Luke 21 - New Testament-et Akuzipigestun

Ugingigham Tunusaa

¹ Jesus Temple‑mesimaluni, esghapakii aklungilnguut tunusameggneng manilghutagnun kanaghtilghiit.

² Taagken esghapakaa aklumalghii ugingighaq manilghutagnun kanaghtilghii maalghugegneng coin‑ngiighhaagneng.

³ Jesus‑em pikii, “Ipa ungipaatamsi, una aklumalghii ugingighaq kanaghtinguuq uglaghataghaghluku tamaakuneng aklungilngughneng.

⁴ Tamaakut tunquugut aklungighllagmeggneng, iwernga ugingigham aklumaghllagmini qamaglluku tuunaa kiyaghusighqaqsaqeni.”

Naafqelleghqaa Temple‑em

⁵ Ilangita maligsaaghtengan akuzitkegkaat Temple‑a. Pinighyagutkiit pinighnaghllaget uyghaget, tunusatlu tuunegkat Kiyaghneghmun pinighnaghsaasiqegkiit Temple‑mun. Iwernga Jesus‑em pikii,

⁶ “Tamaakut esghaghteghasi, pilleghqaq kaasaghqaaguq talwa ataasiq uyghak tawanlenguq nemininnanghituq, qamaglluteng ulleghqughyaghqaagut.”

Seghleliillghetlu Amyuqetaatkellghetlu

⁷ Ilangita maligsaaghtengan aaptekaat, “Apeghtughista, qakun tamaakut piyaghqaawat? Sangulleqa liisimakusighqaghput tamaakut piyaghqaaghtekata?”

⁸ Kiimsiqii, “Kelengatek, puughtestegpenasi, qayughllak uglaq taginaqnguuq aatqa atuqluku whaten pimaghmeng, ‘Whanga Christ‑anguunga!’ piiqellequtlu, ‘Pilleghqaq kaatuq!’ Iwernga maligsaqunaki.

⁹ Kakavegpenasi nagaququfsiki nunat pillugutnguniluki, nunalgutkullghiitlu pillugutnguniluki. Sivukluni tamaana piyaghqapestaaghuuq, iwernga tawaninginaq iqugtelleq pinaanghituq.”

¹⁰ Taagken pikii, “Nunat pillugullequt, ataneghpagullghetlu pillugutullequt.

¹¹ Nani alngunak nunat uvelegtaghllagllequt, neqangisagllagllequt, allegvikikayugetlu aqnighneghet pillequt. Yuget esghaghlleqiit sangwaat qilagami, kakavaataghnalghiit, allaaghlluwhaghyugnalghiitlu.

¹² Iwernga qamaglluki tamaakut pistegpenaki, tugulusi amyuqetaatkelleqiisi. Synagogue‑nun aglaallusi nanqiglleqiisi enkaam anusimingllaghlleqiisi. Aglaalleqiisi umiilegnunllu governor‑nunllu nanqigtesqellusi whanga apalluqlunga.

¹³ Taana pilleghqaqaghsi ungipaqesqellunga whanga.

¹⁴ Enkaangam sumeghtaghaatkekestaghpenaan sameng pilleghqaghsi.

¹⁵ Whanga akuzitkaghqalilleqamsi, peghqinellelilleqamsillu repall anguyagpesi kipullginaaghpagningitiit akuzillesi nalighmeng temnginguninaanghitiit.

¹⁶ Talwa angayuqaghpesi, anglegutegpesi, ilakwaaghpesi, ilakumtaaghpesi uveghpagulleqiisi igleghutistenun, enkaam ilasi tuqulleqiit.

¹⁷ Whanga apalluqlunga tamaghhaghmi yugem ugumikeraaghlleqiisi.

¹⁸ Iwernga naasqughpesineng ataasiq nuyaq iflanaanghituq.

¹⁹ Ugpeqillesi ayepsugitestekufsiki allgeghlleqaghsi unguvalleghsi.

