Matthew 11 - New Testament-et Akuzipigestun

John‑em Paaptaayestem Maligsaaghteni Jesus‑mun Pistekangi

¹ Jesus‑em qula maalghuk siipneqluku maligsaaghteni apeghiighyamiki apeghtughaneghmeng, tamaaken aghulaqegkaq ilangitnun town‑et apeghtughinalunillu ungipaqinalunillu.

² Anusimingllaghvigmelluni John‑em Paaptaayestem nagaqughluku Christ‑a saaqutanga, ilangi maligsaaghteni kayagtekii Jesus‑mun.

³ Aaptekaat Jesus, “Elpengwaa taginaqnikaat, nalighmeng kina tagiyaghqaawaa?”

⁴ Jesus‑em kiimsiqii, “Ungipaasaghtughteggu John nagatkaghpesinengllu esghaqaghpesinengllu:

⁵ ayakaayalghiit esghaghyagutut, piyugigasalghiit piyugyagutut, leprosy‑lguyalghiit naallghutut, tuuslaghyalghiit nagaquusagutut, tuqukaayalghiit unguvaghtut, aklumalghiinunllu Pinilghiit Ungipat ungipaqut.

⁶ Kina alngunak ugpeqinaninghilkumi whangamneng quyastekaaguq!”

Jesus‑em Aapqanga John Yugnun

⁷ Aga John‑em maligsaaghtengi aghulaqsata, Jesus‑em akuzitkegkaa John yulghutnun, “Kilgaanun piiqngafsi, sangwaa esghaghyaghtughesteggu? Vegaaq anuqem ufsuguskangaa?

⁸ Saqutsimi? Esghaghnalukuu aatkaqegtaq yuuk? Tamaaken aatkaqelghiit kiyaghtaqut umiilget mangteghiitni!

⁹ Sangwaami esghaghyaghtughesteggu? Uuknaliqistaa? Aa‑a, ungipaatamsi, esghaqaghsi John uuknaliqistenginaanghituq. Megnunaghataghaghtuq

¹⁰ qayughllak ellnganguuq Akuzitet Igaqegkat aapqaat whaten, ‘Kiyaghneq piiq, Sivugpeni kayaglleqaqa ungipaghteka, yataaghqesaghtiisqelluku tuumkaghqan’.

¹¹ Ipa ungipaatamsi, John Paaptaayesta megnunalleghpigaaguq yugneng allgeqaghyaggaghneng. Iwernga kina alngunak ukalighpigaq Ataneghpagullghani Qilagem John‑meng megnunaghataghaghtuq.

¹² John Paaptaayesta ungipaqiyuggaallghaneng whavemun kenlanga, suuglluget wayaghnaqutkaqaat Ataneghpagullgha Qilagem.

¹³ Qamaglluteng uuknaliqistetlu Moses‑emllu Liilightuusiita uuknaliqutkengngwaat Ataneghpagullgha Qilagem kenlanga John‑em tagillghanun.

¹⁴ John‑nguuq uuknaliqistet uuknaliqutkegkaat taginaqnilleghmeggteggun Elijah. Ugpeqsukufsigu uuknaliqelleq, John Elijah‑nguuq.

¹⁵ Sigutelguusi, nagatek!

¹⁶ “Maaten kiyaghlleghhit yuget samun uspunnaqsingi? Taghnughhaaghestun ayuqut aqumuulluteng akilpegaghvigni, naghaalgutmeggnun akilghuullghiit whaten,

¹⁷ ‘Qalghightaatamsi, tukaleganghitusi! Qiyiqutukut, qiyiqenghitusi!’

¹⁸ “John tagiiqngami fast‑aaquq, meghigatuqlu wine‑meng, enkaam yuget whaten pikaagut, ‘Tughneghalguuq’.

¹⁹ Ighnegha Yugem tagiiqngami, neghelgusighaqii, meghelgusighaqiillu yuget, enkaam yuget whaten pikaagut, ‘Yuukqun taana esghaqaghteggu! Neghetupigtuq, meghetupigtuq, ilakumtaaqaatlu tax‑em qerngughtistengita, seghleghqestetlu!’ Naqamllu Kiyaghneghem peghqinellgha ipapighqengngaaq sallghakun.”

Jesus‑em Aghyuuqangi Avuteghqellghilnguut Yuget

²⁰ Jesus‑em allulluki allaaghlluwhaghtilleni atuqegkaqii Chorazin‑mi, Bethsaida‑mi, Capernaum‑emillu. Iwernga yugit avuteghqelluteng taaqellghilnguut seghleghqenneghmeng enkaam Jesus‑em aghyuughmikii.

²¹ Pikii, “Seghleghwaaghunaqnguusi, Chorazin‑eghmiini! Seghleghwaaghunaqnguusi, Bethsaida‑ghmiini! Elpesini allaaghlluwaghtilleghllaget apeghiiqat pikaayaqata Tyre‑millu Sidon‑millu, neghipiglluteng yugit avuteghqelluteng seghleghqennanighnayaghtut. Tamaaken apalluqluku suvinalghiimeng qiipaghaghqameng aalluteng aqumnayaghtut panetelleghteggun.

²² Ipa ungipaatamsi, Nanqigtillghem Aghneghani Tyre‑eghmiitlu Sidon‑eghmiitlu aghyulleghqestaaghhaayaghqaagut elpesineng!

²³ Enkaam elpesi, Capernaum‑eghmiini! Qaywa anglisteghllagyaghngaaghpesi elpesineng katam repall sumeghpesini usuqellengelleqnillusi qilagmi, yeghlegi ukiglleqiisi hell‑mun. Allaaghlluwhaghtilleghllaget pikaayaqata Sodom‑emi, paninang aghneghmi whani nekevghanayaghtuq!

²⁴ Iwernga ungipaatamsi Nanqigtillghem Aghneghani Kiyaghneghem nangllekataghaghyaghqaqii Sodom‑eghmiit pakiggulluki elpesineng!”

Whangamnun Tagilusi Meghnaalitek

²⁵ Taagken Jesus pikaq, “Kaay Ata, Atanqaaten qilagemllu nunamllu! Iqamsiqayugvikamken qayughllak liitkaanghilngughnun liitestekaqan ipapighqelleq iiqan liitkanengllu peghqineghnengllu.

²⁶ Aa‑a, Ataay, efquqelleghpetun pikaaguten.

²⁷ “Atama tagivaqaqaa sangwaa qamagtengngwaaghluku. Kitum alngunak nallukaa Ighneq, iwerngaqun Atam. Kitum alngunak nallukaa Ata, iwerngaqun Ighneghem, enkaam Ighneghem nakmikegkaminun liitesleqaa Ata.

²⁸ “Tagitek whangamnun qamagllusi ughleghilghiini, uqigtuqamengllu akmalegllagni, meghnaalisleqamsi.

²⁹ Iisqaghmiitagka aallukek liitivikitengnga, qayughllak yakumanginneghitunga, iluka qusevegngaaq. Enkaam meghnaalillequsi unguvasighpesinun.

³⁰ Iisqaghmiitagka piyaqniituk, akmakallu uqengestaaghhaaguq.”