Luke 9 - New Testament-et Akuzipigestun

Jesus‑em Kayagtekangi Qula Maalghuk Siipneqluku Maligsaaghteni

¹ Jesus‑em tuqluqii qula maalghuk siipneqluku maligsaaghteni. Qerngughusata aghtughyaghqaanghilleliquqiillu pilleghqaliquqiillu yugneng aanestesqelluki qamaglluki tughneghaat, naallghutesqellukillu aqnighneghet.

² Taagken ungipaqiyaghtiisqegkii Ataneghpagullghaneng Kiyaghneghem, naallghuqiisqellukillu qinuyulghiit.

³ Pikii, “Igleghalleghpesinun sameng alngunak kelqegpenasi. Ayaviingunasi, aqeftaghaangunasi, neqngunasi, maningunasi, talwa kelqefqaafsi simiitkaghqameng ggaatmeng.

⁴ Kinkunun alngunak iteghlusi upughaskangisi tawanlleghhaasi kenlanga aghulaqelleghqaghpesinun.

⁵ Enkaam kinkut upughanneghilkangisi, aghulaqneghpesini nemeng taagken, tukaataqiteki pagulangi itegaghpesi. Tawaten pikufsi liisimakelleqaat kelengasaaghilleghsi Kiyaghneghem aghyuulleghqaaneng.”

⁶ Maligsaaghtet aghulaqluteng nengiighhaat takuughaqiit, ungipaqikat Pinilghiineng Ungipaneng, naallghuquqatlu tamaghhiitni.

Herod‑em Kukragyaguskanga Jesus

⁷ Herod‑em igleghutistengan Galilee‑m, nagaqughluki Jesus‑em allaaghlluwhaghtillghi teggellghhiiqaq, qayughllak ilangita yuget pikangat John Paaptaayesta unguvaamaniluku tuqulleghmeng.

⁸ Paninang ilangita pikaat Elijah‑nguniluku, enkaam ilangita pikaat naliq ayumightaq uuknaliqista unguvaamaniluku.

⁹ Herod pikaq, “John naasqwightestekaqaqa, iwernga kinangaawaqa yuuk nagaqughaqegkegka tawaten piiqelghii?” Enkaam Herod‑em esghaghyukaa Jesus.

Jesus‑em Neghestillgha 5,000‑neng Siipngalghiineng Yugneng

¹⁰ Apostle‑et uteghnighluteng, Jesus ungipaatkaat apeghiighutelleghmeggneng. Aghulaqutkii neghllagmun Bethsaida‑mun ellnginaanaluteng.

¹¹ Yulghutet naantulanga liigiksamegteggu maligtekaat. Kaasata quyakluki ellngitnun akuzitkegkaa Ataneghpagullgha Kiyaghneghem, naallghutesulghiitlu naallghuquqii.

¹² Whanikuyagu, qula maalghuk siipneqluku maligsaaghtengita takuluku pikaat, “Maana paaghqituq enkaam yulghutet aglaghtuutesqiki qantaghanlengughnun nengiighhaghnunllu piitesighaghtenunllu. Tamaani tukughqangnayaghtutlu neghyaghqangnayaghtutlu.”

¹³ Iwernga Jesus‑em pikii, “Elpesi sameng neghyaghqaliteki.” Pikaat, “Legan taawa tallimat neqekrangllat, iqallugeklu naamapagningitut whaten uglaghqakalghiinun yugnun. Wetkuqun navek neqengyaghtughtesukufkut taawa neghqennayaghaput qamaglluki.”

¹⁴ Tawanlenguut entaqun 5,000‑nguut yuget, kesutkegpenaki aghnatlu taghnughhaatlu. Maligsaaghteni pikii, “Aqumuutesqiteki qerngaqaghtiita, fifty‑ngwaaqluki.”

¹⁵ Maligsaaghtet pisqelleghmegestun qamaglluki aqumuutestekiit.

¹⁶ Taagken Jesus‑em tuguluki tallimat neqekrangllat, iqallugeklu qilagmun sivuglluni, iqamsiqayugvikegkaa Kiyaghneq. Taagken iiggmineng aavghughluki tuunegkii maligsaaghteminun uyegtesqelluki yugnun.

¹⁷ Qamaglluteng neghuutkat kepsuulluteng. Maligsaaghtet tugulaghluki siipneghit imightuqiit qula maalghuk siipneqluku pasketet.

Peter‑em Jesus Christ‑angunikanga

¹⁸ Ataasimi aghneghmi Jesus ellnginaghmi yughalghii. Maligsaaghtengi qantaghanlenguut enkaam aaptekii, “Yuget kinangunilunga piiqatnga?”

