Mark 10 - New Testament-et Akuzipigestun

Jesus‑em Apeghtuusaqegkek Nengughtenkuk Pellghututenkuk

¹ Taagken Jesus aghulaqegkaq tamaaken nunameng. Aglaghluni nunamun aatqelghiimun Judea‑mun, aghviqakek Kiiwek Jordan‑ek. Yulghutem qerngughfiklaataqaa enkaam apeghtuqii piiqelleghmitun.

² Ilangita Pharisees‑et takuluku anagniilqavigighnaqutkelluku aaptekaat, “Liilightuusamnni itagnaghtaa yugem nuliini pegtekumigu?”

³ Jesus‑em kiimsiqii aaptemmeng, “Sangaawami Moses‑em qelghusaa?”

⁴ Kiimsiqaat, “Moses‑em pilleghqalitkaqaa yuuk pegtusim igii imighluki pegtesqelluku nulighha.”

⁵ Jesus‑em pikii, “Tawaten Moses‑em Liilightuusalitkaqiisi pineghllugllagutegpesineng.

⁶ Iwernga nunangllaghyuwhaalleghmeng ‘Kiyaghneghem ulimakaqaak yuuklu aghnaqlu.’

⁷ Taana apalluqluku yugem unillukek atanillu naanillu nuliighminun lliighwaaghyaghqaaguq.

⁸ Enkaam maalghugunanighllequk, ataasiighllequk.

⁹ Tamaaken apalluqluku Kiyaghneghem qerngughutestekakek yeqay yugem pellghututesneghillikek.”

¹⁰ Mangteghamun iteghaasameng maligsaaghtet aaptekaat Jesus tamaaken pillghaneng.

¹¹ Jesus‑em pikii, “Yugem nuliini peglluku allaneng nulightuqumi, taawa gelgaghniighllequq.

¹² Tawateghpigaq aghnam ugini peglluku allaneng ugiiqumi, taawa gelgaghniighllequq.”

Jesus‑em Quyastekangi Taghnughhaat

¹³ Ilangita yuget tagitkiit taghnughhaat Jesus‑mun saafluki quyastesqelluki, iwernga maligsaaghtet ineghtekiit tagitilghiit.

¹⁴ Jesus‑em esghaghluki seghleghyagulluki maligsaaghteni pikii, “Taghnughhaat tagilit whangamnun. Ineghtegpenaki, qayughllak Ataneghpagullgha Kiyaghneghem taghnughhaghestun ayuqelghiit pikaat.

¹⁵ Ipa ungipaatamsi, kitum alngunak tuguklinghilkumigu Ataneghpagullgha Kiyaghneghem taghnughhaghtun, iteghnaanghituq.”

¹⁶ Taagken taghnughhaat tugaaqluki, saaftaqluki quyastekii.

Aklungilnguq Yuuk

¹⁷ Jesus igleghhneqigtaquqlu, yugem ketanqusnaq takuluku manungakun segesqughlluni aaptekaa, “Pinilghii Apeghtughista, naten salunga kenlengilnguq unguvalleq allgeghhnayaghsikun?”

¹⁸ Jesus‑em aaptekaa, “Sangan pinighnizinga? Kina alngunak pininghituq, Kiyaghneghhiinaaguq pinilghii.

¹⁹ Liilightuusat liisimakaten: ‘Yugtaghpenang; gelgaghniighpenang; teglegpenang; iqlengiqutkegpenaki yuget; puughtigpenang; quulvaghlukek atanllu naanllu.’”

²⁰ Yugem pikaa, “Apeghtughista, ima nukalpigaatemneng qaatkengngwaanka taakut Liilightuusat.”

²¹ Jesus‑em piniqepiglluku qiivluku pikaa, “Ataasiiguq piyaghqan. Akikughyaghtughhu qamaglluku saghyan, enkaam akinga tunqughnaken aklumalghiinun. Tawaten pikuvek aklungillequten qilagmi. Taagken maligsaghtughnakevnga.”

²² Tawaten piyatni yuuk nulgiiqaq, iqitkaq iilqepiglluni qayughllak aklungitepiglleghhii.

²³ Jesus yugsughaluni maligsaaghteni pikii, “Piyaqnapigtuq aklungilngughni itelleghqaa Ataneghpagullgha Kiyaghneghem!”

²⁴ Tawaten piyisteng maligsaaghtet saghiighayukat. Jesus‑em pilaataqii, “Taghnughhaghni, piyaqnapigtuq itelleghqaq Ataneghpagullghanun Kiyaghneghem!

²⁵ Piyaqniisaghqaaguq camel‑em suflughutelleghqaa sikuum iiyngakun, aklungilnguum yugem itelleghqaaneng Ataneghpagullghanun Kiyaghneghem.”

²⁶ Maligsaaghtet wataqaaghaq saghiighayukat, enkaam ellmeggneng aapqughaaghutkat, “Kinangam yugulillengelleqa?”

²⁷ Jesus‑em qiivluki pikii, “Yuget piyaghqaqenghilkangit, Kiyaghneghem piyaghqaqii.”

²⁸ Taagken Peter‑em pikaa, “Esghaqaghqutqun, sangwaa qamaglluku unilluku maliglleghaatamken.”

