Luke 16 - New Testament-et Akuzipigestun

Jesus‑em Ungipaghaatkegkanga Ataasiighneghilnguq Umiilgutilghii

¹ Taagken Jesus‑em ungipaghaatkii maligsaaghteni, “Taawanguq aklungilnguq yuuk qepghaghtelguftuq, umiilgutistengllaqaa saghyaminun. Ataasimi aghneghmi kitum ungipaasimakanga aklungilnguq yuuk umiilgutistengllaqaanun sakusiiqniluki saghyangi.

² Enkaam tagsighluku pikaa, ‘Samaniluten nagaqughaqsiken? Umiilgutinanighnaquten saghyamnun. Enkaangam whangamnun tagitiki igaghten; yuvghiighnaqanka.’

³ Taana yuuk sumeghtaghaqaq, ‘Umiilegma taaqestaanga qepghaqamneng. Sanaqsingangam? Kayaatepigtunga laagmun, kaynguyugaqungallu tungsighniilleghqamneng.

⁴ Qepghaqiighuskuma paninang yugnun tuguklightesugtunga ellngitnun.’ Enkaam tawaten pikaq.

⁵ Tagsiqlighteqii ataasikaghtiita asengelget umiilegmineng. Sivuliq aaptekaa, ‘Naten angkaan asingemazigu umiilka?’

⁶ Kiimsiqaa, ‘100‑nguut aqimleghutaghllaget olives‑em mesiighaneng imalget.’ Taagken pikaa, ‘Tuguluku asengegpek igaa, aqumqaghlluten igaqigu 50’.

⁷ Taagken ilanga aaptekaa, ‘Elpek naten angkaan asingemazigu?’ Kiimsiqaa, ‘1,000 bushels‑nguut wheat‑et’ Taam yugem pikaa, ‘Tuguluku asengegpek igaa, igaqigu 800’.

⁸ Umiilgan usuqegkaa ataasiighneghilnguq qepghaghteni peghqiniqellghaneng. Ipanguuq uum nunam yugi ilameggneng akilpeganeghmeggni, tukfightuneghmeggni, peghqiniqataghaghaqut nighugmelngughneng yugneng.

⁹ Ungipaatamsi, nunamelnguq aklungisi kayusiitusiqiteggu yugnun ilakumtaangllaasiiluku elpesinun. Taagken tuqukufsi aklungisi unilleqasi, enkaam upughatellengellequsi kenlengilngughnun nekaghqanun.

¹⁰ Kina alngunak ataasiighmeskumi sayaghqasqughhaghminun, ataasiighmellequqlu sayaghqalghutminun. Kina alngunak ipapighqigalkumi sayaghqasqughhaghminun, ipapighqennaanghituqlu sayaghqalghutminun.

¹¹ Ataasiighmesimangilkufsi atuqaqngafsiki aklungit nunamelnguut, kitumngam neghyukulleqaki elpesinun aklungipiiget?

¹² Enkaam ataasiighmesimangilkufsi kinkut pingitnun, kitumngam tuunelleqisi elpesi pigpesineng?

¹³ Qepghaghtem qepghaannaanghitaak maalghuk umiilgek. Maalghugegneng umiilelgukumi ugumikelleqaa aallgha, piniqelleqaa ilanga, nalighmeng qaatkelleqaa aallgha, siivaknaanghitaa ilanga. Piniqnaanghitagsi qerngaagkenka Kiyaghneghenkuk maninkuk.”

Jesus Apeghtughilghii Ilanganengllu Salleghneng

¹⁴ Pharisees‑et maniyuneghpalluut nagasamegteggu tamaana qamaglluku, legasiighwaatkegkaat Jesus.

¹⁵ Iwernga Jesus‑em pikii, “Elpesi pinighsugningllaghaqusi yuget esghaamanghitni, iwernga Kiyaghneghem liisimakiisi ipa natetulesi ilugpesigun. Sangwaat yuget megnukegkiit satngunghitut Kiyaghneghem esghaamanghani.

