Luke 18 - New Testament-et Akuzipigestun

Jesus‑em Ungipaghaatkegkanga Ugingighaqlu Nanqigtistallu

¹ Taagken Jesus‑em ungipaghaatkii maligsaaghteni apeghtughnaluki quunpeng yughiisqelluki iilqayufqiita.

² Pikii, “Taawanguq neghllagmi nanqigtista alingigalnguq Kiyaghneghmeng, asistaaghaqegkangillu yuget.

³ Tamaanteftuqlunguq neghllagmi ugingighaq. Nanqigtista awen takqwaaqegkanga whaten piiqluku, ‘Nallghusaataghtinga anguyiqelghiimeng whangamnun!’

⁴ Nanqigtistem kayusiisunghiteghngaaghmigu iwernga tagtalmi sumeghtaghaqaq, ‘Qaywa alikigateghngaamkun Kiyaghneq, asistaaghaqeghngaamkillu yuget,

⁵ kayusiinnaqaqa ugingighaq qayughllak qinuyugsimanginaghnaqaanga. Kayusiinneghilkumkun qinuughhnaqaanga.’”

⁶ Taagken Atanghem nagneghutkii, “Liitivikiteggu seghleghem nanqigtistem pillgha.

⁷ Kiyaghneghem nallghusaasaghqaqii nakmikegkani yughalghiit aghneghtuumaan, unugtuumaan. Kiyaghneq sukangisigatuq kiimsighilleghminun.

⁸ Ungipaatamsi, Kiyaghneghem nallghusaatqaghsaghqaqii. Qaywaa Ighnegha Yugem uteghniqumi, nunami naalkulleqaa ugpeqillelegmeng?”

Jesus‑em Ungipaghaatkegkek Pharisee‑nkuk, Tax‑mengllu Qerngughtistenkuk.

⁹ Jesus‑em unallu ungipaghaatkegkaa yugnun sumeghmeggni pinighniluteng pilghiinun, asistaaghiiqlutengllu pilghiinun tamanganun.

¹⁰ Pikii, “Maalghuk yugek Temple‑mun yughaghyaghtuumalghiik, ataasiq Pharisee, ilanga tax‑meng qerngughtista.

¹¹ Pharisee nekevluni ellmineng yughaatkegkaq, ‘Kiyaghneq, iqamsiqayugvikamken ilangistun yuget ayuqenghitunga, wayaghniightengunghitunga, Liilightuusaneng naafqiistengunghitunga, gelgaghniightengunghitunga, talwa uutun tax‑meng qerngughtistetun ayuqenghitunga.

¹² Santilleghni maalghugegneng fast‑aaqunga, allgeghneghmallu qulaghqellgha tuunaqaqa.’

¹³ Iwernga tax‑meng qerngughtista, uyavanlluni nekevghaghmi talwa sivugtegpenani qilagmun, naqam sakimani tenglugmigumiita pikaq, ‘Kiyaghneq, seghleghqestenguunga. Nangllegyaguteqaghtinga!’”

¹⁴ Taagken Jesus‑em pikii, “Ungipaatamsi, tax‑meng qerngughtista neminun aglaqaaguq nallghusallengluni Kiyaghneghem elqughutngallghanun, nakaan Pharisee. Qayughllak kina alngunak ellmineng anglisleghhii ukavaghsaghqaaguq, enkaam kina alngunak ellmineng ukavaghlleghhii anglistellengyaghqaaguq.”

Jesus‑em Quyastekangi Taghnughhaat

¹⁵ Taagken ilangita yuget talwa taghnughhaghhateng tagitkiit Jesus‑mun saafluki quyastesqelluki. Taawanginaq maligsaaghtet esghaghyamegteki ineghtekiit angayuqiit tagitefqiita pisqelluki.

¹⁶ Iwernga Jesus‑em tagsighluki taghnughhaat, maligsaaghteni pikii, “Yeqay taghnughhaat tagilit whangamnun, aghuliightefqiita, qayughllak Ataneghpagullgha Kiyaghneghem taghnughhaghestun ayuqelghiit pikaat.

¹⁷ Ipa ungipaatamsi, kitum alngunak tuguklinghilkumigu Ataneghpagullgha Kiyaghneghem taghnughhaghtun, iteghnaanghituq.”

Aklungilnguum Yugem Aapqughaallgha

¹⁸ Ilangani pilleghmi igleghutistem Jesus aaptekaa, “Pinilghii Apeghtughista, naten sakuma allgeghhnayaghsikun kenlengilnguq unguvalleq?”

