Luke 19 - New Testament-et Akuzipigestun

Jesus‑enkuk Zacchaeus‑enkuk

¹ Jesus kaalluni Jericho‑mun akulngakun igleghtekaa.

² Taawanguq umiilgat tax‑meng qerngughtistet, aatgha Zacchaeus, aklungilnguq.

³ Esghaghyukaa naliitanga Jesus, iwernga amsakaghtaghhaatmineng esghaamangilkanga qayughllak yugtupiglleghhii.

⁴ Enkaam aqfaatkaq sivutghulluki yulghutet, taagken mayuqaa sycamore‑a uqfik esghaghnaluku Jesus qayughllak taakwagun naghughhnaqelghii.

⁵ Jesus kaalluni uqfigmun, sivugfikluku pikaa, “Zacchaeus, egmiinaq ukigi qayughllak aghneghmi whani elpesinitepestaaghnaqnguunga.”

⁶ Ukigaghlluni, ellmeggnun Jesus aglaalluku quyakepiglluku upughatkaa.

⁷ Yulghutet esghapagluku qamaglluteng akuzimleghaatkegkaat, “Seghleghqestemun aga aqelqaayaghtughtuq!”

⁸ Iwernga Zacchaeus‑em nekevluni Ataneq pikaa, “Ataneq, aveglluku aklungika tuunaqaqa aklumalghiinun. Enkaam puughsimakumkun kina estamaghqelluku veghulleqaqa.”

⁹ Jesus‑em pikaa, “Aghneghmi whani, uum yugem ugpeqegkaqutmineng Kiyaghneq, ellnga kingunqaaghtepiigaa Abraham‑em. Enkaam Kiyaghneghem yugulii mangteghami whani kiyaghlleghhiit.

¹⁰ Ighnegha Yugem tagikaaguq ivaghinaluni iflakaneng yugulinaluki.”

Jesus‑em Ungipaghaatkegkangi Gold‑et Coin‑et

¹¹ Yuget nagatngukangat Jesus. Sumeghmeggni kaaskumi Jerusalem‑emun Ataneghpagullgha Kiyaghneghem piinlighaghhnaqniluku pikaat. Enkaam liigikesqelluki Jesus‑em ungipaghaatkii.

¹² Pikii, “Aangwaaq yuuk aghulaqumalghii uyavanun nunamun umiilgughhnaluni, apeghiiqumi uteghnighyaghqaaluni.

¹³ Aghulaqfagilgami tagsighteghluki qula qepghaghteni tunquqii gold‑meng coin‑meng. Pikii, ‘Kenlanga uteghnillemnun tukfighisiqitekillu akilpegaasiqitekillu nulastesqelluku manika.’

¹⁴ Iwernga nunalgutangita ugumikegkangat, enkaam aghulaqsan kayagtekiit yuget umiilegpigaghmun whaten pisqelluku, ‘Taana yuuk umiilkesunghitaghput.’

¹⁵ “Iwernga Umiilegpigaam aangwaaq yuuk umiilgughtestekaa. Uteghnighluni nunaminun tagsiqliqii qepghaghtet manilitkani liigiknaluki naten angkaan allgeghusimatangi.

¹⁶ “Sivuliim tagiluni pikaa, ‘Ataneq, taagken tagivaqaghpeneng allgeghsimaanka qulaghyaget gold‑et coin‑et.’

¹⁷ Umiilgem pikaa, ‘Seghleghhalek, pinilghiinguuten qepghaghta! Ataasiighmetutegpeneng sasqughhaghmun, igleghutistengllaghnaqamken qulaghyagnun neghllagnun.’

¹⁸ Tuunglighhaan qepghaghtem tagiluni pikaa, ‘Ataneq, taagken tagivaqaghpeneng allgeghsimaanka tallimagyaget gold‑et coin‑et.’

¹⁹ Umiilgem pikaa, ‘Elpek igleghunnaqaten tallimat neghllaget.’

²⁰ Taagken pingayaat qepghaghtet tagiluni pikaa, ‘Ataneq, ang, gold‑a coin‑en, kakegllugiitakun iimgulluku iiqaqaqa.

²¹ Alikamken aaghsaghqaanghitutegpeneng. Tugutkayuguuten elpek pikenghilkegpeneng, saghnakayuguutenllu piitesighaqaqenghilkegpeneng.’

²² Umiilgem pikaa, ‘Uyuq, seghleq qepghaghta. Akuziteten elpenun nanqigtusiqnaqanka. Liisimakaghpenga aaghsaghqaanghilnguugunga. Tugutkayuguunga whanga pikenghilkemneng, unataqayuguungallu piitistekaqenghilkemneng.

²³ Sanganꞌngam manika kanaghhnanighsigu bank‑amun? Uteghnillemni veghhnayaghaqa allgeghnelighluku.’

²⁴ Taagken nekevghallghiit tawani, pikii, ‘Tuguluku ellnganeng gold‑a coin‑a tuuniteggu qepghaghtemun qulaghyak coin‑elegmun.’

