Mark 6 - New Testament-et Akuzipigestun

Jesus Tuguklinghilkangat Nazareth‑mi

¹ Taagken Jesus aghulaqegkaq Capernaum‑emeng, aglaqaq neminun Nazareth‑mun, maligsaaghtengitallu maligtekaat.

² Sabbath‑ngughsagu synagogue‑mi apeghtughikaq. Yulghutet nagalluku saghiighayagutkaat. Aapqughaaghutkat ellmeggneng, “Naken liitaki? Kitum peghqinghughtestagu? Saghiighayugnaghllaguut allaaghlluwhaghtillghi!

³ Naten tawaten pii? Kaapentangunghitaa, Mary‑m ighnegha? James‑enkut, Joses‑enkut, Judas‑enkut, Simon‑enkut anglegutkenghitakii? Nayagillulli maantaat?” Enkaam tugukliimangilkangat.

⁴ Jesus‑em pikii, “Kitum alngunak uuknaliqista siivakaqaa, iwerngaqun nunalgutangitallu nalleqliitallu nengllugutangitallu pingigataat.”

⁵ Enkaam tamaani allaaghlluwhaghtipagningitkaq, iwerngaqun qafsinkuuraghhaat saafluki naallghutkii.

⁶ Enkaam Jesus saghiighayugllakaq, qayughllak ugpeqenghilkangat. Taagken Jesus Nazareth‑em uvitanganilngughnun nenun piiqluni apeghtuqii yuget.

Jesus‑em Ungipaqiyaghtiisqegkangi Qula Maalghuk Siipneqluku Malighsaaghteni

⁷ Tagsighluki qula maalghuk siipneqluku maligsaaghteni, kayaggnaqnikii malghukaghtiita ungipaqisqellukillu naallghuqiisqellukillu. Aghulaqfagilgata aghtughyaghqaanghilleliquqii yugneng aanesqiisqelluki tughneghaat.

⁸ Liilightuqiillu, “Igleghalleghpesini sameng alngunak kelqegpenasi iwerngaqun ayaviighmeng. Neqekrangllangunasi, aqeftaghaangunasi, maningunasi pilghaasi.

⁹ Iwernga kameglusi, simiitkaghqameng ggaatmeng kelqegpenasi.”

¹⁰ Whatenllu pikii, “Nani alngunak tukughpesi upughaskangisi tawanlleghhaasi kenlanga aghulaqelleghpesinun.

¹¹ Nenun kaaskufsi upughatingigalngughnun, nalighmeng nagasugigalngughnun, uninnakesi taana nuna itegasi pagulangiimiita. Tawaten pikufsi kelengasaaghlleqasi Kiyaghneghem aghyuulleghqaaneng!”

¹² Enkaam maligsaaghtet aghulaqluteng ungipaqikat yugnun avuteghqelluki seghleghqennaniisqelluki.

¹³ Tughneghalghutet aanesquqiit yugneng, mesiighqaqlukillu qinuyulghutet naallghuquqiit.

Tuqutellgha John‑em Paaptaayestem

¹⁴ Umiilgem Herod‑em nagaquqaa qamaglluku Jesus‑em tawaten pillgha, qayughllak tamaghhaani aapqangit Jesus‑em allaaghlluwhaghtillghi. Ilangi yuget pikat, “John‑nguuq Paaptaayesta, unguvaamaaq enkaam esgha aghtughyaghqaanghillelek allaaghlluwhaghtilleghmun.”

¹⁵ Iwernga ilangit yuget pikat, “Elijah‑nguuq.” Ilangit pikat, “Uuknaliqistenguuq, neghighluku uuknaliqistestun ayuquq.”

¹⁶ Herod‑em nagaqughluku pikaq, “John‑nguuq Paaptaayesta, naasqwightestekaqa iwernga unguvaamaaq!”

^17-18 Qavnganghhaq Herod‑em kayagutkaqegkanga John tuguluku, asighqesluku anusimingllaghtestekaa. Tawaten pistekaa, qayughllak John‑em piighaataqaa Herod whaten, “Liilightuusamnni anaggusimaaten tugulleghpegun anglegutegpek Philip‑em nulighha Herodias.”

