Luke 24 - New Testament-et Akuzipigestun

Jesus‑em Unguvaghteslegha Tuqulleghmeng

¹ Sivulighmi aghneghani santillghem, unaangupiglluku, taakut aghnat lliveghtekat kelqelluki yataaghqegkateng neqnighsaasit.

² Lliveghmun kaasalghiimeng uyghagllak paaynganeng ullghitaghngaftuq.

³ Iteghaasalghiimeng aviiteftuq yugusii Atanghem Jesus‑em.

⁴ Kukriqutkumaluku samatanga, yugek aliighaghtekak saaghwitgun, aatkiik nighugllagek.

⁵ Aghnat alingruughutkat repall gginateng seketestekiit nunamun, yugek aaptekiit, “Sangan ivaghitsi unguvalghiimeng akulngitni tuqukat?

⁶ Whaanneghituq; unguvaghsimaaq tuqulleghmeng. Amenqun salin Galilee‑melluni ungipaatkaqegkangisi,

⁷ ‘Ighnegha Yugem tuunepestaaghyaghqaqaat seghleghqestenun qaquuriisqelluku, taagken pingayaani aghneghem unguvaghllequq tuqulleghmeng.’”

⁸ Taagken aghnat neqanguqiit Jesus‑em akuzitangi.

⁹ Lliveghmeng uteghnighluteng tamaana qamaglluku aapqaat qula ataasiq siipneqluku apostle‑enun, ilangitnunllu maligsaaghtengitnun.

¹⁰ Taakut lliveghtekat Mary Magdala‑ghmiinkut, Joanna‑nkut, Mary‑llu naanga James‑em, ilangillu aghnat. Ungipaatkiit apostle‑et tamaaken pilleghneng,

¹¹ iwernga apostle‑et sumeghmeggni temngi piniluki pikiit enkaam ugpequmangilkangit.

¹² Naqamenraq Peter nekevluni lliveghmun ketanqukaq. Kaasami lliveghmun qineghtekaq, esghaqii qiipagharaaghinaat linen‑et lliluteng. Taagken aglaqaq sumeghtaghaatkumaan Jesus samatanga.

Tumet Emmaus‑mun Ayuqelghiit

¹³ Tawani ataasimi aghneghmi, maalghuk maligsaaghtekek aghulaqegkak nengiighhaghmun aatgha Emmaus, Jerusalem‑emeng entaqun maaghraghvinlek miles‑ngulghii.

¹⁴ Akuzitkegkaak qamaglluku tamaana tawaten pilleq.

¹⁵ Akuzitkumaluku tamaana pilleq, Jesus‑em kaallukek igleghalghusiqakek.

¹⁶ Iwernga nallukegkaak kinangutanga qayughllak Kiyaghneghem liisuqesneghilkanga.

¹⁷ Jesus‑em aaptekakek, “Igleghutkelluku sangwaa akuzitkaqestegnegu?” Aghuliiqak, esghaqaalutek qivghungaghllagek.

¹⁸ Taagken aallghan, Cleopas‑meng atelgem aaptekaa, “Ellnginaaziin laalightaq Jerusalem‑emun nallukilghii tamaaken apeghiiqaneng akugwaaq?”

¹⁹ Aaptekakek, “Sangwaa saa?” Kiimsiqaak. “Jesus Nazareth‑eghmii akuzimghhutkaqaghpung. Uuknaliqistenguyaghtuq, qepghallghillu apeghtughillghillu aghtughyaghqaanghisaghtut Kiyaghneghmillu yugnillu.

²⁰ Chief priest‑emtallu igleghutistemtallu tuunegkaqaat Rome‑em governor‑nganun tuqutesqelluku, enkaam qaquuraghtestekaqaa.

²¹ Sighimaknguyaghaghput ellnganun itemunnaqniluku Israel. Taam saaghwakun, una aghneq pingayiitkaa taagken tawaten pilleghmeng.

²² Ilangita aghnamta saghiighayugsimiinkut. Aghtaghaghaqaallu lliveghlluteng

²³ aviilngaamakangat Jesus‑em yugusii. Tagiluteng aapghaat yaqulgegneng esghaghwaalleghteng, yaqulgek ungipaasimakangik aghnat unguvaamaniluku.

²⁴ Taagken ilaput lliveghlluteng aapghaat tawatengngwaaq aghnat apellghistun, iwernga esghallghitaat Jesus.”

²⁵ Taagken Jesus‑em pikakek, “Nallughhaghmeng yugegni! Piyaqnaghhaghmeng ugpeqinaqelleghtek uuknaliqistet akuzitkegkiitneng.

²⁶ Pikaagut Christ‑a ikfiqepestaaghluni tuqulleqniluku iteghvagilgami nighughqelleghminun.”

