Luke 7 - New Testament-et Akuzipigestun

Jesus‑em Naallghuskanga Centurion‑em Qepghaghtenga

¹ Jesus‑em aleghquneghmeng apeghiighyamiki yuget aglaqaq Capernaum‑emun.

² Taawanguq centurion‑a qepghaghtelaalek, megnukumtaagha, enraqlu qinuyugllakaq repall tuquyaghtungestaghluni.

³ Centurion‑em nagaqughluku Jesus, kevgaqegkii Jews‑et siivanlleghit naallghusaghtuqiisqelluku qepghaghtelaani.

⁴ Jesus‑mun kaasameng nangllegsipiglluteng pikaat, “Centurion‑em kayutkesupigtaaten. Yuuk taana kevgaqiilghii pinighllagtuq kayusighyaghqapiguuq,

⁵ qayughllak piniqepigtii yuput, synagogue‑engllaqaqiinkutlu.”

⁶ Enkaam Jesus‑em maligtekii. Kaasaghtughaqutlu mangteghamun centurion‑em ilakumtaaghminun ungipaasaghtiisqegkaa whaten, “Ataneq, nagneghnaqegpenang qayughllak itagnanghitunga elpenun iteghviksaghqaalunga mangteghamnun.

⁷ Tamaaken apalluqluku whangamneng takupagningitamken. Legan tawanlluten naallghutesqigu qepghaghteka enkaam naallghulli.

⁸ Whangallu umiilelguunga qelghikayugmeng enkaam asinganitunga umiilegma. Pilluwaghtenka asimnitut, ataasiq qelqumkun, ‘Aghulaqi’ aga aghulaqellequq. Ilanga pikumkun, ‘Tagi’ tagillequq. Qepghaghteka qelqumkun, ‘Una piightigu’, aga pilleqaa.”

⁹ Jesus‑em nagalluku tawaten pillgha, allaaghlluwaghyagutkaa enkaam yulghuteghllaget maligtilghiit ellmineng pikii, “Ungipaatamsi, nallaataghsigatunga kitumeng alngunak talwa Israel‑mi, uutun yugtun ugpeqilleghtutkalghiimeng.”

¹⁰ Kevgat uteghnighluteng centurion‑emem mangteghaanun esghaqaat qepghaghtelaagha naallghutngwaaghluni.

Jesus‑em Unguvaghtekanga Ugingigham Ighnegha

¹¹ Unaamingani Jesus aglaqaq neghllagmun atilqelghii Nain, maligsaaghtengitallu yulghuteghllagetlu maligtekaat.

¹² Kaataquqlu iteghviganun neghllagem, yuget aanutaqeftaat tuqukaq yuuk lliveghnaluku. Ugingigham kezemaghhaaftuq ighnegha, enkaam neghllagem yulghutngan maliglleghaataqeftaat aghnaq.

¹³ Atanghem esghaghluku aghnaq nangllegyagulluku pikaa, “Qiyagpenang.”

¹⁴ Taagken takuluku saaftekakek kevgusik enkaam kevgistet aghuliiqat. Taagken tuqukaq pikaa, “Nukalpigaq, ungipaatamken, unguvaa!”

¹⁵ Tuqukaq aqumluni akuzinginaamaghmi pikaq enkaam Jesus‑em pegtekaa naanganun.

¹⁶ Qamaglluteng yulghuteghllaget tallughyuguteghllakat, usuqegkaatlu Kiyaghneq, pikat, “Uuknaliqisteghllagem kaasimiinkut!” Whatenllu pikat, “Kiyaghneghem kayusighyaghtughii yuni!”

¹⁷ Taana ungipaq mingitkaat Judea‑lqaaghaghmi, uvitanganilngughnunllu nunanun.

John‑em Paaptaayestem Kevgaqegkek Yugek Jesus‑mun

¹⁸ John‑em maligsaaghtengita ellnganun apeghteqiit qamaglluki Jesus‑em apeghiightuqii.

