Luke 22 - New Testament-et Akuzipigestun

Tuqusukangat Jesus

¹ Kaasaghtuungulghii “Neqenghaghqelleghqaa Yeast‑aliimangilnguum Neqekrangllam”, atilqelghii Passover‑meng.

² Chief priest‑etlu, apeghtughikayugetlu Liilightuusaneng agghitkengngukangat naten tuqutelleghqameng Jesus. Iwernga agghitkelleteng liisimakesunghilkangit yugnun qayughllak alingelghiit seghleliighqiighllagnayukata.

Judas‑em Angeghqumakegkanga Jesus Uveghpagunnaluku

³ Taagken Tughneghaam iitqaa Judas Iscariot, ilatngalghii qula maalghuk siipneqluku malighsaaghtenun.

⁴ Enkaam aleghqughyaghtuqii chief priest‑etlu, umiilwaaghitlu Temple‑em kelengakistengita naten uveghpagunnaluku Jesus ellngitnun.

⁵ Tawaten pinaqellghaneng quyakat enkaam akeqegkaat manililleqniluku.

⁶ Judas‑em itagnaqluki uveghpagutilleghqangnaqutkegkaq Jesus‑meng, iwernga yugtuqami piyugumangilkanga.

Jesus‑em Malighsaaghtekek Yataaghqelghiik Passover‑mun

⁷ Aghneq kaatkaq Neqenghaghqelleghqaanun Yeast‑aliimangilnguum Neqekrangllam. Tawani aghneghmi tamaghhaghmeng nengllugutet tuqutiighaqelghiit penniighaghaghmeng Passover‑mun.

⁸ Enkaam Jesus‑em pikakek Peter‑enkuk John‑enkuk, “Yataaghqesaghtughtegnegu Passover‑em neqekaghqaa neghuunnaluta.”

⁹ Aaptekaak, “Nani yataaghqestesugsigu?”

¹⁰ Kiimsiqakek, “Nagataghtek! Iitquftek neghllagmun, yugem nallaghlleqiistek tugumiilguuq melghutagneng. Malignakesek mangteghamun iitqan,

¹¹ enkaam mangtegham yuga pinakesek, ‘Apeghtughistem aaptaaten, malighsaaghtekullghiini natungaawa neghvigkaghput Passover‑mun?’

¹² Taagken mayuulleqiistek qemtamun nunatuqameng nelek, neghuutelleghqamun atughqalwaalek. Tawani yataaghqilghaatek.”

¹³ Aglaghlutek piyalghiimek sangwaa qamaglluni Jesus‑em apellghatun ayuqegkaq, enkaam yataaghqegkaak Passover‑em neqekaghqaa.

Atanghem Neghestillgha

¹⁴ Neghvigkaq kaasan Jesus‑llu apostle‑etlu iggasighquutkat neghnaluteng.

¹⁵ Pikii, “Neghelgutkesupigtamsi Passover‑em neqnganeng sivutghulluku ikfiqelleghqaqa!

¹⁶ Ungipaatamsi, alla neghyaghqaqenghitaqa taana kenlanga Ataneghpagulleghmini Kiyaghneghem apeghiiqagu uspeqelleni Passover‑mun.”

¹⁷ Taagken tuguluku qayuusiq, iqamsiqayugvikluku Kiyaghneq, pikaq, “Tuguluku qayuusiq meghvikaataghteggu.

¹⁸ Ungipaatamsi, whaken kenlekluku meghnaanghitaqa wine‑a kenlanga Ataneghpagullgha Kiyaghneghem kaatellghanun.”

¹⁹ Taagken tuguluku neqekrangllaq, iqamsiqayugvikluku Kiyaghneq, aavgughluku tunquqii, whaten pimiita, “Una yugusiqaqa tuunegkegka elpesi apalluqlusi. Neghaqiteggu neqamikusiiluku whangamnun.”

²⁰ Neneghmeng taaqsameng tawateghpigaq tuunegkii qayuusimelngughmeng wine‑meng, whaten pimiita, “Una qayuusiq Kiyaghneghem nutaghaaguq akequsaa aamkun, kuuvelghii elpesi apalluqlusi.

²¹ “Iwernga nagatek! Uveghpagutisteka whaantuq, neghelgusighaqaanga!

²² Kiyaghneghem tawaten uspeqelqaa Ighneghan Yugem tuqulleghqaa. Iwernga seghleghwaaghunaqnguuq taana yuuk uveghpagutiyaghqaq ellnganeng!”

²³ Taagken malighsaaghtet aapqughaaghutkat ellmeggneng nalighteng tawaten piyaghqaatanga.

Aaghtiiraaghutelleq Angelleghpigaalleghmeng

²⁴ Taagken malighsaghtet aaghtiiraaghutkat nalighteng angelleghpigaayaghqaatanga.

