Matthew 10 - New Testament-et Akuzipigestun

Qula Maalghuk Siipneqluku Apostle‑et

¹ Jesus‑em qerngughlluki qula maalghuk siipneqluku maligsaaghteni, aghtughyaghqaanghillelitkii aanestiyaghqaaluki tughneghaghneng, naallghutiyaghqaaluki tamaghhaaneng aqnighneghnengllu, qinuyugnengllu.

² Ukunguut qula maalghuk siipneqluku apostle‑et: sivuliq, Simon (alla atelek Peter‑meng), Andrew (anglegutanga), James‑enkuk John‑enkuk (Zebedee‑m ighneghqek),

³ Philip‑enkut, Bartholomew‑nkut, Thomas‑enkut, Matthew‑nkut (tax‑meng qerngughtistenguyalghii), James‑enkut (ighnegha Alphaeus‑em), Thaddaeus‑enkut,

⁴ Simon‑enkut Zealot‑a, Judas Iscariot‑lu (uveghpagutiyaghqaq Jesus‑meng).

Qula Maalghuk Siipneqluku Apostle‑et Qepghaqaghqaat

⁵ Jesus‑em, taakut qula maalghuk siipneqluku apostle‑et kayagtekii qelghuumiita, “Gentile‑etlu, Samaria‑ghmiitlu nunangitnun pifqaafsi.

⁶ Yeghlegi Israel‑eghmiinun pitek qayughllak iflakastun penniighestun ayuqut.

⁷ Navek alngunak pineghpesini whaten ungipaghaqitek, ‘Ataneghpagullgha Qilagem kaasaghtuumaaq!’

⁸ Qinuyuget naallghuteki, tuqukat unguvaghteki, leprosy‑lget naallghuteki, tughneghaatlu aanesqughteki yugneng. Akingunaan allgeghutkaagusi, enkaam akingunaan tuunitek.

⁹ Kelqegpenasi manimeng: gold‑meng, silver‑meng, talwa copper‑meng.

¹⁰ Kelqegpenasi akmagtameng, simiitkaghqameng, kamegmeng talwa ayaviighmeng, qayughllak qepghaghta aklukegkaaneng tuunyaghqaaguq.

¹¹ “Town‑enun nalighmeng village‑enun kaanneghpesini ivaghiiqitek kitumeng pinilghiimeng enkaam ellnganitaqitek kenlanga aghulaqsaghqaaghtelleghpesinun.

¹² Iitqufsi mangteghaanun quyastaqiteki tawanlenguut whaten, ‘Kiyaghneghem nekeggmellgha elpesinilli.’

¹³ Upughaskangisi, quyastilleghsi tawantesnakesi. Iwernga upughanneghilkangisi, quyastilleghsi veghhnakesi.

¹⁴ Kitum alngunak upughanneghilkangisi nalighmeng naganneghilkangisi, aanutkelluku mangteghameng nalighmeng aghulaqutkelluku town‑meng, itegaghpesi pagulangi ufsugunnakesi.

¹⁵ Ipa ungipaatamsi, Nanqigtillghem Aghneghani, Sodom‑eghmiitlu Gomorrah‑ghmiitlu aghyuulleghqestaaghhaayaghqaagut taam nem yuganeng!”

Apostle‑et Amyuqetaatkesilleghqaat

¹⁶ “Ukughsi! Kayagtekumsi penniighestun qungangitnilngughestun amaat lliighlequsi enkaam peghqinghulusi nemeghyastun, nekeggmellusi doves‑tun.

¹⁷ Kelengalusi, qayughllak yuget tugulusi aglaalleqiisi agghistenun, kagsagmiglleqiisillu synagogue‑meggni.

¹⁸ Whanga apalluqlunga, nekevesleqiisi sivungitgun igleghutistetlu umiilgetlu. Enkaam liigikesaghqaaghlleqaghpesinga ellngitnunllu Gentile‑enunllu.

¹⁹ Nanqigtestemun aglaaskangisi, teggellghiighpenasi naten akuzilleghqaghpesineng, nalighmeng sameng pilleghqaghpesineng. Akuziyaghqaaghtekufsi akuzitkaghqalgullequsi.

²⁰ Akuzitet elpesi pikenghitasi qayughllak Atagpesi Taghneghakek akuzillequk elpesigun.

²¹ “Yuget ellmeng katam angleguteteng tuqutesleqiit, atatlu avaqutateng tawaten piyaghqaqiit. Avaqutat anguyiilluki angayuqateng tuqutesleqiit.

