Luke 15 - New Testament-et Akuzipigestun

Jesus‑em Ungipaghaatkegkanga Iflakaq Penniiq

¹ Ataasimi aghneghmi, tax‑meng qerngughtistelghutetlu, ilangillu seghleghqestelghutet nagasaatkat Jesus‑mun.

² Pharisees‑etlu, apeghtughikayugetlu Liilightuusaneng qikeghqukat, “Uum yugem tuguklighaqii seghleghqestet, neghelgusighaqiillu.”

³ Enkaam Jesus‑em ungipaghaatkii,

⁴ “Nalighsi 100‑meng penniilguyaqumi, ataasiq iflayaqumigu, sanayaghta? Unilluki 99‑et penniini neghumaluki vegaaghtuqami, ivaghyaghtughnayaghaa iflakaq penniini kenlanga naalkelleghminun.

⁵ Naalkesamigu, quyapiglluni uyamikaa.

⁶ Ellmeggnun kaalluni tagsiqliqii ilakumtaani, uviqlinillu pikii, ‘Quyalgusiqaghtengnga, qayughllak naalkaqa penniiqa iflakaayalghii!’

⁷ Ungipaatamsi, tawateghpigaq qilagmi quyakataghaghlleqaat ataasiq seghleghqesta avuteghqelluni seghleghqennanilghii, pakiggulluku taakuneng 99‑eghyagneng pinilghiineng yugneng avuteghqesaghqaanghilngughneng.”

Jesus‑em Ungipaghaatkegkanga Iflakaq Coin‑a

⁸ Taagken Jesus‑em ilanganeng ungipaghaatkii, “Aghnaq qulaghyak silver‑meng coin‑elguyaqumi, ataasiq iflayaqumigu, sanayaghta? Kenelghutak kumaghllukek mangteghani allegnayaghaa ivaghingwaaghumaghmi kenlanga naalkelleghminun.

⁹ Naalkesamigu tagsiqliqii ilakumtaani, uviqlinillu pikii, ‘Quyalgusiqaghtengnga, qayughllak naalkaqa coin‑eka iflakaqsaqegka!’

¹⁰ Ungipaatamsi, tawateghpigaq Kiyaghneghem yaqulgi quyaaqut ataasiq seghleghqesta avuteghqelluni seghleghqennanilghii.”

Jesus‑em Ungipaghaatkegkanga Ighneghem Sakusiiqillgha Unguvalleghmineng

¹¹ Taagken Jesus‑em ilanganeng ungipaghaatkii, “Taawanguq yuuk maalghugegneng ighnelek.

¹² Uyuqliim ighneghan pikaa atani, ‘Ataay, saghyagpeneng tuuninga nengighqamneng.’ Enkaam atangan tuunegkakek ighneghegni nengighqagkeneng.

¹³ Mulunghituq, uyuqliim ighneghan akikughluki nengini aghulaqegkaq uyavanlengughmun nunamun. Tamaani manini sakusiiqluku,

¹⁴ saqraggiighutkaq. Enraqlu tamaana nuna neqangisagllagughtekaq enkaam nuughteghllagughtekaq.

¹⁵ Enkaam qepghaghyaqaq yugmun tamaanlengughmun; taagken yugem qepghaqalitkaa neghqistenguluku kurugaghneng.

¹⁶ Iyatam angtalanganeng kurugaat neghqutkiitneng neghyaghngaaghmi lliiqaq, kitumllu alngunak neghyaghqalisigalkanga.

¹⁷ Qenwatlu liisaaghaqaq, ‘Paneghniqumalunga maani, qamaglluteng atama akileghtughluteng qepghaghtengi neghaqut kepsuulluteng, masisu siiptiigaqut!

¹⁸ Aglaghnaqunga atamnun whaten pinaluku, Ataay, seghleghqumaanga Kiyaghneghmunllu, elpenunllu.

¹⁹ Ighneghulungangam piyaghqaananighnga. Akileghtuqayugestun qepghaghtegpetun lliightestinga.’

²⁰ Enkaam nekevluni ataminun aglaqaq. Iwernga salin uyavanlluku atangan esghaqaa. Nangllegyaguteghllagluku aqfaasnaq payeghluku qetqaghlluku naaqaa.

²¹ Ighneghan pikaa, ‘Ataay, seghleghqumaanga Kiyaghneghmunllu elpenunllu. Ighneghulungangam piyaghqaananighnga.’

²² Iwernga atangan pikii qepghaghteni, ‘Uuhuk, pinilleghpigaak atkuyaaghek tagillukek aatestekek, alangqughiitighteggullu, kamegteggullu.

²³ Enkaam quwintallghaneng kaawaghaam tuqutiighuteggu. Neqenghaghqeghllagnaqukut quyaghllagem angtalanganeng,

²⁴ qayughllak ighneqa una tuqukaayalghii, unguvaamaaq; iflakaayalghii naalkumaaq.’ Enkaam neqenghaghqeghllakat.

²⁵ “Tawani pilleghmi, nuyekliq ighnegha piitesighaghvigmelnguq. Mangteghamun kaasaghtughluni nagaquqii aynganangalghiitlu tukalegalghiitlu.

²⁶ Ataasiq qepghagata tuqlughluku aaptekaa saaqutangi.

²⁷ Qepghaghtem pikaa, ‘Uyughaan kaasimaaq. Atagpek tuqutiighutesimaa quwintallghaneng kaawaghaam, qayughllak kaallghii yaywaaseng pinighluni.’

²⁸ Anengaa sakritkaq, iteghyugumangitkaqlu. Atangan aanvikluku iitghesqughaaqaa.

²⁹ Iwernga atani pikaa, ‘Ayumiqullelghutni qepghaateghllagamken, qaatkenghisigatanka qelghutkaghten. Tawalliima goat‑aaghaghmeng tuqutiighusigataghpenga ilakumtaaqullghiini neqenghaghqesqelluta.

³⁰ Iwernga uum ighneghpek sakusiiqegkaqaa manin aghnanun yugusimeggneng akikikayugneng. Enkaam uteghnighyan whaa elpek tuqutiighutestan quwintallghaneng kaawaghaam!’

³¹ Atangan pikaa, ‘Ighnemni, quunpeng elpek whangkunnitaquten. Qamaglluki saghyanka elpek pikaten.

³² Iwernga quyaluta neqenghaghqengnguukut, qayughllak una uyughaan tuqukaayalghii, unguvaamaaq; iflakaayalghii naalkumaaq.’”