¹⁹ Enkaam Herodias‑em ugumiyaguteghllakaqegkanga John repall tuqutesupigtekaqsaqanga. Iwernga pipagningitkaa qayughllak Herod‑em tawaten pistepagningitkaa.

²⁰ Herod‑em alikegkaqegkanga John liisimakutmineng yuuk pinilghii, Kiyaghneghmun qaatkutngaghllalghii. Enkaam kelengakestengngwaaqaa sanayukatgu. Herod‑em nagasugaqegkanga John qaywa seghleghyugaqeghngaaghmi naganneghminigu.

²¹ Taagken Herodias qenwatlu pilleghqangegkaq. Herod‑em allgeghvini aghneq kaasan neqenghaghqestimalghii kavemem umiilwaaghitnun, pilluwaghtet umiilwaaghitnun, igleghutistengitnunllu Galilee‑ghmiit.

²² Taagken paniga Herodias‑em iteghluni neghuullghiinun tukalegaqaq. Herod‑enkut aqelqaqullghiit elngaatall efquqegkaat. Enkaam umiilgem pikaa aghnaghaq, “Sameng alngunak tungsighvikegkuvnga tuunelleqamken.”

²³ Akeqegkaallu whaten, “Ipapestaaq tuunelleqamken sameng alngunak tungsiquvek, talwa umiilgutimalleghma aklungingan avellgha!”

²⁴ Taagken aghnaghaq aanluni naani aapsaghtuqaa, “Sameng tungsighnaqsinga?” Naangan pikaa, “John‑em Paaptaayestem naasqwa tungsighhu.”

²⁵ Aghnaghaq agliighwaghlluni umiilegmun tungsighvikegkaa, “Whaa maaten, John‑em Paaptaayestem naasqwa piyugaqa qayuutaghraagkun lliluku!”

²⁶ Umiilek elngaatall qivghughllakaq iwernga saluku ighlekligu, qayughllak akeqngwaaqaqegkanga aqelqalghutni nagatestekluki.

²⁷ Enkaam tawaninginaq umiilgem kayagtekaa kelengakista tagitesqesluku John‑em naasqwa. Kelengakista aanluni anusimingllaghvigmun aglaqaq John‑em naasqwa kepnaluku.

²⁸ Naasquq qayuutaghraagkun lliluku aglaalluku aghnaghaghmun tuunegkaa. Enkaam aghnaghaam naaminun tuunegkaa.

²⁹ John‑em maligsaaghtengita nagaqughluku, yugusii aqfaluku lliifqaat.

Jesus‑em Neghestillgha 5,000‑neng Siipngalghiineng Yugneng

³⁰ Apostle‑et uteghnightuulluteng Jesus‑mun aapqiit apeghtughilleteng, naallghuqulleghteng, tughneghaghnengllu aanesqulleghteng yugneng.

³¹ Yugllagulghii tagimaghmengllu aghulaqumaghmengllu pilghiit repall Jesus‑enkut maligsaaghtekullghiit neghepagningiitkat. Enkaam maligsaaghteni pikii, “Natmun aghulaqelta paaghqillghanun, elpesiqun meghnaaliightesqellusi.”

³² Enkaam angyakun paaghqillghanun aghulaqegkat ellnginaghhaaghhnaluteng,

³³ iwernga yulghutem esghaqiit aghulaqelghiit. Liisimakluki navek pinaqutangit, ketanqusnaq naayvam esnengakun maligtekiit. Nenun nallangiinneghata legan yuget maligtaqegkangit. Kaatkat takukameggnun ingyaghaghlluki Jesus‑enkut.

³⁴ Jesus‑em angyameng uuglluni quutmun yulghutet esghaghluki nangllegyagutkii, qayughllak penniighestun penniighniightengilngughestun ayuqelghiit. Enkaam allaaghhiinaghmeng apeghtughtaakii.

^35-36 Whanikupigsagu maligsaaghtengita takuluku Jesus pikaat, “Maana paaghqituq, whanikughllagaallu. Yuget aglaghtuutesqiki piitesighaghtenunllu, nengiighhaghnunllu. Ellmeggneng neqengyaghtughlit neqhyaghqameng.”