²⁵ Pikaat, ‘Ataneq, siingenllu qulaghyak coin‑elguuq!’

²⁶ Umiilgem pikii, ‘Ungipaatamsi, tamaghhaghmi sameng allgeghutkaq tuunegkamneng tuunataghaghyaghqaaguq. Iwernga taana allgeghutellghilnguq, talwa salgughngaan ellnganeng iqilleqiit.

²⁷ Taagken umiilek pikaq, Naaki tamaakut anguyagenka umiilgutesunghilnguut whangamnun? Tagilluki whavek tuququghteki manumni!’”

Umiilguluni Jesus Tagilghii Jerusalem‑emun

²⁸ Ungipaghaneghmeng apeghiighyami Jesus‑em sivullgaaqii Jerusalem‑emun.

²⁹ Tughaaghaqaaklu Bethphage‑enkuk Bethany‑nkuk, Mount Olives‑melnguuk, maalghuk maligsaaghtegni kayagtekakek sivullgaaqestiisqellukek.

³⁰ Pikakek, “Tazingavek nemun aglaghtek, iitghutkelluku esghaghlleqaghtek donkey‑ghaq petugngalghii; kitum alngunak igleghusiqigalkanga. Itemulluku taginnakesek.

³¹ Kitum aaptekangistek, ‘Sangan itemutestegnegu?’ Whaten kiimsighnaaghaghtek, ‘Atanghem atuqsugaa.’”

³² Taagken aghulaqlutek esghaqaak Jesus‑em apellghatun ayuqluku.

³³ Itemusimaluku donkey‑ghaq yugita aaptekagket, “Sangan donkey‑ghaq itemutestegnegu?”

³⁴ Kiimsiqiik, “Atanghem atuqsugaa.”

³⁵ Enkaam Jesus‑mun tagilluku, qaaslimeggneng tefqughvikluku donkey‑ghaq, taagken Jesus aqumestekaat qaayngakun.

³⁶ Igleghsan, yuget qaasliteng saaghquqiit tuumkaghqaakun.

³⁷ Jerusalem‑emun kaasaghtughluni, kaataqaallu ukigyaghaq tumenilnguq Mount Olives‑meng, iingunaghmeng maligsaaghtelghuteghllagi quyateghllagughtekat. Iglagtupigllutengllu usuqegkaat Kiyaghneq Jesus‑em allaaghlluwhaghtilleghllaganeng esghapakameggneng.

³⁸ Pikat, “Kiyaghneghem quyasligu Umiilek tagilghii aatghakun Atanghem! Nekeggmelleq qilagmi, usuqnaghhaleklu Kiyaghneq uusqalleghpigaghmelnguq!”

³⁹ Taagken ilangi Pharisees‑et yulghutnilnguut pikaat, “Apeghtughista, maligsaaghteten nepiighesqiki.”

⁴⁰ Jesus‑em pikii, “Ungipaatamsi, nepiighngayaqata, uyghaget akilghuughllagnayaghtut.”

Jesus‑em Qiyakegkanga Jerusalem

⁴¹ Jesus kaasaghtughluni Jerusalem‑emun, esghaghyamigu qiyakegkaa.

⁴² Pikaa, “Whaa maaten liisimakegkentuq sangutanga aklukegkan kiyaghtesqelluten nekeggmelleghmi! Iwernga maaten liigikepagningitan.

⁴³ Aghneghet kaannaqnguut anguyagpek amigiiritaghvingllaghlleqaaten uzimun. Aghuliighhnaqngwaat igleghalleq iteghmunllu aanmunllu, kangllulleqaatenllu uzimun.

⁴⁴ Naafqelleqaaten, tuququghlleqiitlu yugten mingllutegpek ilunganilnguut, talwa ataasiq uyghak nemininnanghituq. Tamaakut qamaglluteng piyaghqaagut qayughllak liigikenghilken Kiyaghneghem yuguliyaghtuqaqsaqangaten!”

Jesus Temple‑mun Pilghii

⁴⁵ Taagken Jesus iitghaqngami Temple‑mun, yuget tukfightulghiitlu akilpegalghiitlu sakritutepiglluki eslatmun aanesquqii.

⁴⁶ Ungipaatkii, “Igaqngaaq Akuzitni Igaqegkani Kiyaghneq pikaaguq, ‘Mangteghaqa yughaghviguuq yugnun’, iwernga elpesi iighaghvingllaghaghsi teglegniightenun!”

⁴⁷ Aghhutanga tamaghhaan, Jesus apeghtughikaq Temple‑mi. Chief priest‑etlu, apeghtughikayugetlu Liilightuusaneng, igleghutistengitallu yuget agghitkengngukangat naten tuqutelleghqameng.

⁴⁸ Iwernga tuqutepagningitkaat qayughllak yulghuteghllaget kanglluluku nagatngwaaghutngukangit apeghtuusii.