Mark 15 - New Testament-et Akuzipigestun

Pilate‑em Aapqughaaqanga Jesus

¹ Aghtaghaqiinaghyagu chief priest‑etlu, siivanlleghetlu, apeghtughikayugetlu Liilightuusaneng, qamagllutengllu agghistet qerngughutkat agghinnaluteng. Taagken Jesus asighqesluku aglaalluku Pilate‑mun, tuunegkaat ellnganun.

² Pilate‑em aaptekaa, “Jews‑et umiilkataan?” Jesus‑em kiimsiqaa, “Elpek esgha umiilgunikevnga.”

³ Chief priest‑et uglaapiglleghhiineng allaaghhiinaghneng anaggunikaat.

⁴ Pilate‑em aaplaataqaa, “Kiimsiitkaghqiisiin? Naganneghisikii uglaapiglleghhiineng allaaghhiinaghneng anaggunnikangaten?”

⁵ Iwernga Jesus sameng pimangitkaq enkaam Pilate saghiighayukaq.

Pilate‑em Tuqutesnaqegkanga Jesus

⁶ Tamaghhaani Passover‑em Neqenghaghqellghani, Pilate‑em aanestaqegkanga ataasiq anusimingllaghaq yuget nakmikegkaat.

⁷ Taawanguq Barabbas anusimingllaghvigmelnguq, maligulluni ilangitnun yugnun yugtaghaataqaq seghleliighqiighllagmi.

⁸ Yulghutet tagiluteng Pilate‑mun aanestesqegkaat ataasiq anusimingllaghaq tawaten piiqellghatun.

⁹ Aaptekii, “Aanestesugestegguu Jews‑et Umiilgat?”

¹⁰ Pilate‑em liisimakngwaaqangi chief priest‑et aqinakluku Jesus tagitngukangat ellnganun.

¹¹ Chief priest‑et aaghqutaqegkiit yulghutet Barabbas aanestesqelluku avelghaghluku Jesus.

¹² Pilate‑em yulghutet aaplaataqii, “Sanaqsikunmi umiilkenniiqegkesi Jews‑enun?”

¹³ Akilghuukat, “Qaquuraghtestigu!”

¹⁴ Pilate‑em aaptekii, “Sangan, sameng seghleghmeng pimaa?” Iwernga iglagtaaghalluteng akilghuukat, “Qaquuraghtestigu!”

¹⁵ Enkaam Pilate‑em efqughsugluki yulghutet, aanestekaa Barabbas. Taagken Jesus kagsagmigtesluku tuunegkaa pilluwaghtenun qaquuriisqelluku.

Pilluwaghtet Legasiighwaatkegkangat Jesus

¹⁶ Pilluwaghtet itghutkaat Jesus umiilgem mangteghaanun (atilqelghii Praetorium). Taagken pilluwaghtelghuteteng qerngughtekiit.

¹⁷ Jesus‑mun aatestekagket esnegrukegtak atkuyaaghek. Sikughllugmeng qaghpangllaghluku aatestekaat naasqwakun.

¹⁸ Taagken legasiighwaatkegkaat, “Quulvaghamken elpek Umiilgat Jews‑et!”

¹⁹ Unaghsiighwaghmeng naasqwakun anaguleghluku, qesiquluku, manungakun segesqughlluteng qungughfikegkaat.

²⁰ Legasiighwaatkenneghmeng taaqsamegteggu esnegrukegtak atkuyaaghqek mataghllukek ellngan katam aatkii aatestekiit. Taagken aanutkaat qaquuraghnaluku.

Jesus Qaquuraqangat

²¹ Tumeni taakwani nallaqaat yuuk, aatqelghii Simon‑meng, Cyrene‑eghmii, atangak Alexander‑enkuk Rufus‑enkuk. Naken qantaghaneng taginguftuq Jerusalem‑emun. Pilluwaghtet qelghutkaat Simon‑mun uyamigesqelluku Jesus‑em qaquuraa.

²² Jesus aglaatkaat Golgotha‑mun. (Golgotha whaten pisiiguq, “Yugem Naasqwan Nenga.”)

²³ Tawani tuunegkaat wine‑meng myrrh‑meng akumegkameng, iwernga Jesus‑em ighsakegkaa.

²⁴ Taagken pilluwaghtet qaquuraghyamegteggu ateghtiiraaghulluki aatkii tugulaqiit.

²⁵ Qaquuraqaqegkangat unaanguluku 9‑eklaagmi.

²⁶ Qaquuraakun nekegtekaat avutkilleghteng igaqngalghii whaten, Umiilgat Jews‑et.