²² Whangamneng apalluqlusi yugem qamaglluni ugumikelleqiisi. Iwernga nuqenneghtuqat kenlanga kenlemun yugulillengyaghqaagut.

²³ Takukaghpesini amyuutkegkangisi, ilanganun town‑em qimaggaasi. Ipa ungipaatamsi, qamaggnaanghitasi Israel‑em town‑ngi, sivungani Ighneghan Yugem tagilleghqaan.

²⁴ “Maligsaaghta qaasghutinganghituq apeghtughistemineng, talwa qepghaghta qaasghutinganghituq umiilegmineng.

²⁵ Itagnaghiyaghqaaguq maligsaaghta apeghtughistemitun lliiqumi, qepghaghtallu umiilegmitun lliiqumi. Naasquutilghii nengllugutmineng, Beelzebul‑meng atiimakatgu, nengllugutangi seghleghataghaaluki atighyaghqaqiit.

²⁶ “Enkaam alikegpenaki tamaakut amyuqetaghtet. Sangwaa alngunak nallukegkaq liitesaghqaaguq, qamagllunillu aksaqegkaq qayvighqesaghqaaguq.

²⁷ Elpesinun sangwaat aapqanka apeghyaghqaqasi tamanganun. Sigutquutkegkanka elpesinun, ungipaqsaghqaqasi mangteghat qaayngitneng.

²⁸ “Enkaam alikegpenaki yuget tuqutikayuget yugusighhiinaghmeng iwernga tuqutinaanghitut unguvasimeng. Itupill alikiteggu Kiyaghneq, qayughllak hell‑mi naafqiiyaghqaaguq tamaghhaagkeneng yugusimengllu unguvasimengllu.

²⁹ Penny‑meng tukfighyaghqaqagsi qawaaggaak, naqamllu aallgha ifkaqan Atagpesi liisimakaa.

³⁰ Iwernga elpesi aflengakataghaghlusi ayuqiisi, qayughllak talwa nuyaghpesi uglaghtalngi liisimakii.

³¹ Enkaam alingegpenasi, Atagpesi megnukataghaghiisi qawaaggaghneng!

Tuguklighilleq Nalighmeng Ighsakilleq Christ‑ameng

³² “Kitum alngunak ungipaaskaki yuget, whangamnun pikniluni, whangallu Ataka qilagmelnguq ungipaalleqaqa whangamnun pikniluku.

³³ Iwernga kitum alngunak ungipaaskaki yuget whangamnun pikenghinniluni whangallu Ataka qilagmelnguq ungipaalleqaqa whangamnun pikenghinniluku.”

Jesus Nekeggmellengestiyaghtuunghituq

³⁴ Jesus‑em paninang aleghquqii, “Sumeghtaghaghpenasi nekeggmellengestiyaghtuunilunga nunam yuganun. Yeghlegillu! Nekeggmellengestiyaghtuunghitunga, taawanginaq pillugutestiyaghtuugunga.

³⁵ Taginguunga yugmun anguyaliitesqelluku atanga, aghnamun anguyaliitesqelluku naanga, ukaaghanun anguyaliitesqelluku sakinga aghnaq.

³⁶ Enkaam yuuk nengllugutangita anguyaliilleqaat.

³⁷ “Kitum alngunak piniqegkumigu atani nalighmeng naani pakiggulluku whangamneng, whanga pikepagningitaqa. Kitum alngunak piniqegkumigu ighneni nalighmeng panini pakiggulluku whangamneng, whanga pikepagningitaqa.

³⁸ Kitum alngunak qaquurani tuguyunghilkumigu maliggnaanghitaanga, enkaam whangamni itagnanghituq.

³⁹ Kitum alngunak unguvalleni ellminun piknikumigu iflayaghqaqaa. Iwernga kitum alngunak unguvalleni pegtekumigu whanga apalluqlunga allgeghsaghqaqaa unguvallepik.

Akileghtuusat

⁴⁰ “Kitum alngunak upughaskangisi, whangallu upughalleqaanga, enkaam kitum alngunak upughaskuminga, upughalleqaa kayagtisteka.

⁴¹ Kitum alngunak upughaskumigu uuknaliqista uuknaliqistengutanganeng, akileghtuusangellequq uuknaliqistetun. Kitum alngunak upughaskumigu elqughutngalghii yuuk elqughutngatanganeng, akileghtuusangellequq elqughutngalghiitun yugtun.

⁴² Kitum alngunak nenglekeglleghhiimeng meghsikumigu ukalighpigaq maligsaaghteka apalluqluku maligsaaghtekutemneng, ipa piimsi akileghtuusangepestaaghyaghqaaguq.”