Luke 8 - New Testament-et Akuzipigestun

Aghnat Maligullghiit Jesus‑mun

¹ Mulugpenani Jesus ighleghtekaq neghllagnunllu nengiighhaghnunllu. Ungipaqikaq Pinilghiineng Ungipaneng Ataneghpagullghaneng Kiyaghneghem ayuqelghiimeng. Qula maalghuk siipneqluku malighsaaghtengita maligtekaat,

² ilangillu aghnat maligutkat. Aghnaneng aanesquqaqegkangi tughneghaat, naallghuquqaqegkangillu aqnighneghitneng. Taakunguftut Mary Magdala‑ghmii (ellnganeng aanestekaqegkangi maaraghvinlek tughneghaat),

³ Joanna, Susanna, ilangillu aghnat. Taakut aghnat pitutalmeggneng kayusiitaqegkangit Jesus‑enkut maligsaaghtekullghiit. (Joanna‑m uginga Chuza, aflengakistenguftuq Herod‑em mangteghaaneng).

Jesus‑em Ungipaghaatkegkanga Piitesighaghta

⁴ Neghllagneng tamaghhiitneng yulghuteghllaget tagilaghaatkat Jesus‑mun. Qerngughuteghllagyata ungipaghaatkii,

⁵ “Piitesighaghta piitesighaghyaghtuqaq piitesighaghvigminun. Miluuqughyaqminiki piitutet ilangi tekitkat tumetgun enkaam yuget tutmaasghaqegkiit; taagken qawaaget tagiluteng neghegkiit.

⁶ Ilangi piitutet tekitkat uyghagtuqakun naguyalghiimeng paliqat, qayughllak sunanga yukutanneghilnguq.

⁷ Ilangi piitutet tekitkat sikughllugtuqakun, sikughlluget maligulluteng naguyalghiimeng piitfigiqiit.

⁸ Enkaam ilangi piitutet tekitkat sunakegtakun, piitestikat pinilghiineng nunivagseghaghneng. Tamaghhaghmeng tamaakut 100‑kaghtaan piitutengaqut.” Jesus‑em akuzilleni taaqniqii, “Sigutelguusi, nagatek!”

Ungipaghaatet Apalliit

⁹ Maligsaaghtengita aaptekaat Jesus sameng pisiitanga taana ungipaghaan.

¹⁰ Kiimsiqii, “Kiyaghneghem nakmikumiisi liigikesqelluki talughngalghiit ipapillghi Ataneghpagulleghmi. Iwernga ilangitni yugni ungipaghaatnginaawaqut. Enkaam esghaateghngaaghmeng esghaasigatut, nagateghngaaghmeng liigikigatut.

Jesus‑em Liigikestekanga Ungipaghaatni Piitesighaghta

¹¹ “Taana ungipaghaan whaten pisiiguq: Piitutet Kiyaghneghem akuzitkii.

¹² Piitutet tekitkat tumetgun inglutngaat nagatkanun Kiyaghneghem akuzitanganeng. Taagken Tughneghaam tagiluni tugaaqii akuzitet ilungitneng ugpeqifqiitallu yugulillengefqiitallu pisqelluki.

¹³ Piitutet tekitkat uyghagtuqakun usputngaat nagatkanun Kiyaghneghem akuzitanganeng. Nagalluki akuzitet quyakusiqluki tuguklighaqiit, iwernga qamaverugllak ilumeggnun iteghtesigatiit. Ugpeqiighlluteng, iwernga nanghiiqullengneghmeggni ugpeqinanighaqut.

¹⁴ Piitutet tekitkat sikughllugtuqakun usputngaat nagatkanun Kiyaghneghem akuzitanganeng. Iwernga sumeghyalinkut, aklunginkut, teghignaanllu unguvallghem piitfigighaqii, enkaam piitestekiit angtaniisigatut.

¹⁵ Enkaam piitutet tekitkat sunakegtakun usputngaat nagatkanun Kiyaghneghem akuzitanganeng. Neqamikaqiitlu pinilghiikun ipapighqengngalghiikun ilumegteggun. Nagneghaqut qaatkelluki akuzitangi enkaam piitestekastun ayuqut piitesqughllalghiit pinilghiineng.

Sagneghem Asingani Kenelghutak

¹⁶ “Kitum alngunak kenelghutak kumaghllukek sagneghem asinganun llinaanghitaak, nalighmeng qavaghvigem asinganun. Itupill quulvaqun llilleqaak, itelghiinun nighuk esghiisqelluku.