²⁷ Maalghuklu wayaghniightek qaquuraqagket, ataasiq Jesus‑em aghenqigneghakun, aallgha saghumigneghakun.

²⁸ Akuzitet Igaqegkat whaten pillghat apeghiightuq, “Ilalkiitkaqegkangat seghletun pistenun.”

²⁹ Yuget naghughlleghhiit naasquteng ufsugusimiita legasiighwaatkegkaat Jesus, “Seghleghhalek, elpek! Temple‑a naafqelluku nekefsaghqaqngukuvgu pingayut aghneghet atughluki,

³⁰ sangan yuguliluten elpeneng qaquurameng ukignanighsin?”

³¹ Chief priest‑etlu apeghtughikayugetlu Liilightuusaneng legasiighwaatkegkaat Jesus, ilateng pikiit, “Yuguliiqi ilangit naqam ellmineng katam yugulipagningituq!

³² Christ‑a, Umiilga Israel‑em, ukigli maaten qaquurameng, enkaam esghapagluku ugpeqelteggu.” Qaquuralgutegkenkallu seghlequuqaak.

Tuqullgha Jesus‑em

³³ Taagken qamaglluni nuna mamleghqwaakaq aghneghem qukaaneng kenlanga 3‑klaagmun.

³⁴ Tawani 3‑klaagmi Jesus akilghuughllakaq, “Eloi, Eloi, lama sabachthani?” whaten pisiq, “Kiyaghnemni, Kiyaghnemni, sangama unisinga?”

³⁵ Ilangita yuget nekevghallghiit nagalluku pikat, “Nagataghtekqun, Elijah tuqlughaghaa!”

³⁶ Yuuk ataasiq aqfaquqaq mesiqayugmeng. Taagken nepluku quwaalghiimun wine‑mun unaghsiighwaghqun nekeglluku nengugutkaa Jesus‑mun melugriisqelluku. Pikaq, “Wiintaku, esghapakaalteggu Elijah‑m iiksaghtughaqsaaghaa qaquurameng!”

³⁷ Taagken Jesus araghllagluni tuqukaq.

³⁸ Temple‑melnguq safkaaghun malghughqegkaq, piikaq pikegken kanavek.

³⁹ Pilluwaghtet umiilwaaghita qaquuram manunganilnguum, esghapagyamigu Jesus tawaten tuqulghii, pikaq, “Ipapestaaq una yuuk Ighnequmaagu Kiyaghneghem!”

⁴⁰ Aghnam ilangi uyavaneng esghapakat. Tawanteftut Mary, Magdala‑ghmii, Salome‑llu, Mary‑llu naangak uyuqliim James‑em, Joses‑emllu.

⁴¹ Jesus, Galilee‑melluku taakut aghnat maligsaaqaqegkangatlu kayusiitkaqegkangatlu. Ilangillu aghnalghutet tawanlenguut, maligulluteng ellnganun Jerusalem‑etkat.

Llivellgha Jesus‑em

^42-43 Taawanguq yuuk, aatqelghii Joseph‑meng, Arimathea‑ghmii, siivakumtaaq ilangat agghistet. Ellnganllu utaqangukanga piinlilleghqaa Ataneghpagullgha Kiyaghneghem. Whanikuyagu, Yataaghqellghem Aghneghani, sivungiighhaani Sabbath‑em, tetugnanighluni Pilate‑mun piluni tungsiqaa Jesus‑em yugusii.

⁴⁴ Pilate‑em saghiighayagutkaa nagaqughluku Jesus tuqulghaghtuumaniluku. Enkaam pilluwaghtet umiilwaaghat tagsighluku aaptekaa, “Llaaghaan Jesus tuqulghaghtuumaa?”

⁴⁵ Umiilwaaghmeng liigiksamigu Jesus‑em tuqullgha, Joseph‑mun tugusqegkaa yugusii.

⁴⁶ Enkaam Joseph tukfighiyaghtuqaq qatelghiimeng qiipaghaghmeng lliveghyaghqanun atuqaqegkemeggneng. Taagken iikluku yugusii qaquurameng, iimgutkaa qiipaghaghqun. Taawanguq uyghagrukutaaghllak sanimineng ilutmun laakaq lliivghuluni. Tawavek yugusiq kanaghtekaa. Taagken uyghagrugllak ullghitaghtaqaa lliivghem paaynganun.

⁴⁷ Mary‑m Magdala‑ghmiim, Mary‑mllu Joses‑em naangan esghapakaak nagun Jesus llimatanga.