Luke 4 - New Testament-et Akuzipigestun

Tughneghaam Seghleghqesnaqutkegkanga Jesus

¹ Taagken Jesus, Agleghnalghiigneng Taghneghagneng esleqngalghii, uteghniqaq Kiiwegneng Jordan‑egneng, enkaam Taghnegham aghulaqutkaa kilgaanun.

² Tughneghaam seghleghqesnaqutkegkaa 40 aghneq. Tamaani aghneghni Jesus neghumangilnguq. Taakut aghneghet kingungitneng iyataghllakaq.

³ Tughneghaam pikaa, “Kiyaghneghem Ighneqngukangaten, una uyghak neqnghugtestigu.”

⁴ Jesus‑em pikaa, “Akuzitet Igaqegkat pikaagut, ‘Yuuk kiyaghhnaanghituq neqnginaghhaghqun.’”

⁵ Taagken Tughneghaam mayuutkaa uusqapiglleghhiimun, natengiighhaq kelguvikegkaa nunam ataneghpagullghitneng.

⁶ Pikaa, “Elpenun tuunelleqanka qamaglluki tamaakut ataneghpagullghet, aghtughyaghqaanghillghetlu. Qamaglluteng whangamnun tagivaqaagut enkaam kitumun alngunak tuunyukegkamnun tuunelleqanka.

⁷ Manigughyaquvnga qamaglluki elpek pikaaghhnayaghaten.”

⁸ Jesus‑em pikaa, “Akuzitet Igaqegkat pikaagut, ‘Manigughyaghqaqan Ataneq Kiyaghneghen, ellnginaaguqlu qepghaasaghqan.’”

⁹ Taagken Tughneghaam aglaatkaa Jerusalem‑emun, nekevestekaa Temple‑em uusqalghakun. Pikaa, “Kiyaghneghem Ighneqngukangaten, qetgeghi tesamavek,

¹⁰ qayughllak Akuzitet Igaqegkat pikaagut, ‘Kiyaghneghemnguq yaqulegminun paqnasightesaghtughlleqaaten!’

¹¹ Pikaagutlu, ‘Iiggmeggneng nuqneqelleqaaten, luuraq itegaghten uygaghquunnayukata.’”

¹² Jesus‑em pikaa, “Akuzitet Igaqegkat pikaagut, ‘Ataneq Kiyaghneghen nanghiiqugpenaan sasqelluku ellngan piyukelqenghilkanganeng.’”

¹³ Taagken Tughneghaam apeghiighyamiki seghleghqestinaqutkelleni Jesus‑mun, unitkaa kenlanga alla pilleghqangelleghqaminun.

Jesus‑em Piinliqanga Ungipaqilleni Galilee‑mi

¹⁴ Taagken Jesus uteghniqaq Galilee‑mun aghtughyaghqaanghillelighluni Agleghnalghiignekun Taghneghagnekun. Tamaghhaani nunani yuget ungipaqegkaat.

¹⁵ Apeghtughiiqelghiillu synagogue‑ngitni, qamagllutengllu yuget usuqegkaat.

Nazareth‑eghmiit Ighsakegkangat Jesus

¹⁶ Taagken Jesus anglivigminun Nazareth‑mun pikaq. Sabbath‑ngughsagu piiqelleghmitun synagogue‑mun aglaqaq. Nekevegkaq atightughnaluni Akuzitneng Igaqegkaneng.

¹⁷ Tuunegkaat uuknaliqistem Isaiah‑m igaaneng. Qelpeghtekii whaten igaqngalghiimun,

¹⁸ “Atanghem Taghneghakek whangamnituk, qayughllak nakmikegkaqaanga Pinilghiineng Ungipaneng ungipaqisqellunga aklumalghiinun. Kayagtaanga anusimingllaghat itemutesqelluki, ayaakatlu esghaasagutesqelluki, amyuqetaatkesilghiitlu itemutesqelluki amyuqetaatkistengitneng.

¹⁹ Apeghyaghtiisqaallu ayumiqulleq kaanniluku Atanghem yugulighilleghqaallu quyastilleghqaallu yugneng.”

²⁰ Atightuneghmeng apeghiighyamiki igat tuunegkii aflengakistemun taagken aqumegkaq. Synagogue‑melnguut qamaglluteng esghapagtuutkaat sameng pilleghqaaneng.

²¹ Pikii, “Aghneghmi whani, nagasimaneghpesini ukut Akuzitet Igaqegkat aapqaat apeghiightuq.”

²² Akuzineghmeng taaqsan qamaglluteng nagallghiit efquqegkiit akuzillghi, saghiighayagutkiitlu akuzitangi nangllegtallelguniluki. Aapqughaaghutkat, “Una Joseph‑em ighneqenghitaguu?”

