Mark 11 - New Testament-et Akuzipigestun

Jesus‑em Kaatellgha Jerusalem‑emun

^1-2 Tughaaghyalghiimeng Jerusalem‑emun, kaatkat Bethphage‑munllu Bethany‑munllu, Mount Olives‑mi. Taagken Jesus‑em kayagtekakek maalghuk maligsaaghtegni nemun pisqellukek. Pikakek, “Kaataghesnaquftek esghaghlleqaghtek donkey‑ghaq petugngalghii kitum alngunak igleghutkumangilkanga. Itemulluku taginnakesek.

³ Kitum alngunak aaptekangistek whaten, ‘Sanaqestegnegu?’ ungipaannakesek, ‘Atanghem atuqsugaa. Taaqaghesnaqumigu veghutesnaaghaa.’”

⁴ Enkaam nemun kaallutek tumenilluku esghaqaak donkey‑ghaq petugngalghii mangtegham amigan tungangakun. Itemsimaluku

⁵ yuget nekevghataaghullghiit tawani aaptekagket, “Sangan itemutestegnegu donkey‑ghaq?”

⁶ Kiimsiqiik Jesus‑em apeghtullghatun enkaam yuget nepiighutkagket.

⁷ Jesus‑mun kaatulluku donkey‑ghaq, qaasliit atkuyaatek teghikusam qaayngakun lliyagneki, Jesus uuglluni igleghtekaq.

⁸ Tamaakut yulghutet igleghullghiit tumetgun saaghquqiit qaasliit atkuyaateng, ilangit avayameng ququngalegmeng ikutaqluteng tumet saaghqughvikegkiit.

⁹ Jesus‑em sivunganilnguutlu kingunganilnguutlu akilghuutkat, “Usuqnaghhalek Kiyaghneq! Kiyaghneghem quyasligu tagilghii aatghakun Atanghem!

¹⁰ Kiyaghneghem quyasligu tagilghii ataneghpagullgha sivunemta David‑em! Usuqnaghhalek Kiyaghneq qulighpigaghmelnguq qilagmi!”

¹¹ Jesus kaalluni Jerusalem‑emun, aglaqaq Temple‑mun. Tawani sangwaa qamaglluku yuvghiiqaa. Whanikungulghii, kelqelluki qula maalghuk siipneqluku maligsaaghteni aglaqaq Bethany‑mun.

Jesus‑em Neghviksaghqaananightestekanga Figs‑em Uqfiga

¹² Unaamingani, Bethany‑meng uteghniitkelluku Jesus iyataqaq.

¹³ Uyavaneng esghaqaa figs‑em uqfiga ququngaghtuqaq, enkaam esghaghyaghtuqaa figs‑elgunayukan. Kaasaqminigu ququngaraaghinaaftuq, qayughllak salin figs‑et piisugniilnguut.

¹⁴ Jesus‑em uqfik pikaa, “Allamengllu kitum alngunak figs‑etughviknaanghitaaten!” Maligsaaghtengita nagatkaat.

Jesus Temple‑mun Pilghii

¹⁵ Kaasameng Jerusalem‑emun, Jesus, Temple‑mun pikaq. Tawani aanesquqii tukfightulghiitlu akilpegalghiitlu. Manimeng naveghqughtet tipelngit ulleghquqii, aqumutiitlu qawaagmeng akilpegaghtet.

¹⁶ Nangaqaghsaghqaananightestekiillu kinkut alngunak sameng tugumiilget Temple‑em manughaakun.

¹⁷ Taagken apeghtuqii yuget, “Kiyaghneq pikaaguq Akuzitni Igaqegkani, ‘Mangteghaqa, yughaghviguyaghqaaguq tamaghhaanun yuganun nunam.’ Iwernga elpesi iighaghvigughtaghsi wayaghniightenun!”

¹⁸ Chief priest‑etlu, apeghtughikayugetlu Liilightuusaneng nagaqughluku tawaten pillgha, akuzimghhutkegkaat naten tuqutelleghqameng, naqam alikumaan. Alikegkaat, qayughllak qamaglluteng yulghuteghllaget saghiighayagutngukangit apeghiillghi.

¹⁹ Ighivgaghyagu Jesus‑enkut maligsaaghtekullghiit aghulaqegkat Jerusalem‑emeng.

Jesus‑em Apeghtuusaqegkangi Ugpeqilleq, Yughalleq, Seghevutilleq

²⁰ Unaanguluku igleghutkelluku esghaqaat figs‑em uqfiga palighwaaghumalghii akughhaghminun kenlanga.

²¹ Peter‑em esghaghluku neqaatkaa Jesus‑em pillgha. Enkaam pikaa, “Apeghtughista, ii‑i, figs‑em uqfiga ineghtengngwaaqan palighwaaghumaaq.”

²² Jesus‑em pikii, “Ugpeqiteggu Kiyaghneq.

²³ Ipa ungipaatamsi, kitum alngunak malghuklillngunani ilumikun, ugpeqegkumikillu akuzitni piyaghqaatangi, una naayghaq whaten pikumigu, ‘Kelliinun aatghi,’ taawa apeghiighyaghqaaguq ellnganun.

²⁴ Enkaam ungipaatamsi: sangwaa alngunak aklukegkaghsi yughaatkegkufsigu ugpeqluku allgeghsaghqaqutsi, taawa allgeghlleqaghsi.

²⁵ Nekevneghpesini yughaghnalusi, seghevutaqiteki seghletun pistesi, enkaam Atagpesi qilagmelnguum seghevulleqii seghleghqellesi.”

²⁶ Iwernga seghevutinghilkufsi, talwa Atagpesi qilagmelnguum seghevunnaanghitii seghleghqellesi.

Aaptekangat Jesus Pilleghqaaneng

²⁷ Jesus‑enkut maligsaaghtekullghiit kaanneqigtekat Jerusalem‑emun. Jesus igleghsimaluku Temple‑em manughaani, chief priest‑etlu, apeghtughikayugetlu Liilightuusaneng, Elder‑etlu takuluku

²⁸ aaptekaat, “Saam pilleghqaakun aanesqughsiki akilpegaghtet? Kitum qelellghakun tawaten pinguzin?”

²⁹ Jesus‑em kiimsiqii, “Ungipaalleqamsi kitum qelelghakun tawaten pikaatka kiimsiqufsinga.

³⁰ John‑em paaptaayeghillgha Kiyaghneghmeng pingwaa, nalighmeng yugneng? Ungipaatengnga.”

³¹ Ellmeggneng akuzimghhutkat, “Kiyaghneghmeng piknikumteggu, pilleqiinkut, ‘Sanganꞌngam ugpeqenghisteggu John?’

³² Yugneng piknikumteggu yuget anguyiilleqiinkut.” (Alingegkat yugneng, qayughllak yuget qamaglluteng ugpeqngukangat John uuknaliqistengutanga.)

³³ Enkaam Jesus kiimsiqaat, “Nallukaghput.” Jesus‑em pikii, “Whangallu ungipaannaanghitamsi kitum qelellghakun tawaten pikaatka.”