²⁵ Jesus‑em pikii, “Gentile‑et umiilgita atanghutaqiit yuteng, igleghutistengitlu atightesugaqut ‘Kayutngit Yuget’ tawatenneghiteghngaaghmeng.

²⁶ Iwernga elpesi tawatesaghqaanghitusi. Itupill akulegpesini angelleghpigaat uyuqlighpigaastun lliighlit, enkaam igleghutista qepghaghtestun lliighli.

²⁷ Nalikek aangataghaghta, aqumgalghii tipelegni, nalighmeng kepsiiqulghii? Aqumgalghii aangataghaghtuq. Iwernga akulegpesini whanganguuq kepsiiqulghii elpesinun.

²⁸ “Elpesinguut whangamnitkat nanghiighsaghallemni.

²⁹ Tamaaken apalluqluku ataneghpagullelitamsi katam Atama tagivallghatun whangamnun.

³⁰ Enkaam Ataneghpagullemni neghellequsillu meghellequsillu tipelegemni. Aqumellequsillu umiilgusim aqumutiitgun nanqigsaghqaaluki qula maalghuk siipneqluku Israel‑em ramkengi.”

Jesus‑em Aapqanga Peter‑em Nallunqelleghqaa

³¹ Jesus‑em pikaa Peter, “Simon, Simon! Nagaten! Tughneghaq pilleghqangumaaq Kiyaghneghmeng nanghiiqunaluki ugpeqillesi. Aaftesugiisi whangamneng katam piitesighaghtem avullghatun mallat wheat‑neng.

³² Iwernga yughaatkumaamken Simon, ugpeqillghen pegtefqaan pisqelluku. Enkaam ugpeqenqigtekuvnga, iknaqughsaghyaghqaqaten maligsaaghtelgutegpek ugpeqillghit.”

³³ Peter‑em pikaa, “Ataneq, maligsaqleggiinaaghsimaamken anusimingllaghvigmun, tuqulgusighnalutenllu!”

³⁴ Jesus‑em pikaa, “Peter, ungipaatamken, unukun pingayuneng nallunqelleqaghpenga sivungani rooster‑em qalghilleghqaan.”

Jesus‑em Kelengasaaqangi Maligsaaghteni

³⁵ Taagken Jesus‑em aaptekii, “Kayagtaqngamsi manilghutangunasi, aqeftaghaangunasi, nalighmeng kaamngunasi sameng aklumatsi?” Kiimsiqaat, “Aklumangitukut.”

³⁶ Pikii, “Iwernga maaten, kina alngunak manilghutalgukumi, nalighmeng aqeftaghaalgukumi kelqelli. Kina alngunak savigpagiskumi qaasligni akiklukek pikengli.

³⁷ Ungipaatamsi, igaqngaaq Akuzitni Igaqegkani, ‘Ilalkiisimaat Liilightuusat naafqiistengitnun.’ Taana Akuzin Igaqegkaq whangamneng ayuquq, enkaam apeghiighyaghqaaghtuq.”

³⁸ Maligsaaghtet pikaat, “Ii‑i Ataneq! Whaa maalghuk savigpagek.” Jesus‑em pikii, “Tawatenginaghngam!”

Jesus Yughalghii Mount Olives‑mi

³⁹ Jesus‑enkut maligsaaghtekullghiit aanluteng Jerusalem‑emeng, piiqelleghmegestun aglaqat Mount Olives‑mun.

⁴⁰ Kaasameng takukameggnun pikii, “Yughaghtek aaghqutaqenghitesqellusi nanghiiqulleghmun.”

⁴¹ Uyghagem miluutellghan uyaatulngatun tazingavek aglaqaq unilluki maligsaaghteni. Enkaam segesqughlluni yughaqaq,

⁴² “Atamni, piyukellqegkuvgu awiitigu una qayuusiq whangamneng. Iwernga whanga piyukelqa avelghaghluku elpek piyukellghen apeghiighli.”

⁴³ Qilagmeng yaqulgem takuluku iknaqughsaqaa.

⁴⁴ Ikfiqeghllagem angtalanganeng taakunginaghhaagneng yughaqaq, qesightellghallu aawestun uqlughqaqaq nunamun.

⁴⁵ Yughaneghmeng taaqsami nekevluni malighsaaghteminun piyalghiimi qavaatnguftut, qayughllak qivghullghem paghyughqegkangi.

⁴⁶ Pikii, “Sangafsi qavaghaqetsi? Makellusi yughaghtek aaghqutaqenghitesqellusi nanghiiqulleghmun.”

Tugukangat Jesus

⁴⁷ Jesus akuzimaluku, Judas‑em maghyaghquqii yulghutet ellnganun. (Judas ilatngalghii qula maalghuk siipneqluku maligsaaghtenun.) Takukaa Jesus naaghnaluku.

