Mark 16 - New Testament-et Akuzipigestun

Jesus‑em Unguvallgha Tuqulleghmeng

¹ Sabbath‑a alpagyan Mary, Magdala‑ghmii, Mary‑llu naanga James‑em, Salome‑llu, tepengllaasingegkat Jesus‑em yugusii angighhnaluku.

² Sivuliim aghneghani santillghem, unaangupiglluku siqineq piitekestaaluku lliveghtekat.

³ Tumemi taakwani aapqughwaaghutkat, “Kitumngam ullghitaghtaannaqinkut uyghagllagmeng lliivghem paaynganilngughmeng?”

⁴ Taagken sivugsalghiimeng uyghagllak awitngwaaghluni ayuqeftuq.

⁵ Lliveghmun iteghluteng esghaqaat nukalpigaq qatelghiimeng atkuyaalek aqumgalghii aghenqigneghani. Aghnat elngaatall saghiighayukat.

⁶ Nukalpigam pikii, “Saghiighayugpenasi, liisimakamsi ivaangwaaghsi Jesus, Nazareth‑eghmii, qaquuraqaayalghii. Whaanneghituq, unguvaghtestekaaguq! Esghaqaghtegguqun, whagun llikaqsaghaat.

⁷ Ungipaasaghtughteki maligsaaghtengi, Peter‑llu, aga Galilee‑mun sivullgaaghumaaq pinaqnilleghmitun. Taagani esghaghlleqaghsi.”

⁸ Aanluteng anagniiqat lliveghmeng, qayughllak kukragyugumaghmeng alingruughulghiit, repall ungeleglluteng. Talwa kina alngunak sameng pimangilkangat, qayughllak alingruughulghiit.

Jesus‑em Aliighvikegkanga Mary, Magdala‑ghmii

⁹ Sivuliim aghneghani santillghem, unaangupiglluku Jesus unguvaqaalghii tuqulleghmeng. Aliighviksuwhaaqaa Mary, Magdala‑ghmii. (Aghnameng taagken aanestekaqegkangi maaghraghvinlek tughneghaat.)

¹⁰ Ungipaasaghtuqii ellnganisalghiit qivghumaluki, qiyamaluki.

¹¹ Iwernga ungipaasisteng Jesus unguvaamaniluku tuqulleghmeng, ellminunllu esghaamaniluku ugpequmangilkangat.

Jesus‑em Aliighvikegkek Maalghuk Maligsaaghtek

¹² Taam kingunganeng Jesus‑em allanguluni aliighvikegkakek maalghuk maligsaaghtegni, navek pimalukek.

¹³ Uteghnighlutek ungipitkaqsaqangik ilatek iwernga ugpequmangilkegket.

Jesus‑em Aliighvikegkangi Qula Ataasiq Siipneqluku Maligsaaghteni

¹⁴ Taam kingunganeng Jesus‑em aliighvikegkii qula ataasiq siipneqluku maligsaaghteni neghuusimaluki. Aghyuuqii ugpeqinghitellghitnengllu aygughikellghitnengllu esghaatkat ellmineng unguvaghtestelleghmi kingunganeng.

¹⁵ Pikii, “Aghulaqlusi nunataghhaanun tamaghhaanun ungipaqiteki Pinilghiit Ungipat tamaghhaanun yugnun.

¹⁶ Kina alngunak ugpeqilghiillu paaptaayelghiillu yugulillengyaghqaaguq. Iwernga kina alngunak ugpeqinghilnguq aghyuullengyaghqaaguq seghleghqelleghminun.

¹⁷ Ugpeqat allaaghlluwhaghtillequt liigikesqelluku aghtughyaghqaanghilleghteng Kiyaghneghmeng pingutanga. Enkaam atemkun aanesqughlleqiit tughneghaat yugneng; akuzillequt allastun ulustun;

¹⁸ tugusaghngaaghmeng nemeghyameng, nalighmeng meghyaghngaaghmeng tuqunalghiimeng sanaanghitut; qinuyulghiit saafneghmegteki naallghutaqellequt.”

Jesus‑em Mayullgha Qilagmun

¹⁹ Atanghem Jesus‑em maligsaaghteni aleghquneghmeng taaqsaki, Kiyaghneghem mayughtestekaa qilagmun, enkaam aqumegkaq Kiyaghneghem aghenqigneghakun.

²⁰ Taagken maligsaaghtet aghulaqluteng tamanganun ungipaqikat Pinilghiineng Ungipaneng. Atanghem qepghalgusiqii, ipapighqestekaallu ungipaq allaaghlluwhaghtistelleghmikun. Amen.