Luke 14 - New Testament-et Akuzipigestun

Jesus‑em Naallghuskanga Qinuyulghii Yuuk

¹ Ataasimi Sabbath‑mi, Jesus neghyaghtughyan ataasimun igleghutistengitnun Pharisees‑et, tawanlenguut yuget riirngingwaaqaat.

² Jesus‑em manunganiteftuq yuuk, ighukeklu, tallikekllu puuvngalghiik.

³ Jesus‑em aleghquqii apeghtughikayuget Liilightuusaneng, Pharisees‑etlu, aaptekii, “Liilightuusamtaa naallghutisqinkuut Sabbath‑mi, nalighmeng pisnanightinkuut?”

⁴ Iwernga nepiighwaaghutkat. Taagken saafluku yuuk naallghulluku, aglaghtestekaa.

⁵ Taagken aaptekii, “Nalighsi ighnelgukumi, nalighmeng ox‑elgukumi, Sabbath‑mi meghtaghvigmun ifkaqan, tawaninginaq sayugnayaghtaguu Sabbath‑ngughngaan?”

⁶ Taawa kiimsighpagningitkaat.

Jesus‑em Apeghtuusaqegkanga Qusevegngalleq

⁷ Jesus‑em esghaqii ilangi aqellqat aqumuullghiit aangwaaghet aqumutiitgun. Enkaam ungipaghaatkii,

⁸ “Tagsiqlillengegkuvek nengughhnaqelghiik neqenghaghqellghegkenun, aqumefqaavek pilghaaten aangwaaghet aqumutiitgun, kina tagsiqliqaanayukan aangwaaghataghalghii elpeneng.

⁹ Tagsiqlighikam elpetegneng tagiluni whaten pilleqaaten, ‘Aqumestigu taana aqumvigpegun.’ Elngaatall tawani kaynguyugllequten nuugtekuvek ukavanlenguum aqumutagkenun.

¹⁰ Iwernga tagsiqliqangaten, aqumyaghtughhaaten aqumutam ukavantellghanun. Tagsiqlightegpek tagiluni pilleqaaten, ‘Ilakumtaamni, aqumyaghtaa aangwaaghughtekat aqumutiitnun.’ Elngaatall quulvallengellequten aqelqalghutet esghaamanghitni.

¹¹ Tamaghhaghmeng ellmeggneng aangwaaghughtekat qusevegtellengyaghqaagut, iwernga tamaghhaghmeng ellmeggneng quseveglleghhiit, taawa aangwaaghughtellengyaghqaagut.”

¹² Taagken Jesus‑em tagsiqlighteni pikaa, “Neghyaghtiisqikuvek tagsiqlifqiita ilakumtaaghten, angleguteten, ilakwaaghten, nalighmeng aklungilnguut uvilighneghten, qayughllak uteghmun ellngitallu ellmeggnun neghyaghtiisqennayukangaten. Tawaten pikufki akitkallghuughlleqaaten.

¹³ Iwernga neqenghaghqestinaqngukuvek, tagsiqlighnaketen aklumalghiit, yugusiit nalighneghllugmelnguut, ighullugmelnguut, ayaakatlu.

¹⁴ Enkaam quyastellengellequten qayughllak tamaakut akitepagningitaaten. Kiyaghneghem akileghtughlleqaaten unguvaghtekumiki qaatkutngalghiit yuget.”

Jesus‑em Ungipaghaatkegkanga Neqenghaghqelleghllak

¹⁵ Tipelegni ataasim aqumgalghiim nagalluku Jesus pikaa, “Quyastekaagut neghyaghtughyaghqat neqenghaghqellghanun Ataneghpagullghan Kiyaghneghem!”

¹⁶ Iwernga Jesus‑em pikaa, “Yuuk neqenghaghqinaqumalghii, uglaqlu tagsiqliqaa.

¹⁷ Neqet apeghiighyata, qepghaghteni kayagtekaa whaten piyaghtiisqelluki tagsiqliqani, ‘Tagilaghaatek, neghyaqleggiinaaghtukut!’

