Mark 7 - New Testament-et Akuzipigestun

Sivuliighaat Apeghtuusiit

¹ Pharisees‑etlu ilangillu apeghtughikayuget Liilightuusaneng Jerusalem‑emeng pit, Jesus‑em uvitanganun qerngughutkat.

² Esghaqiit maligsaaghtengan ilangi uughtughpenateng neghelghiit. Uughtullghilnguut Pharisees‑et pisqellghistun.

³ (Pharisees‑etlu Jews‑etlu qamaglluteng neghyaghqaanghilnguut wetkuqun sivukluteng uughtughwaaghluteng, qayughllak sivuneghmeng apeghtuusiit atuqngukangit.

⁴ Talwa akilpegaghvigmeng tagineghmeggni neghigalnguut wetku sivukluten ukmangighsaghwaaghaqelghiit. Ilangillu sivuneghmeng apeghtuusalghutangit atuqngukangit. Atuqfagilgamegtiki qayuusiteng, sagneteng, siilut gaaghusiteng sangighqughwaaghaqegkangit.)

⁵ Enkaam Pharisees‑etlu apeghtughikayugetlu Liilightuusaneng aaptekaat Jesus, “Sangameng maligsaaghteten uughtughpenateng neghaqat? Sivunemta apeghtuusiit atuqigatiit.”

⁶ Jesus‑em kiimsiqii, “Elqughllusi Isaiah‑m uuknaliqutkumakangisi piniiyugneghni elpesi. Whaten igaqaaguq, ‘Kiyaghneq piiq, “Ukut yuget akuzitmegteggun quulvaghaqaatnga, nakaan ilumegteggun.

⁷ Temngi manigughaqaatnga, qayughllak apeghtuusaqaqiit liilightuusangllaqateng katam whanga Liilightuusaqepiglleghhiistun.”’

⁸ Enkaam elpesi Kiyaghneghem Liilightuusii pakigluki qaatkaqasi yuget apeghtuusiit.”

⁹ Jesus‑em nagneghutkii, “Pakigillepiguusi Kiyaghneghem Liilightuusiitnun qaatkepigesnaghnaluki elpesi katam apeghtuusasi.

¹⁰ Una esgha usputaq tawaten pilleghpesinun: Moses‑em aapqaqii Kiyaghneghem Liilightuusii whaten pilghiit, ‘Quulvaghluku atanllu naanllu.’ Whatenllu pikaaguq, ‘Kitum alngunak atanillu naanillu seghlequuqumikek tuqutellengyaghqaaguq.’

¹¹ Iwernga elpesi allanguut apeghtughillesi. Whaten piiqusi, ‘Yugemnguq atani nalighmeng naani whaten piyaghngaaghmigu, “Kayusiitusighqalguunga elpenun iwernga tuunaanghitaqa qayughllak Corban‑nguuq.”’ (Corban whaten pisiiguq, siingenllu Kiyaghneghmun akequsaqumaaqa.)

¹² Tawaten pilleghpesigun apeghtughaqasi yuget kayusiinneghisaghngaatki atangitlu naangitlu pisqelluki.

¹³ Enkaam pakigaqasi Kiyaghneghem akuzitangi, apeghtuusaqepigesnaghnaluki yugnun elpesi katam akuzitesi. Tamaakut temngi usputaagut, uglaapigtut sangwaat piiqegkesi.”

Seghleghqusiqlu Seghleghqusiinghilnguqlu

¹⁴ Taagken Jesus‑em yulghutet ellminun tagsinqiglluki pikii, “Qamagtengngwaaghlusi nagallusi liigikiteggu sameng pitka.

¹⁵ Yuuk neghegkaan nukeggnaghqigataa, seghletun sumeghtaghallghan, sallghanllu nukeggnaghqaqaa.

¹⁶ Sigutelgukufsi nagatusighqameng, nagatek!”

¹⁷ Jesus‑em unilluki yulghutet iteghyan maligsaaghtengita aaptekaat ungipaghaan sameng pisiitanga.