¹⁹ Enkaam John‑em maalghuggiinaak maligsaaghtegni tagsighlukek kevgaqegkakek Ataneghmun, aaptesqelluku whaten, “Elpengwaa taginaqnikaat, nalighmeng sighimakeltegguu kina alla tagiyaghqaq?”

²⁰ Yugek kaallutek Jesus pikaak, “John‑em Paaptaayestem kevgaqiinkung aaptesqelluten whaten, ‘Elpengwaa taginaqnikaat, nalighmeng sighimakeltegguu kina alla tagiyaghqaq?’”

²¹ Tawani pilleghmi Jesus‑em naallghuquqii yulghutet qinuyugitneng, aqnighneghitneng, tughneghaat yuget ilungitneng aanestaqluki, ayaakatlu esghaasagutestaqluki.

²² Enkaam kevgak kiimsiqakek, “Aglaghlutek John‑mun ungipaategnegu esghapakaghpetegnengllu nagatkaghpetegnengllu. Ayaakat esghaasagutut, piyugigasalghiit piyugyagutut, leprosy‑lguyalghiit ukmangiightii, tuuslaghyalghiit nagaquusagutut, tuqukaayalghiit unguvaghtestut unguvalleghmun, aklumalghiinunllu Pinilghii Ungipaq ungipaquq.

²³ Quyastekaaguq kitum alngunak taaqenghilkuminga ugpeqneghmeng!”

²⁴ John‑em kevgakek aghulaqsayek, Jesus‑em akuzitkegkaa John yulghuteghllagnun; “Kilgaanun piiqngafsi, sangwaa esghaghesteggu? Vegaaq anuqem ufsuguskangaa?

²⁵ Sangwaa esghaghyaghtuqaqesteggu? Yuuk aarraghngalghii? Tawaten aarraghngalghiitlu, aklungiteghllagetlu kiyaghtaqut umiilget nengitni.

²⁶ Sangwaa esghaghyaghtuqaqesteggu? Uuknaliqistaa? Aa‑a, ungipaatamsi, esghaqaghsi uuknaliqisteneng aangataghaghtuq.

²⁷ John‑nguuq Akuzitet Igaqegkat aapqaat, ‘Kiyaghneq piiq, Sivugpeni kayaglleqaqa ungipaghteka yataaghqesqelluku tuumkaghqan.’

²⁸ Ungipaatamsi, yugyaggaghneng allgeghaqelghiineng John aangelleghpigaaguq. Iwernga kina alngunak ukalighpigaq Ataneghpagullghani Kiyaghneghem John‑meng aangataghaghtuq.”

²⁹ (Qamaglluteng tamaakut yuget, talwa tax‑meng qerngughtistet, nagasamegteki Jesus‑em apeghtughillghi tuguklighiit Kiyaghneghem qelghusii elqughutnganiluki. Tawaten pikaagut qayughllak sivunghani tugukliqaqegkangit John‑em apeghtughillghi. Enkaam John‑mun paaptaayestekaalghiit.

³⁰ Iwernga Pharisees‑etlu apeghtughikayugetlu Liilightuusaneng tugukliimangitiit John‑em apeghtughillghi, enkaam ellnganun paaptaayesugumangitut. Tawaten pilleghmegteggun ighsakegkaqaat Kiyaghneghem uspeqellgha ellmeggnun.)

³¹ Jesus‑em pikii, “Maaten kiyaghlleghhiit yuget tuguklighinghilnguut apeghtughillemnun, samun inglunnaqsingi? Natetat?

³² Taghnughhaghestun ayuqut aqumuulluteng akilpegaghvigni, ilateng akilghuukangit whaten, ‘Qalghightaatamsi, tukaleganghitusi! Qiyiqutukut, qiyiqenghitusi!’

³³ Elpesi maaten kiyaghlleghhiini taakustun taghnughhaghestun ayuqusi. John Paaptaayesta tagiiqngami neqekrangllaghtuumangituqlu meghumangituqlu wine‑meng enkaam pikaagusi, ‘Tughneghalguuq.’