¹⁸ Iwernga qamaglluteng tagsiqliqii apghusiighutkat. Sivuliim qepghaghta pikaa, ‘Piitesighaghvingumaanga, esghaghyaghtupestaaghnaqngwaaqa. Umiilgen ungipaataghnaken, qivghukaqanguq neghyaghtughpagningilnguunga!’

¹⁹ Tuunglighhaan pikaa, ‘Tallimat inglukullghiit ox‑et tukfiimaanka, nanghiiquyaghtughnaqaqanka qepghallegtulngit. Umiilgen ungipaataghhnaken, qivghukaqanguq neghyaghtughpagningilnguunga.’

²⁰ Enkaam ilangan pikaa, ‘Nulightunghhaagunga, enkaam neghyaghtughpagningitunga.’

²¹ Qepghaghtem tagiluni umiilegminun aapqii sameng pillghit. Taagken umiilgem sakriteghllagumaghmi qepghaghteni pikaa, ‘Aanqaghlluten neghllagem tuumngitneng tagiquutiki aklumalghiit, yugusiit nalighneghllugmelnguut, ayaakat, ighullugmelnguut.’

²² Mulugpenani qepghaghtem pikaa, ‘Yuguniiq, qelelleghpetun apeghiightuq, iwernga paninang nekaghqaghllaguuq.’

²³ Umiilgem pikaa, ‘Aanluten neghllagmeng tumenilnguut yuget tagilaghaatesqiki enkaam mangteghaqa esleqaghaghlli.

²⁴ Ungipaatamsi, tamaakut tagsiqliqaqsaqenka neghnaanghitut neqenghaghqusimneng.’”

Maligsaaghtengulleq

²⁵ Yulghuteghllaget maliglleghaatkaat Jesus. Qiivluki pikii,

²⁶ “Kina alngunak tagilghii whangamnun maligsaaghteknaanghitaqa wetkuqun piniqataghaquminga pakiggullunga atamineng, naamineng, nuliighmineng, avaqutamineng, anglegutmineng, nayagmineng, ellminengllu katam.

²⁷ Kitum alngunak ellmi katam qaquurani uyaminghilkumigullu maligtekumingallu, maligsaaghtekepagningitaqa.”

²⁸ Taagken Jesus‑em pikii, “Nalighsi tower‑engllaghyugukumi, sivukluni aqumluni akitulanga naraqelleqaa naamayaghqaanayukan manini.

²⁹ Naraqenghilkumigu manini, tunemangllaghluku tower‑a peglleqaa. Enkaam yuget esghaghluku nenglaghyugsaatkelleqaat.

³⁰ Pillequt, ‘Uum yugem piinlighluku nekeftekani taaqepagningitaa.’”

³¹ Taagken Jesus‑em aaptekii, “Sanayaghtatuq umiilek ilangan umiilgem sughugnaqngukangatni? Sivukluni aqumaghlluni akuzimghhutkennayaghaa ilaminun kayaalqiiyaghqaanayukami 10,000‑meng pilluwaghtelighluni, pilluwaghyaghyaqumigu umiilek 20,000‑meng pilluwaghtelek.

³² Iwernga kayaalqiipagningilkumi, taagken umiilek salin uyavanteghllagluku kayaglleqii akuzistekaghqani ellnganun. Whaten piyaghtiisqelleqaa, ‘Sasqesugsikut nekeggmetunnaluta?’”

³³ Jesus‑em nagneghutkii, “Enkaam una sumegtaghaatkiteggu, kitum alngunak pegsunghilkumiki qamaglluki ellmi pini, maligsaaghtekepagningitaqa.”

Sasiinghilnguq Taghyuq

³⁴ Jesus‑em taaqniqii, “Taghyuq pinightuq, iwernga taghyughningiiskumi allamengllu taghyughnighunnaanghituq.

³⁵ Taawa pinighnaanghituq sunamun, nalighmeng piinnaasiiluni piitesighaghvigmun, enkaam yuget eglleqaat. Nagatek, sigutelguusi!”