¹⁸ Jesus‑em pikii, “Elpesillu liigikigatsii? Sangwaa alngunak yugem neghaqegkanga nukeggnaghqusighqaanghituq ellnganun,

¹⁹ qayughllak neghegkii ighsaqghwanun pinaanghitut. Aqsaqghwanun piiqut enkaam yugusiineng aanaqut.” (Tawaten pilleghmikun Jesus‑em aapghwaa neqet qamaglluteng neghyaghqaaniluki.)

²⁰ Pikiillu, “Yugem qamaken ilumineng aanestekaan nukeggnaghqestaqaa.

²¹ Qaamken yugem ilunganeng aanaqut: sumeghtaghalleluget, nengughtegpenani kitumeng alngunak atuqilleq, teglegniiq, yugtaq,

²² gelgaghniiq, pakigniiq, alngunak seghletun pilleq, puughti, kayngusaghaatelleq, aqina, yulgutmeng iqlengiqutki, qukaayugta, temngitwha.

²³ Tamaakut qamaglluteng seghleghet yugem ilunganeng aanegkat nukeggnaghqikayuguut.”

Aghnam Ugpeqillgha

²⁴ Taagken Jesus aghulaqegkaq Tyre‑m tunganganun, kaalluni mangteghamun iitqaq. Kitumun alngunak nallukesuguyaqanga kaatelleni, iwernga ilangita liisimakegkaat.

^25-26 Aghnam Gentile‑em, allgeqam Phoenicia‑mi, Syria‑melngughmi nagaquqaa Jesus kaasimaniluku. Paniggaa ilumikun tughneghalek. Enkaam aglaragkiighluni Jesus‑mun segesqughlluni manungakun, maniguutkaq aanestaghtesqelluku tughneghaq panigmineng.

²⁷ Iwernga Jesus‑em pikaa, “Taghnughhaat sivukluteng neghesaghqaagut, qayughllak anaggutngaaq taghnughhaat neqngit tuguluki qikminun miluuskumeng.”

²⁸ Aghnam kiimsiqaa, “Aa‑a, Ataneq, talwa qikmit tipelem asinganilnguut neghaqut taghnughhaat ifkaghqellghitneng!”

²⁹ Enkaam Jesus‑em pikaa, “Naqamqun tawaten kiimsighaghpenga aglaghhaaten, tughneghaq aanumaaq panigpeneng!”

³⁰ Aghnaq neminun aglaghyalghiimi paniga ingaghmeteftuq qavaghvigmi, taawa llaaghan tughneghaq aanumalghii paniganeng.

Jesus‑em Naallghuskanga Yuuk Nagaquusigalnguq Talwa Akuziyiilnguq

³¹ Taagken Jesus aghulaqegkaq Tyre‑meng. Sidon‑kunllu, Qula Neghllagteggunllu aagluni Naayvamun Galilee‑mun pikaq.

³² Yuget ilangita, yuuk nagaquusigalnguq talwa akuziyiilnguq tagilluku Jesus‑mun nangllegsiitkaat saaftesqelluku.

³³ Enkaam Jesus‑em awiitutkaa yulghutneng. Sivukluku tekghegni sigutegkenun kanaghllukek, taagken iqillukek qesighluki iiggeni, ulunga saaftekaa.

³⁴ Taagken sivuglluni qilagmun aneghpakaghluni yuuk pikaa, “Ephphatha!” (Taana whaten pisiilghii, “Reghightek!”)

³⁵ Tawaninginaq yugem sigutkek reghiqak, ulungallu piniightekaq, aga akuzinginaamaghmi pikaq akuziyiilliqegpenani.

³⁶ Taagken Jesus‑em ineghtengngwaaqii kitumun alngunak ungipaqefqaan pisqelluku, iwernga ineghtaataghyisteng wata ungipaqegkaat.

³⁷ Nagaquullghiit tamaakut elngaatall saghiighayugllakat, pikat, “Uum yugem sallgha qamaglluni piniperewaaghuuq! Talwa nagaquusigalnguut nagaquusagutestii, akuziyiilnguutlu akuziyagutestii!”