Mark 5 - New Testament-et Akuzipigestun

Jesus‑em Naallghuskanga Yuuk Ilumikun Tughneghaghtuqaq

¹ Naayvam inglunganun kaatkat Jesus‑enkut maligsaaghtekullghiit, nunangitnun Gerasa‑ghmiit.

² Legan Jesus angyameng quutmun uugtuq yuuk aanluni sufliitneng llivghet, paasqaa.

^3-4 Taana yuuk ilumikun tughneghaghtuqaq lliveghnitaqelghii. Awen qiipraghutneng asightaqsaqangat iiggitgunllu itegiitgunllu iwernga sakeqaqegkangi qiipraghutet, kagimtaqegkangillu savikenghaaghet itegaminilnguut. Kitum alngunak asighqepagningitkaallu aghuliightepagningitkaallu, qayughllak iknaqepiglleghhii.

⁵ Unugtuumaan, aghneghtuumaan igleghtaqelghii lliivghet qungangitnillu qeminillu, quunpeng araghaataamaghmi, uyghagteggun kiitiqumaghmi ellmineng.

⁶ Jesus esghaghyamigu uyavaqaanlluku ketanqusnaq takuluku segesqughfikluku maniguqaa.

^7-8 Taagken Jesus‑em yugem ilunganilnguq tughneghaq pikaa, “Uyuq seghleq tughneghaq, aani yugmeng!” Tughneghaam araghaataqaa, “Jesus, Ighnegha Kiyaghneghem, sanaqsinga? Akeqi Kiyaghneghmun ikfiqestesaghqaafqaama pisqellunga!”

⁹ Jesus‑em aaptekaa, “Kinanguzin?” Yugem kiimsiqaa, “Aatqaqa ‘Uglaghllak’ qayughllak uglaghllagtukut!”

¹⁰ Elngaatall Jesus‑mun aapuquutkii tughneghaat aghulaqestefqiita pisqelluki taagken nunameng.

¹¹ Taawanguq qemim minglengani kurugalghuteghllaget, neghuullghiit.

¹² Tughneghaat aapuquutkat Jesus‑mun, “Kurugaghnun kayagtikut, ellngitnun iteghtestikut.”

¹³ Enkaam angeghqumakegkii. Tughneghaat yugmeng aanaghesnaghluteng kurugaghnun iteghaatkat. Entaqun 2,000‑nguut kurugaat, pennaneng asitmun pangalgulluteng naayvamun ateghaatkat enkaam tuqulaghaatkat.

¹⁴ Kurugaat aflengakistengit qimaguutkat neghllagmunllu uvitanganilngughnunllu nunanun. Tamaani ungipaqegkiit ilumikun tughneghaghtuqaqlu, kurugaatlu. Enkaam yuget esghaghyaghtuutkiit samatangi.

¹⁵ Jesus‑mun kaalluteng esghaqaat yuuk tughneghaghtughllagyalghii ilumikun. Taawanguq aqumgaftuq piluguwaaghluni, umyugakeklu naallghullutek enkaam alingruuqat.

¹⁶ Tamaakut esghapakat aapqaat naallghusimaniluku yuuk tughneghaghtughllagyalghii, aapqiitlu kurugaat samatangi.

¹⁷ Taagken yulghutet maniguutepiglluteng Jesus aghulaqesqegkaat nunameggneng.

¹⁸ Jesus uugtaquqlu angyamun, yugem tughneghaghtuyalghiim maniguutepiglluni aaptekaa, “Maligllaken?”

¹⁹ Iwernga Jesus‑em ighsakluku pikaa, “Nengllugutegpenunllu, ilakumtaaghpenunllu aglaghluten apeghnaken Atanghem nangllekepiglluten apeghiillgha elpenun.”

²⁰ Enkaam yuuk aghulaqegkaq. Tamaani nunami aatqelghiimi, Qula Neghllaget, ungipaqegkaa Jesus‑em apeghiillgha ellminun, tamaakut nagaquutkat allaaghlluwhaghyukat.

