Mark 13 - New Testament-et Akuzipigestun

Liisimakusighqat Nunam Kenlekaghqaanun

¹ Jesus aanumaluku Temple‑meng, ataasim maligsaaghtengan pikaa, “Apeghtughista, ii‑i! Esghaqaghqiqun maakut pinighnaghllaget mangteghat uyghagrukutaaghllagneng ulimaaghet.”

² Jesus‑em pikaa, “Esghaghsikii mangteghaghllaget maakut? Talwa ataasiq uyghak nemininnaanghituq; qamaglluteng ulleghqughyaghqaagut.”

³ Mount Olives‑mi, Jesus ellnginaghhaghmi aqumgamaluku Temple‑mun ayuqluni, Peter‑enkut James‑enkut John‑enkut Andrew‑nkut takukaat.

⁴ Aaptekaat, “Ungipaatikut, qakun tamaakut piyaghqaawat? Sangulleqa liisimakusighqaghput tamaakut apeghiilleghqiitnun?”

⁵ Jesus‑em pikii, “Kelengatek, kitumun alngunak puughtestegpenasi.

⁶ Uglaapiglleghhii tagiyaghqaaguq atuqluku aatqa, whaten piiqluteng, ‘Ellnganguunga!’ Enkaam uglaapiglleghhii puughqughyaghqaqaat.

⁷ Nagaququfsiki pilluwat, akusqaghtaatkellghetlu pilluwat, alingegpenasi. Tamaana piyaghqaaguq, salin iquggnaqngunghituq.

⁸ Nunam ramkengi pilluwutullequt, nunamllu ataneghpagullghi sughugaallequt, nunatlu nani alngunak tuyepeghtaghaqluteng piyaghqaagut, neqangisagllagaqlunillu piyaghqaaguq. Qamaglluteng tamaakut aghnam ighniyukestallghatun ayuqut.

⁹ “Iwernga elpesi kelengalusi. Tugulusi agghistenun aglaalleqiisi. Synagogue‑ni kagsagmiglleqiisi. Whanga apalluqlunga nekevellequsi sivungitni igleghutistetlu umiilgetlu ungipaghtengulusi Pinilghiineng Ungipaneng.

¹⁰ Pinilghiit Ungipat ungipaqsaghqaagut tamanganun ramkenun sivungani iqugtellghem.

¹¹ Tugulusi aglaaskangisi nanqigtivigmun sumeghtaghaqestaghpenasi akuzitkaghqameng. Pilleghqaq kaataqegkan akuziiqnaaghtusi pisqelleghpesistun, qayughllak elpesingunaanghitut akuzilghiit, Agleghnalghiik Taghneghak elpesigun akuziiqnaaghtuk.

¹² Yuget angleguteteng tuqutesleqiit, yuget avaqutateng tawateghpigaq pisleqiit. Taghnughhaatlu angayuqateng kipullginaaghluki tuqutesleqiit.

¹³ Whanga apalluqlunga qamaglluni yugem ugumiilleqiisi. Iwernga kina alngunak nuqenneghtuqaq kenlemun yugulillengyaghqaaguq.”

Jesus‑em Aapqanga Seghleliilleghqaghllak

¹⁴ (Yeqay atightulghiim liigikligu una uuknaliqelleq!) “Esghaqufsigu agleghniighutista paaghqiitestilghii, nekaghqaqenghilkemini nekevelghii, tamaakut Judea‑melnguut anagniighhaat naayghanun.

¹⁵ Yuuk mangtegham qaaynganilnguq qamavek kelqesaghqameng aqfatefqaami pilghaaq.

¹⁶ Yugem piitesighaghvigmelnguum qaasligni aqfafqaamikek pilghaaq.

¹⁷ Seghleghwaaghunaqnguut tamaakut qumilgetlu mamaghtilghiitlu tamaani aghneghni!

¹⁸ Yughaghtek Kiyaghneghmun uksumi tawaten pifqaan pisqelluku!