⁴⁸ Taagken Jesus‑em aaptekaa, “Judas, naaghsiguu Ighnegha Yugem uveghpagunnaluku anguyaganun?”

⁴⁹ Maligsaaghtet Jesus‑melnguut liigikluku sangwaa sanaqutanga, aaptekaat, “Ataneq, pilluwaaltekii savigpamteggun?”

⁵⁰ Aga naliita savigpagmineng ilefkaghaghtekaa aghenqigneghan sigutnga qepghaghtelaaghan high priest‑em.

⁵¹ Iwernga Jesus‑em pikii, “Haamangam, tawatenꞌngam pitek!” Enkaam saafluku qepghaghtelaaghem sigutnga maamestekaa.

⁵² Taagken Jesus‑em aaptekii chief priest‑et, umiilwaaghi Temple‑em kelengakistengita, siivanlleghetlu aqfaaghilghiit ellmineng, “Tuguyaghtuungustengngaa savigpagtuumaghpesi, anagutaghtuumaghpesi nikimqun wayaghniightengulunga?

⁵³ Aghhutanga tamaghhaan elpesinitaqngama Temple‑mi, tugunaqutkumangitaghpesinga. Iwernga una aflukaghsi, qayughllak aghtughyaghqaanghillgha mamlegem igleghutinguuq.”

Peter‑em Nallunqegkanga Jesus

⁵⁴ Taagken Jesus tuguluku aghulaqutkaat, aglaatkaat high priest‑em mangteghaanun. Uyavaqaanlluni Peter‑em maligtekaa.

⁵⁵ Courtyard‑em qukaani, kumaaqiyameng qerngaghmeng aqumuutkat. Peter‑llu akulngitgun aqumegkaq.

⁵⁶ Taagken aghnaghaam qepghaghtem esghaghyamigu aqumgalghii kenghegni, esghapagtughluku pikaq, “Unallu yuuk ellnganitkayuguuq!”

⁵⁷ Iwernga Peter mesighaqaq, “Aghnami whani, nallukaqa kingangutanga!”

⁵⁸ Mulugpenani yugem esghaghluku pikaa, “Elpeklu naliqaaten maligsaaghtengan!” Iwernga Peter‑em pikaa, “Yugmi whani, maligsaaghtekenghitaanga!”

⁵⁹ Taagken entaqun ataasiq aflu naghughtaquqlu ilangan yugem sagiqutkaa, “Ipapestaaq una yuuk ellnganitkaaguq, qayughllak Galilee‑ghmiinguuq!”

⁶⁰ Iwernga Peter‑em pikaa, “Yugmi whani, sameng piiquten nallukaqa!” Tawaninginaq tawaten akuzimaluku, rooster‑a qalghiqaq.

⁶¹ Atanghem qiivluku esghaqaa Peter iyegkenkun. Taagken Peter‑em neqanguqii Atanghem akuzitangi, pikaqegkanga, “Unukun rooster‑a qalghightestegpenaan pingayuneng nallunqelleqaghpenga.”

⁶² Enkaam Peter aanluni qiyaaghwaghllakaq.

Jesus Legasiighwaatkegkaatlu Qevuutiiqaatlu

⁶³ Yuget kelengakilghiit Jesus‑meng legasiighwaatkegkaatlu qevuutiiqaatlu.

⁶⁴ Qiipaghaghmeng iiskek saaplukek tengluwaataatkaat. Taagken pikaat, “Uuknaliqistenguuten. Ungipaatikut kitum tenglugtaten?”

⁶⁵ Seghlequughtaakaatlu.

Jesus Agghistenun Aglaaskangat

⁶⁶ Aghsagu, Jews‑et siivanlleghit, chief priest‑et, apeghtughikayugetlu Liilightuusaneng qerngughulluteng, Jesus tagitestekaat.

⁶⁷ Pikaat, “Christ‑angukuvek ungipaatikut.” Iwernga pikii, “Ungipaaskumsi, ugpeqnaanghitaghpesinga.

⁶⁸ Aaptekumsillu kiimsighnaanghitaghpesinga.

⁶⁹ Iwernga qantaghaqun Ighnegha Yugem aqumellequq aghenqigneghakun Aghtughyaghqaanghiteghllagem Kiyaghneghem.”

⁷⁰ Qamaglluteng aaptekaat. “Awii, Kiyaghneghem Ighneqaten?” Kiimsiqii, “Elpesi taananguniighpesinga.”

⁷¹ Taagken pikat, “Taawa liisimakistesughniighutiinkut! Ellnganeng katam nagaqughaghput Kiyaghneghmun Ighneqniluni piiq.”