Luke 17 - New Testament-et Akuzipigestun

Seghleghqelleqlu Seghevutilleqlu

¹ Jesus‑em maligsaaghteni pikii, “Seghleghqestinaqutkellghet quunpeng piyaghqaagut. Iwernga seghleghwaaghunaqnguuq taana seghleghqestinaqutkilghii yugneng.

² Taam yugem seghleghqestekagu naliit mekestaaghhaat ugpeqingalghiit whangamneng, itagnaghnayaghtuq yuget qaamqaghfikluku uyghagllagmeng uyaqghwakun miluusaqumegteggu kelliimun.

³ Enkaam kelengalusi! Seghleghqesnaqutkegpenaki yuget. “Ugpeqaalguten seghleghqegkan, aghyuughnaken. Enkaam avuteghqelluni seghleghqennaniqan, seghevunnaken.

⁴ Ataasimi aghneghmi maaghraghvinlegneng seghletun pikangaten, tagiighaataqanllu elpenun maaghraghvinlegneng whaten pimaghmi, ‘Qivghukepigtamken seghletun piighaatallemneng’, seghevutepestaaghyaghqaqan.”

Ugpeqilleq

⁵ Apostle‑et Ataneq pikaat, “Ugpeqilleghtughtaghaqaghqut!”

⁶ Atanghem pikii, “Ugpeqillelguyaqufsi mustard‑em piitutangatun angkalghiimeng, una mulberry uqfik whaten pikufsigu, ‘Akughtuumaghpek iikluten, piisaghtaa kelliikun’, qaatkennayaghiisi.”

Qepghaghtem Qepghaghyaghqaa

⁷ “Nalighsi qepghaghtelguyaqumi piitesighaghvigmi nunamun laagwaaghtemeng, nalighmeng penniighmeng aflengakikayugmeng, uteghniqan qepghaghvigmineng pinayaghsiguu, ‘Esnevaghaghlluten, neghi’?

⁸ Nakaa! Itupill whaten pilleqan, ‘Yataaghqigu neghyaghqaqa. Simightughluten kepsiiqunga neghyaghqamneng, meghyaghqamneng. Neneghmeng taaqegkuma, neghumaghpek, meghumaghpek pilghaaten.’

⁹ Umiilgem iqamsiqayugviknaanghitaa qepghaghteni qayughllak taawaraaghinaq qelellghatun piiqelghii.

¹⁰ Elpesillu tawatetusi. Apeghiighumakufsiki qamaglluki Kiyaghneghem qelghutkii, whaten pillequsi, ‘Qepghaghtenginaagukut; taawaraaghinaq qelghutkaghhiinaat piiqaput.’”

Jesus‑em Naallghuskangi Qulaghyaget Leprosy‑lget

¹¹ Jesus Jerusalem‑emun pitkelluku, igleghtekaq akulegkenkun Samaria‑nkuk Galilee‑nkuk.

¹² Nengiighhaghmun kaataquqlu, qulaghyaget yuget leprosy‑lget nallaqaat. Uyavaqaanlluteng

¹³ akilghuukat, “Jesus! Yuguniiq! Nangllegyagutaghtikut!”

¹⁴ Esghaghyamiki pikii, “Aglaghtek priest‑enun yuvghiighesqellusi.” Igleghsimaluteng naallghutkat, ukmangiitkat leprosy‑meggneng.

¹⁵ Taagken ataasim esghaghluku naallghutelleni, Jesus‑mun uteghlluni, iglagtuluni usuqegkaa Kiyaghneq.

¹⁶ Jesus‑em itegaan sivungakun sekelluni nunamun iqamsiqayugvikegkaa. Yuuk taana Samaria‑ghmiinguftuq.

¹⁷ Taagken Jesus pikaq, “Qulanguyaghtut naallghutkanka. Naaki estamaneng inglulget yuget?

¹⁸ Una nakumii, ellnginaawaa uteghlluni usuqiyaghtulghii Kiyaghneghmun?”

¹⁹ Taagken Jesus‑em pikaa, “Nekevluten ighleghten, ugpeqilleghpek naallghutestaaten.”

