Luke 3 - New Testament-et Akuzipigestun

Ungipaqillgha John‑em Paaptaayestem

¹ Akimigaaghtengngukanga ayumiqulleq igleghutillghan Tiberius Caesar‑em, Pontius Pilate, governor‑nguluku Judea‑mun. Enkaam Herod, igleghutistengulghii Galilee‑mun, anglegutangallu Philip, igleghutistengulghii Ituraea‑nkugnun, Trachonitis‑enkugnun. Lysanias‑llu igleghutistengulghii Abilene‑mun.

² Annas‑enkuk Caiaphas‑enkuk high priest‑ngulghiik. Tamaani pilleghmi, Kiyaghneghem aleghquqaa John kilgaanisimaluku. John ighneqegkanga Zechariah‑m.

³ Taagken John igleghtekaq uvitangani Kiiwem Jordan‑em, ungipaqikaq yugnun peglluki seghleghqellghit paaptaayesqelluki, enkaam seghevutellengelleqniluki seghleghqellghitneng.

⁴ Igaqngakaalghiit igatgun akuzitangi uuknalqistem Isaiah‑m whaten, “Ma akilghuugaquq kilgaani whaten; ‘Yataaghqiteggu tuumkaghqaa Atanghem, taklaghteggu tuumkaghqaa.

⁵ Qamaglluni suqluneq imighllequq, qamagllutengllu naayghat, qemit asivaghllequt, enkaam agughpiiraaghet tumet taklaghrukguullequt, tuumllugmelnguutlu tuumkwhuughlleqii.

⁶ Qamaglluni yugem esghaghlleqaa Kiyaghneghem yugulighillgha yugneng!’”

⁷ Taagken yulghuteghllaget tagilaghaatkat ellnganun paaptaayesqelluteng. John‑em pikii, “Elpesi nemeghyani! Kitum kelengasaaghtisi anagesqellusi Kiyaghneghem aghyuughilleghqaaneng kaannaqelghiimeng?

⁸ Kiyaghtaalleghpesi ipapighqelligu avuteghqumaasi seghleghqelleghpesineng. Sumeghtaghaghpenasi itagnaghnilusi Kiyaghneghmi qayughllak Abraham‑em kingunqegkangisi. Ungipaatamsi, Kiyaghneghem uyghaget maakut taghnughhangllaghnayaghii Abraham‑emun.

⁹ Talwa maaten qalqalima uqliilluni ayuquq kepnaluki uqfiget akwiitgun. Qamaglluni uqfik pinilghiimeng piitestinghilnguq kepluni kenghegnun miluusaghqaaguq.”

¹⁰ Yulghuteghllaget aaptekaat, “Sanaqestangam?”

¹¹ Kiimsiqii, “Maalghugegneng qaaslilgukuvek, aleghqek tuunakegken avangilngughmun yugmun, enkaam neqelgukuvek tawatenllu pilghaaten.”

¹² Ilangillu tax‑meng qerngughtistet tagiluteng paaptaayestekat ellnganun. Aaptekaat, “Apeghtughista, whangkuta sanaqesta?”

¹³ Kiimsiqii, “Tuwaaqiteggu naamignganginaghhaq tax‑elleq, wata tugutegpenasi.”

¹⁴ Pilluwaghtetlu aaptekaat, “Whangkutamii‑i, sanaqesta?” Kiimsiqii, “Akeqsagtegpenaki yuget ellngitnun manilitesqellusi nalighmeng temngi avutkegpenaki. Itagnaqaqiteki akileghtuusaghpesi angtalangit.”

¹⁵ Yuget sighimaluteng lliiqat, qamagllutengllu sumeghtaghaatkegkaat John, Christ‑angunayukan.

¹⁶ Enkaam John‑em pikii, “Tagiyaghqaq taana aghtughyaghqaanghiteghllagtuq whangamneng, enkaam whanga pininghitngwaaghtunga itemsaghqaaluki singii. Paaptaayeghiiqunga meghqun, iwernga ellngan paaptaayelleqiisi Agleghnalghiigneng Taghneghagneng, keneghmengllu.

¹⁷ Tugumiilguuq pekutameng malliighnaluki wheat‑et. Taagken wheat‑et kagpaglleqii, iwernga mallat paneghlleqii qaamyaghqaanghilnguugnekun kenghegnekun.”

¹⁸ John‑em ungipaasimanginaqii yuget naten allangughnaqesqelluki kiyaghtaallghit, ellngitnun ungipaqinguluni Pinilghiineng Ungipaneng.

¹⁹ Iwernga John‑em aghyuughmikaqegkanga governor‑a Herod, qayughllak tugukaqegkanga Herodias, anglegutmi Philip‑em nulighha. Aghyuughmikaallu Herod seghletun pillghaneng apalluqluku.

²⁰ Taagken Herod wata seghleghataghatun pikaq anusimingllaghtestekaa John.