¹⁹ Kiimsiqaat, “John‑nguniiqaaten Paaptaayesta, iwernga ilangita Elijah‑nguniiqaaten. Enkaam ilangita piiqaaten naliit ayumightaq uuknaliqista unguvaqaq.”

²⁰ Aaptekii, “Elpesimi kinanguniiqestengnga?” Peter‑em kiimsiqaa, “Christ‑akaaten Kiyaghneghem.”

Jesus‑em Akuzitkegkanga Ikfiqelleghqanillu Tuqulleghqanillu

²¹ Iwernga Jesus‑em ineghtengngwaaqii ungipaatefqaan kina alngunak pisqelluku.

²² Pikii, “Ighnegha Yugem uglalghiimeng ikfiqepestaaghyaghqaaguq, ighsaksaghqaqaatlu siivanlleghet, chief priest‑et, apeghtughikayugetlu Liilightuusaneng. Taagken tuqulleqaat, iwernga pingayiitangani aghneghem unguvaghllequq.”

²³ Taagken qamaglluki pikii, “Kitum alngunak maligsukuminga, ellmi katam piyukelleni peglluki, aghhutanga tamaghhaan tuguluku qaquurani, maligllinga.

²⁴ Enkaam kitum alngunak peggneghilkumigu unguvalleni, iflayaghqaqaa. Iwernga kitum alngunak pegtekumigu unguvalleni whanga apalluqlunga, yugulilleqaa.

²⁵ Sangwaa yugem allgeghlleqagu iingunaan nuna piliilluku iflakumigu nalighmeng naafqegkumigu unguvalleni?

²⁶ Kitum alngunak kayngukegkanganga, akuzitenkallu, Ighneghan Yugem kayngukelleqaa tagikumi nighughqelleghmikun, nighughqengngallghitgunllu Atam, agleghnalghiitlu yaqulget.

²⁷ Iwernga ipa ungipaatamsi, ilasi nekevghallghiit whani tuquyaghqaanghitut kenlanga esghalleghmeggnun Ataneghpagullgha Kiyaghneghem.”

Jesus‑em Allangughnegha

²⁸ Tawaten Jesus akuziluni, pingayuneng inglulek aghneghet atughluki, kelqegkii Peter‑enkut John‑enkut James‑enkut. Mayuqat naayghamun yughaghnaluni.

²⁹ Yughaamaluku, gginaa allangughtekaq, aatkiillu qaterakguutkat nighugraketun.

^30-31 Taagken aliighaghtekak maalghuk yugek nighugullutek qilagem nighughqellghakun, Moses‑enkunguftuk Elijah‑nkuk. Aleghqughaqeftaak Jesus tuqulleghqaaneng Jerusalem‑emi; tawaten tuqukumi apeghiighlleqaa Kiyaghneghem uspeqellgha.

³² Peter‑enkut qavanghaateghllakat, iwernga taghtughluteng esghaqaat Jesus‑em nighughqellgha, yugeklu nekevghalgutkek.

³³ Yugek unitaqaaklu Jesus, Peter‑em pikaa, “Yuguniiq, itagnapigtuq whaanlenguukut! Pingayut azigutat nekefnaqaput elpenunllu Moses‑munllu Elijah‑munllu.” (Peter akuzikaq nallukluku sameng piiqutni.)

³⁴ Salin akuzimaluku qilagwaaq aliighluni saapegkii. Maligsaaghtet alingegkat qilagwaaghem saapsisteng.

³⁵ Qilagwaaghmeng mem pikii, “Una Ighneqaqa, nakmikegkaqa! Nagataqiteggu!”

³⁶ Ma nepiighyalghiimi Jesus ellnginaaftuq. Maligsaaghtet sameng pimangilnguut, esghaqaghtengllu aapghumangilkangat kitumun alngunak.

Jesus‑em Naallghuskanga Mekelghiiq Ilumikun Tughneghalek

³⁷ Unaamingani naayghameng ukigyalghiimeng yulghuteghllaget Jesus utaqaaqeftaat.

³⁸ Yulghuteghllaget akulngitneng yuuk akilghuukaq, “Apeghtughista, maniguutunga elpenun ighneqa esghaqiisqelluku qayughllak kezemaghhaalghii avaqutaqa.

³⁹ Ilumikun tughneghalghuuq, tugupiggneghminigu araghaataghqaqaa, sayugpagtaghtesimaan kenlanga qaangha puuglliighqellghanun. Aqnighqeghllagaqaa, unitelqungigataallu.

⁴⁰ Maligsaaghtegpenun aanestaghtesqumayaghaqa iwernga pipagningitaat.”

