Mark 12 - New Testament-et Akuzipigestun

Jesus‑em Ungipaghaatkegkangi Aflengakistengi Grapes‑em Piitfigan

¹ Taagken Jesus‑em ungipaghaatetgun aleghquqii. Pikii, “Taawanguq yuuk piitesiighaqaq grapes‑meng, mingllusiqaallu uvitanga piitesighaghvini. Laagutkakek grapes‑mun qageghquusik, nekeftekaallu kelengakivigkaq. Taagken piitesighaghvini navghitkaa grapes‑meng piitesighaghtenun nengitesqelluni, enkaam ellnga natmun aghulaqegkaq.

² Saghnayaghqaaghsata ataasiq qepghaghteni kevgaqegkaa nengini grapes‑et aqfasqelluki.

³ Kaasan taakut aflengakistet akuqaghluku qevutiighluku avangunaan aglaghtestekaat.

⁴ Kevgaqlaataqaa ilanga qepghaghteni. Taana naasqwakun kiitiquluku, kayngusaghaatestekaat.

⁵ Kevgaqiilaataqaq ilanganeng qepghaghtemi enkaam taana tuqutkaat. Ilangillu qepghaghtelghuteni kevgaqenghaki legan tawaten piiqegkangit, ilangit qevutiiqiit, ilangit tuququqiit.

⁶ “Qenwat ataasighhaaghtuq kevgaqsaghqaa, ighnegha piniqumtaagha. Kevgaqegkaa sumeghtaghaamaghmi whaten, ‘Ighneqa siivakelleqaat.’

⁷ Iwernga taakut aflengakistet ilateng pikiit, ‘Uum piliisaghqaqaa una piitesiighaghvik. Tuqutelteggu enkaam piitesiighaghvik whangkuta piliilleqaghput!’

⁸ Enkaam akuqaghluku, tuqulluku yugusii egtekaat piitesiighaghvigmeng.”

⁹ Jesus‑em aaptekii, “Salleqangꞌngam piitesiighaghvilek? Tagiluni navghitivikegkaqsaqenni taakut tuququghluki, enkaam piitesiighaghvini allanun navghilleqaa.

¹⁰ Atightiigasteggu una Akuzitni Igaqegkani? ‘Uyghak mangteghangllaghtet ighsakegkaat piyalghiimi megnunalleghpigaaftuq uyghak.

¹¹ Taana Atanghem apeghiiqaqaa, Allaaghlluwhaghyugnapigtuq!’”

¹² Jews‑et igleghutistengita tuguyupigtekaqsaqangat, qayughllak liigikelghiit ungipaghaatetgun Jesus‑em ellngit akuzitkaqeftii. Iwernga alingegkat yulghutneng enkaam unilluku aghulaqegkat.

Aapqughaalleq Tax‑neng

¹³ Taam kingunganeng Jews‑et igleghutistengita kayagtekiit ilangi Pharisees‑etlu maligsaaghtengillu Herod‑em anagniilqavigiisqelluku Jesus. Kayagtekiit anagniilqavigiisqelluku akuzillghakun.

¹⁴ Kaalluku pikaat, “Apeghtughista, liisimakamken ataasiighmetuten. Waakigataten yuget sumeghtaghallghit, talwa waakigataten yuget sanguyaghngaata, iwernga ipapighqelluten apeghtuusaqaqan Kiyaghneghem piyukellgha yugnun. Ungipaataghtikut, Kiyaghneghem Liilightuusaani elqughutngaa llivikilleghqaghput tax‑eneng Caesar‑mun? Llivikiltaa‑a nalighmeng pinghitelta?”

¹⁵ Iwernga Jesus‑em liisimakegkangi seghletun pingukangat enkaam pikii, “Sangama anagvigighnaqutkestengnga? Manilitaghtengnga, esghaqaghlakun.”

¹⁶ Tuunyatni aaptekii, “Kitum gginaqagullu aatqagullu una?” Kiimsiqaat, “Caesar‑em.”

¹⁷ Jesus‑em pikii, “Tuuniteki Caesar‑mun tamaakut Caesar‑em pingi. Tuuniteki Kiyaghneghmun tamaakut Kiyaghneghem pingi.” Enkaam saghiighayagutkaat Jesus.

Aapqughaalleq Tuqukat Unguvaghtellghitneng

¹⁸ Taagken ilangi Sadducees‑et, Jesus‑mun pikat. (Tamaakut piiqelghiit tuqukat unguvaghyaghqaanghinniluki.)

¹⁹ Pikaat, “Apeghtughista, Moses‑em Liilightuusangllaqaqiinkut whaten, ‘Yuuk nuliilek avaqutigpenani tuqukan anglegutangan tuguyaghqaqaa aghnaq avaqutinnaluku anglegutni tuqukaq.’

²⁰ Taawanguq maaghragvinlek yuget anglegutkullghiit. Nuyeklighpigaq nulightughluni avaqutigpenani tuqukaq.

²¹ Enkaam tuunglighhaan tugukaa aghnaq, iwernga ellngallu tuqukaq avaqutigpenani. Pingayiitangan tuguluku aghnaq, tuqukaq avaqutigpenani.

²² Qamaglluteng tugaaqluku aghnaq tuqulaghaatkat avaqutigpenateng. Kingulighpigaaluni aghnaq tuqukaq.

²³ Qamaglluteng maaghraghvinlek anglegutkullghiit nulighqegkaqsaqangat. Aghneghmi tawani tuqukat unguvaghtuutellghitni, naliita aghnaq nulighqelleqagu?”