¹⁶ “Kiyaghneghem yugnun tuunegkaqii Liilightuusatlu uuknaliqistetlu igaqegkiit atuqesqelluki kenlanga John‑em Paaptaayestem tagillghanun. Taam kingunganeng Pinilghiit Ungipat Ataneghpagullghaneng Kiyaghneghem ayuqelghiit ungipaqinguut. Enkaam qamaglluteng yuget qevuutepiglluteng iteghnaqutkeghllakaat.

¹⁷ Iwernga piyaqnaghataghaghtuq iqitelleghqaa ataasiq tagneqraghhaq Liilightuusaneng, qilagenkuk nunankuk aviighutelleghqagkeneng.

¹⁸ “Kitum alngunak peglluku nuliini, allaneng nulightuqumi gelghaghniighllequq. Kitumllu alngunak tugukumigu pegtekaq aghnaq gelghaghniighllequq.”

Aklungilnguqlu Yuuk Lazarus‑lu

¹⁹ Taagken Jesus‑em pikii, “Taawanguq aklungilnguq yuuk pilugugngalghii akitupiglleghhiineng aatkaneng. Aghhutanga tamaghhaan neqem akitullghinaaneng neghaqelghii siiptiighllagaqluni.

^20-21 Taawallunguq aklumalghii yuuk aatgha Lazarus. Aghhutanga tamaghhaan tagitaqegkangat aklungilnguum mangteghaanun lliiqluku eslaklighneghakun amigllagan. Kitumun neghestesupigtaqsalghii ifkaghqelleghmeng asinganilngughmeng tipelngan aklungilnguum. Uvinga alqwaaghngalghii ukiqelleghmeng enkaam qikmit tagiluteng alungraqaqegkangit.

²² Tagtalmi aklumalghii yuuk tuqukaq, enkaam yaqulget aglaatkaat Abraham‑em nayaanun. Aklungilnguqlu yuuk tuquyan lliifqaat.

²³ Hades‑mi aklungilnguq yuuk ikfiqeghllaguftuq. Quulmun esghaghyalghiimi, uyavaghpanllukek esghaqakek Abraham‑enkuk Lazarus‑enkuk saaqwliqullutek.

²⁴ Enkaam aklungilnguq yuuk akilghuukaq, ‘Ataay, Abraham, nangllegyaguteqeghtinga! Kayagtigu Lazarus, ighneghwaani nepluku meghmun uluka nenglekegsaghtuqaghligu, qayughllak kenghem ikfiqesteghllagwaanga!’

²⁵ Iwernga Abraham‑em pikaa, ‘Ighnemni, neqamikan nunami kiyaghtaaghuluten pinilghiimeng pilgukaalghiiten, Lazarus pilgumaluku seghleghmeng. Iwernga maaten itagnaghillengumaaq, elpek ikfiqeghllagumaluten.

²⁶ Taam saaghwakun, akulemnnituq aangepiglleghhii aghvighyaghllak. Enkaam ukegken kina aghvighpagningituq elpesinun, taagegken kina aghvighpagningituq whangkunnun.’

²⁷ Aklungilnguum yugem pikaa, ‘Naqam Ataay, tungsighvikaghllaken, Lazarus kayagtaghtigu atama mangteghaanun,

²⁸ qayughllak tallimaneng anglegutelguunga. Kelengasaaghyaghtughliki luuraq taginayukata whavek ikfiqfigllagmun!’

²⁹ Iwernga Abraham‑em pikaa, ‘Igaquqiit Moses‑emllu uuknaliqistetlu ellngitnitut, liitiviknakangit.’

³⁰ Aklungilnguum yugem pikaa, ‘Nakaan, ataay Abraham! Itupill kitum tuqumasliighneng takuyaqumiki, avuteghqelluteng seghleghqennanighnayaghtut.’

³¹ Iwernga Abraham‑em pikaa, ‘Liitfikumangilkumegteki igaquqiit Moses‑emllu uuknaliqistetlu, talwa ugpeghtesnaanghitii tuqumasliighem unguvaghluni ungipaaskumiki.’”