Mark 8 - New Testament-et Akuzipigestun

Jesus‑em Neghestillgha 4,000 Siipngalghiineng Yugneng

¹ Taam kingungiighhaaneng yulghuteghllak qerngughullaataqaq. Neghyaghqaqraggiighusata Jesus‑em maligsaaghteni tagsighluki pikii,

² “Ukut nangllegyagutepigtanka. Whangamninnaqneghmeng pingayuni aghneghni neghyaghqiighutut.

³ Nengitnun aglaghtestekumki neghestegpenaki tumemi taakwani ulleghaallequt, qayughllak ilangi uyavaneng tagilaghaatkaagut.”

⁴ Maligsaaghtengita aaptekaat, “Maani paaghqituq naken neqengnaqesta whaten uglaghqakalghiinun naamayaghqameng?”

⁵ Jesus‑em aaptekii, “Naten uglaghqakaan neqekrangllalgutsi?” Kiimsiqaat, “Maaghraghvinleguut neqekrangllat.”

⁶ Enkaam Jesus‑em yulghuteghllaget qelqii aqumuutesqelluki nunakun. Taagken tuguluki taakut maaghraghvinlek neqekrangllat Kiyaghneq iqamsiqayugvikluku, kagimlluki tuunegkii maligsaaghteminun uyegtesqelluki. Enkaam maligsaaghtengi uyegtekat.

⁷ Qafsinkuuraghhaghnengllu amsakalghiineng iqallulget. Jesus‑em iqamsiqayugvikluku Kiyaghneq, taakutlu maligsaaghteminun uyegtesqegkii.

^8-9 Entaqun 4,000‑nguut yuget kepsuulluteng neghuutkat. Taagken maligsaaghtet qerngughsaqmegteggu siipneq, maaghraghvinlek pasketet imiqiit esleqaghaghlluki.

¹⁰ Jesus‑em yulghuteghllaget aghulaquutesluki, enkaam maligsaaghtekullghiit angyamun uuglluteng aghulaqnginaamaghmeng pikat Dalmanutha‑mun.

Pharisees‑et Allaaghlluwhaghtitesqelghiit

¹¹ Tamaanlenguut Pharisees‑et takuluku Jesus aaghtiiraaqaat. Pikaat, “Allaaghlluwhaghtighllagi, enkaam ugpeqelleqaghput aghtughyaghqaanghillghen Kiyaghneghmeng pingutanga.” Tawaten pikaat anagniilqavigighnaluku.

¹² Jesus‑em aneghpagluni pikii, “Sangameng maaten aghneghem yugi allaaghlluwhaghtilleghmeng tungsighaqat? Ipa ungipaatamsi, allaaghlluwhaghtinnaanghitamsi.”

¹³ Taagken unilluki, angyamun uuglluni inglunganun naayvam aghviqat.

Jesus‑em Kelengasaaqangi Maligsaaghteni

¹⁴ Maligsaaghtet puygumalghiit neqekrangllameng kelqegpenateng, ataasighhaaftuq kelqegkaat angyamelnguq.

¹⁵ Jesus‑em kelengasaaqii, “Kelengangwaaghlusi yeast‑atangitneng Pharisees‑et, yeast‑atanganengllu Herod‑em.”

¹⁶ Taagken ellmeggneng aleghquutkat, “Tawaten piinkut qayughllak neqekranglliilnguukut.”

¹⁷ Jesus‑em akuzitkengngukangi apeghtuusiit Pharisees‑et, apeghtuusiillu Herod‑em. Liisimakegkangi maligsaaghtengan liigikenghilkangat akuzitkegkaa enkaam aaptekii, “Sangan neqekranglliinnilusi pitsi? Paninang nallukaqetsilluu, liigikigatetsilluu? Umughtakii umyugasi?

¹⁸ Iyelgulghiisi, esghiigatsii? Sigutelguusi, nagaquusigatsii? Neqamikenghistekii

¹⁹ tallimat neqekrangllat kagimtekanka 5,000‑enun? Qafsinat pasketet siipneghmeng imighesteki?” Kiimsiqaat, “Qula maalghuk.”