¹⁹ Jesus‑em kiimsiqaa, “Sangama pinilghiingunizinga? Kiyaghneghhiinaaguq pinilghii, kina alngunak pininghituq.

²⁰ Liisimakaten Liilightuusat, ‘Gelgaghniighpenang, Yugtaghpenang, Teglegpenang, Iqlengiqutkigpenang, Quulvaghlukek atanllu naanllu.’”

²¹ Yugem pikaa, “Anglinghhaatemneng ima qaatkengngwaanka taakut qamaglluki Liilightuusat.”

²² Jesus‑em nagasamigu pikaa, “Ataasiq paninang piyaghqaqan. Qamaglluki saghyaten akikughluki, akingi uyeggnaketen aklumalghiinun, enkaam qilagmi aklungilgullequten. Taagken tagiluten maligtinga.”

²³ Iwernga yugem nagalluku iilqeghllakaq, qayughllak aklungitepiglleghhii.

²⁴ Jesus‑em esghapagluku illqelghii pikaq, “Piyaqnapigtuq aklungilngughnun itelleghqaat Ataneghpagullgha Kiyaghneghem!

²⁵ Ipa piyaqniisaghqaaguq camel‑em suflughutelleghqaa sikuum iiyngakun, aklungilnguum yugem itelleghqaaneng Ataneghpagullgha Kiyaghneghem.”

²⁶ Tamaakut nagallghiit aaptekaat, “Kinangam yugulillengelleqa?”

²⁷ Jesus‑em kiimsiqii, “Yuget piyaghqaqenghilkangit, Kiyaghneghem piyaghqaqii.”

²⁸ Taagken Peter‑em pikaa, “Ii‑i! Unilluki neput, maligtamken.”

²⁹ Jesus‑em pikii, “Ipa ungipaatamsi, kitum alngunak uniskumigu neni, nuliini, angleguteni, angayuqagni, avaqutani apalluqluku Ataneghpagullgha Kiyaghneghem,

³⁰ whani kiyaghtaalleghmi allgeghuteghllagyaghqaaguq. Enkaamllu qilagmi kenlengilngughmeng unguvallengellequq.”

Jesus‑em Pingayiitkun Akuzitkellaataqanga Tuqulleghqani

³¹ Taagken Jesus‑em awiitutaghlluki qula maalghuk siipneqluku maligsaaghteni pikii, “Nagataghtek! Jerusalem‑emun pinaqukut. Uuknaliqistet igaqullghit Ighneghaneng Yugem ayuqelghiit qamaglluteng apeghiighnaqnguut.

³² Jerusalem‑emi Jews‑et igleghutistengita tuguluku tuunelleqaat Gentile‑enun. Enkaam legasiighwaatkelleqaat, kayngusaakelleqaat, qesiqulleqaat,

³³ kagsagmiglleqaatlu. Taagken tuqulleqaat, iwernga pingayiitangani aghneghem unguvaghllequq unguvalleghmun.”

³⁴ Iwernga maligsaaghtengita liigikepagningitkaat qayughllak sameng pillgha whateghlluwaaghunghilnguq ellngitni. Nallukegkaat sangwaa akuzitkaqutanga.

Jesus‑em Esghaasagutestekanga Ayaakaq Tungsighraghta

³⁵ Jesus kaasaghtughaquqlu Jericho‑mun, ayaakaq yuuk aqumgaftuq tumet saaghwitni, tungsighralghii.

³⁶ Yulghuteghllaget naghughqaallghiit nagasamiki, aapqughaaqaq sangwaa saaqutanga.

³⁷ Ungipaatkaat, “Jesus Nazareth‑eghmii naghughtaquq.”

³⁸ Ayaakaq yuuk akilghuukaq, “Jesus, Ighnegha David‑em! Nangllegyaguteqeghtinga!”

³⁹ Tamaakut sivullgaalghiit ineghtekaat nepiighesqelluku. Iwernga iglaghtaaghalluni akilghuukaq, “Ighnegha David‑em, nangllegyaguteqeghtinga!”

⁴⁰ Jesus‑em aghuliighluni tagitestekaa, tughaaghyatni aaptekaa,

⁴¹ “Sameng sasqelluten piiqsin?” Kiimsiqaa, “Ataneq, esghaasagusugtunga.”

⁴² Jesus‑em pikaa, “Esghaasaguten! Ugpeqilleghpek naallghutaaten.”

⁴³ Tawaninginaq esghaasagulluni maligtekaa, usuqumaan Kiyaghneq. Qamaglluteng yulghuteghllaget esghaghyamegteggu ellngitallu usuqegkaat Kiyaghneq.