Mark 3 - New Testament-et Akuzipigestun

Yugem Iiggan Inglungi Uniiqat

¹ Taagken Jesus aglanqigtekaq synagogue‑mun, tawanteftuq yuuk inglungi iiggan uniiqat.

² Ilangita yuget tawanlenguut riirngingwaaqaat Jesus‑em naallghunnayukagu Sabbath‑mi. Naallghuskagu whaten pinaluku, “Anaggututen!”

³ Uniiqameng iiggelek yuuk Jesus‑em pikaa, “Tagi whavek.”

⁴ Taagken yuget aaptekii, “Liilightuusamta sasqinkut Sabbath‑mi? Pinitun pisqinkuut, nalighmeng seghletun? Yugulighisqinkuut, nalighmeng tuqutisqinkuut?” Iwernga yuget qallegnanighwaaghutkat.

⁵ Jesus‑em esghapagngaaghmiki ugumiyagutkii, naqam iilqutkumiita pineghllugullghitnengllu waakigatngitnengllu. Taagken Jesus‑em qiivluku yuuk pikaa, “Iiggeten nengugutiki.” Legan nengugutii aga naallghutkat.

⁶ Enkaam Pharisees‑et aanaghesnaghluteng synagogue‑meng, Herod‑em ilapgastengitnun aglaghluteng agghitkegkaat naten tuqutelleghqameng Jesus.

Yulghun Naayvam Esnengani

^7-8 Jesus‑enkut maligsaaghtekullghiit Naayvamun Galilee‑mun aglaqat. Yulghuteghllaget maligtekiit, qayughllak nagaquqaqegkangit Jesus‑em allaaghllugwhaghtillghi. Tamaana yulghun Galilee‑meng, Judea‑meng, Jerusalem‑emeng, Idumea‑meng, Jordan‑em Kiiwem inglunganilngughneng nunaneng, Tyre‑meng, Sidon‑meng pingulghiit.

⁹ Yuuk uglaghighllagyan Jesus maligsaaghteminun angyameng yataaghqutesqegkaq luuraq ighlleghnayukangatni meghmun.

¹⁰ Yulghun naallghuquqaqutanganeng qamaglluteng qinuyuget ellnganun kaannaqeghllakat saaftepigesnaghnaluku.

¹¹ Tamaakutlu tughneghaat yuget ilungitnilnguut esghaneghmegteggu Jesus, sivungakun ullghaghlluteng akilghuugaqelghiit, “Kiyaghneghem Ighneqaaten!”

¹² Iwernga Jesus‑em ineghtengngwaaqii tughneghaat kinangutni apefqaan pisqelluku.

Jesus‑em Nakmikegkangi Qula Maalghuk Siipneqluku Apostle‑et

¹³ Taagken Jesus qemimun mayughluni yuget piyukegkani tagsighteqii. Tagilaghaasata

¹⁴ nakmikegkii qula maalghuk siipneqluku yuget apostle‑nguluki. Taagken pikii, “Whangamnitesqellusi nakmikamsi, kayaglleqamsillu ungipaghyaghtiisqellusi.

¹⁵ Aghtughyaghqaanghillelgullequsillu tughneghaat aanestesqelluki yugneng.”

¹⁶ Ukut nakmikegkaqii, Simon, (Jesus‑em ateghiqaa Peter‑meng);

¹⁷ James‑enkuk John‑enkuk, ighneghqek Zebedee‑m, (Jesus‑em atiqakek Boanerges‑meng, whaten pisimeng, “Ighneghqek Kallugem”);

¹⁸ Andrew‑nkut, Philip‑enkut, Bartholomew‑nkut, Matthew‑nkut, Thomas‑enkut, James‑llu ighnegha Alphaeus‑em, Thaddaeus‑enkut, Simon‑llu Zealot‑a,

¹⁹ Judas Iscariot‑lu uveghpagutiyaghqaq Jesus‑meng.

Jesus‑enkuk Beelzebul‑enkuk

²⁰ Taagken Jesus tukughminun aglaqaq. Yulghuteghllaget aglaghtuullaataqat ellngitnun, repall Jesus‑enkut maligsaaghtekullghiit neghepagningiitkat.

²¹ Nengllugutangan nagaqughluku tawaten aneghtellgha aqfakaat, qayughllak yuget pikangat nallungughhniluku.

²² Ilangi apeghtughikayuget Liilightuusaneng Jerusalem‑emeng tagikat whaten pimaaqelghiit, “Beelzebul Jesus‑em ilunganituq! Enkaam aanesqughaqii tughneghaat yugneng aghtughyaghqaanghillghakun Beelzebul‑em, umiilwaaghitgun tughneghaat.”

²³ Enkaam Jesus‑em tagsighluki yuget ungipaghaatkii, pikii, “Tughneghaq ellmineng aanesleqaa?

²⁴ Ataneghpagulleq aafquuskumi, taana ataneghpagulleq qerngaghmennaanghituq.

²⁵ Nengllugutet aafquuskumeng, taakut nengllugutet qerngaghmennaanghitut.

²⁶ Tawateghpigaq Tughneghaankut aafquulluteng pilluguskumeng, Tughneghaq nekevghapagningiilluni kenlekaghqaminun kaallequq.

²⁷ “Kina alngunak iteghnaanghituq iknaqelghiim yugem mangteghaanun wayaghteghnaluki saghyangi. Sivukluku iknaqelghii yuuk asighqaghlluku, taagken wayaghteghlleqii saghyangi.

²⁸ “Ipa ungipaatamsi, yuget seghevutellengyaghqaagut seghleghqellghitneng, seghletunllu akuzitkellghitneng Kiyaghneq.

²⁹ Iwernga kitum alngunak seghletun akuzitkegkumikek Agleghnalghiik Taghneghak seghevutellengnaanghituq, qayughllak seghleghqengnguuq Kiyaghneghem seghevusaghqaqenghilkanganeng. Taana seghleghqelleq kenglengilnguuguq.”

³⁰ Jesus tawaten akuzikaq qayughllak ilangita pikaqegkangat, “Tughneghalguuq ilumikun.”

Jesus‑em Naangallu Anglegutangillu

³¹ Taagken Jesus‑em naangallu anglegutangillu kaatkat. Manughamelluteng aanesqegkaat esghaghyugniluku.

³² Yulghutet aqumuutngalghiit Jesus‑em uvitangani ungipaatkaat, “Qakma naagpeklu anglegutegpeklu esghaghyugaqaaten.”

³³ Jesus‑em aaptekii, “Kinangaawa naaka? Kinkungaawat anglegutenka?”

³⁴ Yugsughaluni aqumgalghiit pikii, “Elpesi naakamsillu, anglegutkamsillu!

³⁵ Kitum alngunak atuqegkumigu Kiyaghneghem piyukellgha, anglegutkaqallu naakaqallu.”