³ Taagken yuuk uniighngalghiimeng iiggelek pikaa, “Nengugutiki iiggeten.” Iiggeni nengugutkii, aga naallghutkat, inglumegestun lliiqat.

¹⁴ Taagken Pharisees‑et aanluteng agghisaghtuqat naten tuqunnaluku Jesus.

Kiyaghneghem Nakmikegkaa Qepghaghta

¹⁵ Jesus‑em liisimakluku agghillghat, aghulaqegkaq. Yulghuteghllaget maliglleghaatkaat, enkaam naallghuquqii qinuyulghiit qamaglluki,

¹⁶ ineghtekiillu ungipaqefqaami pisqelluni.

¹⁷ Tawaten pilleghmikun apeghiiqaa Kiyaghneghem pillgha uuknaliqistekun Isaiah‑kun whaten:

¹⁸ “Una esgha nakmikegkaqa qepghaghtenguluku. Piniqegkaqa unguvasigma efquqepigtaa. Taghneghagka ellngakun nekeglleqagka. Ungipaalleqii Gentile‑et tawateghlluwaaq nanqigtilleghqamneng tamaghhaanun yugnun.

¹⁹ Aaghtiiraaghnaanghituq nalighmeng akilghuunaanghituq, tumeni iglagtupiglluni akuzinaanghituq.

²⁰ Iiknaanghitaa vegaaq ulleghngalghii, qaamyaghtuungestaqak kenelghutak qaamnnaanghitaak. Tawaten piyaghqaaguq kenlanga qamaglluni yuuk whaten piyugluni lliiqan, Kiyaghneghem nanqigtellgha yugneng avutangituq.

²¹ Enkaam Kiyaghneghem nakmikegkaakun Gentile‑et sighimallequt.”

Jesus‑enkuk Beelzebul‑enkuk

²² Taagken Jesus‑mun tagitkaat yuuk ayaakaq, akuzingigalnguq qayughllak ilumikun tughneghalek. Jesus‑em naallghutkaa enkaam akuziyagutkaqlu esghaasagutkaqlu.

²³ Yulghuteghllaget saghiighayugllakat repall ellmeggneng aapqughaaghutkat whaten, “Una David‑em Ighneqenghitaguu?”

²⁴ Pharisees‑et nagalluteng pikat, “Yugneng aanestaqii tughneghaat qayughllak atuqngukanga aghtughyaghqaanghillgha Beelzebul‑em, igleghutistengat Tughneghaat.”

²⁵ Jesus‑em liisimakegkangi sumeghtaghallghit enkaam pikii, “Alngunak ataneghpagulleq aafquulluni pilluguskumi, naavellequq. Tanemlleqa neghllaget nalighmeng nengllugutet aafquulluteng pilluguskumeng, qerngaghmennaanghitut.

²⁶ Tawateghpigaq Tughneghaam aanestekumigu Tughneghaq, taawa ellmineng pilluwaaguq enkaam ataneghpagullgha kenletghuullequq.

²⁷ Aanesquungukuma tughneghaghneng Beelzebul‑kun, natenmi yugpesi aanesqughaqatki tughneghaat? Enkaam yusi nanqigtistekelleqasi.

²⁸ Iwernga Kiyaghneghem Taghneghagkenka aghtughyaghqaanghillghakun aanesquungukuma tughneghaghneng, taawa taam ipapighqaa Ataneghpagullgha Kiyaghneghem kaasimaaq elpesinun.

²⁹ “Kina alngunak iteghyukumi iknaqelghiim yugem mangteghaanun teglegughnaluni saghyanganeng, sivukluku yuuk asighqesaghqaqaa. Taagken wayaghteghlleqii saghyangi.

³⁰ “Kina alngunak whangamninneghilnguq kipullginaaghtekaqa; kitum alngunak qerngughtilgusinghilkuminga mingitistenguuq.

³¹ Tamaaken apalluqluku ungipaatamsi yuget seghevutellengyaghqaagut alngunak seghleghqelleghmeggneng, alngunaklu seghlequulleghmeggneng. Iwernga kitum alngunak seghlequuqumikek Agleghnalghiik Taghneghak, seghevutellengnaanghituq.

³² Kitum alngunak kipullegmun sameng pikumigu Ighnegha Yugem, seghevutellengyaghqaaguq. Iwernga kitum alngunak kipullegmun sameng pikumikek Agleghnalghiik Taghneghak, seghevutellengnaanghituq maaten kiyaghtaalleghmi, nalighmeng tuunglighhaani.

Uqfigem Piitestekii

³³ “Uqfik aflengakegkaq pinilghiinguuq, piitestekii pinightut. Uqfik aflengakellghilnguq seghleghuuq, piitestekii seghleghuut. Piitestillghakun liisimakelleqaghsi uqfigem natetulanga.