Aghnaghaam Unguvaghtellghallu Aghnamllu Naallghutellgha

²¹ Jesus angyakun uteghnighyan inglunganun naayvam, esnemi yulghuteghllaget qerngughutkat uvitanganun.

²² Taagken ataasiq synagogue‑em umiilwaagha, Jairus‑nguftuq aatgha, tagiluni Jesus‑mun segesqughtekaq manungakun.

²³ Maniguutepiglluni pikaa, “Paniggaqa qinuyugllaguuq, tuquyaghtungestaamaaq. Takwaaghtigu saafsaghtuqaghhu, enkaam naallghulluni kiyaghlli!”

²⁴ Enkaam Jesus‑em maligtekaa. Yulghuteghllagetlu maliglleghaatkaat Jesus, repall kanglluqaghlluku.

^25-26 Aghnaqlu tawanteftuq aagtuqaataq qula maalghuk siipngaan ayumiqulleghni. Talwa aghallegtalghutet kayusiitaqsaghngaatni naallghusigalnguq, yeghlegi naavnginalghii. Qenwat maniqraggiighutkaq.

²⁷ Nagaqughaqegkanga Jesus, enkaam yulghuteghllaget akulangitgun tunutanganeng takukaa.

²⁸ Sumeghtaghaqaq, “Aatkii saafteqeghsaqumki naallghunayaghtunga.”

²⁹ Legan atkuyaaghqek saaftaak kiitnginaamaghmi pikaq, enkaam elpekegkaa naallghutellgha qaamnami.

³⁰ Tawaninginaq Jesus‑em liigikegkaa aghtughyaghqaanghilleq aanelghii ellmineng, enkaam yulghuteghllaget qiivluki aaptekii, “Kitum aatkanka saaftaki?”

³¹ Maligsaaghtengita pikaat, “Yulghuteghllaget qungangitnilnguuten sangan kitumun saafniluten pizin?”

³² Iwernga Jesus‑em esghaghnaqegkaa kitumun saaftutni.

³³ Aghnam liigikluku naallghutelleni alingem ungelegsimaghmi takukaa Jesus. Taagken manungakun segesqughlluni ungipaatkaa salleghmineng.

³⁴ Jesus‑em pikaa, “Panimni, ugpeqilleghpek naallghutestaaten. Nekeggmellelighluten aglaa, naallghutngwaaghumaaten.”

³⁵ Jesus‑em aleghquumaluku aghnaq, kevgat tagiluteng ungipaatkaat Jairus, “Panigen tuqumaaq, takusqegpenaanꞌngam Apeghtughistemun.”

³⁶ Jesus‑em nagateghngaaghmiki avelghaqiinaghluki Jairus pikaa, “Alingegpenang, taawanginaq ugpeghi.”

³⁷ Taagken kitumun alngunak maligtesnaniqaq, iwerngaqun kelqegkii Peter‑enkut James‑enkut John‑enkut, anglegutanga James‑em.

³⁸ Jesus‑enkut kaasalghiimeng Jairus‑enkunun, yulghuteghllaget elngaatall qiyaaghuuteghllaguftut metuumaghmeng.

³⁹ Jesus‑em iteghluni yulghutet pikii, “Sangafsi qiyaaghuuteghllagutsi? Sangafsi nepugtiighllagutsi? Taghnughhaq tuqullghituq, qavaaguq!”

⁴⁰ Iwernga nenglaqegkaat tawaten piyisteng. Qamaglluki aanesamiki angayuqakeklu taakutlu maligsaaghteni itghutkii taghnughhaam nenganun.

⁴¹ Jesus‑em iiggakun tuguluku aghnaghaghhaq pikaa, “Talitha kum!” (whaten pisiq, “Aghnaghaghhaq, maketesqamken!”)

⁴² Tawaninginaq makelluni piyukaq. (Aghnaghaghhaq qula maalghuk siipngaan uksughtutkaftuq.) Angayuqakeklu maligsaaghtetlu elngaatall saghiighayukat!

⁴³ Taagken Jesus‑em ineghtengngwaaqii kitumun alngunak ungipaqefqaan pisqelluku, pikiillu, “Neghyaghqaghhaghmeng tuuniteggu.”