Jesus‑em Akuzitkegkanga Jerusalem‑em Naafqelleghqaa

²⁰ “Tawani esghaqufsigu Jerusalem kangllukangat pilluwaghtet, taawa liisimakelleqaghsi qantaghaqun naafqelleghqaa.

²¹ Taagken Judea‑melnguut anagniighhaat naayghanun, Jerusalem‑emelnguutlu aghulaqelghaat, eslataanilnguutlu itefqaameng pilghaat.

²² Qayughllak tamaakuni aghneghni Kiyaghneghem aghyuughlleqii Jews‑et. Enkaam uuknaliqistet igaquqiit taakuneng aghneghneng qamaglluteng apeghiighllequt.

²³ Seghleghwaaghunaqnguut qumilgetlu mamaghtalgetlu anagniighnaqutkelleghqiit. Seghleliighllagem kaannaqngwaa Israel‑em nunanga qayughllak Kiyaghneghem aghyuughnaqngwii yugi.

²⁴ Ilangi tuqulleqiit savigpagkun, ilangi tuguluki aghulaqulleqiit tamanganun nunanun. Enkaam Gentile‑et kayaalqelleqaatlu igleghulleqaatlu Jerusalem, kenlanga pilleghqaat kenletghuutellghanun.

Tagilleghqaa Ighneghan Yugem

²⁵ “Taakwaningani sangwaat alingruughnalghiit pillequt siqineghqun, tanqikun, ighaleqetaaghteggun. Nunami, nunataghhaani tamaghhaani yuget alingruughllagllequtlu kukragyugllequtlu sangami kellii qallaghtelleghllaganengllu qagingughtelleghllaganengllu.

²⁶ Yuget esghaqumegteki aghtughyaghqaanghillghet qilagami qapraghqesleghhiit igleghneghmeggneng, teggellghiighutkeghllaglleqaat saaqutanga nuna. Enkaam alingruughem tuquraagllequt.

²⁷ Taagken esghaghlleqaat Ighnegha Yugem tagilghii qilagwaaghqun aghtughyaghqaanghillelighlunillu nighughqellelighllaglunillu.

²⁸ Tamaana tawaten pikestaqan, nekevlusi sivuglleghhaasi, qayughllak yugulillengyaghtungestaghtusi.”

Uqfiga Figs‑em Liitusighqaq

²⁹ Taagken Jesus‑em ungipaghaatkii, “Esghaqaghteggu figs‑em uqfiga, qamagllukillu uqfilghutet.

³⁰ Esghaneghpesiki ququngangekestanghata, liisimakaqaghsi kiigyaghtulghii.

³¹ Tawateghpigaq qamagtengngwaaghluki aapqanka esghaqufsiki, liisimakelleqaghsi Ataneghpagullgha Kiyaghneghem kaasaghtungestalghii.

³² Ipa ungipaatamsi, maaten unguvalghiit tuqulaghaatestegpenaki qamaglluteng tamaakut piyaghqaagut.

³³ Qilagenkuk, nunankuk aviighusaghqaaguk, iwernga whanga akuzitenka aviighunnaanghitut.

Kelengalleghqaq

³⁴ “Kelengalusi, aghsaghpaagtegpenasi neqenghaghqemmeng, meghuutelleghmeng, nalighmeng sumeghyaligpenasi nunam pinganeng. Tawaten pikufsi taam aghneghem kaatqaghnayukangisi naapleghhiistun.

³⁵ Taana Aghneq kaasaghqaaguq iingunaghhaanun yugnun nunamelngughnun.

³⁶ Enkaam kelengatek quunpeng! Yughaghtek anagyaqlegesqelluki tamaakut qamaglluki pikata, nekevyaqlegesqellusi sivungakun Ighneghan Yugem.”

³⁷ Aghhutanga tamaghhaan Jesus apeghtughiiqelghii Temple‑mi, iwernga aaneghmini unugmi Mount Olives‑metaqelghii.

³⁸ Unaanguluku yuget qamaglluteng aglaghtuutaqelghiit Temple‑mun nagannaluku.