²³ Jesus‑em pikii, “Nalluneqnangunaan whangamnun apeghlleqaghsi whaten pilleq, ‘Aghallegtaq, elpeneng naallghuten.’ Nagaquqaqaput Capernaum‑emi pikaghten, maanillu anglivigpeni tamaakut piightiki, enkaam ugpeqelleqamken Messiah‑nguniluten.”

²⁴ Pikiillu, “Ipa piimsi, uuknaliqista tuguklightengituq ellmi katam anglivigmini.

²⁵ Iwernga ipa ungipaatamsi, Israel‑mi, Elijah kiyaghtengnguluku, ugingighhaghtuuq. Tamaani pilleghni eslallugughhneghitkaaguq pingayut ayumiqullghet, aghvinlek tanqit ilalluki, enkaam neqangisagllakaaguq tamaghhaani nunangani Israel‑em.

²⁶ Iwernga Kiyaghneghem Elijah‑mun kayusighyaghtiisqellghitii nalighhiiniit ugingighat Israel‑melnguut. Yeghlegi kayusiisaghtiisqegkaqaa Gentile‑a ugingighaq, kiyaghlleghhii Zarephath‑mi, Sidon‑melngughmi.

²⁷ Enkaamllu Israel‑mi leper‑ekaghtuuq, kiyaghtellghani uuknaliqistem Elisha‑m. Nalighhiiniit ukmangillghitutlu naallghutellghitutlu, iwerngaqun Gentile‑a Naaman, Syria‑ghmii.”

²⁸ Qamaglluteng synagogue‑melnguut sakriteghllakat nagasamegteggu Jesus‑em tawaten pillgha.

²⁹ Taagken nekevuulluteng, ayagaghtaamaan neghllagmeng aanutkaat. Taana neghllagat qemikun nekeftekaalghii enkaam aghulaqutkaat qemim qagughruganun siingnaluku tesamavek.

³⁰ Iwernga akulngitgun naghughqughluki aghulaqegkaq.

Jesus‑em Aanestekanga Tughneghaq Yugmeng

³¹ Taagken Jesus tesamavek Capernaum‑emun pikaq, neghllagmun Galilee‑melngughmun. Sabbath‑mi apeghtughimaluku,

³² saghiighayagutkaat apeghtughillgha, qayughllak apeghtughikaq aghtughyaghqaanghillelighluni Kiyaghneghmeng.

³³ Synagogue‑meteftuq yuuk ilumikun tughneghalek. Iglagtupiglluni akilghuumeng pikaq,

³⁴ “Avelghaghqut! Jesus Nazareth‑eghmii, sanaqsikut? Naafqesaghtuuzikuut? Liisimakamken kinanguten, Agleghnalghiikaaten Kiyaghneghem.”

³⁵ Iwernga Jesus‑em aghyuuqaa, “Qallegpenang ellnganeng aani!” Tughneghaam iqusluku manungitgun, aqnighqegpenaan aanegkaq.

³⁶ Qamaglluteng yuget saghiighayugumaghmeng pikat, “Aghtughyaghqaanghitaghhalek akuzitangi! Pilleghqalighlunillu aghtughyaghqaanghillelighluni qeleghyaqminiki tughneghaat legan aanleghaatut!”

³⁷ Jesus‑em tawaten pillgha ungipaqegkaat nani alngunak tamaani.

Jesus‑em Naallghuskangi Yulghutet

³⁸ Jesus nekevluni, synagogue‑meng aanluni, Simon‑enkunun aglaghluni iitqaq. Simon‑em sakinga aghnaq puqleghaghllak, enkaam naallghutaghtesqegkaat ellnganun.

³⁹ Takuluku qavaghviganun nekevghaghmi qulangighluku puqleghanga eflequqaa enkaam puqleghangiitkaq. Tawaninginaq makelluni kepsiiqukii.

⁴⁰ Siqineq teviimaluku, Jesus‑mun yuget tagiquutkiit qinuyugngalghiit allaaghhiinaghneng aqnighneghneng. Qamaglluki saaftaqluki naallghuquqii.

⁴¹ Tughneghaatlu aanleghaatkat yugneng akilghuumaghmeng, “Elpek Kiyaghneghem Ighneqaaten!” Iwernga aghyuuqii, akuzisnaniqiillu qayughllak liisimakegkangat ellnga Christ‑angulghii.

Jesus Ungipaqilghii Synagogue‑nni

⁴² Aghsagu Jesus kilgaanun pikaq. Yuget ivaghyaghtughluku, naalkesamegteggu aghulaqesnaniqaat.

⁴³ Iwernga pikii, “Ungipaqepestaaghyaghtughnaqngwaaqa Ataneghpagullgha Kiyaghneghem ilangitnunllu neghllagnun, qayughllak taana apalluqluku kayagtekaagunga.”

⁴⁴ Enkaam ungipaqimanginaqaq synagogue‑ngitni Judea‑m.