²⁰ Jesus‑em aaptekii, “Maaghraghvinlek neqekrangllat kagimtaqngamki 4,000‑enun, qafsinat pasketet siipneghmeng imighesteki?” Kiimsiqaat, “Maaghraghvinlek.”

²¹ Aaplaataqii, “Sangafsi paninang liigikigatsi?”

Jesus‑em Naallghuskanga Ayaakaq Yuuk Bethsaida‑mi

²² Bethsaida‑mun kaasata ilangita yuget Jesus‑mun tagitkaat ayaakaq yuuk, saaftaghtesqelluku.

²³ Jesus‑em ayaakaq tasluqluku aghulaqutkaa nemeng. Taagken qesighlukek iiskek saaflukek aaptekaa, “Sameng esghaanneghisiin?”

²⁴ Yugem sivuglluni yugsughaluni pikaa, “Aa‑a, esghaghanka yuget, iwernga esghaqaaluteng llangaqa uqfiget piyugullghiit.”

²⁵ Jesus‑em allameng saaftekakek yugem iiskek. Maatenllaam yuuk esghaannaqeghllagyalghiimi, qemall esghaasagunneqigtuq whateghlluwaaq.

²⁶ Jesus‑em agliisqegkaa nenganun, pikaallu, “Aghuliifqaavek taakwani nemi.”

Peter‑em Jesus Christ‑angunikanga

²⁷ Taagken Jesus‑enkut maligsaaghtekullghiit aghulaqegkat nenun tunganganilngughnun Caesarea Philippi‑em. Tumemi taakwani maligsaaghteni aaptekii, “Kinangunilunga yuget piiqatnga?”

²⁸ Kiimsiqaat, “Ilangita piiqaaten John‑nguniluten Paaptaayesta, ilangita Elijah‑nguniiqaaten, enkaam ilangita naliqniluten uuknaliqistet.”

²⁹ Aaptekii, “Elpesi kinganguniiqestengnga?” Peter‑em pikaa, “Christ‑anguuten.”

³⁰ Taagken Jesus‑em ineghtengngwaaqii, “Kitumun alngunak apeghpenanga.”

Jesus‑em Aapqanga Ikfiqluni Tuqulleghqani

³¹ Taagken Jesus‑em apeghtuqestaqii maligsaaghteni, “Ighnegha Yugem elngaatall ikfiqepestaaghyaghqaaguq, ighsaksaghqaqaatlu siivanlleghet, chief priest‑et, apeghtughikayugetlu Liilightuusaneng. Taagken tuqulleqaat iwernga pingayiitangani aghneghem unguvaghllequq.”

³² Whateghlluwaaq ungipaatkii. Peter‑em iqitulluku aghyuuqaa.

³³ Iwernga Jesus‑em qiivluni esghaqii maligsaaghteni taagken Peter aghyuuqaa. Pikaa, “Awiiten whangamneng, Tughneghaq. Sumeghtaghalleghten yugem sumeghtaghalqii, Kiyaghneghem sumeghtaghalqenghitii!”

³⁴ Taagken Jesus‑em yulghuteghllagetlu maligsaaghtenillu tagsighteghluki pikii, “Kitum alngunak maligsukuminga, ellmineng katam piyukelleni peglluki, qaquurani uyamigluku maligllinga.

³⁵ Kitum alngunak yuguliyukumigu unguvalleni iflayaghqaqaa. Iwernga kitum alngunak iflakumigu unguvalleni whanga apalluqlunga, Pinilghiitlu Ungipat apalluqluki yuguliyaghqaqaa.

³⁶ Sangwaangam yugem pinighqusiqelleqagu piliilluku nunaghllak, iflakumikek unguvasigni?

³⁷ Samengꞌngam yuuk veghtusiqelleqa unguvasigminun?

³⁸ Maaten aghneghem yugi ataasiighmenneghitut Kiyaghneghmun, seghleghqumanguutlu. Maani aghneghni kitum alngunak kaynguyaguskanganga, apeghtuusankallu, whangallu Ighneghani Yugem kaynguyagulleqaqa tagikuma aghtughyaghqaanghillelighlunga Atamneng kelqelluki agleghnalghiit yaqulget.”