⁴¹ Jesus‑em pikii, “Kii, elpesi yugni ugpellghitusillu seghleghwaaghuusillu! Naten tagkaan elpesininnaqsinga ugpeqesqellunga?” Taagken yuuk pikaa, “Ighneghen tagitigu whavek.”

⁴² Tagimaluku tughneghaam ulleghlluku sayugpagtaghtestekaa. Iwernga Jesus‑em qelqaa tughneghaq aanesqelluku, enkaam naallghulluku mekelghiiq atanganun tuunegkaa.

⁴³ Qamaglluteng yuget saghiighayagutkaat aghtughyaghqaanghitelleghllaga Kiyaghneghem. Paninang yuget saghiighayugumaluki tamaghhaaneng Jesus‑em apeghiillghaneng, maligsaaghteni pikii,

Jesus‑em Akuzitkellaataqanga Tuqulleghqani

⁴⁴ “Nagatngwaaghtek, puygugpenaan una: Ighnegha Yugem uveghpagutellengnaqnguuq taagken yuget tugulleqaat.”

⁴⁵ Iwernga liigikumangilkangat tawaten pillgha qayughllak umyugiit liigiksaghqaananighqegkaalghiit. Tetukaat aapneghmeng sangami tawaten akuzillghaneng.

Kina Angelleghpigaawa?

⁴⁶ Taam kingunaneng maligsaaghtet aaghtiiraaghutkat nalighteng angelleghpigaayaghqaatanga.

⁴⁷ Iwernga Jesus‑em liisimakegkii sumeghtaghallghit. Enkaam tuguluku taghnughhaq saaghwmikun nekevestekaa.

⁴⁸ Pikii, “Kitum alngunak atemkun tugukliqumigu una taghnughhaq, tuguklighlleqaanga. Enkaam kitum alngunak tugukliquminga, tuguklighlleqaa kayagtisteka. Kina alngunak ukalighpigaq akulegpesinilnguq, angelleghpigaaguq.”

Elpesinun Kipullginaanghilnguq Elpesinun Ayuquq

⁴⁹ John‑em pikaa, “Yuguniiq, esghaamaghput yuuk ateghpegun aanesqulghii tughneghaghneng. Enkaam ineghsimaaghput qayughllak whangkunnun ilatnganghilnguq.”

⁵⁰ Jesus‑em pikaa, “Ineghtegpenaan qayughllak kina alngunak elpesinun kipullgginaanghilnguq elpesinun ayuquq.”

Samaria‑ghmiit Tuguklighyunghilkangat Jesus

⁵¹ Tughaaghyan Jesus‑em qilagmun mayulleghqani, qakiqniqepigtekaq Jerusalem‑ennaluni.

⁵² Kayagtekii ilangi ungipaghtet igleghtekestiisqelluki sivumini. Samaria‑mun pikat nekaghqangusaghtughnaluku.

⁵³ Iwernga Samaria‑ghmiit upughanneghitkaat qayughllak Jerusalem‑emun maniguusaghtuulghii.

⁵⁴ Maligsaaghtegkenka, James‑enkuk John‑enkuk esghapagluki yuget ighsakegkangat Jesus, aaptekaak, “Ataneq, Kiyaghneghmun tungsiiteltekii‑i qilagmeng ukigtesqelluku keneq paneghtesqelluki?”

⁵⁵ Jesus‑em qiivlukek aghyuuqakek.

⁵⁶ Taagken ilanganun nem aglaqat.

Jesus‑mun Maligsaaghtengughsulghiit

⁵⁷ Tumetgun igleghsimaluki yugem Jesus pikaa, “Maliglleqamken navek alngunak pikuvek.”

⁵⁸ Jesus‑em pikaa, “Kaviighet riigtelguut, qawaaget unglutelguut, iwernga Ighnegha Yugem nekaghqiituq.”

⁵⁹ Taagken ilanga yuuk Jesus‑em pikaa, “Maligtinga.” Iwernga yugem pikaa, “Ataneq, maliglleqamken iwernga sivukluku ataka qungughyaghtughnaqaqa.”

⁶⁰ Jesus‑em pikaa, “Tamaakut tuqukat qungughlitki tuqumasliiteng. Iwernga elpek, aghulaqluten ungipaqsaghtughhu Ataneghpagullgha Kiyaghneghem.”

⁶¹ Ilangan yugem pikaa, “Ataneq, maliglleqamken iwernga sivukluki nemiinka ungipaasaghtuqaghnaqanka.”

⁶² Jesus‑em pikaa, “Kina alngunak piitesighaghvigmini peksighqimaluni nunameng qiivaataqumi uteghmun itagnaghnaanghituq Ataneghpagullghanun Kiyaghneghem.”