³⁴ Ighnegha Yugem tagiluni, neghelgusighiiqlu meghelgusighiiqlu yugneng enkaam pikaagusi, ‘Yuukqun taana esghaqaghteggu! Neghevalluuguq, meghevalluuguq, ilakumtaaqaatlu tax‑meng qerngughtistet, seghleghqestetlu!’

³⁵ Naqamllu tamaakut apeghtuusamneng tuguklighilghiit kiyaghllequt pinitun. Tawaten pillghem ipapighqelleqaa apeghtuutkegkaqa Kiyaghneghem peghqinelqaa!”

Jesus Simon‑enkunilnguq Pharisee‑mi

³⁶ Ataasim Pharisee‑m Jesus neghyaghtiisqegkaa ellmeggnun. Enkaam Pharisee‑nkunun aglaghluni aqumegkaq neghnaluni.

³⁷ Tamaanteftuq neghllagmi aghnaq seghleghqesta. Nagaqughyamigu Jesus neghaqniluku Pharisee‑nkuni, kelqegkakek alabaster‑ek aqimleghutak akitupiglleghhiimeng tepengllaasimeng imalgek.

³⁸ Iteghluni nekevegkaq tunutangakun Jesus‑em itegaan. Qiyatkelluku qunimineng aghistekii itegii, enkaam nuyamineng sangighquqii. Taagken naaghaqluki, angighhegkii tepengllaasimeng.

³⁹ Neghyaghtiisqikam Pharisee‑m esghapagluku sumeghtaghaqaq, “Una yuuk uuknaliqistenguyaqumi, liisimaknayaghaa aghnaq kinangutanga, sastengutangallu saafqughaalghii ellnganeng, qayughllak seghleghqestenguuq.”

⁴⁰ Jesus‑em pikaa, “Simon, ungipaataghsugamken sameng.” Simon‑em aaptekaa, “Apeghtughista, sameng?”

⁴¹ Jesus‑em pikaa, “Maalghuk yugek navghaamalghiik manimeng navghitikayugmeng. Aallgha navghaqaq 500 denarii‑meng, ilanga 50 denarii‑meng.

⁴² Nalighhiinaagkenka llivikepagningitkiik navghatek enkaam navghitikam puygusqegkiik navghallghik. Naligkenka yugek piniqataghaghlleqagnegu?”

⁴³ Simon‑em kiimsiqaa, “Entaqun aangluku navghitkaan.” Jesus‑em pikaa, “Elqughaghtan.”

⁴⁴ Taagken qiivluku aghnaq Simon pikaa, “Esghaghsiguu una aghnaq? Iitghaqngama whavek meghmeng tuunellghitaghpenga iteganka ughviisqelluki. Iwernga uum aghnam iteganka ughvughii qunimineng, sangigtaqluki nuyamineng.

⁴⁵ Upughasimangitaghpenga naaghmeng, iwernga iitghutmineng aghnam aghuliighunneghitii naaghmineghmeng iteganka.

⁴⁶ Naasquqa mesiighmeng kuuvikellghitan, iwernga ellngan iteganka kuuvikii tepenglaasimeng.

⁴⁷ Ungipaatamken, seghevutellengut seghleghqellelghuteghllagi, tamaaken apalluqluku piniqellelegllaguuq. Tawateghpigaq kina alngunak seghevutellengevleghaqaq piniqellevleghallgaaguq.”

⁴⁸ Taagken Jesus‑em aghnaq pikaa, “Seghleghqelleghten seghevutellengumaat.”

⁴⁹ Taagken tipelegni ellnganeng aqumgalgusighilghiit aapqughaghutkat, “Kinangaawa una seghevutiiqelghii seghleghqelleghneng?”

⁵⁰ Jesus‑em aghnaq pikaa, “Ugpeqilleghpek yugulillengestaaten, aglaa nekeggmellelighluten.”