Luke 2 - New Testament-et Akuzipigestun

Allgellgha Jesus‑em

¹ Kingunganeng John‑em allgellghan, tamaani pilleghni Rome‑em Umiilegpigaan Augustus‑em, qelqaa yuuk qamagtengngwaaghluku, aatghit igaqestesaghtiisqelluki igalghutmikun. Tawaten pistekii kesnaluki yuget uglaghtalangit igleghutkaminilnguut nunani.

² Taana sivulighpigaalghii yugmeng kestilleq, Quirinius governor‑kengnguluku Syria‑m.

³ Qamagtengngwaaghluteng yuget ellmeng katam allgeghvigmeggnun aglaghtuutkat ateteng igaqesqelluki.

⁴ Nazareth‑meng, Galilee‑melngughmeng, Joseph‑llu aghulaqegkaq Bethlehem‑emun, Judea‑melngughmun, umiilgem David‑em allgeghviganun. Tamaavek pikaalghii qayughllak kingunqegkanga David‑em.

⁵ Joseph‑em ateni igaqestesaghtuqaa, nuliighqani Mary kelqelluku, aqsaliighlluni ayuqelghii.

⁶ Tamaansimalukek ighniyaghqaaghtekaq.

⁷ Aantekaa ighneqsuwhaani, enkaam qiipaghaghqun yuungiilluku, aghsukaa neghqusitagnekun, qayughllak nekaghqiilnguuk aqelqalghutami.

Penniighniightetlu Yaqulgetlu

⁸ Unugmi tawani, nunivagmi penniighniightet aflengakingulghiit penniighmeggneng.

⁹ Atanghem yaqulgan aliighvikegkii, nighughqellghanllu Atanghem kukegtekii, enkaam alingruughuteghllakat.

¹⁰ Yaqulgem pikii, “Alingegpenasi nagataghtek, pinilghiimeng ungipameng tagitaqamsi quyanapiglleghhiimeng yugnun tamaghhaanun.

¹¹ Aghneghmi whani elpesinun allgeghaquq Yugulighista, neghllagani David‑em, Christ‑anguuq Ataneq.

¹² Whaten liisimakelleqaghsi; esghaghlleqaghsi taghnughhaq qiipaghaghqun yuungiilluni, aghsugngaaq neghqusitagnekun.”

¹³ Nuuskagan ilatqaghtaatkat yaqulegmun qilagem pilluwaghtelghuteghllagi yaqulelghutet, usuqegkaat Kiyaghneq, pikat,

¹⁴ “Usuqnaghhalek Kiyaghneghmun, qilagem uusqalleghpigaanilngughmun, nekeggmellelgulitlu nunamelnguut efquqegkii!”

¹⁵ Yaqulget mayughtuusata qilagmun, penniighniightet ellmeggneng pikat, “Bethlehem‑emun esghaghyaghtuulteggu taghnughhaq allgelghii, Atanghem liisimakestekanga whangkunnun.”

¹⁶ Enkaam aglaragkiighluteng esghaqiit Mary‑nkut, Joseph‑enkut, taghnughhaqlu aghsugngalghii neghqusitagni.

¹⁷ Penniighniightet esghaghyamegteggu taghnughhaq, tamanganun aapqaat tamaana yaqulgem apellgha ellmeggnun.

¹⁸ Penniighniightet ungipaqellghitneng nagaquullghiit qamaglluteng allaaghlluwhaghyukat.

¹⁹ Iwernga Mary‑m qaalkaghpenani ilumikegkii tamaakut pillghet, awen sumeghtaghaatkaqegkangi.

²⁰ Penniighniightet uteghniqat usuqumaan, quulvamaan Kiyaghneq, qayughllak nagaquqaatlu esghaqaatlu yaqulgem apellghatun ayuqegkaq.

Jesus Atiitkangat

²¹ Pingayuneng inglulek aghneq atughluku, taghnughhaq circumcise‑eyan atiqaat, Jesus‑meng. Yaqulgem tuunegkaa ateq Mary‑mun salin qumingellghilluku.

Mary‑nkuk Joseph‑enkuk Aglaaskangak Jesus Temple‑mun

²² Moses‑em Liilightuusaan qelellghatun pelungighsalleghqaak kaatkaq. Enkaam Jerusalem‑emun aglaatkaak taghnughhaq Ataneghmun tuunaluku.

²³ Liilightuusaani Atanghem igaqngaaq, “Tamaghhaghmi aghnam ighneqsuwhaagha aafsaghqaaguq Ataneghmun.”

²⁴ Atanghem Liilightuusaan qelghutellghatun aghqutkesaghqaalghiik maalghuk dove‑ek, nalighmeng maalghuk pigeon‑aaghaak.

²⁵ Jerusalem‑emeteftuq yuuk, aatgha Simeon. Qaatkutngalghiillu maniguutkayuklu Kiyaghneghmun. Utaqiingulghii Kiyaghneghmun yugulisqelluki Israel‑eghmiit. Agleghnalghiik Taghneghak ellnganilnguuk.

²⁶ Agleghnalghiim Taghnegham akeqegkaa tuqunaanghinniluku kenlanga esghalleghqaanun Messiah Atanghem akequsaqegkaa.