¹⁹ Qayughllak tamaani aghneghni seghleliiq seghleghataghaayaghqaaguq seghleliighaqelleghneng ima Kiyaghneghem ulimayuwhaallghaneng nuna whavemun kenlanga. Allamengllu tawatelnguq seghleliiq pinaanghituq.

²⁰ Atanghem takellimangisaqaki tamaakut aghneghet, kina alngunak unguvanayanghituq. Iwernga apalluqluki nakmikegkani aghneghet takellikaqii.

²¹ “Taagken kitum alngunak pikangisi, ‘Esghaghteggu, Christ‑a whaa!’ nalighmeng ‘Esghaghteggu, tazigna esgha!’ ugpeqegpenaan.

²² Christ‑asighwaaghetlu uuknaliqistesighwaaghetlu allgeghtuusaghqaagut. Allaaghlluwhaghtighllagaataghyaghqaagutlu, saghiighanaghqeghllagaataghyaghqaagutlu puughqughnaluki yuget, talwa Kiyaghneghem nakmikegkii puughsaqlegukumegteki pilleqiit.

²³ Enkaam kelengalusi! Sameng tamaghhaaneng ungipaatekestaghamsi tamaakut pistegpenaki.

Tagilleghqaa Ighneghan Yugem

²⁴ “‘Kingunganeng taam seghleliilleghllagem siqineq mamlegllequq, tanqiq nighugunnanighllequq,

²⁵ ighaleqetaaghet ifkaquullequt qilagameng, aghtughyaghqaanghillghet qilagamelnguut igleghallghit alngunaghqeslequt.’

²⁶ “Taagken yuget esghaghlleqaat Ighnegha Yugem tagilghii qilawaaghteggun aghtughyaghqaanghillelighllaglunillu nighughqellelighllaglunillu.

²⁷ “Taagken yaqulget kayaglleqii qerngughtesqelluki nakmikegkani yuget nunataghhaaneng tamaghhaaneng.

Figs‑em Uqfiga Liitfiksaghqaq

²⁸ “Liitfikiteggu figs‑em uqfiga. Avayii uniilliighaghluteng ququngii piitekestaqata sungaghyuketun liisimakelleqaghsi kiigyaghtulleq.

²⁹ Figs‑em uqfiganeng liitelleghpesistun esghaqufsiki tamaakut qilagamelnguut apellemtun pilghiit, liisimakelleqaghsi Ighneghan Yugem kaasaghtungestallgha, aaqun amigmun lliighumaaq.

³⁰ Ipa ungipaatamsi, maaten unguvalghiit tuqunaanghitut sivungani qamaglluteng tamaakut pilleghqiita.

³¹ Qilagallu nunallu aviighusaghqaaguk, iwernga whanga akuzitenka aviighusagqaanghitut.

Kelengakluku Tagilleghqaa

³² “Iwernga kitum alngunak nallukaa nani aghneghmillu aflumillu tagiyaghqaatanga. Talwa yaqulget qilagmelnguut nallukaat, Ighneghemllu nallukaa, Atanginaghhaam liisimakaa.

³³ Kelengatek, waaknanighpenasi qayughllak nallukaghsi qakun tagilleghqaa.

³⁴ Yugtun ayuqsaghqaaguq natmun pilghiitun. Aghulaqellghilluni qepghaghteni aflengakistengllaghlleqii mangteghaminun, ungipaalleqiillu sayaghqiitneng. Amigniighteminunllu kelengakesqegkaa uteghnilleghqani.

³⁵ Enkaam elpesi kelengatek, qayughllak nallukaghsi qakun mangteghalek uteghnighyaghqaatanga. Walluumllu tagiiqli ighivgaghmi, unugem qukaani, aghtaghaqestami, nalighmeng unaanguluku.

³⁶ Enkaangam kelengatek luuraq kaatqaghtekumi qavaalusi angunayukangisi.

³⁷ Aapqegka una elpesinun, tamaghhaghllaganun pingwaaqa: Kelengalusi!”