³⁴ Ukughsi nemeghyani! Naten akuziiqetsi pinilghiimeng seghleghughngaaghpesi? Sangwaa alngunak yugem ilunganilnguq aanegkaayuguuq akuzillghakun.

³⁵ Pinilghii yuuk pinilghiimeng ilumikilghii pinilghiimeng aanestikayuguuq. Seghleq yuuk seghleghmeng ilumikilghii seghleghmeng aanestikayuguuq.

³⁶ “Ungipaatamsi, Nanqigtillghem Aghneghani yuget apeghyaghqapestaaqiit Kiyaghneghmun qamaglluki seghleghet akuzitet atuqegkateng sangita atuqumatangi.

³⁷ Qayughllak Kiyaghneghem nanqiglleqaaten akuzitegpegun. Akuzitegpek ipapighqelleqaaten avutnginniluten nalighmeng nanqiglleqaaten aghyuughyaghqaaluten.”

Igleghutistet Allaaghlluwhaghtitesqelghiit

³⁸ Taagken ilangita apeghtughistengita Liilightuusam, ilangitallu Pharisees‑et pikaat Jesus, “Apeghtughista, allaaghlluwhaghtilghiiten esghapagyuwamken liigiknaluku aghtughyaghqaanghillghen Kiyaghneghmeng pingutanga.”

³⁹ Iwernga Jesus‑em pikii, “Aghneghem uum yugi seghleghqumanguut, ataasiighneghilnguut Kiyaghneghmun. Naqam allaaghlluwhaghtitesqut whangamnun. Yeghlegillu! Taananginaghhaq allaaghlluwhaghtilleq esghaghlleqaghsi Kiyaghneghem allaaghlluwhaaghtillgha Jonah‑mun.

⁴⁰ Jonah iqallugrugllagem aqsaqghwanitkaaguq pingayut aghneghet, pingayut unuget. Tawateghpigaq Ighnegha Yugem samansaghqaaguq nunami pingayut aghneghet, pingayut unuget.

⁴¹ Nanqigtillghem Aghneghani Kiyaghneghem nanqigtekangisi elpesi kiyaghlleghhiini aghneghmi whani, Nineveh‑ghmiit nekevluteng anaggunnilleqiisi aghyuughyaghqapestaaghunilusi. Uuknaliqista Jonah ungipaghyan Nineveh‑ghmiit avuteghqelluteng seghleghqennaniqaagut. Iwernga elpesi avuteghqellusi seghleghqennanillghitusi qaywa nagatkaqeghngaaghpesigu kina aangataghalghii Jonah‑meng.

⁴² Nanqigtillghem Aghneghani Kiyaghneghem nanqigtekangisi elpesi kiyaghlleghhiini aghneghmi whani, Queen‑ngan Sheba‑m nekevluni nanqigsaghqaanilleqiisi. Tagikaaguq uyavaghpanilngughmeng nemineng nagannaluku Solomon‑em peghqineghllak apeghtughillgha. Iwernga kina aangataghalghii Solomon‑meng whaantuq, tawalliima ighsakaqaghsi.”

Uteghnillgha Tughneghaam

⁴³ “Tughneghaq yugmeng aanegkumi igleghllequq meqraggiilngughmi nunami, ivaghillequq meghnaalivigkameng. Iwernga naalkunneghisami,

⁴⁴ pikaq, ‘Kiyaghfiksaqemnun uteghhnaqunga.’ Kaasalghiimi paaghqiteftuq, aallwaaghluni, mingllegtengngwaaghluni ayuqeftuq.

⁴⁵ Taagken aanluni tagitkii maaghraghvinlek tughneghaat ellmineng seghleghataghalghiit. Iteghaalluteng yugmun tawantekat. Enkaam taana yuuk sivunghaneng wataqaaghaq seghleghwaaghughtekaq. Tawateghpigaq ayuqsaghqaagut seghleghet yuget kiyaghlleghhiit maaten, wataqaaghaq seghleghughtaghaghyaghqaagut sivunghani pilleghmeggneng.”

Jesus‑em Naangallu Anglegutangillu

⁴⁶ Paninang Jesus‑em aleghquumaluki yuget, Jesus‑em naangallu anglegutangillu kaalluteng manughami aleghqughyukaat.

⁴⁷ Enkaam kitum ungipaatkaa, “Ii‑i, qakma naanllu anglegutetenllu, aleghqughyugaqaaten.”

⁴⁸ Jesus‑em aaptekaa, “Kinangaawa naaka? Kinkungaawat anglegutenka?”

⁴⁹ Taagken kenighluki maligsaaghteni, pikaq, “Taakusta naakallu anglegutenkallu!

⁵⁰ Kina alngunak Atama qilagmelnguum piyukellghatun pikumi, anglegutkaqa, nayakaqa, naakaqallu!”