Luke 20 - New Testament-et Akuzipigestun

Ighleghutistet Aapqughaaqangat Jesus

¹ Aataasimi aghneghmi, Temple‑mi, Jesus apeghtughimaluku yugnun, ungipaqimalukullu Pinilghiineng Ungipaneng, chief priest‑etlu, apeghtughikayugetlu Liilightuusaneng, siivanllequlluteng takukaat.

² Pikaat, “Ungipaatikut kitum qeleghtaten tawaten pisqelluten, nalighmeng kitum qelellghakun tawaten pinguzin?”

³ Kiimsiqii, “Whangallu aaptaghllamsi. Ungipaataghtengnga,

⁴ John‑em paaptaayeghillgha Kiyaghneghmeng pingwaa, nalighmeng yugneng?”

⁵ Ellmeggneng akuzimghutkelluku, pikat, “Sameng pinaqesta? Kiimsiqumteggu Kiyaghneghmeng pinguniluku, whaten pilleqiinkut, ‘Sanganmi ugpeqenghitesteggu John?’

⁶ Iwernga, ‘Yugneng pingunikumteggu’, qamaglluteng yuget milughpagaataghlleqiinkut, qayughllak ugpeqngukangat John uuknaliqistenguniluku.”

⁷ Enkaam kiimsiqaat nallukniluku naken pingutanga.

⁸ Jesus‑em pikii, “Whangallu ungipaannaanghitamsi kitumeng qelellengegkaatka tamaavek pikamnun.”

Jesus‑em Ungipaghaatkegkangi Seghleghet Aflengakistengi Piitesighaghvigem

⁹ Taagken Jesus‑em yuget ungipaghaatkii, “Yuuk piitesighaghvigmini grapes‑meng piitesighaamalghii. Navghilluku aflengakistenun taagken ilanganun nunam aghulaqluni muluughllakaq.

¹⁰ Grapes‑et saghnayaghqaaghsata, qepghaghta kevgaqegkaa aflengakistenun nengini aqfasqelluki. Iwernga aflengakistet qevuutiighluku aghulaqestekaat avangunaan.

¹¹ Ilanga qepghaghta kevgaqegkaa, ellngallu qevutiighluku, kayngusaakluku aghulaqestekaat avangunaan.

¹² Enkaam pingayiitangat qepghaghta kevgaqegkaa, taana kiitiquluku eslatmun miluutkaat.

¹³ Taagken grapes‑em piitesighaghvigan yuga pikaq, ‘Sanaqsinga? Kevaqnaqaqa whanga katam piniqegkaqa ighneqa, luuraq siivaknayukatgu.’

¹⁴ Iwernga aflengakistet esghaghyamegteggu pikat, ‘Una pagitiyaghqaaguq whaken piitesighaghvigmeng, tuqutelteggu enkaam piitesighaghvik whangkuta piliilleqaghput.’

¹⁵ Aanesluku piitesighaghvigmeng tuqutkaat.” Taagken Jesus‑em aaptekii, “Piitesighaghvilgem salleqakingam taakut aflengakistet?

¹⁶ Tagiluni tuququghlleqii, enkaam piitesighaghvini tuunelleqaa ilangitnun.” Nagasamegteggu tawaten pilghii, pikaat, “Kiyaghneghem tawatelluku apeghiightesneghilligu!”

¹⁷ Iwernga esghaamakngwaaghluki aaptekii, “Una Akuzin Igaqegkaq sameng pisiiwa? ‘Uyghak mangteghangllaghtet ighsakegkaat, megnunalleghpigaaghtekaaguq uyghak.’

¹⁸ Tamaghhaghmi iqulghii taaggun uyghagkun kagimyaghqaaguq. Iwernga uyghagem ulleghvikegkumigu kina kagimqelleqaa pagulanguluku.”

Aapqughalleq Tax‑meng

¹⁹ Apeghtughikayugetlu Liilightuusaneng, chief priest‑etlu liigikegkat Jesus‑mun ellmeng akuzitkengnguniluteng ungipaghaatmikun. Enkaam tawaninginaq tuguyukaat iwernga alikegkiit yuget seghleliighqiinayukata.

²⁰ Enkaam iiskughtengngwaaqaat Jesus qayughllak tuunyukangat Rome‑em governor‑nganun, ellnganun nanqigtesqelluku. Tamaaken apalluqluku kayagtekiit riirngistet nagatesqelluku Jesus. Ipapighqesighwaaghluki anaggutesnaqutkesqelluku Jesus akuzillghakun.

²¹ Taakut riirngistet pikaat, “Apeghtughista, whangkuta liisimakamken akuzilleghtenllu apeghtughilleghtenllu ipanguut. Atunengwaaq pikayuguuten yugnun, apeghtughaqatenllu ipalleghmeng Kiyaghneghem piyukellghaneng ayuqelghiimeng.