¹⁷ Qayughllak sangwaa alngunak iighngalghii Kiyaghneghem aliighsaghqaqaa, sangwaallu alngunak saapngalghii qaaynganun lliightesleqaa.

¹⁸ Enkaam nagatngwaaghtek. Kitum alngunak liigikegkumiki apeghtuusanka liigikellengataghaghllequq. Iwernga kitum alngunak liigikenghilkumiki apeghtuusanka talwa liigiknikii iqilleqiit.”

Jesus‑em Naangallu Anglegutangillu

¹⁹ Taagken Jesus‑em naanganllu anglegutangitallu takukaat, iwernga kaanneghmeng aghtuqaat qayughllak yulghuteghllaget kanglluqaghlluku ayuqegkangat.

²⁰ Kitum ungipaatkaa, “Naanllu anglegutetenllu qakma nekevghataaghutaqut, esghaghyugaqaaten.”

²¹ Iwernga pikii, “Naakallu anglegutenkallu tamaakunguut nagallghiit akuzitanganeng Kiyaghneghem, qaatkegkangitlu.”

Jesus‑em Amsanaghtestekanga Naafteghllak

²² Ataasimi aghneghmi Jesus‑em maligsaaghteni pikii, “Naayvam inglunganun aghviilta.” Angyamun uughquulluteng aghulaqegkat.

²³ Telaanangamaluki Jesus qavaqaq. Naayvami anuqliiteghllakii, angyaatlu meghem imighaataqegkaa enkaam yakughniighllakat.

²⁴ Maligsaaghtengita takuluku taghtughlluku pikaat, “Yuguniiq, Yuguniiq, tuqulaghaannaqukut!” Jesus‑em makelluni ineghtekii anuqallu imaghllugetlu enkaam naangegkat, amsanaghtengnginaamaghmi pikaq.

²⁵ Aaptekii, “Sangama ugpeqenghitestengnga?” Iwernga alingengulghiitlu allaghlluwhaghyugulghiitlu enkaam ellmeggneng ilateng aapqughaaghutkiit, “Kinangaawa una yuuk, talwa ineghtekangi anuqallu imaghllugetlu enkaam legan qaatkegkangat?”

Jesus‑em Naallghuskanga Yuuk Ilumikun Tughneghalek

²⁶ Taagken kaatkat Gerasa‑ghmiit nunangitnun, naayvam inglunganilnguq Galilee‑meng.

²⁷ Legan Jesus quutmun uugtuq, nallaqaa yuuk ilumikun tughneghaghtuqaq, nemeng pinguftuq. Pilugugigalnguq qavngaghhaaneng, kiyaghsigalnguqlu mangteghani naqam lliveghnitaqelghii.

^28-29 Jesus‑em qelqaa tughneghaq ellnganeng aanesqelluku. Taagken yuuk araghaataghllagluni sikmuutkaq manungakun, maniguutepiglluni iglagtupiglluni pikaa, “Jesus, Ighnegha Qulighpigaghllagem Kiyaghneghem, sanaqsinga? Maniguutepigtunga ikfiqestefqaama pisqellunga.” Tawaten pikaa qayughllak Jesus‑em qelqanga yugmeng aanesqelluku tughneghaq. (Uglaghngaan tughneghaam tugughllagaqegkanga. Yuget kelengakaqsaqangat, qiipraghutnengllu asightaqsaqangit iiggillu itegiillu, iwernga sakequghaqegkangi. Enkaangam tughneghaam kilgaanun aghulaqestekaa.)

³⁰ Taagken Jesus‑em aaptekaa, “Kinanguzin?” Kiimsiqaa, “Aatqaqa, ‘Uglaghllak!’” qayughllak tughneghalghuteghllaget iteghukaqegkangat.

³¹ Taakut tughneghaat Jesus‑mun aapuquusimanginaqat aglaghtestefqaameng Abyss‑mun pisqelluteng.

³² Taawa qemim minglengani kurugalghuteghllaget neghuutaqeftut. Tughneghaat aapuquutkat Jesus‑mun kurugaghnun iteghtesqelluteng enkaam iteghaatestekii.

³³ Taagken tughneghaat yugmeng aanleghaalluteng iteghaatkat kurugaghnun. Kurughaat pennanun pangalgulluteng naayvamun ifkaqulluteng tuqulaghaatkat.

³⁴ Kurugaat aflengakistengita esghapagluku tawaten pilleq, qimaguulluteng ungipaqegkaat neghllagmi, uvitanganilngughnillu nunani.