²⁷ Enkaam Jesus‑em piinliisiqluki igaquqiit Moses‑enkut, qamagllutengllu uuknaliqistet, liigikestekakek Akuzitneng Igaqegkaneng ellmineng ayuqelghiineng.

²⁸ Kaasaghtuqat Emmaus‑mun, Jesus nagneghsugnighqegkaq.

²⁹ Iwernga ighlekluku pikaak, “Whangkutegniten, whanikunaqaa mamleggnaqegkanga.” Enkaam elkegnitkaq.

³⁰ Tipelegni aqumelgusighlukek, neqekrangllaq tuguluku iqamsiqayugvikluku Kiyaghneq, ikutaqlukek tuunegkakek.

³¹ Taagken Kiyaghneghem liisuqestekaak Jesus‑ngutanga, esghaamanghegkenengllu aviitqaghtekaq.

³² Ellmetegneng pikak, “Qaamggunqun quyaghllagtukung aleghqughaqngamikung tumemi, liigikestaqngamikung Akuzitneng Igaqegkaneng!”

³³ Tawaninginaq yugek nekevlutek uteghniqak Jerusalem‑emun. Tawani qerngughutngaftut qula ataasiq siipneqluku maligsaaghtet, tamaakutlu ellngitnilnguut.

³⁴ Kaasayek taakut ungipaatkagket maligsaaghtek, “Ataneq unguvapestaaghumaaq tuqulleghmeng! Aliighvikumaallu Simon!”

³⁵ Taagken yugek aapqaak tumemellutek sangwaa sakaatanga, natenllu liisuqelleghtek Ataneq neqekrangllaq aavgughaqngagu.

Jesus‑em Aliighvikegkangi Maligsaaghteni

³⁶ Yugek ungipamsukumaluku tawaten pilleq, Jesus ellnga katam nekevghaftuq akulngitni, pikii, “Nekeggmelleq elpesinilli!”

³⁷ Upughluteng alingruuqat, sumeghmeggni esghaanniluteng taghneghameng pikat.

³⁸ Iwernga Jesus‑em aaptekii, “Sangafsi alingruughetsi? Sangan aygughitiqetsi?

³⁹ Esghaqaghtekiqun iigenkallu itegankallu, whanganguunga. Saaflunga liisimakelleqaghpesinga, qayughllak taghneghak kemekragituklu neghqwaaghituklu, esghaghaghpesinga whanga pilguunga.”

⁴⁰ Tawaten piluki Jesus‑em kelguvikegkii iigminengllu itegaminengllu.

⁴¹ Iwernga ugpeqngwaaghumangilkangat qayughllak quyaghllagulghiitlu saghiighayugllagulghiitlu. Enkaam aaptekii, “Whani sameng neghyaghqiitsii?”

⁴² Tuunegkaat gaaqameng iqallugmeng,

⁴³ tuguluku neghegkaa esghaamanghitni.

⁴⁴ Taagken Jesus‑em pikii, “Elpesinitngulunga whaten ungipaatkaqamsi: Sangwaat qamaglluteng whangamneng ayuqelghiit igaqegkat apeghiighyaghqaagut, Moses‑em Liilightuusaanilnguut, uuknaliqistet igaqegkiitngilnguut, psalms‑enilnguutlu.”

⁴⁵ Taagken umyugiit liigikestekii Akuzitneng Igaqegkaneng.

⁴⁶ Pikii, “Whaten igaqegkaaguq: ‘Christ‑a ikfiqepestaaghyaghqaaguq, taagken pingayaani aghneghem unguvapestaaghyaghqaaguq tuqulleghmeng.’

⁴⁷ Whatenllu igaqegkaalghii: ‘Maligsaaghtengi ungipaqillequt Aatghakun, piinlighluteng Jerusalem‑emeng taagken tamaghhaanun ramkenun. Ungipaasaghqaqiit avuteghqelluki seghleghqennaniisqelluki Kiyaghneghmun seghevutesqelluki.’

⁴⁸ Elpesi liisimakistenguusi ikfiqellemnun, tuqullemnun, unguvaghtestellemnun.

⁴⁹ Enkaam taawa kayaglleqagka Atama akequsakek elpesinun. Iwernga utaqiilghaasi maani Jerusalem‑emi, kenlanga aatesfikelleghpesinun aghtughyaghqaanghilleghmeng qilagmeng pamaken.”

Jesus‑em Qilagmun Mayullgha

⁵⁰ Taagken aghulaqutkii uyavantulangatun Bethany‑m, tawani iiggeni nengugulluki quyastekii.

⁵¹ Quyasimaluki unitkii, Kiyaghneghem qilagmun mayuutestekaa.

⁵² Tawani manigughluku uteghniqat Jerusalem‑emun quyallelighllagluteng,

⁵³ enkaam iiwleng Temple‑metaqelghiit Kiyaghneq usuqaqegkangat.