²⁹ Jesus‑em pikii, “Ipa ungipaatamsi, kitum alngunak uniskumiki mangteghani, anglegutni, naani, atani, avaqutani, nunani apalluqlunga whanga, Pinilghiitlu Ungipat,

³⁰ allgeghutaaghaghyaghqaaguq whani kiyaghtaalleghmi. Mangteghaa, anglegutangi, naanga, avaqutii, nunanga, nulaghllagyaghqaagut; tamaakunun maligulluku amyuutkellengyaghqaaguq. Taagken taakwaningani kenlengilngughmeng unguvallengyaghqaaguq.

³¹ Iwernga uglalghiit angelleghpigaat ukaliighsaghqaagut taagani, enkaam uglalghiit ukalighpigaat angelleghpigaaghsaghqaagut.”

Jesus‑em Tuqulleghqani Akuzitkellaataqanga

³² Jesus aga sivungitnilnguq igleghanguluki tumetgun Jerusalem‑emun ayuqelghiitgun. Maligsaaghtengi saghiighayukat, yugetlu alingumaghmeng maligtekaat. Jesus‑em qula maalghuk siipneqluku maligsaaghteni aafulluki ungipaallaataqii salleghqamineng.

³³ Pikii, “Nagatek, Jerusalem‑ennaqukut. Tawani Ighnegha Yugem tuunelleqaat chief priest‑enunllu apeghtughikayugnunllu Liilightuusaneng. Nanqiglluku tuqusaghqaanilleqaat, enkaam tuunelleqaat Gentile‑enun.

³⁴ Taakut legasiighwaatkelleqaat, qesiqulleqaat, kagsagmiglleqaat, tuqulleqaatlu. Pingayut aghneghet atughluki unguvaghllequq.”

James‑enkuk John‑enkuk Tungsillghak

³⁵ Taagken James‑enkuk John‑enkuk, Zebedee‑m ighneghegkenka takuluku Jesus pikaak, “Apeghtughista, elpenun sameng pisqesugtukung.”

³⁶ Jesus‑em aaptekakek, “Sasqesugestek whangamnun?”

³⁷ Kiimsiqaak, “Nighughqengngalghiimi Ataneghpagulleghpeni aqumegkuvek aqumelgusighyugamken, nalighpung aghenqigneghpenilluku, nalighpung saghumigneghpenilluku.”

³⁸ Jesus‑em pikakek, “Nallukaghtek sameng tungsilleghtek. Meghyaghqamneng qayuusimelngughmeng meghelleqestaak? Paaptaayelleghqamtun paaptaayelleqestaak?”

³⁹ Kiimsiqaak, “Piyaghqaagukung.” Jesus‑em pikakek, “Meghyaghqaqa qayuusimelnguq qaywa meghelleqaghtek, paaptaayellequteklu paaptaayelleghqamtun.

⁴⁰ Iwernga whanga nakmiksaghqaqenghitanka kinkut aqumyaghqaatangi aghenqignemkunllu saghumignemkunllu, yataaghqutkat tamaakut aqumyaghqaagut.”

⁴¹ Taakut qula malighsaaghtet nagaqughlukek James‑enkuk John‑enkuk pillghak, ugumiyagutkagket.

⁴² Enkaam Jesus‑em qerngughlluki pikii, “Liisimakasi Gentile‑et igleghutistengita atanghutaqiit yuteng, aangwaaghughtekatlu yukeghqutaqiit.

⁴³ Iwernga tawatesaghqaanghitusi elpesi. Nalighsi aangwaaghuyukumi qepghaghtenguli ilaminun,

⁴⁴ nalighsillu aangelleghpigaayukumi qepghaghtelaaghughlli tamanganun.

⁴⁵ Talwa Ighnegha Yugem tagikaanghituq qepghaatesqelluni, tagikaaguq qepghaatinalunillu tuunalukullu unguvalleni yugulinaluki yulghutet.”

Jesus‑em Naallghuskanga Ayaakaq Bartimaeus

⁴⁶ Taagken Jesus‑enkut maligsaaghtekullghiit, yulghuteghllagetlu Jericho‑mun kaalluteng, aghulaqegkat. Taawaanguq ayaakaq yuuk, aatgha Bartimaeus, ighnegha Timaeus‑em aqumluni tumet saningitgun tungsighraghaqelghii.

⁴⁷ Nagaqughyamigu Jesus Nazareth‑eghmii, tughwaaghniluku akilghuukaq, “Jesus! Ighneghani David‑em! Nangllegyagutaghtinga!”

⁴⁸ Uglalghiim yugem aghyuuqaat nepiighesqelluku iwernga qevuutaghalluni akilghuukaq, “Ighneghani David‑em, nangllegyagutaghtinga!”

⁴⁹ Jesus‑em aghuliighluni pikii, “Tagisqiteggu.” Enkaam tuqlughluku ayaakaq pikaat, “Seghleghhalek, tuqlughaaten nekevi!”

⁵⁰ Qaasliik atkuyaaghegni mataghaghllukek nekefqaghlluni takukaa Jesus.

⁵¹ Jesus‑em aaptekaa, “Sasqelluten piiqsin?” Ayaakam kiimsiqaa, “Apeghtughista, esghaasagunneqigsugtunga.”

⁵² Jesus‑em pikaa, “Igleghlleghhaaten, ugpeqilleghpek naallghutestaaten.” Tawaninginaq esghaasagutkaq taagken maligtekaa Jesus.