³⁵ Taagken yuget esghaghyaghtuutkaat sangwaa samatanga. Kaalluteng Jesus‑mun esghaqaat yuuk tughneghiighulluni. Aqumgaftuq Jesus‑em manungani pilugugwaaghluni, umyugakeklu naallghutngwaaghlutek enkaam alingruughuteghllakat.

³⁶ Tamaakut esghapakat ungipaqegkaat yuuk ilumikun tughneghaghtughllagyalghii naten naallghutkaatanga.

³⁷ Taagken qamaglluteng yuget Gerasa‑ghmiit nunangitnilnguut aghulaqeskegkaat Jesus, qayughllak alingruughuteghllagulghiit. Enkaam Jesus‑enkut angyamun uuglleghaalluteng aghulaqegkat.

³⁸ Yuuk tughneghaghtughllagyalghii aapuquutkaayalghii Jesus‑mun maligunnaluni, iwernga Jesus‑em aghulaqesqegkaa. Pikaa,

³⁹ “Uteghnighluten negpenun, aapghhu naten angkaan Kiyaghneghem apeghiillgha elpenun.” Enkaam ellmeggnun aglaghluni tamaghhaani neghllagem aapqaa Jesus‑em apeghillgha ellminun.

Aghnaghaamllu Unguvaghtellgha Aghnamllu Naallghutellgha

⁴⁰ Jesus uteghnighyan yulghuteghllaget upughatkaat qayughllak utaqangukangat.

⁴¹ Taagken yuuk atelek Jairus‑meng tagikaq, igleghutistenga synagogue‑em. Jesus‑em manungakun niinghulluni maniguutkaq ellmeggnun piightesqelluku,

⁴² qayughllak kezemaghhaq paniga, qula maalghuk siipneqluku uksughtutkalghii, tuqunaqnguftuq. Aglaamaluku yulghuteghllaget kanglluqaghtekaat Jesus.

⁴³ Akulngitniteftuq aghnaq aagtuqaataaftuq qula maalghuk siipngaan ayumiqulleghni. Maningiitkaq llivikuusaqneghmeng aghallegtanun, naqamllu kitum alngunak naallghutepagningitkaa.

⁴⁴ Tunutanganeng Jesus takuluku atkuyaaghan keniin esnengakun saaftekaa, enkaam kiitnginaamaghmi pikaq.

⁴⁵ Jesus‑em aaptekii, “Kitum saaftanga?” Qamaglluteng mesighaghyata, Peter‑em pikaa, “Yuguniiq, yulghuteghllaget kanglluqaghlluten ayuqaaten.”

⁴⁶ Iwernga Jesus‑em pikii, “Kitum saaftaanga, qayughllak elpekaqa aghtughyaghqaanghilleq aanelghii whangamneng.”

⁴⁷ Aghnaq piyalghiimi aksaqfigiteftuq enkaam ungelegsimaghmi tagikaq. Jesus‑em sivungakun niinghulluni, yulghutet nagasimanghitni ungipaatkaa sangan saaftelleghmineng, tawaninginaqlu naallghutelleghmineng.

⁴⁸ Jesus‑em pikaa, “Panimni, ugpeqilleghpek naallghutestaaten, aglaa nekeggmellelighluten.”

⁴⁹ Salin Jesus akuzimaluku, igleghutistenkuneng yuuk tagiluni Jairus pikaa, “Panigen tuqumaaq, Apeghtughista qinuyugtegpenaanꞌngam.”

⁵⁰ Iwernga Jesus‑em nagalluku, pikaa Jairus, “Alingegpenang. Taawanginaghhaq ugpeghi, piniighhnaaghaa.”

⁵¹ Jesus mangteghamun kaasami kitumun alngunak itelgusightesimangilnguq. Iwerngaqun iteghtestekii Peter‑enkut John‑enkut James‑enkut, taghnughaamllu atanga, naangallu.

⁵² Qamaglluteng yuget qiyaaghuuteghllagulghiit aghnaghaghhaghmun tuqulghiimun. Iwernga Jesus‑em pikii, “Qiyagpenasi qayughllak tuqullghituq, qavaghaquq.”

⁵³ Nenglaqegkaat liisimakluku tuqukaatanga.

⁵⁴ Iwernga tuguluku iiggakun tuqluumaan pikaa, “Taghnughhaq, maketen.”

⁵⁵ Aghnaghaghhaq unguvaghluni, nekevegkaq. Jesus‑em kayagutkaa sameng neghestesqelluku.

⁵⁶ Angayuqakek saghiighayukak, iwernga ineghtekakek kina alngunak ungipaatefqaan pisqelluku tawaten pilleghmeng.