²⁴ Jesus‑em kiimsiqii, “Sumeghtaghallesi anaggutngaat qayughllak liigikigalkesi Akuzitet Igaqegkat, nallukegkesillu Kiyaghneghem aghtughyaghqaanghillgha.

²⁵ Tuqukat unguvaghtuuskumeng tuqulleghmeng, qilagmelngughestun yaqulgestun ayuqsaghqaagut, nengughutusaghqaanghitut.

²⁶ Atightiigastegguu Kiyaghneghem apellgha tuqukat unguvalleghqiitneng tuqulleghmeng? Moses‑em igaani apeghngaaq kumaghughngalghiimi uqfillegaghmi. Tawani Kiyaghneghem pikaqaa Moses, ‘Whanga Kiyaghneqaanga Abraham‑em, Kiyaghneqaanga Isaac‑em, Kiyaghneqaanga Jacob‑em.’

²⁷ Taana whaten pisiiguq, Kiyaghneq, Kiyaghneqenghitaat tuqukat, Kiyaghneqaat unguvalghiit. Enkaam anaggutepigsimaasi!”

Angelleghpigaq Liilightuusaq

²⁸ Apeghtughikayuk Liilightuusaneng tagiluni nagatkii aaghtiiraaghullghiit. Nagalluku Jesus‑em kiimsighilaataqullgha Sadducees‑enun, aaptekaa, “Natungaawa Liilightuusaq megnunalleghpigaq?”

²⁹ Jesus‑em kiimsiqaa, “Megnunallegpigaq unanguuq: ‘Nagatek, Israel‑eghmiini! Ataneq Kiyaghneghput taananginaghhaaguq Ataneq.

³⁰ Ataneq Kiyaghneghen piniqsaghqaqan tamaghhaakun ilugpegun, tamaghhaakun unguvasighpegun, tamaghhaakun umyugaghpegun, qamagllukullu iknaqelleghpegun.’

³¹ Tuunglighha whatetuq: ‘Piniqsaghqaqaten yulguteten, piniqelleghpetun elpeneng katam.’ Alla Liilightuusiituq taakugetun megnunaghtutkalghiimeng.”

³² Apeghtughikayugem Liilightuusaneng Jesus pikaa, “Apeghtughista, elqughaghtan! Ipanguuq taana pillghen, Ataneq taananginaghhaaguq Kiyaghneq, alla avangituq kiyaghneghmeng iwerngaqun ellnga.

³³ Enkaam yugem piniqsaghqaqaa Kiyaghneq tamaghhaakun ilumi, tamaghhaakun umyugagmi, tamaghhaakunllu iknaqelleghmi. Piniqsaghqaqiillu yulgutni katam ellmineng piniqelleghmitun. Taakuk Liilightuusak megnunaghataghaghtuk paneghlluku tunusaqegkaneng, nalighmeng aghqutkegkaneng.”

³⁴ Jesus‑em liigiksamigu yugem kiimsiitnga elqughutngalghii, pikaa, “Qantaghantuten Ataneghpagullghaneng Kiyaghneghem.” Taam kingunganeng kitum alngunak tetugyagutkaa aapqughaaneghmeng Jesus.

Aapqughaalleq Christ‑ameng

³⁵ Temple‑mi, Jesus‑em apeghtughitkelluku aaptekii, “Sangan apeghtughikayuget Liilightuusaneng piiqatgu Christ‑a David‑mun Ighneqniluku?

³⁶ Agleghnalghiim Taghnegham David whaten pistekaqaa, ‘Atanghem pii Atanqa: Aqumi whagun aghenqignemkun kenlanga anguyagten itegaghpek asinganun lliightellemnun.’

³⁷ “David‑em ellngan katam atiqaqaa, ‘Ataneghmeng’ enkaam naten Christ‑a Ighneqagu David‑em?” Yulghutet quyakusiqinaghluku nagatkaat Jesus.

Jesus‑em Kelengasaaghuskangi Apeghtughikayuget Liilightuusaneng

³⁸ Apeghtuutkelluki pikii, “Kelengalusi apeghtughikayugneng Liilightuusaneng. Aasuneghtuut atkuyaaghmeng akughtuqameng, igleghsuneghtuutlu akilpegaghvigni yugnun qungughfikesqelluteng.

³⁹ Aqumyuneghtuut aangwaaghughtekat aqumutiitgun, synagogue‑nillu neqenghaghqelghiinillu.

⁴⁰ Esghaghlaataqwaaqiit ugingighat mangteghiighaqluki. Taagken pinighniluteng pisqelluteng taakluku yughaghaqut. Tamaaken apalluqluku aghyuullengeghllagyaghqaagut!”

Ugingigham Tunusaa

⁴¹ Temple‑mi, Jesus‑em aqumgatkelluku tungangakun manilghutam, esghapakii yulghutet kanaghtiighaatalghiit manimeggneng. Aklungilnguut yulghutet manilghutmeng kanaghquqat.

⁴² Taagken aklumalghii ugingighaq iteghluni kanaghtekakek maalghuk maningiighhaak, qerngaagmek penny‑nguftuk.

⁴³ Jesus‑em maligsaaghteni tuqlughluki pikii, “Ipa ungipaatamsi, uum aklumalghiim ugingigham tuunegkakek qaayghutinguuk aklungilnguut tuunegkiitneng.

⁴⁴ Yuget kanaghtinguut aklungimeggneng, iwernga uum aghnam kanaghtaa qamaglluku maningiighhani, akluknguyaqanga ellminun kiyaghusighqaaluku.”