²⁷ Taghnegham maghyaghqullghakun iteghyaghtuqaq Temple‑mun. Liilightuusat pisqellghistun angayuqagkenka taghnughhaq Jesus itghutkaak Temple‑mun.

²⁸ Simeon‑em tuguluku taghnughhaq iqamsiqayugvikegkaa Kiyaghneq, pikaq,

^29-30 “Ataneq, yeqay maaten qepghaghten aghulaqestigu nekeggmelluku, qayughllak akeqelleghpetun, whanga katam iyegemneng esghaghaqa kayagtekan Yugulighistenguluku.

³¹ Yataaghqegkaqan yugnun tamaghhaanun esghiisqelluku.

³² Nighuguuq Gentile‑enun liigikestilghii Kiyaghneghmeng, ellnga apalluqluku yugten Israel‑eghmiit quulvallengeghllagllequt.”

³³ Taagken taghnughhaam atanganllu naanganllu saghiighayagutkaak tawaten akuzitkesagu.

³⁴ Simeon‑em Kiyaghneghmun tungsiitkakek quyastesqellukek. Enkaam naanga Mary pikaa, “Nagataghtinga, una taghnughhaq Kiyaghneghem nakmikegkaqaa. Ilangi Israel‑eghmiilghutet nanqiglleqii aghyuughyaghqaaluki, ilangi yuguliyaghqaaluki. Kiyaghneghem kayagtengngwaa ellminun ungipaghtenguluku, iwernga yulghutet ighsakelleqaat,

³⁵ enkaam tawaten pilleghmegteggun liitesleqiit aksaqngalghiit sumeghtaghalleteng. Enkaam elpek Mary, qivghum kagimlleqaak unguvasigken, katam tawaten savigpagem kaapellghatun.”

³⁶ Taawallunguq uuknaliqista aghnaq, aatgha Anna, Phanuel‑em paniga, Asher‑em ramkenganeng pi. Aghnalqwaaghuftuq, ugilgukaaftuq maaghragvinlek ayumiqulleq.

³⁷ Taagken ugingiitelleghmineng 84‑ngughtekangi ayumiqullghet. Awen tagiiqelghii Temple‑mun, aghneghuyaghngaan, unuguyaghngaan Kiyaghneq manigughaqegkanga, fast‑aaqlunillu yughaghaqlunillu.

³⁸ Tawani ataasimi aflumi, Anna‑m takuluki Kiyaghneq iqamsiqayugvikegkaa. Taghnughhaq akuzitkegkaa tamaghhiitnun utaqiilghiinun Messiah‑meng, ellnganun itemutesqelluku Jerusalem.

Uteghnilleq Nazareth‑mun

³⁹ Joseph‑enkuk Mary‑nkuk qamaglluki apeghiighyamegneki Atanghem Liilightuusiita pisqellghit, uteghniqak Nazareth‑mun, Galilee‑melngughmun.

⁴⁰ Taghnughhaq anglikaq, iknaqughtekaqlu, imighngaghmi peghqinelleghmeng; Kiyaghneghem kayusiqaallu quyastekaallu.

Mekelghiiq Jesus Temple‑mi

⁴¹ Ayumiqulleq tamaghhaan angayuqakek Jerusalem‑etaqelghiit, neqenghaghqellghanun Passover‑em.

⁴² Jesus‑em uksughtulanga qula maalghugughsan, piiqelleghmegetun neqenghaghqelleghmun pikak kelqelluku Jesus.

⁴³ Neqenghaghqelleq apeghiighyan uteghniqak, iwernga mekelghiiq Jesus unegtekaq Jerusalem‑emi. Angayuqagkenka nallukegkangak.

⁴⁴ Sumeghmegni igleghalgutegmegninniluku aghnelqusiq igleghtekak. Taagken ivaqaak ilakwaaghmegnillu ilakumtaaghmegnillu.

⁴⁵ Naalkenghisamegnegu Jerusalem‑emun ivaghyaghtuqaak.

⁴⁶ Pingayut aghneghet atughluki naalkegkaak uvitanganilluku Temple‑em, aqumluni apeghtughistet akulngitni, nagataqeftiillu aapqughaaghaqeftiillu.

⁴⁷ Qamaglluteng nagatullghiit ellnganeng saghiighayagutkaat liigikingallghanengllu kiimsightughillghanengllu.

⁴⁸ Angayuqagkenka esghaghluku saghiighayagutkaak. Naangan pikaa, “Ighnemni, esghaqaghqung, sangan whaten aneghsikung? Atagpeklu whangallu elngaatall ivanghiighutamken, repall pengꞌgiilluten.”

⁴⁹ Kiimsiqakek, “Sangan ivaghestegnenga? Nallukestegneguu Atama mangteghaanisaghqapestaaghulghiinga?”

⁵⁰ Iwernga liigikumangilkangak sameng tawaten pingutanga.

⁵¹ Taagken maligllukek uteghniqaq Nazareth‑mun, qaatkutngakaalghiillu elkegkenun. Naangan tamaana qamaglluku umyugaghmikegkaa.

⁵² Jesus anglitkelluku peghqinghughtekaq, efqughnaghtengnginaqaq Kiyaghneghmillu yugnillu.