²² Ungipaataghtikut, Kiyaghneghem Liilightuusaani elqughutngaa llivikilleghqaghput tax‑meng Caesar‑mun? Llivikiltaa‑a nalighmeng pinghitelta?”

²³ Iwernga Jesus‑em liisimakegkangi peghqiniqellghit enkaam pikii,

²⁴ “Kelguvikitengnga coin‑meng. Kitum gginaallu, aatghallu coin‑meta?” Kiimsiqaat, “Caesar‑em.”

²⁵ Pikii, “Tuuniteki Caesar‑mun tamaakut Caesar‑em pingi, enkaam tuuniteki Kiyaghneghmun tamaakut Kiyaghneghem pingi.”

²⁶ Enkaam riirngistet Jesus akuzillghakun anaggutestepagningitkaat yuget sivungitni. Saghiighayagulluki kiimsiitangi, qallegnaniqat.

Aapqughaalleq Tuqukat Unguvaghtellghitneng

²⁷ Taagken ilangi Sadducees‑et tagikat Jesus‑mun. Ellngita ugpeqngukangit tuqukat unguvaghyaghqaanghinniluki.

²⁸ Pikaat, “Apeghtughista, Liilightuusamnni Moses‑em igaqegkaqaa whaten, yugem anglegutanga nulightughluni tuqumakan avaqutigpenani, anglegutangan tuguyaghqaqaa nulighqesaqanga avaqutinnaluku anglegutni tuqukaq.

²⁹ Taawanguq maaghraghvinlek yuget anglegutkullghiit. Nuyekliq nulightughluni tuqukaq avaqutigpenani.

³⁰ Tuunglighhaan tuguluku ugingighaq, ellngallu tuqukaq.

³¹ Pingagayiitangitallu tuguluku, ellngallu tuqukaq. Qenwat qamaglluteng maaghraghvinlegyaget anglegutkullghiit tuqulaghaatkat avaqutigpenateng.

³² Kinguliiluni aghnaq tuqukaq.

³³ Qamagllutengqun maaghraghvinlegyaget nulighhuluku tugukaqegkangat. Enkaangam kitum nulighqelleqagu aghnaq tuqukat unguvaghtuuskata?”

³⁴ Jesus‑em pikii, “Kiyaghtaalleghmi maaten yuget nulightughaqut, aghnat aangꞌghutaqiit.

³⁵ Iwernga tamaakut Kiyaghneghem itagnaqegkii tuqulleghmeng unguvaghtuusaghqaagut, kiyaghllequtlu nutaghami nunami, tugutunnaanghitut.

³⁶ Tawani unguvalleghmi yaqulgestun ayuqsaghqaagut tuqunaanghitut. Avaqutaqii Kiyaghneghem, qayughllak tuqulleghmeng unguvaghtekaagut.

³⁷ Whateghlluwaaq Moses‑em ipapighqegkaqii tuqukat unguvaghsaghqaaniluki. Igatgun igaqaqngamigu uqfillegaq kumaghughngalghii whaten pikaaguq, Ataneq ‘Kiyaghneqaa Abraham‑em, Kiyaghneqaa Isaac‑em, Kiyaghneqaa Jacob‑em.’

³⁸ Ellnga Kiyaghneqaat unguvalghiit, qayughllak ellngani qamaglluteng paninang unguvalghiinguut. Ellnga Kiyaghneqenghitaat tuqukat.”

³⁹ Ilangita apeghtughikayuget Liilightuusaneng pikaat, “Apeghtughista, kiimsighlaataqwaaten.”

⁴⁰ Taagken tetugyagutkaat aapqughaaneghmeng.

Aapqughaalleq Christ‑ameng

⁴¹ Taagken Jesus‑em aaptekii, “Sanganmi yuget Christ‑a ighneqniiqatgu David‑mun?

⁴² Igaani Psalms‑em David pikaalghii, ‘Atanghem Kiyaghneghem pikaqaa Atanqa, Aqumi aghenqignemkun,

⁴³ kenlanga anguyagten asingiitellemnun itegaghpek.’

⁴⁴ David‑em tuqluqaa ‘Ataneghmeng’ enkaam natenmi ighneqelleqagu?”

Jesus‑em Kelengasaaghuskangi Apeghtughikayuget Liilightuusaneng

⁴⁵ Yuget ellminun nagatusimaluki, Jesus‑em maligsaaghteni pikii,

⁴⁶ “Kelengalusi apeghtughikayugneng Liilightuusaneng. Igleghsuneghtuut aalluteng akughtuqameng atkuyaaghmeng, akilpegaghvignillu quyakesugaqut aangwaaghughtekaaluteng. Synagogue‑nillu neqenghaghqelghiinillu aqumyuneghtuut aangwaaghughtekat aqumutiitgun.

⁴⁷ Esghaghlaataquluki ugingighat mangteghiighaqiit. Taagken pinighniluteng pisqelluteng taakluku yughaghaqut. Tamaaken apalluqluku aghyuullengeghllagyaghqaagut!”