Kiyaghneghem Ataneghpagullghan Tagillgha

²⁰ Ilangita Pharisees‑et aaptekaat Jesus qakun Ataneghpagullgha Kiyaghneghem tagiyaghqaatanga. Kiimsiqii, “Ataneghpagullgha Kiyaghneghem taginguuq iwernga yuget esghaghyaghqaqenghitaat qayughllak nalluniighusiilnguq.

²¹ Enkaam kina alngunak whaten pinaanghituq, ‘Ii‑i, whaantuq!’ nalighmeng ‘Esgha tazigna!’ qayughllak Ataneghpagullgha Kiyaghneghem ilugpesinituq.”

²² Taagken maligsaaghteni pikii, “Ukegkuni aghneghni tagilghiini whangamnisugllagllequsi, Ighneghani Yugem, waran ataasimun aghneghmun, iwernga taana aghneq esghaghnaanghitaghsi.

²³ Yuget ungipaalleqiisi, ‘Ii‑i, esgha tazigna Ighnegha Yugem!’ nalighmeng ‘Ii‑i, whaantuq!’ Iwernga takugpenaki, maligtegpenaki.

²⁴ Katam nighugpaguutellghem nighugtellghatun qilaga inglunganeng agavek inglunganun, tawatesaghqaaguq Ighnegha Yugem uteghniqumi nunamun.

²⁵ Iwernga sivukluni, Ighnegha Yugem uglalghiimeng ikfiqepestaaghyaghqaaguq, ighsaksaghqaqaatlu maaten kiyaghlleghhiit yuget.

²⁶ Sivungani uteghnilleghqaan Ighneghan Yugem, yuget kiyaghtaallghit tawatesaghqaagut yuget kiyaghtellghistun taagani aghneghni Noah kiyaghtengnguluku.

²⁷ Yuget neghaqluteng, meghaqluteng, nengughutaqluteng, aangꞌghutiiqluteng pikaagut kenlanga Noah‑m ark‑mun itellghanun. Taagken uleveghllagem tuququqaqii qamagtengngwaaghluki.

²⁸ Yuget kiyaghtaallghit tawatesaghqaagut yuget kiyaghtellghistun taagani aghneghni Lot kiyaghtengnguluku. Yuget neghaqluteng, meghaqluteng, tukfighiiqluteng, akikiiqluteng, piitesighaghaqluteng, nekeftiiqluteng pikaagut.

²⁹ Iwernga tawani aghneghmi Lot aghulaqsan Sodom‑emeng, qilagmeng eslallugughtekaaguq keneghmengllu sulphur‑mengllu, enkaam tuququqaqii qamagtengngwaaghluki.

³⁰ “Tawani aghneghmi Ighnegha Yugem aliightekan, yuget kiyaghtaallghat almesiqsaghqaqaa yuget kiyaghtaalqesaqangistun sivunghani.

³¹ Taam aghneghani, yuuk mangtegham qaaynganilnguq ukifqaami pilghaaq mangteghami ilunganun saghyaqunaluni. Tawateghpigaq piitesighaghvigmelnguq mangteghaminun pifqaami pilghaaq.

³² Neqamikiteggu sakaatanga Lot‑em nulighha!

³³ Enkaam kitum alngunak peggneghilkumigu unguvalleni Ataneghmun, iflayaghqaqaa. Iwernga kitum alngunak pegtekumigu unguvalleni Ataneghmun, unguvallengepiigllequq.

³⁴ Ungipaatamsi, Ighnegha Yugem tagikan, tawani unugmi, maalghuk qavaallequk ataasimi qavaghvigmi. Aallgha tugulleqaa, ilanga uneglleqaa.

³⁵ Maalghuk aghnak qerngaagmek kagimtillequk grain‑meng. Aallgha tugulleqaa, ilanga uneglleqaa.

³⁶ Maalghuk yugek piitesighaghvigmellequk. Aallgha tugulleqaa, ilanga uneglleqaa.”

³⁷ Maligsaaghtet aaptekaat, “Ataneq, nani tamaakut piyaghqaagwat?” Jesus‑em kiimsiqii, “Nani alngunak kemegkwaalgukan qawaagpaget qerngughfikelleqaat.”