Paaptaayellgha Jesus‑em

²¹ Kingungitneng qamaglluteng yuget paaptaayestellghita, Jesus‑llu paaptaayestekaq. Jesus yughaamaluku, qilak qelpeqaq,

²² taagken Agleghnalghiik Taghneghak dove‑ngulutek ukikak ellnganun. Qilagmeng ma pikaq, “Ighneqamken, piniqepigkamken, efquqepigtamken.”

Jesus‑em Sivunghi

²³ Jesus‑em piinlighaqngamigu qepghaqani, entaqun 30‑nguuq uksughtulanga. Yuget sumeghtaghaatkegkaat ighneqniluku Joseph‑mun. Joseph, ighneqegkanga Heli‑m.

²⁴ Heli, ighneqegkanga Matthat‑em. Matthat, ighneqegkanga Levi‑m. Levi, ighneqegkanga Melchi‑m. Melchi, ighneqegkanga Jannai‑m. Jannai, ighneqegkanga Joseph‑em.

²⁵ Joseph, ighneqegkanga Mattathias‑em. Mattathias, ighneqegkanga Amos‑em. Amos, ighneqegkanga Nahum‑em. Nahum, ighneqegkanga Esli‑m. Esli, ighneqegkanga Naggai‑m.

²⁶ Naggai, ighneqegkanga Maath‑em. Maath, ighneqegkanga Mattathias‑em. Mattathias, ighneqegkanga Semein‑em. Semein, ighneqegkanga Josech‑em. Josech, ighneqegkanga Joda‑m.

²⁷ Joda, ighneqegkanga Joanan‑em. Joanan, ighneqegkanga Rhesa‑m. Rhesa, ighneqegkanga Zerubbabel‑em. Zerubbabel, ighneqegkanga Shealtiel‑em. Shealtiel, ighneqegkanga Neri‑m.

²⁸ Neri, ighneqegkanga Melchi‑m. Melchi, ighneqegkanga Addi‑m. Addi, ighneqegkanga Cosam‑em. Cosam, ighneqegkanga Elmadam‑em. Elmadam, ighneqegkanga Er‑em.

²⁹ Er, ighneqegkanga Joshua‑m. Joshua, ighneqegkqanga Eliezer‑em. Eliezer, ighneqegkanga Jorim‑em. Jorim, ighneqegkanga Matthat‑em. Matthat, ighneqegkanga Levi‑m.

³⁰ Levi, ighneqegkanga Simeon‑em. Simeon, ighneqegkanga Judah‑m. Judah, ighneqegkanga Joseph‑em. Joseph, ighneqegkanga Jonam‑em. Jonam, ighneqegkanga Eliakim‑em.

³¹ Eliakim, ighneqegkanga Melea‑m. Melea, ighneqegkanga Menna‑m. Menna, ighneqegkanga Mattatha‑m. Mattatha, ighneqegkanga, Nathan‑em. Nathan, ighneqegkanga David‑em.

³² David, ighneqegkanga Jesse‑m. Jesse, ighneqegkanga Obed‑em. Obed, ighneqegkanga Boaz‑em. Boaz, ighneqegkanga Salmon‑em. Salmon, ighneqegkanga Nashon‑em.

³³ Nashon, ighneqegkanga Amminadab‑em. Amminadab, ighneqegkanga Admin‑em. Admin, ighneqegkanga Arni‑m. Arni, ighneqegkanga Hezron‑em. Hezron, ighneqegkanga Perez‑em. Perez, ighneqegkanga Judah‑m.

³⁴ Judah, ighneqegkanga Jacob‑em. Jacob, ighneqegkanga Isaac‑em. Isaac, ighneqegkanga Abraham‑em. Abraham, ighneqegkanga Terah‑m. Terah, ighneqegkanga Nahor‑em.

³⁵ Nahor, ighneqegkanga Serug‑em. Serug, ighneqegkanga Reu‑em. Reu, ighneqegkanga Peleg‑em. Peleg, ighneqegkanga Eber‑em. Eber, ighneqegkanga Shelah‑m.

³⁶ Shelah, ighneqegkanga Cainan‑em. Cainan, ighneqegkanga Arphaxad‑em. Arphaxad, ighneqegkanga Shem‑em. Shem, ighneqegkanga Noah‑m. Noah ighneqegkanga Lamech‑em.

³⁷ Lamech, ighneqegkanga Methuselah‑m. Methuselah, ighneqegkanga Enoch‑em. Enoch, ighneqegkanga Jared‑em. Jared, ighneqegkanga Mahalaleel‑em. Mahalaleel, ighneqegkanga Cainan‑em.

³⁸ Cainan, ighneqegkanga Enos‑em. Enos, ighneqegkanga Seth‑em. Seth, ighneqegkanga Adam‑em. Enkaam Adam ighneqegkanga Kiyaghneghem.