³⁷ Iwernga Jesus‑em pikii, “Elpesi neghyaghqaliteki.” Aaptekaat, “Tukfighiyaghtughtesugsikuut 200 denarii‑m akinganeng neqekrangllameng neghesqelluki?”

³⁸ Jesus‑em aaptekii, “Naten uglaghqakaan neqekrangllalgutsi? Enta ivaghiightek.” Naalkusameng ungipaatkaat, “Taawa tallimat neqekrangllat, maalghuklu iqallugek.”

³⁹ Taagken Jesus‑em maligsaaghteminun qafsinkaghtiita aqumestesqegkii vegaaghqun.

⁴⁰ Enkaam aqumuutkat 100‑ngwaaqluteng 50‑ngwaaqluteng.

⁴¹ Jesus‑em tuguluki tallimat neqekrangllat, maalghuklu iqallugek, quulmun sivuglluni iqamsiqayugvikegkaa Kiyaghneq. Taagken neqekrangllat iiggmineng aavgughluki maligsaaghteminun tunquqii uyegtesqelluki. Iqallugeklu iigmineng aavgughlukek tunqughtestekii.

⁴² Qamagtengngwaaghluni neghuutkaq kepsuulluni.

⁴³ Taagken maligsaaghtet tugulaqiit qula maalghuk siipneqluku pasketet esleqngalghiit kagimleghughtekaneng neqekrangllaneng, iqallugnengllu.

⁴⁴ Yuget neghuutkat 5,000‑nguftut, kesutkegpenaki aghnatlu taghnughhaatlu.

Jesus Meghqun Piyulghii

⁴⁵ Legan taaqut Jesus‑em maligsaaghteni qelqii angyakun igleghtekestiisqelluki Bethsaida‑mun, naayvam inglunganilngughmun. Taagken ellngan yulghutet aglaghtuutestekii nengitnun.

⁴⁶ Aglaghtuutesamiki yughaghyaghtuqaq qemimun.

⁴⁷ Unugmi taakwani angyat naayvamelluki Jesus ellnginaghhaakaq quutmi.

⁴⁸ Esghaqii malighsaaghteni aygughnaqutkelghiit yaavuqumeng, qayughllak anuqliiskangi. Akulegkeni three‑kellaagenkuk six‑ekellaagenkuk unaanguluku, takukii meghem qaayngakun piyugmeng. Naghughhnaqaqiillu

⁴⁹ esghaqaat meghqun piyulghii. Sumeghmeggni taghneghaaniluku araghllakat.

⁵⁰ Qamaglluteng alingruughutkat. Tawaninginaq Jesus‑em pikii, “Ilutughtek! Whanganguunga, alingegpenasi.”

⁵¹ Legan angyamun uugtuq ellmaaragllugughtekaq. Maligsaaghtet saghiighayugllakat,

⁵² qayughllak paninang liigikigalkangat Jesus kinangutanga, qaywa esghapagngaaghmegteggu neqekrangllat nulastekangi. Tawatetkaalghiit qayughllak salin umyugiit reghiigalnguut.

Jesus Naallghuqulghii Gennesaret‑mi

⁵³ Taagken nagneqat naayvam inglunganun enkaam Gennesaret‑kun tamlagluteng angyaghteng petukaat.

⁵⁴ Legan angyaghteng unitaat yuget liisuqnginaamaan Jesus pikaat.

⁵⁵ Enkaam kelkaghtaarragkiiqat Jesus kaasimaniluku. Jesus navek piyaghngaan qinuyuget aglaataqegkangit allighiitgun ellnganun.

⁵⁶ Jesus kaanneghmini neghllagnunllu, nenunllu, eslamelngughnun akilpegaghvignun aglaghaqelghii. Enkaam yuget tagitaqegkangit qinuyuget akilpegaghvignun Jesus‑mun naallghutesqelluki. Jesus‑mun maniguututkiit qinuyugnun waran saaftesqelluku kenii, enkaam qamaglluteng saaftilghiit naallghutkat.